Yehova kena kusadisa bampangi 6 yina kele ya kukangama na buloko

KUWA NA

Ntama mingi ve, tribinale ya kizunga ya Rostov-on-Don kebaka nzengolo samu na mpangi Aleksey Dyadkin, Aleksey Goreliy, Nikita Moiseyev, Vladimir Popov, Yevgeniy Razumov, mpe Oleg Shidlovskiy. Prokirere tuba ntete ve kitumbu yina bafueti pesa bau.

Badati ya mambu yina kuminaka bau

Kilumbu ya 8 Août 2020

Bapolisi ya FSB sosasosaka na bayinzo ya Bambangi ya Yehova 17 na bambanza tatu na kizunga ya Rostov mpe na mbanza ya Kursk. Bakangaka mpangi Goreliy, Moiseyev, Razumov, mpe Shidlovskiy mpe na kilumbu yina landaka, batindaka bau na buloko samu na mua ntangu. Nkumbu ya mpangi Popov sonamaka na liste ya bantu yina bapolisi kena kusosa
Kilumbu ya 12 Août 2020

Bapolisi ya FSB kangaka mpangi Popov. Batindaka yandi na buloko samu na bilumbu zole
Kilumbu ya 21 Août 2020

Na manima ya kuyuvusa mpangi Dyadkin biuvu, bamfumu ya Leta tindaka yandi na buloko
Kilumbu ya 28 Juin 2021

Avoka mosi kuendaka tala bampangi yango 6 na buloko. Bampangi yango tubilaka yandi mambu ya mpasi yina bakena kukutana na yau, buela diaka tiya ya badegre Celsius 40 yina vuandaka na bashambre na bau, kubeba ya bibaka, mpe bantu yankaka ya buloko tambakanaka na maladi ya COVID-19
Kilumbu ya 21 Juillet 2021

Lokola mpangi Popov vuandaka na mukakatano ya kupema, batindaka yandi na departema ya buloko yankaka yina ketadilaka mambu ya mavimpi. Mpe na manima batindaka yandi na opitale
Kilumbu ya 30 Septembre 2021

Mpangi Popov vutukaka na buloko na manima ya kusala bangonda zole na opitale
Kilumbu ya 17 Novembre 2021

Tribinale bandaka kusambisa bampangi yango 6, mpe bavuandaka kaka na buloko

Mambu yina metadila bau

Aleksey Dyadkin

Kubutuka: 1989 (na Chkalovsk, naTajikistan)

Disolo ya luzingu: Yandi vuandaka sala kisalu ya kusude. Yandi vuandaka sala diaka kisalu ya kutunga, ya kubongisa batiyo ya maza, mpe kutula bakaro na bayinzo

Yandi longukaka kedika na nzila ya nkaka na yandi. Yandi vuandaka sala kisalu yankaka na opitale na kisika ya kusala kisalu ya kisoda. Yandi bakaka mbotama na 2010. Yandi kuelaka Vitalina na 2011

Mambu yina nketo ya Aleksey, Vitalina, metuba a

Yinki mambu metadila Yehova nge longukaka na ntangu yango ya mpasi?

Munu monaka bikadulu mingi ya Yehova, lokola nzola, kimpombo, dikebi na yandi na mutindu yankaka. . . . Yehova mezaba munu mbotembote—kuluta munu mosi. Munu bandaka kusonika balusakumunu yina munu vuandaka baka, yina kebambulaka munu nzola yina Yehova monisinaka munu.

Aleksey Goreliy

Kubutuka: 1980 (Na Ryazan, na kizunga ya Ryazan)

Disolo ya luzingu: Ntangu yandi vuandaka muana fioti, yandi vuandaka sepela kulonguka kusala baplan ya bayinzo, kulonguka masolo ya ntama, mpe kusala bifuani ya bamasuwa. Yandi vuandaka sala lokola kontable ya kompani yina kesalaka basavon

Yandi longukaka kedika na nzila ya mama na yandi mpe nkaka na yandi. Yandi bakaka mbotama na 1995. Yandi kuelaka Inna na 2011. Bakele na muana mosi ya bakala

Mambu yina nketo ya Aleksey, Inna, metuba b

Yinki verse ya Biblia yina kekindisaka nge?

Bampova yayi ya ntumua Paulo kekuizilaka munu konso ntangu na makanisi: ‘Samu konso ntangu yina munu kele ya kulemba, na ntangu yina munu kevuandaka ngolo.’ (2 Bakorinto 12:10) . . . Ntangu bapolisi kuizaka sosasosa na yinzo na beto mpe bakangaka Aleksey, yasalaka munu mpasi mingi—yavuandaka lokola ntoto mekatuka na yinsi ya makulu na munu. Verse yango kendimisaka munu ti Yehova kepesa munu kibakala samu munu kanga ntima mpe munu bikana niee samu na kupesa Yehova lokumu.

Nikita Moiseyev

Kubutuka: 1990 (na Dinskaya, na terituare ya Krasnodar)

Disolo ya luzingu: Yandi vuandaka sala kisalu ya kuran mpe yandi vuandaka sala kisalu ya kubongisa baapareyi. Yandi bakaka mbotama na 2004

Yandi kutanaka na nketo na yandi, Sofiya, na 2011 ntangu yandi vuandaka sala na opitale ya bana fioti. Yandi kuelaka yandi na 2013

Mambu yina nketo ya Nikita, Sofiya, metuba c

Yinki mutindu nguizani na nge na Yehova sadisaka nge nge nunga kukitungisa na makanisi samu na mutindu bakangaka bakala na nge?

Ntangu munu monaka bamfumu ya Leta na porte ya yinzo na beto, munu monaka ‘kiyenge ya Nzambi yina meluta mayele nionso ya kubakusa mambu’ mutindu Bafilipi 4:7 memonisa yau. Munu bakaka kiyenge yina munu salaka baka ntete ve. Munu bakusaka ti beto kele na nzila ya mbote . . . mpe Yehova kele kintuadi na beto. Banguilu yango kindisaka munu mpenza. Munu zabaka ve diambu yina lendaka kumina dibuta na munu . . . Munu bakusaka ti mambu ya luzingu na munu kesoba na manima. Atako plina, munu vuandaka banga ve to kukimona ti munu mesundolama.

Vladimir Popov

Kubutuka: 1967 (na Shakhty, na kizunga ya Rostov)

Disolo ya luzingu: Yandi kele na garaje yina kebongisaka bantomabilu. Yandi kesepelaka kulunda baniosi.

Yandi kuelaka Irina na 1985. Babakaka mbotama kaka na mvula yango. Bakele na bana tatu, zole ya banketo mpe mosi ya bakala

Mambu yina nketo ya Vladimir, Irina, metuba d

Yinki mutindu bampangi kena kusadisa nge na dibuta na nge?

Munu kele mpenza na butondi samu na bampangi na beto ya babakala mpe ya banketo. Bau nionso, baketudilaka beto mpenza dikebi. Munu mekuma na bankundi mingi ya bizunga mingi ya buala ya Russie mpe ya bisika mingi na yinza. Munu kele mpenza na butondi na Yehova na mutindu yandi mepesa beto dibuta ya yinza ya mvimba ya bampangi. Beto monaka nzola mpe dikebi na yandi na mitindu nionso. Katula yau, beto zolaka vuanda ve na dikoki ya kukanga ntima na mambu yayi ya mpasi.

Yevgeniy Razumov

Kubutuka: 1979 (na Gukovo, na kizunga ya Rostov)

Disolo ya luzingu: Yandi kesalaka kisalu ya kubongisa batiyo ya maza

Yandi bikaka kunua nsunga mpe drogi na manima ya kubanda kulonguka Biblia na Bambangi ya Yehova. Yandi bakaka mbotama na 2002

Yandi kuelaka Natalya na 2005

Mambu yina nketo ya Yevgeniy, Natalya, metuba e

Yinki mutindu Yehova kena kusadisa nge na ntangu yayi ya mpasi?

Bakala na munu vuandaka sala kisalu ya ngolo samu na kukokisa bansatu ya dibuta na beto. Munu kumaka na kieta banda bumuana mpe munu kevuandaka ve na dikoki ya kusala. Bubu yayi, munu kele ve na dikoki ya kusala kisalu yina kepesa munu mbongo. [Kasi], munu bandaka kukanisa na mambu yina Yehova kesadilaka munu. Na bantangu yankaka yandi kepesaka munu kiese mpe ngolo yina munu kanisaka ve, mpe munu mebakusa mpenza ti munu kele ve munu mosi. . . . Yau kendimisaka munu ti yandi mezaba mambu yina kena kukumina luzingu na munu mpe yandi kena kutuadisa mambu nionso.

Oleg Shidlovskiy

Kubutuka: 1969 (na Gornyatskiy, na kizunga ya Rostov)

Disolo ya luzingu: Ntangu yandi vuandaka ntuenia, yandi vuandaka sepela na bansaka, mingimingi basketball. Yandi kumaka nlongisi ya fiziki

Yandi bandaka kulonguka Biblia na Bambangi ya Yehova ntangu yandi vuandaka tanga na iniversite. Yandi bakaka mbotama na 1991

Yandi kuelaka Natalya na 1998. Bakele na bana zole ya banketo

Mambu yina nketo ya Oleg, Natalya, metuba f

Yinki sadisaka nge nge tanina makanisi ya mbote lokola bakala na nge kele na buloko?

Munu vuandaka baka ntangu mingi samu na ndongokolo na munu mosi ya Biblia samu yasadisa munu munu nunga kukitungisa na makanisi. Munu kele ve na dikoki ya kusangana na bampangi yankaka samu na maladi ya COVID-19, na yau, samu munu bika diaka bela maladi ya kuniokuama na makanisi, munu kesalaka ntangu nionso bisalu yina kele nzinganzinga ya yinzo na munu.

Munu kele diaka na Tata ya nzola yina kele na [dizulu] mpe na dibuta ya nzola ya kimpeve. Munu kena kuzaba kutu ve yinki mutindu munu lendaka nunga mikakatano nionso yayi. Bampangi kuizaka kondua kuvingila mpe bayuvusaka munu yina balenda sala samu na kusadisa munu.

Beto kena kutatamana kusambila Yehova samu na bampangi yango ya babakala mpe mabuta na bau. Beto mendimisama ti Yehova kepesa bau ngolo mpe kiminu yina bakele na yau nsatu.—Baroma 15:30.

a b c d e f Lokola bampangi yango 6 kele na buloko, beto vuandaka ve na dikoki ya kubaka mambu yina metadila bau.

NEWS RELEASES