19 MAI 2022
RUSSIE

Kiminu na bau memekama na Lesozavodsk

KUWA NA

Tribinale ya distriki ya Lesozavodski na terituare ya Primorye kebaka nzengolo na bilumbu kena kuiza samu na diambu ya mpangi Yevgeniy Grinenko, mpangi Sergey Kobelev mpe mpangi ya nketo Svetlana Yefremova. Prokirere tuba ntete ve kitumbu yina bakebaka.

Badati ya mambu kuminaka bau

Kilumbu ya 12 Mai 2020

Mambu metadila kusamba mebanda samu na mpangi Yevgeniy, bafundaka yandi ti Yandi bongisaka bisalu ya nkubukulu mosi ya bantu ya “mobulu”. Basoda ya FSB tindamaka samu na kukuenda sosasosa na mutindu ya yimbi na bayinzo ya mpangi Yevgeniy mpe mpangi Sergey. Basoda yankaka kangaka mpangi Sergey na kisika na yandi ya kisalu. Bavuandaka yuvusa yandi biuvu yina zingilaka bawola 4 tekila babika yandi. Yevgeniy diaka kangamaka mpe batulaka yandi na buloko
Kilumbu ya 14 Mai 2020

Tribinale mepesa yinsua ti mpangi Yevgeniy vuanda na kasho yina baketulaka bantu samu na mua ntangu
Kilumbu ya 29 Mai 2020

Bamfumu ya Leta metinda mpangi Yevgeniy na kasho yina baketulaka bantu samu na mua ntangu na Spassk-Dalni
Kilumbu ya 8 Juillet 2020

Tribinale mebimisa mpangi Yevgeniy na kasho yina baketulaka bantu samu na mua ntangu mpe bametula yandi na kisika yina bakesungaka bantu
Kilumbu ya 6 Février 2021

Bamekatula mpangi Yevgeniy na kisika yina bakesungaka bantu mpe bamepekisa yandi yandi bika katuka na kizunga yango
Kilumbu ya 8 Mars 2021

Bamebanda kusambisa mpangi Sergey samu yandi fundamaka ti yandi bongisaka bisalu ya nkubukulu mosi ya bantu ya “mobulu”
Kilumbu ya 6 Avril 2021

Mpangi Svetlana diaka buelamaka na nsambusulu yango

Mambu metadila bau

Yevgeniy Grinenko

Kubutuka: na 1970 (na Lesozavodsk)

Disolo ya luzingu: Yandi kesalaka kisalu ya mabaya. Kubanda 1994 tii ntangu yandi kangamaka, yandi salaka lokola muntu yina keyumisaka mabaya. Yandi kesepelaka kuloba bambizi mpe kulokota mayebo. Yandi bandaka kulonguka Biblia na 1997. Yandi bakaka mbotama na 1999

Mambu yina yandi metuba

Yinki sadisaka nge nge tanina kiese na nge ntangu nge vuandaka na kasho yina baketulaka bantu samu na mua ntangu?

Diambu yina sadisaka munu samu munu tanina kiese na munu kele kukanisa na baverse ya mutindu na mutindu ya Biblia mpe mutindu ya kusadila yau na mambu yina muvuandaka kutana na yau na buloko. Munu kuizaka bakusa ti atako yakele mpasi kukutana na mikakatano ya ngolo, yau kena kukokisa bambikudulu ya Biblia. Diaka, ndongokolo na munu mosi bambulaka munu ti yakele na bampangi mingi ya babakala mpe ya banketo yina kutanaka na mikakatano ya mutindu mosi na munu bataninaka kiminu na bau mpe babikanaka ya kukuikama na Yehova. Yau ndimisaka munu ti munu diaka munu kevuanda na dikoki ya kukanga ntima na mikakatano na munu.

Yinki diambu sadisaka nge samu nge lemba ve?

Mambu ya yimbi yina kena kusalama na yinza kena kumonisa puelele ti nsuka na yau mekuma pene. Munu fueti tatamana kukanga ntima tii ntangu munu kemona kukokisama ya nsuka ya bambikudulu yina metadila kubebisama ya yinza yayi.

Sergey Kobelev

Kubutuka: na 1975 (na buala ya Koursk, na Terituare ya Primorye)

Disolo ya luzingu: Yandi vuandaka sala kisalu ya kuran na nzila ya train. Yandi kuelanaka na Lyudmila na 1997. Yandi longukaka Biblia mpe yandi bakaka mbotama na 2007. Lyudmila diaka kumaka Mbangi ya Yehova

Mambu yina yandi metuba

Yinki maluaku nge bakaka samu na kupesa kimbangi na bantu yankaka na kilokola yango?

Munu bakaka maluaku mingi ya kusamuna mpe kutubila bantu yankaka kiminu na munu mpe mambu yina metadila Yehova. Na kifuani, munu vuandaka samunina kaka na bapolisi ve kasi mpe bankundi na munu ya kisalu. Yalombaka munu sasila mfunu yina munu vuandaka kutana na mikakatano mpe mfunu yina bakatulaka munu na kisalu. . . . Yau sadisaka munu munu bakusa ti atako mikakatano yina munu kena kukutana na yau, munu lenda kukipesa diaka mingi na kusadila Yehova.

Svetlana Yefremova

Kubutuka: na 1950 (na buala ya Blagovechtchensk, na kizunga ya Amour)

Disolo ya luzingu: Yandi salaka na izini ya kutunga bilele tii ntangu ya kangamaka na 1991. Na 1996, yandi bandaka kusala na kompani yina ketadilaka mambote ya bantu. Yandi bakaka pansion na manima ya bamvula 9. Yandi bandaka kulonguka Biblia na 1992. Ndongokolo na yandi ndimisaka yandi ti Nzambi kele Mvangi ya bima nionso. Yandi bakaka mbotama na 1993

Mambu yina yandi metuba

Yinki sadisaka nge nge vuanda na makanisi ya mbote na ntangu yango ya mpasi?

Yesu tubaka na Matayo 10:18: ‘Bakenata beno na ntuala ya baguvernere mpe ya bantinu samu na munu, samu na kupesa kimbangi na ntuala na bau mpe ya makanda.’ Bubu yayi, munu kena kupesa maboko na kukokisama ya bampova yango, mpe munu kele na kiese ya kuvuanda na diluaku yango.

Bampangi na beto ya babakala mpe ya banketo kele kifuani ya mbote samu na nzila ya kibakala na bau, bakena ‘kukota na Kimfumu ya Nzambi na nzila ya bampasi mingi.’—Bisalu 14:22.

NEWS RELEASES