20 JANVIER 2022
RUSSIE

Bampangi 7 ya babakala ya buala Russie kena kubaka ngolo na nzila ya Mvangi na bau

KUWA NA

Tribinale ya kizunga ya Petchora, na République des Komis kemonisa nzengolo na yau na bilumbu kena kuiza na diambu ya mpangi Nikolay Anufriyev, Eduard Merinkov, Gennadiy Polyakevich, Aleksandr Prilepskiy, Viktor Shchannikov, Gennadiy Skutelets, mpe mpangi Aleksandr Vorontsov. Prokirere tuba ntete ve kitumbu yina bakebaka.

Badati ya mambu kuminaka bau

Kilumbu ya 28 Janvier 2020

Bamfumu ya buala République des Komis kotaka na kingolo samu na kusosasosa na bayinzo ya mabuta 12 ya Bambangi ya Yehova. Nsambusulu samu na mpangi Polyakevich mpe mpangi Skutelets bandaka
Kilumbu ya 30 Janvier 2020

Batulaka mpangi Gennadiy Polyakevich na buloko samu na mua ntangu, mpe batulaka mpangi Gennadiy Skutelets na kisika yina bakena kusunga yandi
Kilumbu ya 20-25 Mai 2020

Bapolisi mebanda kuyuvusa biuvu mingimingi na bampangi yankaka ya kizunga ya Petchora samu na kusosa kubaka kimbangi samu na diambu yango. Lokola mosi ya bapolisi tungisaka mpenza mpangi mosi na makanisi, mpangi yango salaka AVC. Bubu yayi mavimpi na yandi kele mbote
Kilumbu ya 26 Juin 2020

Bamebuela diaka bilumbu yina mpangi Gennadiy Polyakevich fueti sala na buloko samu na mua ntangu. Zuzi metuba ti mpangi Gennadiy mefundama ti “yandi mesala diambu ya yimbi kuluta,” buela diaka kutuba ti “kutatamana kusadila Yehova kele na mfunu ata kana bamfumu kena kuniokola yandi”
Kilumbu ya 24 Août 2020

Bamfumu mekuenda kota samu na kusosasosa na bayinzo ya mabuta 12 ya Bambangi ya Yehova yankaka
Kilumbu ya 10 Novembre 2020

Bamebanda kusambisa mpangi Aleksandr Prilepskiy, Aleksandr Vorontsov, Eduard, Nikolay, mpe mpangi Viktor. Bamekangikisa diambu yango na yina ya mpangi Gennadiy Polyakevich mpe ya mpangi Gennadiy Skutelets
Kilumbu ya 25 Novembre 2020

Na manima ya kulutisa bilumbu 300 na buloko samu na mua ntangu, bamebimisa mpangi Gennadiy Polyakevich mpe bametula yandi kisika yina bakebanda kusunga yandi
Kilumbu ya 27 Janvier 2021

Na manima ya kulutisa bilumbu 363 na buloko, bamebimisa mpangi Gennadiy Skutelets

Mambu metadila bau

Eduard Merinkov

Kubutuka: 1975 (na Pechora)

Disolo ya luzingu: Banda bumuana, yandi kesepelaka kusala bansaka na kisika ya bantu mingi, na kifuani kunata masuwa na Nzadi ya Pechora. Yandi kesalaka na kompani mosi yina kesalaka banzila ya train. Yandi bakaka mbotama na 1993. Yandi kuelaka nketo na yandi, Valentina, na 1997. Bakele na muana mosi ya nketo, Iolanta

Mambu yina yandi metuba

Yinki kele mambu ya kimpeve nge kesalaka mbala na mbala, mpe yinki mutindu yakena kusadisa nge nge nunga?

Diambu yina munu kesepelaka kusala . . . kele kulunda na yintu mpe kuyimbila miyimbu yankaka yina kele na [TV JW]. Yakesadisaka munu munu mona lusadusu ya Yehova. Munu keyimbilaka miyimbu yango konso kisika—na yinzo, na ntomabilu, ata kana munu kele na kisalu! Munu kezolaka diaka Nkunga 27 mpe munu ketangaka yau mbala na mbala.

Yinki kesadisaka nge nge bika ve?

Kuzaba ti Mvangi ya Nene ya luyalanganu zola ti munu vuanda nkundi na yandi kepesaka munu kiese mingi. Yavuanda yinki mpasi lenda kumina munu, munu kele na nsatu ya kusadila Yehova samu na mvimbamvimba. Munu kele na nzengolo ya kubikana ya kukuikama na Yehova tii na nsuka!

Aleksandr Prilepskiy

Kubutuka: 1964 (na Pechora)

Disolo ya luzingu: Yandi vuandaka sepela kusaka bansaka ya tennis na bumuana na yandi. Yandi kebulaka gitare. Yandi bakaka mbotama na 1994. Yandi kuelaka nketo na yandi, Vera, na 1990. Bakele na muana mosi ya nketo mpe bantekolo zole ya babakala

Mambu yina yandi metuba

Yinki kesadisaka nge nge kanga ntima?

Nzola na munu samu na Yehova mpe kivuvu na munu samu na bilumbu kena kuiza kesadisaka munu munu tatamana kukanga ntima mpe munu tatamana kusadila Yehova. Kutala nsemono ya Tata na beto ya dizulu kepesaka munu diaka ngolo.

Yinki dilongi nge kepesa na bantu yankaka yina kena kukibongisa samu na mikakatano yina kena kuiza?

Munu ketuba na bampangi na munu ti batatamana kusadila mbote madia ya kimpeve yina beto kebakaka. Kusala mutindu yina kesadisa bau batatamana kukenga mpe kuzola Nzambi mpe bikadulu na yandi ya kitoko. Yakesadisa bau diaka bamonasana nzola, bavuanda na mbakusulu na kati na bau, mpe banlemvukilanaka.

Viktor Shchannikov

Kubutuka: 1961 (na Beryozovka)

Disolo ya luzingu: Yandi vuandaka zola kusala badesen mpe kusala biteke na bumuana na yandi. Kulonguka bansikudukusu ya Biblia sadisaka yandi yandi nunga kikadulu ya kunua malavu mingi. Yandi bakaka mbotama na 1990. Yandi kuelaka nketo na yandi, Viktoria, na 2003. Bakele na muana mosi ya bakala ya bamvula 15

Mambu yina yandi metuba

Yinki nge salaka samu na kutanina nguizani ya dibuta na nge mpe nguizani na Yehova?

Beto kudisaka kikadulu ya kutudila Yehova ntima, mpe bisambu na beto kumaka diaka ya puelele. Beto kelutisaka ntangu mingi kintuadi, yau salaka ti beto kuma diaka na nguizani ya ngolo. Munu kesalaka ngolo samu na kulonguka bikadulu ya Yehova, mpe munu kesosaka kusadila mambu yina munu kelongukaka na dibuta na munu. Diaka, lusadusu yina nketo na munu kepesaka munu salaka ti munu baka yandi diaka na valere mingi.

Gennadiy Skutelets

Kubutuka: 1976 (na Pechora)

Disolo ya luzingu: Yandi vuandaka sepela kusala sport ntangu yandi vuandaka muana fioti. Yandi kesalaka kisalu ya kusukula bayinzo. Yandi kamuaka mutindu bambikudulu ya Biblia kena kukokisama. Yandi bakaka mbotama na 2003

Mambu yina yandi metuba

Nge lenda kanisa na diluaku yina nge monaka lusadusu ya Yehova na diambu mosi?

Ntangu banataka munu na kisika bakekangaka bantu samu na mua ntangu, soda yina vuandaka mfumu ya kisika yango kamuaka mutindu yandi bakusaka ti munu vuandaka banga ve mpe yandi yuvusaka munu, “Yakele mbala ntete nde nge mekota buloko?” Nzokande, munu mosi munu vuandaka kukimona lokola munu kena kuzakama samu munu vuandaka tungisama na makanisi. Na manima, ntangu munu kotaka na mua buloko yango, munu kukimonaka diaka penepene ya Yehova. Yehova pesaka munu ngolo [ya kubikana niee atako makanisi na munu vuandaka tungisama].

Aleksandr Vorontsov

Kubutuka: 1984 (na Pechora)

Disolo ya luzingu: Yandi zabaka Yehova banda kintuenia mpenza na nzila ya dibuta mpe bankundi na yandi. Yandi vuandaka sala kisalu ya mabaya. Yandi bakaka mbotama na 2012. Yandi kuelaka nketo na yandi, Yelena, na 2016

Mambu yina yandi metuba

Yakele na diambu mosi ya kukindisa yina mpangi mosi ya bakala to ya nketo tubilaka nge mpe yasadisaka nge nge kanga ntima?

Na manima ya kusamba samu na mbala ya ntete, mpangi mosi ya bakala tubilaka munu ti yandi vuandaka sambila samu na munu, kaka ve tekila ya kusamba na munu, kasi mpe ntangu nsambusulu vuandaka luta. Kifuani na yandi tindaka munu munu kanisa Nehemia. Munu landaka kifuani na yandi na kusamba na munu yina landaka, munu vuandaka sambila na yinsi ya ntima konso ntangu yina munu vuandaka na ntuala ya zuzi.—Nehemia 2:4.

Yakele na disolo mosi ya Biblia yina sadisaka nge samu nge kanga ntima?

Kifuani ya Estere kele kifuani mosi ya mbote samu na munu. Yandi diaka yandi vuandaka zinga ntangu yina bisadi ya Yehova vuandaka kutana na kumekama. Yavuandaka lomba yandi vuanda na kibakala mingi samu na kukotila bantu na yandi. Munu mosi munu kekukimonaka lokola munu kena kukutana na diambu yina Estere kutanaka na yau mpe yakesadisaka munu munu tanina mambote ya bampangi na munu na ntuala ya tribinale.

Beto kele na kivuvu ti kiminu ya bampangi na beto kesakumuka na kutadila mambote ya Yehova banda bubu yayi mpe na bilumbu kena kuiza.—Nkunga 27:13.

NEWS RELEASES