24 JANVIER 2022
RUSSIE

Mpangi Aleksandr Polozov mpe mpangi Stepan Shevelev bakaka mambote mingi atako bakutanaka na banzomono

KUWA NA

Tribinale ya mbanza ya Norilsk na terituare ya Krasnoyarsk kebaka nzengolo samu na diambu metadila mpangi Aleksandr Polozov mpe mpangi Stepan Shevelev bayina fundamaka. Kasi Prokirere yina kelandila diambu na bau tuba ntete ve yinki kitumbu yandi kepesa bampangi yango.

Badati ya mambu kuminaka bau

Kilumbu ya 20 Octobre 2019

Basoda zungaka kan mosi ya mbanza ya Norilsk. Bambangi ya Yehova kuluta 50 kangamaka kuvingilaka ti basambisa bau.
Kilumbu ya 26 Octobre 2019

Bamekanga Aleksandr mpe bametula yandi na buloko yina baketulaka bantu yina samba ntete ve.
Kilumbu ya 21 Janvier 2020

Bamepesa Aleksandr kimpuanza na manima ya kulutisa bangonda tatu na buloko.
Kilumbu ya 19 Février 2020

Nkumbu ya Aleksandr metulua na mulongo ya bantu yina kele ba ekstremiste mpe bamepekisa yandi yandi sadila mbongo na yandi yina kele na banki.
Kilumbu ya 6 Mai 2021

Bamefunda Stepan mpe Aleksandr ti bavuandaka na “kimvuka ya bantu ya yimbi.” Bametuba ti “diambu ya yimbi” yina Stepan salaka kele, yandi vuandaka sambila mpe kusamuna.

Mambu metadila yandi

Aleksandr Polozov

Kubutuka: 1970 (Torzhok, na Tver)

Disolo ya luzingu: Ntangu yandi vuandaka ntuenia, yandi vuandaka zola mingi bansaka yina bakebokidilaka hockey mpe kunaje. Yandi salaka kisalu ya kusadisa bantu yina kebuilaka bivonza. Na mvula 1998, yandi kuelaka Svetlana. Bawu zole bakesepelaka kunata velo mpe kusala bavuayaje.

Yandi bandaka kulonguka Biblia na Bambangi ya Yehova na bamvula 1990. Yandi bakaka mbotama na mvula 1995

Mambu yina yandi metuba

Yinki mutindu Yehova sadisaka nge ntangu nge vuandaka na buloko?

Na manima ya kupesa bamvutu na biuvu ya bazuzi, banataka munu na kisika batulaka munu na buloko. . . . Muntu mosi yina vuandaka na munu na shambre yango zolaka kuzaba diambu musalaka. Munu zabisaka yandi ti mukangamaka samu na kiminu na munu na Nzambi. . . . Yandi tubaka: “Tala na yinsi ya meza.” Munu talaka mpe munu monaka Babiblia zole na etajere mosi. Munu kamuaka mpenza! . . . Banda kilumbu yina ya ntete, munu bakaka Mpova ya Nzambi. Munu kele na butondi na Yehova yina sadisaka munu na mutindu yina ya kukamua.

Yinki mutindu bampangi ya babakala mpe ya banketo sadisaka nge?

Mutindu ya kusasila lusadusu yina bampangi pesaka munu kele ve. Kilumbu mosi na sunka, madidi vuandaka ya ngolo, banataka munu na tribinale. Kuna bampangi yambaka munu na maboko yina babudilaka munu. Na nkokila, na 18:00, ntangu bavuandaka vutula munu na buloko, babudilaka munu diaka maboko. Yasimbaka mpenza ntima na munu, mpe yapesaka kimbangi ya mbote.

Stepan Shevelev

Kubutuka: 1982 (Maslyanino, na Novosibirsk)

Disolo ya luzingu: Yandi vuandaka sala kisalu ya kubongisa bansinga ya kuran. Yandi kuelaka Oksana na mvula 2013. Bavuandaka zola kutanga mpe kusala bavuayaje.

Na 1996, mama ya Stepan mpe mpangi na yandi ya nketo bandaka kulonguka Biblia kasi bandimaka kedika ve. Stepan yandi bandaka mpe kulonguka Biblia mpe yandi sepelaka na malongi ya Bambangi ya Yehova. Yandi monaka mutindu Biblia kesobaka luzingu ya bantu. Yandi bakaka mbotama na mvula 2001

Mambu yina yandi metuba

Yinki mutindu mimeseno na beno ya kimpeve sadisaka nge mpe nketo na nge?

Beto kezolaka mingi nsambudulu na beto na kati ya dibuta. Yameluta bamvula, beto ponaka kilumbu mosi samu na yau mpe beto ketulaka yau na ntuala ya mambu nionso. Samu na diambu yango, munu kele na kivuvu ti nketo na munu kevuanda na dikoki ya kutanina kiminu na na yandi. Konso kilumbu munu kesosaka kukumisa ntangulu na munu ya Biblia kitoko. Na kifuani, mvula mosi, munu tangaka Biblia na mvimba na yau. Kasi na manima munu tangaka yau na mutindu mambu landanaka (chronologie). Munu tangaka yau diaka na kusangisaka yau na grupe ya mikanda yina nsoniki mosi mosi sonikaka, mpe na mitindu yankaka. Na mutindu yina nde ntangulu na munu ya Biblia lembisaka munu ve, mpe munu kemonaka ntangu nionso mambu ya yimpa.

Yinki mutindu nge sobaka mutindu ya kutadila bantu yina kena kuniokola nge?

Yehova kena kusadisa munu na kutadila bau mutindu yandi ketadilaka bau. Munu mpe nketo na munu beto kemonaka ti mingi kati na bau kele kaka lokola bantu nionso, yina kesalaka kaka kisalu na bau. Bakekutanaka mpe na bampasi, mpe bakele na nsatu ya kuwa bivuvu ya kitoko yina beto kesamunaka.

Beto mendimisama ti Yehova ketatamana kusadisa bampangi na beto yina kena kutatamana ‘kaka kulanda’ lunungu ata na kati ya banzomono.—Bazuzi 8:4.

NEWS RELEASES