21 FÉVRIER 2022
RUSSIE

Bampangi mekumisa kiminu na bau ngolo na nzila ya lusadusu yina bakena kubaka na bampangi na bau Baklisto

KUWA NA

Ntama mingi ve, tribinale ya mbanza ya Petrozavodsk na République de Carélie kebaka nzengolo samu na nsambusulu ya bampangi Maksim Amosov, Mikhail Gordeev, Nikolay Leshchenko, mpe Dmitriy Ravnushkin. Prokirere tuba ntete ve kitumbu yina bakepesa bau.

Badati ya mambu kuminaka bau

Kilumbu ya 31 Juillet 2019

Basoda ya FSB sosasosaka na bayinzo mpe na bisika ya bisalu ya Bambangi ya Yehova 16
Kilumbu ya 2 Août 2019

Mfumu ya basoda pekisaka mpangi Maksim bima na buala. Bamfumu ya Leta bandaka kusambisa mpangi Nikolay mpe bapekisaka yandi yandi katuka kisika yandi kevuandaka
Kilumbu ya 6 Août 2019

Soda yina vuandaka tuadisa baankete fundaka mpangi Maksim mpe mpangi Nikolay lokola “bakriminele” samu bavuandaka longuka Biblia
Kilumbu ya 5 Septembre 2019

Basoda ya FSB kangaka mpangi Mikhail na kisika na yandi ya kisalu mpe babakaka ordinatere na yandi. Soda yina vuandaka tuadisa baankete pesaka ntumu basambisa mpangi Mikhail
Kilumbu ya 20 Septembre 2019

Basoda ya FSB sosasosaka na kisika ya kisalu ya mpangi Dmitriy mpe babakaka telefone na yandi. Soda yina vuandaka tuadisa baankete yuvusaka mpangi Dmitriy biuvu bawola yiya, yandi pesaka ntumu basambisa yandi, mpe yandi pekisaka mpangi yango yandi katuka kisika yandi kevuandaka
Kilumbu ya 18 Octobre 2021

Tribinale bandaka kusambisa bau

Mambu metadila bau

Mikhail Gordeev

Kubutuka: 1959

Disolo ya luzingu: Yandi kesepelaka kusala naje mpe miziki

Banda bumuana, yandi kevuandaka na biuvu yina metadila Nzambi mpe mfunu ya luzingu. Nketo na yandi ya ntete kufuaka ntangu muana na bau ya bakala vuandaka ntuenia. Lokola yandi vuandaka na nsatu ya lukindusu, yandi sololaka na na mosi ya Bambangi ya Yehova mpe yandi longukaka nkumbu ya Nzambi. Yandi kutanaka diaka na Bambangi ya Yehova bamvula mingi na manima mpe mbala mosi yandi ndimaka ndongokolo ya Biblia. Yandi bakaka mbotama na 1996

Yandi kuelaka Yelizaveta na 1999. Bakele na bana zole ya banketo yina kena kuzinga ntete kintuadi na bau

Mambu yina yandi metuba

Yinki mutindu nge bongisaka dibuta na nge samu na kununga mikakatano?

Ntangu kisalu ya Bambangi ya Yehova pekisamaka na buala yango, . . . munu bakusaka ti bipekiseli yango ketula kiminu na beto na kumekama ya ngolo. Na yau munu bakaka nzengolo ya kukumisa kiminu na munu ngolo mpe ya dibuta na munu. Beto vuandaka tanga mbala na mbala Biblia mpe kusambila kintuadi, samu na kulomba Yehova kibakala. Beto vuandaka tanga diaka masolo ya mambu metadila kukanga ntima ya bampangi na beto ya babakala mpe ya banketo.

Nge kena kuzaba diaka ntangu yina Yehova sadisaka nge na mutindu mosi ya spesiale?

Ngonda mosi lutaka na manima ya kusosasosa na yinzo na munu, [bantu yina kesalaka baankete] kuizaka kanga munu na kisika ya kisalu. Banataka munu na biro na bau samu na kuyuvusa munu biuvu mpe batangilaka munu mambu yina bafundilaka munu. Ntangu bavuandaka yuvusa munu biuvu, bantu yina kesalaka baankete vuandaka sosa kutula munu mbamba. Batubaka ti bakenata munu na buloko kana munu memanga kutuba mambu yina metadila bampangi na munu Baklisto. Yavuandaka ntangu mosi ya mpasi. Munu sambilaka Yehova samu yandi pesa munu nduenga mpe ngolo. Yandi sadisaka munu munu kanga ntima mpe munu bika teka bampangi na munu.

Nikolay Leshchenko

Kubutuka: 1962 (na Poltava, na Ukraine)

Disolo ya luzingu: Yandi kuelaka Svetlana na 1984. Na 1988, bakutanaka na bankuelani mosi yina vuandaka Bambangi ya Yehova ntangu yandi vuandaka sala kisalu ya soda na Pologne. Na 1989, bakutakanaka samu na mbala ya ntete na Mbambukulu ya lufua ya Yesu. Na 1993, na manima ya kuvutuka na Russie, babandaka kulonguka Biblia mpe ntangu fioti na manima, kaka na mvula yango babakaka mbotama

Mambu yina yandi metuba

Yinki mutindu Yehova sadisaka nge ntangu bapekisaka nge nge sala vuayaje?

Pene ya nsuka ya mvula 2019, munu belaka maladi ya kuniokuama na makanisi. Svetlana vuandaka kutakana na balukutakanu ya nene na mbanza ya Warsaw, na Pologne. Yandi kutanaka na bankundi yina vuandaka zinga na Pologne. Yandi bakaka bankubukulu samu munu solola na bau na nzila ya videoconference. Munu kena kuzaba mpenza mbote ve mambu yina batubaka, kasi kusolola na bau salaka munu kukimona mpenza mbote. . . . Munu bakusaka ti Yehova nde vuandaka sadila diluaku yango samu na kusadisa munu.

Beto kele na kiese mingi na mutindu bampangi na beto na Russie kena kutatamana kutambula na kedika atako bakena kukutana na mikakatano.—3 Yoane 4.

a b Beto vuandaka na dikoki ve ya kubaka mambu yina metadila yandi.

NEWS RELEASES