20 MAI 2022
RUSSIE

Na lusadusu ya Yehova mabuta kena kukanga ntima na mikakatano

KUWA NA

Ntama mingi ve tribinale ya distriki ya Sovietskiy ya mbanza ya Oryol kebaka nzengolo samu na mpangi Vladimir Melnik, Vladimir Piskarev, mpe Artur Putintsev. Prokirere tuba ntete ve kitumbu yina bakepesa bau.

Badati ya mambu kuminaka bau

Kilumbu ya 8 Décembre 2020

Bamfumu ya Leta bandaka kulandila mpangi Melnik, Piskarev, mpe Putintsev
Kilumbu ya 9 Décembre 2020

Bapolisi sosasosaka na bayinzo 8 ya mabuta ya Bambangi ya Yehova na Oryol, buela diaka bayinzo ya bampangi yayi tatu. Batulaka bau na buloko samu na mua ntangu
Kilumbu ya 11 Décembre 2020

Batindaka mpangi Melnik mpe Piskarev na buloko samu na mua ntangu
Kilumbu ya 14 Décembre 2020

Batindaka mpangi Putintsev na buloko samu na mua ntangu
Kilumbu ya 19 Janvier 2021

Batubilaka bamfumu ya Leta ti mpangi Piskarev kena kukutana na mambu mingi yina metadila mavimpi, kasi bamangaka kusadisa yandi mpe kupesa yandi bilongo
Kilumbu ya 21 Janvier 2021

Mpangi Piskarev bakaka yinsua ya kubaka bilongo yina nketo na yandi vuandaka kuenda bikila yandi kasi yandi kele ntete ve na yinsua ya kukutana na munganga
Kilumbu ya 24 Juin 2021

Mpangi Piskarev kuendaka sadisa ekzame na opitale, mpe babakusaka ti yandi salaka accident vasculaire cérébral (AVC). Atako mavimpi na yandi vuandaka mbote ve, bavutusaka yandi diaka na buloko yango
Kilumbu ya 29 Octobre 2021

Bafundaka bampangi ti bakena kupesa maboko na bisalu ya nkubukulu ya baekstremiste
Kilumbu ya 31 Janvier 2022

Nsambusulu bandaka

Mambu metadila bau

Vladimir Melnik

Kubutuka: 1965 (na Donetsk, na Ukraine)

Disolo ya luzingu: Yandi vuandaka sala kisalu ya kisoda. Na manima yandi kumaka enjeniere

Yandi kuelaka Irina na 1987. Bakele na bana tatu ya banketo. Muana na bau ya bakala kufuaka na 1991

Yandi yundukaka na dibuta mosi yina vuandaka ndimina Nzambi ve. Yandi mpe nketo na yandi babandaka kusepela na Biblia na manima ya kulonguka luzingu ya Yesu. Babakaka mbotama na 1992

Mambu yina Irina, nketo ya Vladimir metuba a

Na yinki mutindu Vladimir vuandaka sadisa bantu yankaka ntangu yandi vuandaka na buloko?

[Na baletre na yandi,] Vladimir vuandaka tatamana kutindila beto makanisi na yina metadila nsambudulu ya dibuta yina munu vuandaka sala kintuadi na bana na beto ya banketo. Samu na yau, mbala mingi yandi vuandaka sadila bapoweme, masolo, bifuani, bansaka ya puzzles, mpe baverse ya Biblia.

Yandi tuadisaka ata mpe ndongokolo ya Biblia na mosi ya bantu yina vuandaka na yandi na buloko. . . . Ntuenia yango ya bakala tindamaka na buloko yina vuandaka na mbanza yankaka. Vladimir metuba ti ntuenia yango kena kulonga bantu yankaka mambu yina yandi longukaka.

Vladimir Piskarev

Kubutuka: 1956 (na Karpinsk, na mbanza ya Sverdlovsk)

Disolo ya luzingu: Yandi vuandaka sala lokola enjeniere. Yandi kuelaka Tatyana na 1976. Bakele na muana mosi ya bakala mpe muana mosi ya nketo. Kulonguka kedika yina metadila Yesu tindaka yandi mpe nketo na yandi balonguka Biblia kintuadi na Bambangi ya Yehova. Yandi bakaka mbotama na 1995

Mambu yina Tatyana, nketo ya Vladimir metuba b

Yinki kesadisaka bakala na nge yandi samu yandi kanga ntima na buloko?

Konso ntangu yina Vladimir kekutanaka na muntu yina kevuandaka na biuvu mingi ya kuyuvusa, yandi ketadilaka yau lokola lusakumunu mpe lukindusu. Yandi metuba, “Yakele mbote mpenza kuvuanda na mambu mingi ya kusala na kisalu ya Mfumu—ata kana nge kele na buloko!” Yavuanda yinki kisika bakala na munu lenda vuanda, yandi keyimbilaka ntangu nionso miyimbu na beto ya Kimfumu. Yandi kesepelaka mingi na muyimbu yina kele na yintu ya diambu “Tokoyika mpiko tii na nsuka.” Yakekindisaka mingi kiminu na yandi, mpe yakesadisaka yandi yandi bikana ya kukuikama na Yehova. Na maluaku mingi, yandi kesonikinaka munu bampova yina kevuandaka na muyimbu yango: “Kobá koyika mpiko./Kobundela solo./Nzambe alingi biso./Tokoyika mpiko tii na nsuka.”

Artur Putintsev

Kubutuka: 1970 (na Chita, na terituare ya Trans-Baikal)

Disolo ya luzingu: Babutukaka 6, yandi kele muana ya ntete. Yandi vuandaka sala kisalu ya kuran, yandi vuandaka sala bilanga, mpe yandi vuandaka nati ya ntomabilu. Yandi kuelaka Lyudmila na 1993. Yandi bakaka mbotama na 2005

Mambu yina Lyudmila, nketo ya Artur metuba c

Nge kena kuzaba diaka diluaku yina Yehova sadisaka nge?

Ntangu bakangaka bakala na munu mpe batulaka yandi na buloko, muntu yina vuandaka sala baankete kangaka baapareyi na beto nionso, buela diaka batelefone na beto. Munu bikanaka kaka munu mosi [mpe munu vuandaka diaka ve na dikoki ya kubokila muntu]. Yasalaka munu mpasi mpenza, mpe munu sambilaka Yehova samu na kulomba lusadusu. Munu lombaka yandi yandi sadisa munu munu zaba mutindu ya kutubila bampangi mambu yina mekatuka salama. Bampangi kuizaka kaka na manima ya ntangu fioti yina ntomabilu yina nataka Artur kuendaka. Bakindisaka munu mpe bapesaka munu telefone. Basundolaka munu ve mvula ya mvimba, mpe ata bubu yayi, bakena kutatamana kutanina munu. Munu mezaba ti Yehova kepesa mvutu na bisambu na munu na ntangu yina mebonga mpe ti yandi kena kubakusa banguilu na munu.

Ata kana dibuta yango kele ve kisika mosi samu na mua ntangu, beto mekindusua na kuzaba ti ata kima mosi ve lenda kabula bau na nzola mpe na lutanunu ya Yehova.—Baroma 8:38, 39.

a b c Lokola mpangi Melnik, Piskarev, mpe Putintsev kele kaka na buloko, beto bakaka ve mambu yina metadila bau.

NEWS RELEASES