Bampangi na beto ya babakala mpe ya banketo na Ukraine kena kulemba ve kusadisa bampangi na bau Baklisto. Bakena kutatamana kumonasana nzola yina mekondua muyimi.

Mpangi ya nketo Olena kele na bamvula 81. Na kilumbu ya 6 juin, bombi mosi kubuaka pembeni ya yinzo na yandi. Bombi yango buisaka yinzo ya finangani na yandi, yasalaka dibulu ya bametre 7. Kumuangana ya bombi yango vuandaka ngolo mpe yasalaka ti yinzo ya mpangi Olena bebisama ngolo.

Yandi metuba: “Munu vuandaka ya kuleka, mpe kibaka kubuaka pembeni ya yintu na munu. Mupepe yina fulukaka na pusiere kotisaka kitombe ya ngolo. Bitini ya bavere mpe ya mabanga vuandaka kumuangana konso kisika. Munu pesaka Yehova matondo samu munu vuandaka na luzingu.” Bampangi ya babakala mpe ya banketo kuizaka tala mpangi Olena na manima baminiti fioti ya kubua ya bombi, buela diaka mpangi yina yinzo na yandi bebisamaka. Mpangi Olena mebuela: “Ntangu bampangi kuizaka, bakonduaka bampova. Kumona bau pesaka munu kibakala. Munu kukimonaka mbote mutindu bavuandaka penepene na munu.”

Mpangi Serhii, nkulutu yina vuandaka kuenda tala mbala na mbala mpangi Olena kintuadi na bantuenia ya kimvuka, metuba: “Ntangu munu zabaka ti bombi kubuaka penepene ya yinzo ya mpangi Olena, yabangisaka munu mpe munu vuandaka kukitungisa. Kaka ntangu munu monaka ti yandi lualaka ngolo ve kasi yandi vuandaka kaka na bamputa ya fiotifioti ya kati, munu kukimonaka mbote. Kima ya ntete yina mpangi Olena sosaka kubaka na manima ya kubebisama ya yinzo na yandi vuandaka mikanda yina kesasilaka Biblia yina bapesaka yandi mua bilumbu na ntuala.”

Diambu ya kiese, bampangi ya dibuta na yandi sosilaka yandi yinzo yankaka. Kimvuka kena kutatamana kupesa yandi lusadusu ya mfunu, mpe bankulutu kebokilaka mpangi Olena konso kilumbu. Bampangi ya babakala mpe ya banketo pesaka yandi diaka baapareyi samu yandi vuanda na dikoki ya kulanda mbotembote balukutakanu ya kimvuka. Yandi metuba: “Bantangu yankaka munu kelembaka nzutu, kasi balukutakanu kepesaka munu ngolo. Bampangi na munu Baklisto kebokilaka munu mbala na mbala, mpe munu kele na butondi samu na yau.”

Bankuelani mosi tubilaka mambu yina bakutanaka na yau ntangu basuamaka na yinsi ya ntoto ya Yinzo ya Kimfumu mosi kintuadi na bansamuni yankaka 200. Nketo yango sonikaka: “Dikebi ya nzola yina bankulutu tudilaka munu simbaka mpenza ntima na munu. Babambulaka munu mambu yina kuminaka Davidi, yina zolaka kufua ntangu yandi vuandaka nuana na nkosi mpe urse samu na kuvukisa mameme. Ntangu beto vuandaka ya kusuama na yinsi ya ntoto, bankulutu kutanaka na kivonza ya lufua ntangu babimaka samu na kukuenda kusosila beto madia mpe maza, ata mpe petrole samu na kupedisa muinda. Na nzila na yau nde, beto vuandaka na dikoki ya kutuadisa balukutakanu ya kimvuka mpe balukutakanu ya kisalu ya kusamuna. Ata na yinsi ya babombi, bankulutu yango vuandaka kuenda tala mbala na mbala bampangi ya babakala mpe ya banketo yina vuandaka kaka na yinzo na bau, na kunatinaka bau madia mpe maza mpe kubomba bau. Munu kele na luzitu ya mpinda na ntadisi ya bankulutu yango. Tekila mvita banda, munu vuandaka tadila bau lokola banlongisi mpe bansamuni, kasi bubu yayi munu kena kutadila bau lokola bamvungi ya mameme yina beto lenda tudila ntima. Munu kele mpenza na butondi samu na kifuani na bau ya kumonisa kibakala, ya kutanina, mpe ya kutudila ntima!”

Bansamuni ya kimvuka mosi ya Ukraine sonikinaka filiale ya Ukraine na yina metadila bantu yina kena kutuadisa kisalu ya kupesa lusadusu: “Bantima na beto mefuluka na butondi. Kumona mutindu Yehova kena kutanina beto na nzila ya bampangi na beto Baklisto, yakena kukamuisa beto. Beto memona mpenza kedika ya bampova ya Yesu: ‘Na diambu yayi bantu nionso kezaba ti beno kele banlonguki na munu—kana beno kele na nzola kati na beno.’—Yoane 13:35.

Tii na kilumbu ya 21 juin 2022, beto bakaka bantalu yayi melanda na Ukraine. Bantalu yango mekatuka na balapolo yina beto bakaka na bampangi ya Ukraine. Kasi bantalu ya kedika lenda vuanda mingi kuluta, samu beto kele na mukakatano ya kusolola na bampangi yina kele na bizunga nionso ya buala yango.

• Bansamuni 42 kufuaka

• Bansamuni 83 lualaka

• Bansamuni 31 185 metina bayinzo na bau

• Bayinzo 495 kubuaka

• Bayinzo 557 bebisamaka ngolo

• Bayinzo 1 429 bebisamaka ngolo ve

• Bayinzo ya Kimfumu 5 kubuaka

• Bayinzo ya Kimfumu 8 bebisamaka ngolo

• Bayinzo ya Kimfumu 34 bebisamaka ngolo ve

• Bakomite samu na kupesa lusadusu 27 kena kusala na Ukraine

• Bakomite samu na kupesa lusadusu sadisaka bansamuni 52 348 samu babaka bisika ya kuvuanda yina kele ve na bivonza

• Bansamuni 23 433 tinaka na babuala yankaka mpe bampangi na bau Baklisto kena kupesa bau lusadusu