4 JANVIER 2022
RUSSIE

Kukibongisa mpe kivuvu kena kusadisa mpangi Pyotr Krupnov mpe nkento na yandi, Maya

KUWA NA

Na kilumbu ya 9 Mars 2022, Tribinale ya mbanza ya Penza mangaka kusambisa diaka mpangi Pyotr Krupnov mpe nketo na yandi Maya. Bakekuenda ve na buloko samu na ntangu yayi.

Badati ya mambu kuminaka yandi

Kilumbu ya 30 Décembre 2021

Tribinale ya Nikolskiy na kizunga ya Penza monisaka ti mpangi Pyotr Krupnov mpe nketo na yandi Maya salaka foti na kutadila minsiku ya Leta, mpe bapesaka bau kitumbu ya bamvula tatu ya buloko. Yalombaka ve bakuenda mbala mosi na buloko yango.
Kilumbu ya 25 Octobre 2021

Bamebanda kusambisa bau
Kilumbu ya 12 Octobre 2021

Pyotr mpe Maya buelamaka na liste ya bateroriste mpe ya baestremiste samu bavuandaka solola na bankundi na bau mambu ya Nzambi na kusadilaka mikanda yina kesasilaka Biblia.
Kilumbu ya 15 Septembre 2021

Bamebanda kusambisa ntete Maya. Na manima, bakotisaka Pyotr na diambu yango samu na kusamba diambu yina bamefundila bau.
Kilumbu ya 11 Octobre 2020

Bapolisi kotaka na kingolo na bayinzo ya Bambangi ya Yehova yiya na Nikolsk, na kati na yau na yinzo ya mpangi Krupnovs.

Mambu metadila bau

Pyotr Krupnov

Kubutuka: 1963

Disolo ya luzingu: Yandi vuandaka sala kisalu ya plombieri. Yandi bandaka kulonguka Biblia na Bambangi ya Yehova na 1996. Na manima ya kutanga mikanda na beto mpe kumona bikadulu ya mbote ya mpangi yina vuandaka longa yandi Biblia, yandi kukindimisaka ti yandi memona kedika. Yandi bakaka mbotama na 2002.

Yandi kutanaka na Maya na lukutakanu mosi ya kimvuka. Bakuelanaka na 2008.

Mambu yina yandi metuba

Nge kena kuzaba diaka diluaku mosi yina nge monaka lusadusu ya Yehova na luzingu na nge?

Mukena kuzaba diluaku mosi yina musambilaka Nzambi samu yandi pesa munu mpeve na yandi ya nlongo mpe na ntangu yango munu bambukilaka diaka bampova yina kele na Yoane 10:28, yina metuba: ‘Muntu mosi ve kebotola bau na maboko na munu.” Dibanza yango pesaka munu ngolo mpe kiese. Munu zabaka ti Tata na munu vuandaka tala munu mpe yandi vuandaka sadisa munu. Na mbala mosi, munu kumaka na kiyenge na ntima mpe munu bandaka kukitudila ntima.

Yinki sadisaka nge samu nge kanga ntima?

Munu kemekaka kubambuka moyo ti ata yinki mutindu ya kumekama yina beto kena kukutana na yau, yalenda kokana ve na diluaku ya kusadila Yehova mpe ya kubaka luzingu ya mvula na mvula na paradiso. Nzola na munu samu na Nzambi mpe samu na bafinangani na munu kepesaka munu ngolo yina mukele na yau nsatu samu na kununga kumekama.

Maya Krupnova

Kubutuka: 1957 (na Atasu, na Kazakhstan)

Disolo ya luzingu: Yandi vuandaka mfumu ya bulanjeri. Bubu yayi yandi mebakaka pansion, mpe yandi kesepelaka kusala jardin.

Yandi zabaka Bambangi ya Yehova na nzila ya muana na yandi ya nketo. Bau nionso zole bakaka mbotama na 2001.

Mambu yina yandi metuba

Yinki mutindu nge kukibongisaka samu na kumekama yayi?

Mubandaka kukibongisa ntangu babandaka kukanga bampangi na beto [na mbanza yina kele pene] na beto. Munu tangaka mukanda ya Estere mpe ya Yeremia. . . . Munu vuandaka landa bansangu na site na beto mpe munu kangaka miyimbu ya kimfumu na yintu. Munu bongisaka saki mosi yina lenda sadisa kana kivonza mesalama mpe saki mosi yina munu lenda nata kana munu mekuenda na buloko. . . . Munu sambilaka samu na kulomba nduenga mpe kibakala yina munu kevuanda na yau nsatu munu na kukanga ntima na kumekama na mutindu ya mbote.

Yinki mutindu bampangi na nge Baklisto sadisaka nge?

Bavuandaka kindisa munu ntangu nionso, mingimingi ntangu yina munu vuandaka mpenza na nsatu ya lukindusu. Ntangu munu vuandaka tungisama na makanisi, bampangi na munu Baklisto vuandaka bokila munu mpe kusonikina munu baletre samu na kumonisa munu nzola na bau. . . . Munu vuandaka zaba ti munu kele na dibuta mosi ya nene mpe yina kele ya kufuluka na nzola. Kasi banda 2020, munu bandaka kundima mpenza kedika ya diambu yango.

Beto mesepela na kifuani ya Pyotr mpe Maya mutindu babikanaka ya kukangama ngolo na kivuvu na bau mpe batudilaka Yehova ntima.—Baebreo 6:19.

NEWS RELEASES