20 JANVIER 2022
RUSSIE

Bambangi ya Yehova ya mbanza ya Karpinsk kena kutanina kiminu na bau ngolo na kutudilaka Yehova ntima

KUWA NA

Tribinale ya mbanza ya Karpinsk na kizunga ya Sverdlovsk kemonisa nzengolo na yau na bilumbu kena kuiza samu na diambu ya mpangi Darya Dulova, Venera Dulova, Aleksandr Prianikov mpe nketo na yandi, mpangi Anastasiya Prianikova, mpe mpangi Svetlana Zalyaeva. Prokirere tuba ntete ve kitumbu yina bafueti baka

Badati ya mambu kuminaka bau

Kilumbu ya 27 Janvier 2020

Bamepesa mpangi Aleksandr, Darya, mpe Venera kitumbu samu na mbala ya ntete
Février 2020

Bamebanda diaka samu na mbala ya zole kusosa mambu ya kusambisila mpangi Aleksandr, Darya, mpe Venera
Kilumbu ya 30 Mars 2020

Bamfumu ya Leta mekotila bampangi yango samu na kusosasosa mpe bakangaka baapareyi na bau
Kilumbu ya 19 Mai 2020

Bamebuela diambu ya Anastasiya mpe ya Svetlana na mambu yina bafueti sambisa. Bamezabisa bau zole babika katuka na mbanza yango
Kilumbu ya 29 Avril 2021

Bamebanda kusambisa bau

Mambu metadila bau

Darya Dulova

Kubutuka: 2000 (na Karpinsk, na Kizunga ya Sverdlovsk)

Disolo ya luzingu: Muana ya nsuka na kati ya bana tatu. Yandi kesepelaka na mambu mingi, kati na yau art mpe sport

Ntangu yandi vuandaka mpenza ntuenia, yandi kamuaka kumona ti yavuandaka na bantu yina ketuadisaka luzingu na bau na kulandaka bansikudukusu ya Biblia. Yandi bakaka mbotama na 2016

Mambu yina yandi metuba

Yinki mutindu nguizani na nge na Yehova kulaka na ntangu yayi ya mpasi?

Mambu ya mpasi yina munu vuandaka kutana na yau, salaka ti Yehova kuma mpenza muntu ya kedika samu na munu. . . . Ntangu munu kemonaka mutindu Yehova kena kusadisa munu ata na mambu ya fioti, munu kekumaka diaka na kibakala samu munu mezaba ti Yehova kesundola munu ve ata fioti. . . . Baroma 8:38, 39 kele kikapu yina kepesaka munu kibakala mingi.

Venera Dulova

Kubutuka: 1968 (na Karpinsk, na Kizunga ya Sverdlovsk)

Disolo ya luzingu: Yandi yundukaka na maboko ya mama mpe nkaka na yandi. Yandi kesepelaka kutunga bilele ya basinga, kutanga, mpe kulonguka. Mama mpe nkaka na yandi kufuaka tekila yandi kuma na bamvula 17. Yandi kuelaka na 1990. Yandi kele na bana tatu

Yandi vuandaka kukiyuvusa samu na yinki beto kekufuaka mpe luzingu ya bana na yandi kevuanda yinki mutindu na bilumbu kena kuiza. Yandi bandaka kulonguka na Bambangi ya Yehova ntangu yandi vuandaka na bamvula 28. Yandi bakaka mbotama na 1998

Mambu yina yandi metuba

Na yinki mitindu nge monaka lusadusu ya Yehova na ntangu yayi?

Bampangi ya dibuta yina vuandaka telemina munu mpe bakala na munu na ebandeli, bubu yayi bakena kukitungisa samu na beto. Bakala na munu kepesaka munu felisitasion mpe yandi kekindisaka munu munu lemba ve. . . . Yehova kena kusadisa beto diaka na nzila ya balukindusu ya bampangi ya banketo mpe ya babakala.

Ntangu bavuandaka sosasosa samu na mbala ya ntete mambu yina kebuisa munu, diambu ya ntete yina kuizaka na makanisi na munu vuandaka: ‘Tribinale kena kusosa munu na diambu, yalenda salama ve! Yakele ndozi!’ Kasi nkundi mosi tubilaka munu munu tuba nde, ‘Munu kenunga—lokola Yesu.’

Aleksandr Prianikov

Kubutuka: 1987 (na Udinsk, na Terituare ya Khabarovsk)

Disolo ya luzingu: Yandi kezolaka miziki. Yandi kesadilaka kisadulu ya miziki yina bakebokidilaka accordéon. Yandi vuandaka sala lokola électricien na izini mosi. Bubu yayi yandi kesalaka badesen

Yandi vuandaka ndima ntangu nionso ti Nzambi kele. Kivuvu ya Nzambi yina metuba ti bantu kekufua diaka ve simbaka ntima na yandi. Yandi bakaka mbotama na 2004. Yandi kuelaka nketo na yandi Anastasiya na 2011

Mambu yina yandi metuba

Na yinki mitindu bampangi kindisaka nge na ntangu yayi ya mpasi?

Mpangi mosi ya bakala kanisaka kintuadi na beto Nkunga 139:1. Yandi tubaka ti “Yehova kezolaka beno mingi mpe yandi mezaba mambu nionso yina beno kena kukanisa, mambu nionso yina beno kena kukimona, mambu nionso yina beno kena kutuba, mpe mambu nionso yina beno kena kusala. . . . Ntinu Davidi zabaka ti Yehova ketudilaka mosimosi na beto dikebi. . . . Yandi ketulaka dikebi na mambu nionso yina beto kena kukutana na yau na luzingu yina kena kusala ti beto vuanda mutindu beto kele. Beto fueti tuba ve ti beto kele kaka beto mosi.” Bampova yango simbaka mpenza ntima na munu. Konso kilumbu munu kemonaka ti Yehova kele pene na munu.

Anastasiya Prianikova

Kubutuka: 1987 (na Karpinsk, na Kizunga ya Sverdlovsk)

Disolo ya luzingu: Yandi mpe mpangi na yandi ya bakala bayundukaka na mama na bau. Yandi kesepelaka kuyimbila mpe kutunga bilele

Yandi kezolaka nsilulu ya Biblia ya kutula kiyenge na bilumbu kena kuiza. Yandi monaka ti Biblia kele na malongi ya kitoko mpe yakele na nduenga mingi. Yandi bakaka mbotama na 2002. Yandi kuelanaka na Aleksandr na 2011

Mambu yina yandi metuba

Yinki mutindu nguizani na nge na Yehova kulaka na ntangu yayi ya mpasi?

Bamvula tatu zola koka banda bakesambisaka beto, kasi kiminu na munu mekuma diaka ngolo. Mekuma kutudila diaka Yehova ntima ya ngolo. Mezaba ti Yehova mezaba mambu nionso. Na ntangu yankaka kana yamemonana ti beto kekoka ve kukanga ntima na bampasi, yandi kesadisaka beto samu beto kanga ntima. Munu mebakusa diaka ti kana bampasi kele mingi, munu kekumaka diaka na nsatu ya kusala diambu samu na Yehova.

Svetlana Zalyaeva

Kubutuka: 1975 (na Volchansk, na Kizunga ya Sverdlovsk)

Disolo ya luzingu: Mosi na kati ya bana tatu. Yandi vuandaka ntuenia mpenza ntangu mama na bau kufuaka. Ntangu yandi vuandaka ntuenia yandi vuandaka sepela kusala bansaka ya hockey mpe volley. Yandi vuandaka sala na kompani mosi ya mine. Yandi mebakaka pansion. Bakuelanaka na Ruslan na 2003. Bakele na bana yiya

Na manima ya kundima ti Biblia ketubaka kedika, yandi bandaka kusepela kuvuanda na luzingu yina kele na nguizani na bansikudukusu ya Biblia. Yandi bakaka mbotama na 2016

Mambu yina yandi metuba

Yinki mutindu Yehova kena kusadisa nge samu nge tanina kibakala mpe kiese na nge?

Munu kele na ntembe ve ti kana beto kena kutudila Yehova ntima, beto mevuanda niee, bakala na munu, bana na beto, mpe munu beto kevuanda na dikoki ya kukanga ntima na konso diambu ya mpasi!

Atako bampangi na beto ya Russie kena kutatamana kuniokuama, yakena kukumisa kiminu na beto ngolo kumona ti Yehova kena kutudila bau dikebi mpe yandi kena kusadisa bau. Kiminu na bau yina memekama kena kupesa nkumbu ya Yehova ‘lokumu mpe nkembo.’—1 Piere 1:7.

NEWS RELEASES