Beto kena kutatamana kusambila ngolo samu na bampangi na beto ya babakala mpe ya banketo yina kele na mbanza ya Marioupol, kisika babombi mpe bamvita kena kutatamana. Diambu ya kiadi, bampangi na beto 6 kufuaka ntangu babombi vuandaka kubua. Yau salaka ti bampangi na beto 10 kufua na buala ya Ukraine. Katula yau, bazulunalo mingi tubaka ti yinzo mosi ya teatre yina vuandaka na bantu 1000 bakaka bombi na sabala lutaka. Kasi ata mpangi na beto mosi ve kufuaka, kasi ndambu kaka lualaka bamputa ya fioti.

Bampangi na beto kana 750 tinaka Marioupol, kasi bampangi pene ya 1600 kele ntete na mbanza yango. Mingi kati na bau kele na mbanza ya est, yina buala ya Russie nungaka.

Mutindu beto landaka mbala lutaka, bampangi ya babakala mpe ya banketo pene ya 200 suamaka na yinsi ya ntoto ya yinzo yina kele na Yinzo ya Kimfumu mpe Yinzo ya balukutakanu ya nene. Ntangu beto kumaka na dikoki ya kusolola na bampangi, bampangi tubaka mambu yayi melanda:

“Ntangu babombi vuandaka kubua, bampangi fioti kaka vuandaka banga mpenza. Bayankaka bandaka kuganga. Ntangu beto vuandaka kuwa makelele ya babombi, beto kanisaka ti beto kezola kufua na babombi yango to na tiya. Nkulutu mosi pesaka dibanza ti beto banda kuyimbila miyimbu ya Kimfumu. Beto yimbilaka kintuadi miyimbu 10 tii 15, muyimbu mosi na manima yankaka. Ntangu makelele ya babombi vuandaka kuma kaka ngolo mpe yinzo yina beto vuandaka bandaka kuningana, beto vuandaka yimbila diaka na ndinga ya ngolo. Na manima beto tangaka Nkunga 27 mpe beto tubilaka yau kintuadi. Na manima, bantu nionso bandaka kutubila baverse ya Biblia yina bakezolaka mingi mpe mutindu yakindisaka bau. . . . Beto monaka ti Yehova kele mpenza ‘Tata ya kiadi mingi mpe Nzambi yina kebombaka bantu nionso,’ Muntu yina lenda sadisa beto beto vuanda niee na ntangu ya mpasi.”—2 Bakorinto 1:3, 4.

Bankulutu mpe bampangi ya komite samu na kupesa lusadusu yina kekukiyiminaka vuandaka sosasosa bampangi na bau Baklisto mpe banatinaka bau madia, bilongo yina bavuandaka na yau nsatu, batulaka ata mpe luzingu na bau na kivonza. Na bantangu yankaka, yavuandaka lomba bampangi yango leka na ntoto samu na kukitanina na masasi ntangu bavuandaka sosa bampangi na bau na mbanza yango. Beto kele na fiere samu na bampangi na beto, yina ‘kena kutula luzingu na bau na kivonza’ samu na bampangi na bau Baklisto.—Baroma 16:4.

Lokola gaz mpe kuran kele ve, bampangi ya banketo ya mbanza ya mvimba yina kele na kibakala kelambaka na nganda na tiya ya bankuni. Na manima, bakepesaka madia yango na bansamuni yina mekuma biboba mpe yina kele na kieta. Bankundi mingi zimbisaka bayinzo na bau, bantomabilu na bau, mpe bima na bau ya kinsuni, kasi bakele na butondi samu na nzola mpe lutanunu yina bampangi na bau Baklisto kena kumonisina bau.

Bampangi na beto ya babakala mpe ya banketo yina metina babuala, bakena kutatamana mumeseno na bau na yina metadila mambu ya kimpeve na kulongukaka Biblia kintuadi mpe na kutubilaka bantu yankaka nsangu ya Biblia kana diluaku memonana.

Bantalu yayi melanda kele bantalu yina beto anrejistreke na kilumbu ya 22 Mars 2022. Beto mepesa bantalu yayi na kutadila bansangu ya kedika yina mekatuka na bampangi yina kele kisika mambu yango kena salamina. Kasi, bantalu ya kedika lenda vuanda ya kumonte mingi, na yau, yakele mpasi samu na kusolola na bampangi yina kele na bambanza nionso ya yinza.

• Bansamuni 10 kufuaka

• Bansamuni 27 lualaka

• Bansamuni 33 180 tinaka bayinzo na bau samu na kukuenda bisika yina bamvita kele ve

• Bayinzo 78 ya bampangi bebaka

• Bayinzo 102 ya bampangi bebaka ngolo

• Bayinzo 484 ya bampangi bebaka ngolo ve

• Yinzo ya Kimfumu 1 bebaka

• Bayinzo ya Kimfumu 4 bebaka ngolo

• Bayinzo ya Kimfumu 18 bebaka ngolo ve

• 27 Komite samu na kupesa lusadusu kena kusala na Ukraine

• Bansamuni 25 069 mebaka lusadusu mbala mosi na Komite samu na kupesa lusadusu na bantu yina mebuila mpasi samu babaka bisika ya mbote ya kuvuanda

• Bansamuni 14 308 metina na babuala yankaka, kuna bakena kubaka lusadusu yina mekatuka na bampangi na bau Baklisto