Na kilumbu ya 26 juin 2020, bamfumu ya buloko ya Lgov tindaka mpangi Dennis Christensen na kartie mosi bakepesilaka bitumbu na bantu yina mebuka minsiku ya nene. Lokola mavimpi na yandi vuandaka mbote ve, bamfumu tindaka yandi na kisika yango kaka samu na kubuela sala yandi mpasi mpe kulembisa kukuikama na yandi. Mbala yankaka prokirere kena kusosila yandi mambu yankaka yina bakefundila yandi samu kaka mpangi Christensen bika bima na buloko, atako mua bilumbu na ntuala kaka prokirere yango ndimaka nzengolo yina bakamaka ya kubimisa yandi ntangu basambisaka yandi samu na mbala ya nsuka.

Mpangi Christensen mekokisa kati kati ya kitumbu yina bazengilaka yandi ya bamvula 6 ya buloko. Mvula mosi meluta, yandi kele na yinsua ya kubaka kimpuanza na buloko to kukitisa bamvula ya buloko. Na manima ya kulomba kimpuanza mbala tatu, bavuandaka pesa yandi mvutu ve, yandi lombaka yau samu na mbala ya yiya nde tribinale tadilaka yau. Na kilumbu ya 23 juin 2020, tribinale ya kizunga ya Lgov pesaka ntumu ti yandi futa amande samu na bilumbu na yandi ya buloko yina bikanaka. Prokirere Artem Kofanov, vuandaka vana ntangu lusambusulu yango vuandaka luta mpe yandi tubaka na mambote ya mpangi samu na kukitisa kitumbu na yandi.

Bilumbu zole na manima, prokirere yankaka Aleksei Shatunov, monisaka ti nzengolo ya tribinale kokanaka ve na minsiku, yandi bandila lusambusu yango mpe zuzi yankaka sambisa diambu yango kaka na tribinale yango. Samu na yau, prokirere Shatunov tadilaka diambu yina tubukaka na biro ya buloko ya Lgov samu na mpangi Christensen ti “yandi salaka mbote ve kisalu balombaka yandi mpe yandi vuandaka na bikadulu ya mbote ve na buloko.”

Ntangu bavuandaka sambisa mpangi Christensen na kilumbu ya 23 juin, bamonisi ya buloko vuandaka tuba kaka mambu ya yimbi samu na mpangi, kasi zuzi ndimaka bau ve. Kasi avoka ya mpangi monisaka na tribinale mikanda ya lopitalo yina monisaka ti mpangi Christensen pekisamaka kusala bisalu ya ngolo samu na mavimpi na yandi. Na manima, monisi ya buloko tubaka ti kisalu yankaka ya kupesa mpangi Christensen kele ve samu na mavimpi na yandi.

Ntangu biro ya prokirere vuandaka sosa lusambusu yankaka samu na mpangi Christensen, bamfumu ya buloko kotisaka balapolo zole samu na kufunda mpangi Christensen. Ya ntete tubaka ti yandi kuizaka na retare na ntangu ya kubaka bima ya kudia, mpe ya zole yandi vuataka kinkuti yankaka na kisika ya kuvuata kinkuti yina bantu ya buloko kevuataka. Yau yina bamfumu ya buloko bakaka nzengolo ya kutula mpangi Christensen na kisika ya fioti ya yandi mosi kaka samu na bilumbu 10. Na kutadila nsiku ya Russie, bamfumu lendaka pesa kitumbu ya mutindu yina kaka na muntu yina kena kutatamana kubuka mbala mingi nsiku ya buloko, kasi tekila basala mutindu yina bafueti sala yandi ntete ekzame ya munganga samu na kuzaba mavimpi na yandi. Lokola yasalamaka mutindu yina ve samu na mpangi Christensen, yavuandaka na mfunu ata mosi ve ya kutula yandi na kisika ya mutindu yina samu na kupesa yandi kitumbu.

Mpangi Christensen na muntu yankaka ya buloko bakele ya kukangama na mua yinzo mosi ya bamezire 3/2. Kisika yango kekotisaka mupepe mbote ve mpe yamefuluka na bima ya nkedi, yina kena kubebisa diaka mbote mbote mavimpi ya mpangi Christensen. Bangonda meluta yandi belaka maladi ya mpema, mpe bamonaka yandi maladi ya ngolo na kati ya kivisi ya mukongoni. Avoka ya mpangi Christensen memonisa ti biro ya buloko mezaba ti mavimpi na yandi kele mbote ve, kasi bametula yandi diaka na kisika yina yandi kelekaka kaka na mua nkuala ya ngolo, yakena kumonisa yandi diaka mpasi mingi.”

Mpangi Christensen tubaka na avoka na yandi ti ntangu bavuandaka vunina yandi mambu ti yandi kena kubuka bansiku ya buloko, yandi vuandaka kintuadi na bantu yankaka ya buloko, kasi yandi mosi kaka batulaka na kisika ya mutindu yina. Avoka ya mpangi Christensen tubaka, “yakena kutinda beto beto kanisa ti mambu nionso yina bamefundila yandi bongisamaka na ntuala samu na kupekisa Dennis bima na buloko mutindu nzengolo ya tribinale bakamaka.”

Ata kana bamfumu ya Russie kena kutatamana kubimisa mambu ya yimpa na mutindu ya yimbi samu na kubimisina bampangi na beto ya Russie mpasi, beto kena kundimisama ti Yehova kevuanda kisika na bau ya lutaninu. Beto tatamana kusambila Yehova samu yandi pesa mpangi Christensen mpe nketo na yandi Irina, nionso yina bakele na yau nsatu samu na kubikana ya kukuikama na ntangu yayi ya mpasi.—Nkunga 94:13, 21, 22.