Na kilumbu ya 25 janvier 2022, tribinale ya Distrike ya Trusovskiy ya kizunga ya Astrakhan zengilaka mpangi Anna Safronova yina kele na mvula 56 kitumbu ya buloko ya bamvula 6 na buloko yina bakesadisaka bantu kisalu ya ngolo. Banataka yandi mbala mosi na buloko.

1. Kilumbu ya 28 mai 2021

   Babandaka kusambisa yandi

2. Kilumbu ya 2 juin 2021

   Bamfumu ya Leta sosasosaka yinzo yina bavuandaka zinga kintuadi na mama na yandi ya bamvula 81. Batulaka Anna na mua buloko

3. Kilumbu ya 3 juin 2021

   Babimisaka yandi na mua buloko mpe batulaka yandi na yinzo yina bavuandaka sunga na basoda. Bamfumu ya Leta pekisaka yandi kubima na yinzo na yandi katula kaka kutambula wola mosi na kilumbu kubanda 9h00 tii 10h00.

4. Kilumbu ya 10 juin 2021

   Babuelaka nkumbu na yandi na liste ya baekstremistre mpe bakangaka mbongo na yandi yina vuandaka na banki

5. Kilumbu ya 24 janvier 2022

   Na bampova na yandi ya nsuka na ntuala ya tribinale, yandi tubaka: “Yesu longaka banlonguki na yandi na Matayo 5:44 na ‘kuzola bambeni na [bau] mpe kusambila samu na bantu yina kena kumonisa [bau] mpasi.’ Samu na yinki? Samu yakele na bifuani mingi ya bantu yina vuandaka niokola bisadi ya Nzambi yina na manima kumaka bisadi ya Yehova.

   “Munu vuandaka tula ntima ti ata mosi ya bapolisi, mosi ya bantu yina kesalaka baankete, mosi ya bantu yina kesungaka na buloko, mosi ya baavoka, mpe mosi ya bantu yankaka yina kekuwa munu to kemona bikadulu na munu, yandi kesoba mutindu na yandi ya kutadila Bambangi ya Yehova . . . Mbala yankaka yalenda vuanda na muntu mosi kati na bau yina kesepela kutanga Biblia, kusosa kubaka bamvutu na biuvu na yandi, kukudisa nsatu ya kuzaba Nzambi to kukuma kisadi na yandi.”

6. Kilumbu ya 25 janvier 2022

   Bakangaka yandi mpe bazengilaka yandi kitumbu ya bamvula 6 ya buloko

Beto kena kubaka lukindusu na kifuani ya kiminu ya bampangi ya babakala mpe ya banketo ya Russie mpe ya Crimée na mutindu beto kena kulomba Yehova, Tata na beto ya dizulu tatamana kukindisa beto.—2 Batesalonika 1:4.