31 JANVIER 2022
RUSSIE

LAPOLO | Mpangi ya nketo Lyudmila Salikova bakaka ngolo mpe lukindusu yina katukaka na Yehova

KUWA NA

Na kilumbu ya 17 mars 2022, Tribinale ya kizunga ya Tcheliabinsk mangaka kundima kutadila diaka diambu metadila mpangi Lyudmila Salikova. Yandi kuenda ntete ve na buloko.

Na kilumbu ya 20 janvier 2022, Tribinale ya mbanza ya Snejinsk na kizunga ya Tcheliabinsk zengilaka mpangi Lyudmila kitumbu mpe bazengilaka yandi bamvula 6 ya buloko.

Badati ya mambu kuminaka yandi

Novembre 2020

Bapolisi ya Snejinsk sosasosaka na bayinzo ya mabuta yiya (4) ya Bambangi ya Yehova, buela diaka yinzo ya mpangi Lyudmila. Bapolisi sosasosaka diaka na kisika na yandi ya kisalu. Na manima, balombaka yandi na kingolo na kubika kisalu na yandi
Kilumbu ya 26 août 2021

Mpangi Lyudmila fundakamaka ti yandi kele krimineli samu yandi vuandaka sala balukutakanu ya dibundu yina mepekisamaka mpe samu yandi vuandaka saladila mikanda yina mepekisamaka
Kilumbu ya 8 décembre 2021

Babandaka kusambisa yandi

Mambu metadila yandi

Lyudmila Salikova

Kubutuka: 1951 (na Sysert)

Disolo ya luzingu: Yandi kuelaka na 1971. Yandi yundulaka bana tatu. Bakala na yandi kufuaka na 2009. Yandi vuandaka injeniere ya mambu ya kuran ya mbanza ya Snejinsk. Yandi vuandaka sepela kusala bavuayaje

Mpangi na yandi ya mbuta ya nketo bandaka kulonguka Biblia na 1999. Bangonda 6 na manima, Lyudmila diaka bandaka kulonguka. Yandi bakusaka mfunu ya luzingu mpe samu na yinki mambu mekondua lunungu, kinkesi, mpe mvita kele. Yandi bakaka mbotama na 2002

Mambu yina yandi metuba

Yinki mutindu nguizani na nge na Yehova kumaka diaka ngolo ata na yinsi ya bampasi?

Tekila banzomono yango banda, muvuandaka kukimona ti munu kele na valere ve na meso ya Yehova . . . Kasi na manima mabanza na munu sobaka, mpe yakumaka pete samu na munu kubakusa ti Yehova kebakaka munu na valere. Mpe mumonaka mutindu yandi pesaka munu diluaku ya kukumisa nkumbu na yandi na ntuala ya tribinale ya Snejinsk. Na yau bubu yayi munu mendimisama ti Yehova kezolaka mpe ketudilaka munu dikebi. Munu ketadilaka konso diambu yina Yehova mepesa nzila kumina munu lokola diluaku yina kemonisa ti yandi ketudilaka munu ntima.

Yavuandaka na mpangi mosi ya bakala to ya nketo yina tubilaka nge diambu mosi yina kindisaka nge?

Tekila nsambusulu ya ntete banda, munu vuandaka kukitungisa ngolo . . . Munu sambilaka: “. . . Nlemvuka pesa munu mpeve na nge ya nlongo. Pardon Yehova, munu melomba nge yau!” Mua ntangu fioti na manima, munu bakaka mesaje mosi katukaka na mosi ya bampangi na munu ya nketo yina tubaka: “. . . Kumekama ya kiminu kele lokola mashini yina bakesukudilaka bilele. Yakena kubalula mpe kuniema beto. Kasi na manima, mutindu kaka mashini kesalaka bilele bunkete kumekama lenda sala mpe kaka mutindu yina. Kusosasosa, bansambusulu, mpe baankete nionso yina nge kutanaka na yau ‘balulaka mpe niemaka nge.’ Kasi, bantangu yango ya kumekama mpe ya banzomono kumisaka nge diaka kitoko na meso ya Yehova mpe na meso na beto diaka . . . Beto kena kukindimisa ti mbazi na sunka nge kekekukimona ve ti nge kele nge mosi na tribinale kasi nge kevuanda na yinsi ya maboko ya kilendo ya Yehova.” Munu kukimonaka ti Yehova mezaba banguilu yina vuandaka na munu, na mutindu yandi sadilaka mpangi na munu ya nzola ya nketo samu na kutubila munu mutindu yandi vuandaka zola munu mingi.

Bampangi na beto ya babakala mpe ya banketo na Russie kena kutatamana kubaka ngolo mpe lukindusu yina kena kukatuka na Yehova. Nzambi na beto ya nzola kena kundimisa beto ti yandi ‘kezenga mambu na lunungu samu na muana yina mekondua tata mpe bantu yina metutama, samu muntu ya ntoto pesa bau diaka wonga ve.’—Nkunga 10:18.

NEWS RELEASES