8 AVRIL 2022
RUSSIE

Tata mosi yina kele ya kukangama na buloko kena kukokisa bansatu ya kimpeve ya dibuta na yandi

KUWA NA

Ntama mingi ve tribinale ya Kazan ya kizunga ya Sovetskiy ketuba nzengolo ya nsambusulu ya mpangi Konstantin Sannikov. Prokirere tuba ntete ve kitumbu yina bakepesa yandi.

Badati ya mambu yina kuminaka yandi

Kilumbu ya 25 Août 2020

Bantu yina kesalaka baankete fundaka mpangi Konstantin na manima ya kutula na kinsueki baapareyi na yinzo na yandi. Bamfumu ya Leta tubaka ti lokola bantu kuizaka na yinzo na yandi samu na kulonguka Biblia, yandi vuandaka bongisa bisalu ya baekstremiste
Kilumbu ya 27 Août 2020

Bakangaka yandi mpe batulaka yandi mbala mosi na buloko samu na mua ntangu
Kilumbu ya 26 Mai 2021

Tribinale pekisaka nketo na yandi yandi kuenda tala bakala na yandi na buloko mpe yatatamanaka kumanga kundima mambu yina nketo na yandi vuandaka lomba
Kilumbu ya 20 Août 2021

Tribinale bandaka kusambisa yandi

Mambu yina metadila yandi

Konstantin Sannikov

Kubutuka: 1970 (na Kazan, na République ya Tatarstan)

Disolo ya luzingu: Tekila bakanga yandi, yandi vuandaka sala lokola muntu yina mezaba mbote kisalu ya médicolégal et neuropsychologue. Yandi kuelaka nketo na yandi, Irina, na 1992. Bakele na bana yiya (4)

Yandi bandaka kulonguka na Bambangi ya Yehova mpe yandi bakaka mbotama na 1994

Mambu yina nketo ya Konstantin, Irina, metuba a

Yinki mutindu bakala na nge kena kukokisa bansatu ya kimpeve ya dibuta lokola yandi kele na buloko?

Atako Konstantin kele na buloko, yandi kena kutatamana kusadisa beto beto bikana penepene ya Yehova. [Na nzila ya baletre yina yandi kesonikinaka beto,] yandi ketubilaka beto mambu yina yandi kebakaka na kusosasosa na yandi, yandi ketindilaka beto masolo ya lukindusu, mpe yandi ketubilaka beto masolo yina yandi kesololaka na bantu yina kele ya kukangama na buloko. Yandi ketubilaka beto diaka mutindu Yehova kepesaka bamvutu na bisambu na yandi.

[Bana mpe munu] beto kena kutatamana kusala nsambudulu ya dibuta konso kilumbu ya tanu, mutindu kaka beto vuandaka sala yau tekila bakanga Konstantin. Na manima, beto kesonikinaka Konstantin baletre mpe beto ketubilaka yandi mambu ya mfunu yina beto kelongukaka. Yandi kesonikinaka beto diaka samu na kutubila beto makanisi na yandi [na yina metadila kaka mambu yina beto kelongukaka]. Bantangu yankaka yandi kepesaka beto badevuare, lokola kuyimbila miyimbu to kusosasosa masolo ya mfunu.

Lokola mpangi Konstantin kena kutatamana kukokisa bansatu ya kimpeve ya dibuta na yandi, beto mendimisama ti Yehova ketatamana kukokisa bansatu ‘ya bantu na yandi.’—1 Timoteo 5:8.

a Lokola mpangi Sannikov kele ntete na buloko, beto vuandaka ve na dikoki ya kubaka mambu yina metadila yandi.

NEWS RELEASES