18 MAI 2022
RUSSIE

Yehova kena kupesa mpangi Inver Siyukhov ngolo

KUWA NA

Ntama mingi ve tribinale ya mbanza Maïkop na République des Adygués, ketuba nzengolo yina bamebaka samu na diambu ya mpangi Inver Siyukhov. Prokirere tuba ntete ve kitumbu yina yandi kebaka.

Badate ya mambu kuminaka yandi

Kilumbu ya 15 avril 2021

Bafundaka yandi ti yandi bongisaka balukutakanu na nzila ya visioconférence
Kilumbu ya 16 avril 2021

Bamfumu ya Leta kuendaka sosasosa na yinzo ya mpangi Inver mpe na bayinzo yiya (4) diaka ya Bambangi ya Yehova. Bayuvusaka yandi biuvu mpe batulaka yandi na mua buloko yina baketulaka bantu samu na mua ntangu
Kilumbu ya 17 avril 2021

Batulaka yandi na mua buloko
Kilumbu ya 15 août 2021

Batindaka yandi na buloko yina bakesungaka mbote mpenza, yakele na bakilometre 110 ya Maïkop
Kilumbu ya 13 septembre 2021

Babandaka kusambisa yandi

Mambu metadila yandi

Inver Siyukhov

Kubutuka: 1974 (na Maïkop)

Disolo ya luzingu: Yandi longukaka mambu metadila comptabilité mpe kusala ba audit. Yandi vuandaka sala na banke lokola muntu ya kesi mpe comptable

Yandi bandaka kulonguka na Bambangi ya Yehova na 1989. Kukuikama ya Bambangi ya Yehova simbaka mpenza ntima na yandi. Yandi bakaka mbotama na kilumbu ya 9 septembre 1990. Yandi sadisaka yaya na yandi ya nketo samu na yandi zaba kedika, mpe yaya yango bakaka mbotama na 1992. Kaka yaya na yandi ya nketo mpe bakala na yandi kele Bambangi ya Yehova na dibuta na yandi

Mambu yina Zarieta Churda, leki ya Inver, metuba a

Yinki kena kusadisa Inver samu yandi kanga ntima na buloko?

Mbala ya ntete yina beto vuandaka na dikoki ya kukutana na yandi na buloko, munu yuvusaka yandi kana yinki mutindu yandi kena kukimona na kuvuandaka ntama na bankundi na yandi mpe dibuta na yandi. Yilungi na yandi lezimaka mpe yandi tubaka ti banda ntangu kusosasosa bandaka, yandi bandaka kukimona lokola Yehova vuandaka fulusa yandi na ngolo, mutindu kaka bakefulusaka bale na mupepe.

Katula yau, yandi kena kutatamana kutanga mpe kulonguka Mpova ya Nzambi, yandi ketangaka bikapu tatu ya Masonukua ya Ebreo mpe kikapu mosi ya Masonukua ya Greki. Mpe yandi kena kusala nionso samu na kusadisa bankundi na yandi yankaka yina kele na buloko. Bangonda zole ya ntete, yandi sadisaka bantu zole na buloko samu balemba kunua nsunga.

Yinki nge salaka samu na kukibongisa lokola nge zabaka ti nge mpe bakala na nge lenda kota diaka buloko?

Kana bantu yina kekuendaka tala babuala ya kinzenza kena kubongisa vuayaje na bau, mbala mingi yakelombaka babaka vaksen samu na kukitaniina na bamaladi. “Bavaksen” na munu kele baverse ya Biblia, miyimbu, mpe masolo ya kukindisa. Ntangu bapekisaka kisalu ya Bambangi ya Yehova na Russie na 2017, munu vuandaka vutukila kutanga Mukanda ya mvula yina kemonisaka mutindu bampangi na beto tatamanaka kisalu ya kusamuna na babuala yina kisalu na beto mepekisama. Kuzaba mutindu bampangi taninaka kiminu na bau atako bakutanaka na kivonza, yasimbaka mpenza ntima na munu.

Beto bakaka nzengolo ti kana bamekanga beto beto kekumimona kiadi ve. Yakevuanda lokola bametinda beto na kisika mosi ya mpasi kasi ya mfunu, yakevuanda kaka lokola Yehova metubila beto: “Sabuka na Masedonia.”—Bisalu 16:9.

Beto kele na kivuvu ti bampangi na beto ya Russie ‘ketatamana kubaka kilendo na Mfumu mpe na ngolo na yandi ya nene.”—Baefezo 6:10.

a Lokola mpangi Siyukhov kele kaka na buloko, beto vuandaka ve na dikoki ya kubaka bansangu na yandi mosi..

NEWS RELEASES