Kisalu ya kutunga Betele ya yimpa kena kusalama na Lubumbashi, na République démocratique du Congo, yau nde kekuma biro ya ntete ya filiale. Bampangi 260 ya Betele kebanda kukuenda na Betele yango ya yimpa na ngonda ya Mai 2022, kasi bampangi 131 ya Betele kebikana na Betele ya Kinshasa. a Kisalu yankaka ya kutunga bayinzo mpe biro ya filiale bandaka deja kusalama penepene ya Betele yina kele na Kinshasa. Bampangi 48 ya Betele kebanda kuleka mpe kusala na bayinzo yango ya yimpa na manima ya ngonda ya Janvier 2024. Bayinzo yango nionso zole ya yimpa kesadisa samu bisalu ya teokrasi kuenda na ntuala na Congo.

Na mvula ya kisalu ya 2021, bampangi na beto ya République démocratique du Congo longukaka Biblia na bantu kuluta 250 000. Bantu kuluta milion mosi kutakanaka na Mbambukulu ya lufua ya Klisto. Bubu yayi bampangi ya dibuta ya Betele kele 394 na filiale ya Kinshasa.

Lokola dikoki vuandaka ve ya kukumisa bayinzo ya Betele ya Kinshasa nene, bampangi kuendaka sosa kisika yankaka na bambanza yankaka. Bamonaka kisika mosi ya mbote na Lubumbashi samu na kutunga bayinzo ya yimpa ya filiale mpe bayinzo mingi yankaka yina beto lenda vuanda na mfunu na yau na bilumbu kena kuiza.

Betele ya Lubumbashi kele na bakilometre 2 300 kukatuka na Kinshasa. Lupangu ya Betele ya Lubumbashi kele baektare 12 mpe yakevuanda na bayinzo ya kuvuanda, babiro, entrepôt, kisika mosi samu na kusadila bisalu ya mutindu na mutindu buela diaka kisika samu na kudia, mpe bisika samu na kusala bansaka.

Beto bandaka bisalu ya kutunga Betele yango na Novembre 2020 kasi maladi ya coronavirus natinaka beto bampasi mingi na bisalu yango.

Mpangi Robert Elongo ya komite ya filiale ya Congo Kinshasa metuba ti: “Bakangaka bafrontiere ya babuala. Yasalaka ti yavuanda mpasi samu na kunata bima ya kutungila kuna, mpe yasalaka ti kitini ya ebandeli ya bisalu yina beto vuandaka sala baka ntangu mingi samu na kumanisa.”

Atako plina mpangi Elongo mebuela: “Kaka na mvula mosi ya mpamba, 40% ya kitini ya ebandeli ya bisalu yango mesalama.”

Yakele puelele ti Yehova kena kusakumuna bisalu yango. Beto beto kena kusambila samu bima yango ya Klisto pesa kimbangi na bantu mpe yakumisa nkumbu ya Yehova Nzambi.—Matayo 24:14.