23 MARS 2022
RUSSIE

Yehova kena kusadisa bampangi 6 ya babakala mpe ya banketo

KUWA NA

Ntama mingi ve tribinale ya distriki ya Industrialniy na terituare ya Khabarovsk kebaka nzengolo ya nsambusulu ya mpangi ya nketo Maya Karpushkina, mpangi ya bakala Stanislav Kim, Nikolay Polevodov, mpangi ya nketo Svetlana Sedova, mpangi ya bakala Vitaliy Zhuk, mpe nketo na yandi, Tatyana. Prokirere tuba ntete ve kitumbu yina bafueti pesa bau.

Badati ya mambu kuminaka bau

Kilumbu ya 10 Novembre 2018

Bamfumu ya Leta kangaka kimvuka ya bantu 55 yina vuandaka na mua restoran mosi. Bayuvusaka bantu nionso yina vuandaka vana biuvu, yavuanda bana fioti, babaka bau baamprete na bau, mpe bakangaka bau bafoto
Kilumbu ya 12 Novembre 2018

Banataka Stanislav, Nikolay, mpe Vitaliy na buloko yina baketulaka bantu samu na mua ntangu. Bapekisaka Maya, Svetlana, mpe Tatyana kusala vuayaje
Kilumbu ya 14 Janvier 2019

Nikolay mpe Vitaliy bimaka na mua buloko yango mpe batulaka yandi na yinzo yina bapolisi vuandaka sunga
Kilumbu ya 29 Janvier 2019

Stanislav bimaka na mua buloko yango mpe bapolisi vuandaka sunga yinzo yina yandi vuandaka
Kilumbu ya 18 Juillet 2019

Banataka mambu na tribinale ya distriki ya Industrialniy na terituare ya Khabarovsk
Kilumbu ya 2 Août 2019

Bapolisi lembaka kusunga yinzo yina mpangi Nikolay vuandaka
Kilumbu ya 9 Septembre 2019

Bafundaka diaka mpangi Stanislav mpe Nikolay samu na diambu yankaka na tribinale ya Khabarovsk ya distriki ya Zheleznodorozhniy
Kilumbu ya 5 Novembre 2019

Bapekisaka Nikolay kusala vuayaje
Kilumbu ya 18 Janvier 2020

Bapolisi lembaka kusunga yinzo yina mpangi Stanislav mpe Vitaliy vuandaka
Kilumbu ya 4 Février 2020

Basambisaka Stanislav mpe Nikolay, mpe konso muntu bakaka kitumbu ya bamvula zole ya buloko na tribinale ya distriki ya Zheleznodorozhniy ya terituare ya Khabarovsk
Kilumbu ya 3 Août 2020

Tribinale ya distriki ya Industrialniy tindaka diambu yango na prokirere, yau salaka ti prokirere banda kusambisa diambu yango
Kilumbu ya 29 Septembre 2020

Tribinale ya kizunga ya Khabarovsk tadilaka diaka diambu yina prokirere sambisaka. Stanislav mpe Nikolay bakaka yinsua ya kusolola na zuzi. Bamonisaka ti buala ya Russie kele na kati ya luwawanu yina mesangisa babuala ya yinza ya mvimba na diambu metadila kuzitisa yinsua ya bantu mpe kupesa kimpuanza na mabundu
Kilumbu ya 12 Octobre 2020

Tribinale ya kizunga ya Khabarovsk ndimaka nzengolo yina tribinale ya distrike ya Industrialniy bakaka mpe diambu yango vutukaka na biro ya prokirere
Kilumbu ya 15 Décembre 2021

Tribinale ya kizunga ya Industrialniy tadilaka diaka diambu yango

Mambu metadila bau

Maya Karpushkina

Kubutuka: 1949 (na Anuchino, na terituare Primorye)

Disolo ya luzingu: yandi vuandaka nlongisi na kalasi ya primere. Yandi kesepelaka kulutisa ntangu na kusalaka bilanga mpe kukuna bafololo. Yandi yundulaka bana tatu. Yandi kesepelaka kulutisa ntangu na bantekolo na yandi

Ntima na yandi simbamaka na mutindu Bambangi ya Yehova mezaba mbotembote Biblia mpe bakesadilaka malongi na yau. Yandi bakaka mbotama na 1997

Mambu yina yandi metuba

Yinki mutindu bikadulu ya bampangi na nge Baklisto kindisaka nge?

Bikadulu ya bampangi na munu Baklisto mpe mutindu baketaninaka makanisi na bau mbote ntangu bakesambisaka bau kekindisaka munu. Lokola bakevuandaka na makanisi ya mbote, yau kesalaka ti bakondua wonga, basekisa munu, mpe bayamba munu. Yau sadisaka munu samu munu kanga ntima.

Stanislav Kim

Kubutuka: 1968 (na Khabarovsk, na terituare ya Khabarovsk)

Disolo ya luzingu: Ntangu yandi vuandaka muana fioti, yandi vuandaka zola kuyimbila mpe kubula bansaka yina bakebodikala échecs mpe dame. Yandi vuandaka muntu yina zabaka mbote minsiku na ministere yina ketadilaka mambu ya buala

Yandi kutanaka na Bambangi ya Yehova na manima ya kusala aksidan mosi ya ngolo. Kulonguka Biblia sadisaka yandi samu yandi nunga maladi ya makanisi. Yandi bakaka mbotama na 2004. Yandi kuelaka Olesya na 2008. Bakele na bana zole

Mambu yina yandi metuba

Yinki mambu ya mfunu nge salaka samu nge tanina nguizani na nge na Yehova?

Ntangu munu vuandaka na buloko mpe lokola munu vuandaka ve na dikoki ya kutanga Biblia, munu vuandaka yindula na baverse 10 konso kilumbu mpe kuyindula na mpinda na zulu na yau. Munu kukitudilaka diaka lukanu na bisambu na munu: Munu vuandaka sosa mambu 10 konso kilumbu yina munu lendaka pesila Nzambi matondo mpe mambu 10 yina munu kelomba yandi. Munu vuandaka tubila Yehova mambu na munu nionso mpe banguilu na munu.

Nikolay Polevodov

Kubutuka: 1970 (na Khabarovsk, na terituare ya Khabarovsk)

Disolo ya luzingu: Yandi yundukaka na dibuta yina vuandaka ata na muntu mosi ve yina vuandaka kuenda na dibundu mosi. Yandi vuandaka sala kisalu ya kuran

Yandi vuandaka ndima ve ti Nzambi kele tii ntangu yandi monaka bidimbu yina ndimisaka yandi ti Nzambi kele mpe yau mebonga kutudila Biblia ntima. Yandi bakaka mbotama na 1995. Na manima, yandi kuelaka Tatyana. Bakele na muana mosi ya bakala

Mambu yina yandi metuba

Ntangu bakangaka nge, yinki mambu vuandaka tungisa nge, mpe yinki nge salaka samu nge nunga yau?

Mambu vuandaka tungisa munu vuandaka mutindu ya kukindisa muana na munu, yina vuandaka kaka na bamvula 10 na ntangu yango. . . . Munu [kintuadi na nketo na munu] beto bakaka bankubukulu ya kusala nsambudulu ya dibuta konso sabala. Bantangu yankaka, munu vuandaka kanisa na bampova yina kesalamaka na bansaka ya puzzle, munu vuandaka sala badesen, to kusala batablo. Na bantangu yankaka, munu vuandaka pona disolo mosi mpe kubimisa biuvu mingi samu na kusosa kupesa bamvutu na yau. Munu vuandaka tinda bima ya yinzo konso sabala.

Yinki ndimisaka nge ti nge vuandaka baka lusadusu ya Yehova na ntangu ya mikakatano?

Konso sunka, bantu yina kesungaka buloko vuandaka na mumeseno ya kukuiza tala beto na bashambre na beto samu na kuzaba kana beto kele mbote. Kilumbu mosi, mosi ya bantu yina kesungaka buloko pesaka munu mukanda mpe yandi tubaka: “Nge kendiminaka Nzambi, mutindu yina ve? Tangaka mukanda yayi.” Na manima, yandi balukaka mpe yandi kuendaka. Ntangu munu talaka mukanda yango yina yandi pesaka munu, munu monaka ti yavuandaka Biblia Mbangudulu ya Yinza ya Yimpa! . . . Ntangu nionso yina munu lutisaka na buloko, munu vuandaka tanga mbangudulu yango ya kitoko, Mpova ya Nzambi.

Svetlana Sedova

Kutubuka: 1969 (na Komsomolsk-on-Amur, na terituare ya Khabarovsk)

Disolo ya luzingu: Tata na yandi kufuaka ntangu yandi vuandaka na bamvula 3, mpe mama na yandi kufuaka ntangu yandi vuandaka na bamvula 14. Yandi vuandaka sala na izini yina kesalaka bilele. Bubu yayi yandi kena kusala kisalu ya kusunga bayinzo. Yandi kesepelaka kukuna bafololo. Bakala na yandi kufuaka ntangu bana na bau vuandaka ntete bantuenia, babakala zole mpe nketo mosi; yandi yundulaka bau yandi mosi

Ntangu yandi vuandaka ntuenia, yandi bakusaka ti yakele na muntu mosi ya mayele yina salaka ntoto mpe luyalanganu. Yandi bakaka mbotama na 1984

Mambu yina yandi metuba

Yinki mambu nge vuandaka lomba na bisambu na nge ntangu nge vuandaka lutisa ntangu ya mpasi?

Munu vuandaka sambila Yehova samu yandi pesa ngolo kaka na munu ve, kasi mpe na bampangi nionso ya babakala mpe ya banketo yina kena kukutana na mikakatano mpe na kutelemina. Kondua lusadusu ya Nzambi, beto lenda sala ata kima mosi ve samu na kununga mikakatano yina yinza ya Satana kena kubimisina beto.

Munu mendimisama ngolo ti Yehova kele ntangu nionso pene na munu. Mpova na yandi metuba: ‘Na muntu ya kukuikama, nge kevuanda ya kukuikama.’—2 Samuele 22:26.

Tatyana Zhuk

Kubutuka: 1973 (na Khabarovsk, na terituare ya Khabarovsk)

Disolo ya luzingu: Yandi vuandaka nlongisi na kalasi ya maternele mpe bubu yayi yandi kesalaka kisalu ya kusunga bayinzo

Ntangu yandi vuandaka na bamvula 19, yandi kumaka kusepela mingi na Biblia. Biblia sadisaka yandi yandi baka bamvutu na biuvu yina metadila luzingu. Yandi bakaka mbotama na 1994. Yandi kuelaka Vitaliy na 1994

Mambu yina yandi metuba

Yinki mutindu nge taninaka kiyenge na nge na ntangu yango ya mikakatano?

Bampangi, buela diaka bakala na munu, basadisaka munu munu kanisa, kaka ve na yina metadila bampasi yina kena kuiza, kasi mutindu mambu kevuanda na yinza ya yimpa. . . . Yasadisaka munu mpenza.

Munu salaka kanisa ata fioti ve ti Yehova kepesa munu kiyenge ya mutindu yayi. . . . Ntangu bapolisi vuandaka sosasosa na yinzo na beto, mosi ya bapolisi yango yuvusaka: “Samu na yinki nge kele niee? Beno zabaka ti beto kekuiza?” Yandi bakusaka ata fioti ve mutindu kiuvu na yandi sepedisaka munu!

Vitaliy Zhuk

Kubutuka: 1972 (na Khabarovsk, na terituare ya Khabarovsk)

Disolo ya luzingu: Yandi vuandaka sala kisalu ya kusude

Ntangu yandi vuandaka na bamvula 20, yandi bandaka kukanisa na yina metadila mfunu ya luzingu. Kusosasosa kedika tindaka yandi yandi banda kulonguka Biblia na Bambangi ya Yehova, yina sadisaka yandi yandi baka bamvutu ya mbote na biuvu na yandi. Yandi bakaka mbotama na 1994. Na manima, kaka na mvula yango, yandi kuelaka Tatyana

Mambu yina yandi metuba

Yinki dilongi nge bakaka na mikakatano yango?

Munu longukaka kutudila Yehova ntima na kisika ya kukanisa na mambu ya mpasi yina lenda bima na bilumbu kena kuiza. Mbala mingi mambu yina beto kekanisaka kekuminaka beto ve. . . . Munu longukaka diaka mutindu ya kupesa bampangi na munu valere. Na yinza ya mvimba, yakele na bampangi kuluta bamilion 8, mpe beto kele mpenza na bumosi, na mutindu yina kutu beto lenda kanisa ve. Bakevuandaka pene ya kusadisa beto na nzila ya bisambu, ya balukindusu, mpe ya balusadusu na bau ya mfunu.

Beto mezaba ti Yehova ketatamana kusadisa bampangi na beto ya babakala mpe ya banketo ya nzola mpe bampangi mingi yankaka yina kele na kati ya ‘dituti ya nene ya bambangi.’—Baebreo 12:1.

NEWS RELEASES