Tribinale ya Europe yina ketadilaka yinsua ya bantu bakaka nzengolo na bansambusulu zole na kilumbu ya 22 février 2022, samu na kukotila Bambangi ya Yehova. Mambu yango tadilaka mutindu bapolisi niokolaka bampangi na beto ntangu basosasosaka na bayinzo na bau na 2010 mpe 2012. Nsambusulu yango monisaka ti Russie zitisaka ve nsiku yina metadila yinsua mpe kimpuanza ya nsambudulu ya bampangi na beto. Tribinale lombaka Russie futa Bambangi ya Yehova ntalu ya mbongo ya badolare 112 323. Russie lenda lomba diaka ve ti batadila diaka nsambusulu yango.

Banzengolo yango zole ya tribinale buisaka Russie na mambu 6. a Mambu yango sangisaka mutindu bapolisi sadilaka na mutindu ya yimbi mukanda yina pesaka yinsua ya kusosasosa na yinzo ya bampangi mpe na Yinzo ya Kimfumu mosi, buela diaka kusosasosa na nzutu ya bampangi na beto zole ya banketo samu bavuandaka samuna mpe kukanga bima na bau. Na bantangu yankaka, bapolisi ya FBS yina vuataka bamaske mpe bavuandaka na minduki vuandaka niokola bampangi na beto ntangu bavuandaka sosasosa.

Samu na kutubila mfunu ya bansambusulu yango, André Carbonneau yina kele avoka ya nkubukulu ya yinza ya mvimba yina ketadilaka yinsua ya bantu, tubaka ti banzengolo yango “kele kidimbu yina memonisa ti Russie salaka yimbi mpe yazitisaka ve nsiku na mutindu yatindaka bapolisi bakota na bayinzo ya Bambangi ya Yehova, yametadila diaka mutindu bapolisi kotaka na bayinzo ya Bambangi ya Yehova 1 700 banda kisalu na bau pekisamaka na Russie na 2017. Bubu yayi, yakele diambu ya yimbi mpe yakele kumanga kuzitisa luwawanu ya Europe kana bapolisi mekota na kingolo na yinzo ya Mbangi ya Yehova mosi samu na kusosasosa.” Yandi buelaka: “Yakele mfunu beto simba ti tribinale buisaka bamfumu ya Leta ya Russie na mutindu bapekisaka kisalu ya kusamuna yinzo na yinzo. Yau kena kumonisa ti tribinale ya Europe yina ketadilaka bayinsua ya bantu ketadilaka kisalu ya kusamuna lokola kisalu ya nsambudulu yina bamfumu ya Leta lenda pekisa ve.”

Atako banzengolo yango zole tadila ve bipekiseli ya Bambangi ya Yehova na Russie bubu yayi, kasi yakena kumonisa banzengolo yina tribinale kebaka na bilumbu kena kuiza samu na diambu metadila kupekisama ya nkubukulu na beto. Bansambusulu 60 yankaka yina metadila Bampangi ya Yehova na Russie kele ntete na tribinale ya Europe yina ketadilaka yinsua ya bantu. Beto kele na kivuvu ti banzengolo yango ya mbote kena kumonisa mutindu tribinale kebaka banzengolo samu na bansambusulu yango yankaka 60.

Beto nionso beto kele na kiese kumona ti bamfumu ya nkubukulu yina ketadilaka yinsua ya bantu mebakusa kukuikama ya bampangi na beto na Russie. Banzengolo yango kele kidimbu yina kena kumonisa ti Yehova kena kusakumuna bangolo na beto samu na kukotila na kukuikama nionso nkumbu na yandi mpe kupesa maboko na yinsua na yandi ya kuyadila.—Nkunga 26:11.