3 FÉVRIER 2022
RUSSIE

LAPOLO| Mpangi Aleksey Smelov kena kukanga ntima na lusadusu ya Yehova

KUWA NA

Na kilumbu ya 21 Avril 2022, tribinale ya mbanza ya Kondopoga ya République de Carélie pesaka mpangi Aleksey Smelov kitumbu. Balombaka yandi yandi futa amande ya 400 000 roubles (5 012$).

Badati ya mambu kuminaka yandi

Kilumbu ya 23 Juillet 2019

Bamfumu ya Leta bandaka kusala baankete samu na mpangi Aleksey samu bakena kutuba ti yandi vuandaka mosi ya bamfumu ya dibundu yina pekisamaka mpe yandi pesaka maboko samu na kusala balukutakanu mpe “mambu yina kepusaka bantu yankaka na kundima mambu ya dibundu ya bisalu yina metadila kupesa bimbangi”
Kilumbu ya 31 Juillet 2019

Basoda ya FSB kotaka na bayinzo 15 mpe na bisika ya bisalu ya Bambangi ya Yehova na mbanza ya Kondopoga mpe Petrozavodsk. Basoda yango vuataka lokola baplombie mpe bakotaka na yinzo ya mpangi Smelovs samu na kusosasosa. Banataka Aleksey mpe nketo na yandi Irina na biro ya FSB ya mbanza yango mpe bayuvusaka bau biuvu. Na manima, banataka Aleksey na biro ya nene ya FSB na mbanza ya Petrozavodsk. Babikaka yandi na 23h30, mpe bapekisaka yandi kubima na mbanza na yandi
Kilumbu ya 7 Août 2019

Bamfumu ya Leta pesaka Aleksey kitumbu samu yandi mangaka kuzitisa kitini ya ntete ya article 282-2 ya nsiku ya buala ya Russie
Kilumbu ya 9 Avril 2020

Kusosasosa telemaka samu na maladi ya COVID-19
Kilumbu ya 8 Juin 2020

Bavutukilaka kusosasosa

Mambu metadila yandi

Aleksey Smelov

Kubutuka: 1974 (na Kondopoga)

Disolo ya luzingu: Ntangu yandi vuandaka ntuenia, yandi vuandaka zaba mbote kusala bansaka ya hockey mpe kunaje. Na ntama, yandi salaka lokola mekanisien na izini yina kesalaka pâte mpe bapapie. Yandi kele ingénieur na mekanike banda bamvula mingi. Yandi kutanaka na Irina na 1993. Bakuelanaka bamvula zole na manima. Bakele na bana tatu, bana zole kena kuzinga ntete kintuadi na bau

Banda bumuana, yandi vuandaka sosa kuzaba yina kekuminaka muntu na manima ya lufua. Yandi longukaka Biblia na Bambangi ya Yehova mpe yandi longukaka kivuvu yina Biblia kepesaka na yina metadila lufua. Ndongokolo na yandi ya Biblia salaka ti yandi sala bansobolo na luzingu na yandi samu na kuzitisa bansikudukusu ya Nzambi yina kele na Biblia. Yandi bakaka mbotama na 2004

Mambu yina yandi metuba

Yinki mutindu Yehova sadisaka nge na ntangu yango ya mpasi?

Na ntangu yango ya mikakatano, nguizani na munu na Yehova kumaka diaka ngolo samu munu monaka lusadusu yina yandi vuandaka pesa munu samu na kununga mambu mingi ya mpasi. Na kifuani, ntangu basoda vuandaka sosasosa na yinzo na munu, bakangaka baapareyi na munu nionso. Yau salaka ti beto bika diaka vuanda na dikoki ya kusala mambu na beto ya kimpeve mpe ya kulanda balukutakanu ya kimvuka. Beto sambilaka samu Yehova sadisa beto beto baka solision na diambu yango. Yandi sadisaka beto na nsualu na nzila ya bampangi na beto Baklisto. Kaka bilumbu fioti na manima, beto bakaka telefone mpe tablete. Na nzila ya bima yango, beto kumaka na dikoki ya kutanga kikapu ya konso kilumbu mpe kusala ntangulu ya Biblia. Yavuandaka mpenza lusakumunu yina katukaka na Yehova.

Yinki dilongi nge kepesa samu na bampangi yina kena kukubama samu na kukutana na mambu ya mpasi?

Beno banga ata kima mosi ve to ata muntu mosi ve! Tata na beto mezaba mambu nionso yina yandi lenda sala samu na kusadisa beto. (2 Bansangu 16:9a) Kuzimbakana ve ti yakele diluaku ya nene ya kusantisa nkumbu ya Yehova mpe kubaka ndambu na yandi na diambu metadila yinsua na yandi ya kuyala!

Lokola Aleksey, beto kele na kivuvu ti Yehova ketatamana ‘kumonisa ngolo na yandi samu na’ bampangi na beto nionso yina kena kukutana na mikakatano.—2 Bansangu 16:9.

NEWS RELEASES