1 JUIN 2022
RUSSIE

Kintuadi na Yehova bakena kubikana ya kukuikama

KUWA NA

Ntama mingi ve, tribinale ya mbanza ya Nizhnekamsk na République du Tatarstan kebaka nzengolo ya nsambusulu ya mpangi Denis Filatov, Stanislav Klyuchnikov, mpe mpangi Dmitriy Yarchak. Prokirere tuba ntete ve kitumbu yina bakepesa bau.

Badati ya mambu kuminaka bau

Kilumbu ya 18 novembre 2020

Basoda ya FSB mpe bapolisi yina vuandaka na minduki kotaka na kingolo na bayinzo 12 ya Bambangi ya Yehova na mbanza ya Nizhnekamsk. Banataka bampangi ya babakala 9 mpe bampangi ya banketo 3 samu na kukuenda yuvusa bau biuvu
Kilumbu ya 24 août 2021

Na manima ya kusosasosa, bapekisaka mpangi Denis, Stanislav, mpe mpangi Dmitriy, kusala bavuayaje
Kilumbu ya 7 octobre 2021

Mpangi Denis, Stanislav, mpe mpangi Dmitriy fundamaka na Leta. Bafundaka bau samu bavuandaka “yimbila miyimbu ya dibundu na bau, mpe kusala bisambu”
Kilumbu ya 27 janvier 2022

Bantindaka dosie ya nsambusulu na bau na tribinale ya mbanza ya Nizhnekamsk na République du Tatarstan

Mambu matadila bau

Denis Filatov

Kubutuka: 1980 (na Nizhnekamsk)

Disolo ya luzingu: Yandi kutanaka na Bambangi ya Yehova na 1996. Kuzaba ti Nzambi kele na nkumbu na yandi mosi mpe kuzaba kedika na diambu metadila mutindu muntu kekumaka kana yandi mekufua simbaka mpenza ntima na yandi. Yandi bakaka mbotama na 1998

Mambu yina yandi metuba

Yinki kena kusadisa nge nge tula makanisi na kisalu ya Yehova atako mambu ya mpasi mekumina luzingu na nge?

Munu kena kubakusa mbotembote ti Satana mpe bademo na yandi nde kena kunuanisa beto. Kutanga Biblia kesadisaka munu samu na kuzaba na ntima ya mvimba banani kenunga mpe banani kenunga ve mvita yango. Mambu ya yinza kena kutambula na nsualu, mpe yinza ya yimpa kele diaka ntama ve. Beto kele nde na nsatu ya kukanga ntima samu na mua ntangu, kubikana ya kukuikama na Yehova, mpe kutatamana kusadila yandi kintuadi na bampangi na beto ya nzola ya babakala mpe ya banketo.

Stanislav Klyuchnikov

Kubutuka: 1982 (na Nizhnekamsk)

Disolo ya luzingu: Yandi kele na kompani yina kebimisaka bavideo. Yandi kesepelaka kusala ba timbre mpe yandi kesepelaka kukuenda tambula samu na kubaka mupepe

Yandi kutanaka na Bambangi ya Yehova ntangu yandi vuandaka ntete ntuenia mpe kimpombo mpe nzola yina bamonisinaka yandi simbaka mpenza ntima na yandi. Yandi bakaka mbotama na 1998

Yandi kuelaka Oksana na 2003. Bakele na muana mosi ya nketo

Mambu yina yandi metuba

Yinki kekindisaka nge samu nge tatamana kukanga ntima?

Nsatu na munu ya kutatamana kutambula na nzila ya fioti yina kenataka na luzingu ya kedika kesadisaka munu munu tatamana kukanga ntima. Mutindu ntumua Petelo tubaka na Yoane 6:68: ‘Mfumu, na nani beto kekuenda? Nge kele na bampova ya luzingu ya mvula na mvula.’ Bampova na yandi kena kumonisa ti yavuanda yinki nzila Satana kena kusosa kunata beto, yakele kaka na nzila mosi yina kenataka na Nzambi ya kedika. Yakele na mfunu ve kusundola Muntu yina kesadisa beto, mpe yina kevuanda na ndambu na beto!

Dmitriy Yarchak

Kubutuka: 1984 (na Nizhnekamsk)

Disolo ya luzingu: Yandi kele na AVC. Na manima ya kumanisa kalasi na yandi, yandi kumaka kusala lokola comptable na opitale ya bana yina kevuandaka na kieta. Na bilumbu meluta, yandi salaka lokola direktere ya kutekisa ya kompani ya rezo

Yandi bandaka kulonguka Biblia ntangu yandi vuandaka ntuenia. Kulonguka kimuntu ya Yehova simbaka mpenza ntima na yandi. Yandi bakaka mbotama na 1998

Yandi kuelaka Svetlana na 2010

Mambu yina yandi metuba

Yinki lusadusu ya Yehova sadisaka nge mingi?

Munu kesepelaka mingi kusala bisambu. Munu kekukimonaka ti Tata na munu vuandaka ntangu nionso pene na munu luzingu na munu ya mvimba mpe bubu yayi, yandi kena kutatamana kuvuanda na ndambu na munu. Munu kesambilaka yandi mpe munu kelombaka yandi nduenga samu na kubaka banzengolo ya mbote. Munu kelombaka yandi yandi sadisa munu munu vuanda niee, mpe munu vuanda na makanisi ya mbote samu na luzingu na munu.

Lokola bampangi na beto kena kutatamana kulomba Yehova ngolo, bakena kukimona mutindu Davidi nsoniki ya nkunga kukimonaka: ‘Munu kena kutula ntima na diambu yayi: Nzambi kele na ndambu na munu.’—Nkunga 56:9.

NEWS RELEASES