Na kilumbu ya 14 Décembre 2021, komite ya ONU yina ketadilaka yinsua ya bantu tubaka ti buala ya Tajikistan zitisaka ve yinsua ya mpangi Tierri Amedzro na kukangaka yandi mpe na kunataka yandi na buala ya Kazakhstan.

Komite yango tubaka ti bakangaka mpangi na “kingolo” mpe bazitisaka ve luwawanu ya yinza ya mvimba na diambu metadila yinsua ya bantu mpe ya politiki. Komite yango tubaka ti guvernema kele ve na yinsua ya kupekisa mpangi Tierri yandi vutuka na Tajikistan kana yandi kele na nsatu ya kuvutuka. Bamfumu ya Leta ya buala ya Tajikistan “fueti sala nionso samu diambu metadila kumanga kuzitisa yinsua ya muntu salama diaka ve na bilumbu kekuiza.”

Na kilumbu ya 4 Octobre 2018, polise ya buala ya Tajikistan sosasosaka na yinzo mosi yina Bambangi ya Yehova vuandaka sala lukutakanu. Bakangaka mpangi Tierri mpe banataka yandi na biro ya nene ya Comité de l’État pour la sécurité nationale ya buala ya Tajikistan, kuna bayuvusaka yandi biuvu. Na kilumbu ya 16 Octobre 2018, zuzi pesaka mpangi Tierri kitumbu na diambu yina yandi zabaka ve. Mpangi Tierri kele muntu ya buala ya Russie mpe yandi vuandaka sala na Tajikistan.

Zuzi tubaka yandi futa mbongo mpe yandi pesaka ntumu banata yandi na buala ya Kazakhstan.

Mpangi Tierri tubaka: “Munu kele na kivuvu ti nzengolo ya komite ya ONU kesala ti kimpuanza na diambu metadila kusambila na buala ya Tajikistan kezitusua mbotembote, mpe bampangi na beto kevuanda na dikoki ya kusambila Yehova na kiyenge ya makanisi.”

Bubu yayi, yakele na mpangi mosi yina kele na buloko na buala ya Tajikistan samu na kiminu na yandi.

Beto kele na kivuvu ti Yehova ketatamana kupesa bampangi yina kena kukutana na mikakatano kiyenge.—Yezaya 26:3.