27 JANVIER 2022
RUSSIE

Bampangi zole ya babakala memona lusadusu ya Yehova mpe bamemonisa kibakala

KUWA NA

Tribinale ya kizunga ya Kirsanovskiy na Tambov kemonisa ntama mingi ve kitumbu na yau samu na diambu ya mpangi Anton Kuzhelkov mpe mpangi Nikolay Prokhorov. Prokirere tuba ntete ve kitumbu yina bafueti baka.

Badati ya mambu kuminaka bau

Kilumbu ya 21 Décembre 2020

Bazibulaka tribinale samu na mpangi Anton mpe mpangi Nikolay na kufundaka bau ti babongisaka bisalu ya nkubukulu mosi ya butomboki
Kilumbu ya 24 Décembre 2020

Bantu yina bakesadilaka samu na kukuenda sosasosa na bayinzo ya bantu bakotaka na bayinzo 19, na kati na yau bakotaka diaka na yinzo ya mpangi Anton. Banataka Anton na kisika mosi yina kele na distance ya bakilometre 350 ya yinzo na yandi samu na kuyuvusayuvusa yandi. Bayuvusaka Nikolay biuvu mpe bazabisaka yandi yandi bikana kaka na kisika yango
Kilumbu ya 25 Décembre

Bapekisaka Anton yandi bika vutuka na yinzo na yandi mpe batindaka yandi na buloko mosi samu na mua ntangu
Kilumbu ya 30 Août 2021

Batindaka Anton na buloko yankaka

Mambu metadila yandi

Anton Kuzhelkov

Kubutuka: Na 1993 (Sortavala, na République de Carélie)

Disolo ya luzingu: Babutukaka bau tatu bana babakala mpe yandi nde muana ya ntete. Ntangu yandi vuandaka muana ya fioti yandi vuandaka sepela kuloba bambizi mpe kusala nsaka ya planche à neige. Tata na yandi longisaka yandi kisalu ya kutunga bayinzo

Yandi bakaka mbotama na 2007. Yandi kuelanaka na Alyona na 2015

Mambu yina Alyona a nketo ya Anton metuba

Yinki mambu ya mpasi nge vuandaka kutana na yau kana nge mekuenda tala Anton?

Ntangu bapesaka beto nzila beto banda kukuenda tala bau samu na mua ntangu ya nkufi, munu vuandaka kuenda mbala zole konso ngonda na mfumu yina ketadilaka mambu ya kusosasosa samu yandi pesa munu nzila. Yavuandaka diambu yina vuandaka tungisa munu mpenza na makanisi. Diaka, kana munu zola kota na kisika yina bakangaka bau, bavuandaka sosa ntete munu pesa bau kidimbu yina kena kumonisa ti munu kele ve na maladi ya COVID-19. Yavuandaka pete ve kuvuanda na kidimbu yina kena kumonisa ti muntu kele ve na maladi yango.

Bubu yayi bamepekisaka baviziti nionso, yakena kusala mpasi mpenza. Na ndambu yankaka, babandaka kusambisa yandi, mpe bakena kupesaka munu nzila munu kota na kisika bakena kusambisila yandi. Kasi kisika nsambusulu yango kena kulutila, yakele na bakilometre 100 na kisika yinzo na beto kele.

Yinki kena kusadisa bakala na nge yandi nunga kuvuanda kisika yina bakangilaka yandi?

Mingimingi, bisambu yina kekatukaka na ntima, mpe mbala mingi kusala malombo na mansanga kena kusadisa yandi yandi nunga. Na konso diambu yina yandi kekutanaka na yau, yandi kemonaka mpenza lusadusu ya Yehova. . . . Yandi kemekaka diaka kulutisa ntangu ya mbote. Na kifuani, mbala mingi yandi kesepelaka kutala bandeke kana yandi kena kutambulatambula na nganda ya buloko. . . . Yandi keyindulaka na mpinda na nduenga ya Mvangi mpe na kifuani ya Yesu ya bandeke. . . . Mambu yango kena kusadisa yandi samu yandi tanina kiese na yandi.

Nikolay Prokhorov

Kubutuka: 1964 (Morshan, Tambov Region)

Disolo ya luzingu: Yandi salaka na armée. Yandi kesepelaka kusala naje mpe kusala bavuayaje

Yandi kuelanaka na Yelena na 2008. Bakele na muana mosi ya bakala mpe muana mosi ya nketo. Yandi bandaka kulonguka Biblia na manima ya kusepela na bikadulu ya mbote ya Bambangi ya Yehova. Yandi bakaka mbotama na 2008

Mambu yina yandi mosi metuba

Nge lenda tubila ntangu yina nge monaka mpenza lusadusu ya Yehova?

Ata na bantangu yina [munu] vuandaka kutana na mambu ya mpasi mingi, Yehova vuandaka pesa munu ntangu nionso lusadusu na yandi ya kilendo. . . . Munu vuandaka kutana kaka munu mosi na bantu ya guvernema yina vuandaka na lukanu ya kusosa munu ndima kaka ti munu “salaka diambu ya yimbi.” . . . Yavuandaka na ntangu mosi yina munu vuandaka mpe munu kukiyuvusaka kana munu lenda nunga kubanga na munu. Munu sambilaka Yehova mpe munu lombaka yandi yandi pesa munu ngolo mpe kiyenge ya ntima mpe ya makanisi. Ntangu soda mosi monaka munu mekitisa yintu na yinsi, yandi yuvusaka munu, “Samu na yinki nge kena kusambila?” Munu tubaka, “Munu kena kulomba yandi yandi sadisa munu munu bika kutula dikebi na munu mosi.” Na manima munu bambukaka na bampova ya Yezaya 54:17. Munu bakusaka ti balenda sala munu kima mosi ve. Munu sepelaka kumona ti ata basoda vuandaka tudila munu dikebi. Nsukansuka, balembaka kutula munu mbamba. Batubilaka munu munu bika pesa bau foti.

Na yinki mitindu bampangi na nge Baklisto sadisaka nge mpe nketo na nge?

Kimvuka salaka mingi samu na kupesa beto lusadusu yina beto vuandaka na yau nsatu. Bavuandaka kukitula na kivonza kana bamfumu ya guvernema memona diambu yina bakena kusadila beto, bampangi mingi ya kimvuka vuandaka bokila beto. Diaka, bampangi nionso ya Russie mpe ya babuala yankaka vuandaka bokila beto na telefone.

Konso muntu sadisaka beto na ntangu yango ya mpasi. Ntangu bavuandaka sambisa munu, bavuandaka kuiza samu na kusadisa beto. . . . Kumona nzola ya mutindu yina bampangi na beto Baklisto monisaka, yasalaka ti kimbangi ya mbote pesama na bantu yankaka yina vuandaka samba. Kondua ntembe, lusadusu yango sadisaka nketo na munu mpe munu mosi samu beto bikana ya kukuikama na Yehova [na ntangu yayi ya mpasi].

Beto kena kundimisama ti Yehova ketatamana kupesa bampangi na beto ya babakala mpe ya banketo kibakala mpe yandi kesadisa bau banunga bampasi.—Bingana 1:33.

a Mpangi Kuzhelkov kele bubu na buloko samu na mua ntangu. Dikoki vuandaka ve ya kukutana na yandi samu na kubaka mambu yina metadila yandi.

NEWS RELEASES