Na kilumbu ya 24 février 2022, Russie bandaka kunuanisa Ukraine. Yakele na Bambangi ya Yehova kuluta 129 000 yina kena kuzinga kintuadi na bana na bau na buala ya Ukraine. Filiale salaka 27 komite samu na kupesa lusadusu na bampangi na beto Baklisto. Katula yau, samu na kumonisa nzola ya Buklisto, bampangi ya babakala mpe ya banketo kena kusala nionso samu na kupesana lusadusu ya kinsuni mpe ya makanisi, mpe na bafinangani na bau na ntangu yayi ya mpasi.

Bampangi mingi bikanaka na buala yango, kasi bampangi yankaka bakaka nzengolo ya kutina buala yango. Bayina bakaka nzengolo ya kutina Ukraine bakangamaka na milongo ya yinda ya bantu, milongo yankaka vuandaka yinda kuluta bakilometre 30, mpe yalombaka bavingila bilumbu tatu to yiya (4) samu na kubima na buala. Bansamuni yankaka ya buala yango kuendaka sosa bampangi na bau yina vuandaka na milongo yango samu na kupesa bau maza mpe balusadusu yankaka ya mfunu. Ntangu bampangi zengisaka bafrontiere samu na kukuenda na babuala ya pembeni, bayambaka bau na Bambangi ya Yehova yankaka yina simbaka bidimbu ya jw.org, bavuandaka pene ya kubomba bau mpe kupesa bau lusadusu ya mfunu.

• Diambu ya kiadi, na kilumbu ya 1 mars 2022, mpangi na beto mosi ya bakala yina kele dibaba kufuaka mpe nketo na yandi lualaka ngolo ntangu babombi vuandaka kubua na mbanza ya Kharkiv

• Bampangi ya banketo 3 lualaka

• Bansamuni kuluta 5 000 tinaka bayinzo na bau

• Bayinzo 2 kubuaka

• Bayinzo 3 bebisamaka ngolo

• Bayinzo 35 bebisamaka ngolo ve

• Bayinzo ya Kimfumu 2 bebisamaka

• Bansamuni mingi konduaka kuran, baapareyi yina kepesaka tiya vuandaka sala diaka ve, telefone vuandaka sala ve, mpe maza vuandaka ve

• 27 komite samu na kupesa lusadusu salamaka na Ukraine

• Bakomite yango sadisaka bansamuni 867 samu babaka bisika ya kuvuanda yina mekondua bivonza

• Bakomite yango kena kusala nionso samu na kupesa lusadusu ya mfunu, na kifuani madia mpe maza

Bantalu yango mekatuka na balapolo ya ntete yina beto bakaka.

Beto kena kusambila samu bampangi na beto tatamana kuvuanda na nduenga mpe mbakusulu samu bazaba mutindu ya kununga na ntangu yayi ya mikakatano mpe ya mpasi, lokola bakena kutatamana kumonisa nzola ya kimpangi.—Bingana 9:10; 1 Batesalonika 4:9.