15 JUIN 2022
RUSSIE

Galina Kobeleva kele na nzengolo ya kupesa kimbangi na tribinale

KUWA NA

Ntama mingi ve, tribinale ya kizunga ya Lesozavodskiy na terituare ya Primorye kebaka nzengolo samu na mpangi Galina Kobeleva. Prokirere tuba ntete ve kitumbu yina bakepesa yandi.

Badati ya mambu kuminaka yandi

Kilumbu ya 12 mai 2020

Bapolisi sosasosaka na bayinzo ya mabuta tatu ya Bambangi ya Yehova, buela diaka yinzo ya mpangi Galina. Bamfumu ya Leta yuvusaka mpangi Galina mpe muana na yandi ya bakalala, mpangi Sergey Kobelev, biuvu mpe babandaka kusosa mambu yina balenda fundila bau
Kilumbu ya 8 mars 2021

Bamfumu ya Leta fundaka mpangi Galina. Bafundaka yandi ti yandi kepesaka maboko na bisalu ya nkubukulu ya baekstremiste
Kilumbu ya 7 avril 2021

Bamfumu ya Leta pekisaka yandi yandi sala bavuayaje
Kilumbu ya 29 octobre 2021

Tribinale bandaka kusambisa yandi

Mambu metadila yandi

Galina Kobeleva

Kubutuka: 1956 (na Verkhniye Mully, na terituare ya Perm)

Disolo ya luzingu: Yandi vuandaka sala na departema ya kusumba bima mpe ya comptabilité. Yandi kesepelaka kusala bilanga

Yandi bandaka ntete kulonguka mambu metadila Bambangi ya Yehova na nzila ya mama na yandi. Nzola ya bampangi ya babakala mpe ya banketo na kimvuka sadisaka yandi yandi ndima ti yandi memona kedika. Yandi bakaka mbotama na 1998

Mambu yina yandi metuba

Yinki tindaka nge nge pesa kimbangi na kibakala nionso?

Munu vuandaka tadila tribinale lokola terituare na munu. Munu mekanisa ti Yehova mpe Yesu kena kuvingila munu munu pesa kimbangi na ntuala ya tribinale.

Katula yau, bampangi ya babakala mpe ya banketo kekuizaka sadisa munu na konso nsambusulu. Atako munu kevuandaka munu mosi ntangu bakesambisaka munu, munu kemonaka ntangu nionso lusadusu ya mpangi mosimosi yina kesambilaka samu na munu.

Yinki kele baverse ya Biblia yina kesadisaka nge nge kanga ntima?

Mosi ya baverse yina munu kezolaka mingi kele Yezaya 48:17, 18, yina kitini na yau ketubaka: ‘Munu, Yehova, munu kele Nzambi na nge, Muntu yina kena kulonga nge samu na mambote na nge, Muntu yina kena kutuadisa nge na nzila yina nge fueti tambula.’ . . . Munu keyindulaka mbala na mbala na mambote ya kulandaka nzila na yandi mpe kiese mingi yina yakenatinaka munu. Na bilumbu kena kuiza, beto kele na kivuvu ya kitoko ya kuvuanda na luzingu mosi ya mbote na paradiso awa na ntoto. Kasi bubu yayi, beto kele na diluaku ya kumona mutindu Nkundi mpe Tata na beto ya kilendo kele na ndambu na beto na ntangu ya mikakatano mpe kupusana penepene na yandi. . . . Kana munu bikaka nzila na yandi, munu zolaka tatamana kukutana mikakatano ya luzingu, kasi muzolaka nunga yau kondua muntu mosi kaka yina lenda bomba mpe kusadisa munu.

Beto kele mpenza na butondi kumona mutindu Yehova kena kutatamana kutuadisa bisadi na yandi, na kifuani, mpangi Galina, na ‘kisika ya lutanunu’ lokola bakena kukotila nkumbu na yandi na kibakala nionso.—2 Samuele 22:18-21.

NEWS RELEASES