Kilumbu ya 20 Avril 2022 vuandaka aniversere ya bamvula 5 ya bipekiseli ya bisalu ya Bambangi ya Yehova na Russie. a Bamfumu ya Leta ya Russie vuandaka niokola mingi bampangi konso mvula banda kupekisama ya bisalu na bau na buala—banda vana, bampangi na beto kena kukutana na kumekama ya ngolo. Kasi, mutindu balapolo yina kele na jw.org kemonisaka yau, bampangi na beto kena kukanga ntima na kibakala nionso.

Mpangi Dennis Christensen, yina salaka bamvula pene na 5 na buloko, kele kifuani ya mbote samu na yau. Ntangu tribinale bakaka nzengolo ya kupesa yandi kitumbu na manima ya kusambisa yandi na ngonda ya Mai 2019, mbala mosi na kiyenge mpe na kibakala nionso yandi tubilaka bampangi nionso yina kuizaka sadisa yandi na nsambusulu yango mutindu yayi: “Munu salaka nionso samu na kusadila Yehova na mutindu yina munu lenda. Munu kesala yau samu na mvimbamvimba.”

Mpangi Igor Turik bakaka diaka nzengolo ya mutindu yina. Yandi kena kuzaba diaka ntangu yandi kutanaka na mpangi Nikolay Kalibaba, yina kutanaka na mikakatano na ntangu ya Union-soviétique. Nikolay longaka Igor ti mikakatano kepesaka bisadi ya Yehova nzila bamona mutindu yandi kepesaka lusadusu. Igor metuba, “Munu monaka puelele ti yakele diluaku ya nene kukutana na mambu ya mpasi samu na kiminu.” Igor kena kutatamana kukanga ntima atako yandi mekokisa bamvula 7 na buloko.

Mpangi Yevgeniy Fedin kena kusasila kundima na yandi: “Yayi kele ve ntangu ya kunuana samu na kusosa lunungu na nge mosi. Beto fueti pesa kimbangi—Yehova ketula lunungu. Beto kena kunuana samu na kusosa lusakumunu . . . Makanisi yayi kena kusadisa munu munu vuanda na makanisi ya mbote na ntadisi ya mikakatano yango, yavuanda yinki mambu ya mpasi yalenda bimisa. Konso mukakatano kele diluaku ya kukumisa Yehova mpe kupesa kimbangi.”

Mpangi ya nketo Tatyana Zhuk diaka metuba: “Ntangu beto kena kukanisa na mambu yina beto nungaka, nzengolo na beto ya kutatamana kukanga ntima na mikakatano ketatamana. Yakemonisaka ti Yehova kele kintuadi na beto. Yakevuanda mpasi kutanina kiese na beto na ntadisi ya mambu ya mpasi yayi beto kena kukutana na yau bubu yayi kondua lusadusu ya Tata na beto ya mazulu.”

Yevgeniy, yina beto metubila na ebandeli metuba, ‘Beto kena kununga!’ “Baketulaka beto na bakasho, beto kenungaka ntangu beto kebimaka. Bakesambisaka beto, beto kenungaka. Bakekotisaka beto na buloko, beto kenungaka ntangu beto kebimaka.”

Kaka tekila batuba bipekiseli yina bandaka na 2017, Dr. Emily Baran, yina zabaka masolo mpe mambu mingi metadila Bambangi ya Yehova na ntangu ya Union-soviétique, sonikaka: “Kana istuare kele kidimbu yina kemonisaka mambu yina kesalama na bilumbu kena kuiza, Russie kebakusa ti yakele mpasi kuzimbisa Bambangi ya Yehova.”

Yakele puelele ti mbikudulu yina kele na Yezaya 54:17 kele kedika samu na bampangi na beto ya Russie mpe ya Crimée: ‘Ata kinuanunu mosi ve yina bakesadila samu na kunuanisa nge kenunga.’