8 JUIN 2022
RUSSIE

Babakaka lusadusu na bampangi na bau Baklisto

KUWA NA

Ntama mingi ve tribinale ya Vologodskiy ya kizunga ya Vologda kebaka nzengolo samu na nsambusulu ya mpangi Yuriy Baranov mpe Nikolay Stepanov. Prokirere tuba ntete ve kitumbu yina bakepesa bau.

Badati ya mambu kuminaka bau

Kilumbu ya 19 décembre 2019

Basoda kotaka na kingolo na bayinzo ya mabuta 6 ya Bambangi ya Yehova na Vologda. Bakangaka mpangi Yuriy mpe mpangi Nikolay mpe batulaka bau na kasho samu na mua ntangu
Kilumbu ya 20 décembre 2019

Babikaka mpangi Yuriy mpe batulaka yandi na yinzo yina bakesungaka bantu
Kilumbu ya 23 décembre 2019

Batulaka mpangi Nikolay na buloko samu na mua ntangu
Kilumbu ya 16 mars 2020

Bapesaka mpangi Yuriy kimpuanza kasi bapekisaka yandi kusolola na bantu yankaka yina kele diaka na diambu yina bafundilaka yandi buela diaka kusadila telefone mpe Internet
Kilumbu ya 19 mai 2020

Bakatulaka bipekiseli yina batulaka samu na mpangi Yuriy
Kilumbu ya 13 août 2020

Babimisaka mpangi Nikolay na buloko mpe batulaka yandi na yinzo yina bakesungaka bantu
Kilumbu 25 septembre 2022

Bapesaka mpangi Nikolay kimpuanza
Kilumbu ya 7 mars 2022

Tribinale bandaka kusambisa bau

Mambu metadila bau

Yuriy Baranov

Kubutuka: 1952 (na Vologda, na kizunga ya Vologda)

Disolo ya luzingu: Yandi vuandaka sala kisalu ya kusude. Bubu yayi yandi mebakaka pansion, mpe yandi kena kutanina mama na yandi ya bamvula 90 yina kele na kieta

Yandi kuelaka Nadezhda na 1990

Na manima ya kusosa bamvutu na biuvu ya nene yina metadila luzingu, babandaka kulonguka Biblia na Bambangi ya Yehova. Yandi bakaka mbotama na 1994

Mambu yina yandi metuba

Yinki bampova ya lukindusu nge bakaka yina sadisaka nge nge kanga ntima?

Bampangi ya babakala mpe ya banketo vuandaka tindila munu bakarte mpe bavuandaka bokila munu mbala na mbala. Munu kena kubambuka diaka na bampova yina mpangi mosi ya bakala tubilaka munu: “Mambu yango nionso yavuandaka na ebandeli; mpe yakevuanda na nsuka na yau.” . . . Yavuandaka diaka na soda mosi yina kesungaka na kasho yango, yandi tubilaka munu: “Mambu nionso keluta mbote.” Samu na munu, bampova yango nionso kele mitindu yina Tata na munu ya dizulu vuandaka sadila samu na kukindisa munu. . . . Mambu yayi nionso kena kubambula munu ti Yehova kele Tata ya nzola yina ketaninaka.

Nikolay Stepanov

Kubutuka: 1974 (na Vologda)

Disolo ya luzingu: Yandi salaka kisalu ya kisoda tekila yandi kuma Mbangi ya Yehova. Yandi kesalaka bisalu yina kesalamaka na nsuka na manima ya kutunga yinzo

Yandi vuandaka ndima ve ti Nzambi kele. Fianse na yandi, Alla, bandaka kulonguka Biblia kintuadi na mama na yandi na 1995. Alla sadisaka yandi yandi ndima ti Nzambi kele. Bau zole bakaka mbotama na 1996 mpe bakuelanaka na 1997. Bakele na muana mosi ya bakala

Mambu yina yandi metuba

Yinki mutindu bampangi na nge Baklisto sadisaka nge samu nge kanga ntima na ntangu yayi ya mpasi?

Na mosi ya bansambusulu na munu, yavuandaka mpenza lukindusu kumona bampangi mingi mutindu bafulukaka na tribinale—bavuandaka kana 50!

Bampangi ya babakala mpe ya banketo ketindilaka munu diaka bakarte . . . , mpe bakesambilaka samu na munu. Mpangi mosi ya nketo sonikinaka munu diambu mosi yina simbaka mpenza ntima na munu: “Mpangi na munu ya nzola! Tatamana kuvuanda na kibakala mpe ngui. Yehova kevuanda ntangu nionso pembeni na nge. Beto, bankundi na nge, beto kesala bisambu ya ngolo samu na nge, mpe na makanisi na beto beto kevuanda pembeni na nge. Kukatuka na dizulu, Tata na beto ketala nge mpe yandi kevuanda na kiese samu na kukuikama na nge, yandi kesepelaka na nge.”

Yakele mpenza lukindusu kumona mutindu bampangi kena kutatamana kumonisa kiminu atako mikakatano.—1 Batesalonika 3:7.

NEWS RELEASES