Na bisika yina bamvita kele ngolo, lokola na Marioupol, kuran kele diaka ve, baapareyi yina kepesaka tiya kena sala diaka ve, mpe dikoki ya kusolola na telefone mpe na Internet kele diaka ve. Bafenetre ya bayinzo mingi bebisamaka. Madia mpe maza kele diaka mingi ve. Bampangi ya babakala mpe ya banketo kuluta 2 500 kele ntete ya kukangama na mbanza ya Marioupol. Na bambanza, lokola Boutcha, Tchernihiv, Hostomel, Irpine, Kiev mpe Soumy, “banzila” zibukaka, samu na kutinisa bantu. Yapesaka bampangi na beto mingi dikoki ya kukuenda kisika yina mekondua bivonza.

Mpangi mosi ya bakala ya bamvula 36 yina kele nkulutu mpe mpasudi nzila, yina vuandaka vuanda na mbanza ya Hostomel, yandi tinaka kintuadi na nketo na yandi mpe bibuti na yandi. Yandi kena kutubila mambu yina bakutanaka na yau ntangu mvita bandaka na mbanza yango:

“Baelikoptere vuandaka luta na zulu ya yinzo na beto. Bantomabilu ya mvita vuandaka luta na banzila konso ntangu. Basoda kotilaka beto na yinzo na kingolo ntangu beto vuandaka na yinsi ya ntoto. Mpe mosi na bau bulaka masasi mingi na yinsi ya ntoto, kisika beto vuandaka. Masasi bakaka saki ya kuvukila ya mama na munu, kasi baluadisaka beto ve. Na bawola tatu to yiya , beto vuandaka ningana ve to kusala ve makelele ntangu babombi mpe masasi vuandaka bula na zulu ya bayintu na beto. . . . Na sunka yina landaka ntangu beto vuandaka tina na ntomabilu, mvita bandaka penepene na beto. Bantomabilu ya mvita vuandaka mingi na nzila . . . Yavuandaka mpenza kivonza, kasi kubikana kisika beto vuandaka vuandaka kivonza ya nene kuluta.

“Mambu yayi nionso sobaka mpenza baluzingu na beto. Beto longukaka mutindu ya kusadila bansikudukusu mingi ya Biblia. Na kifuani, beto longukaka mutindu ya kubika kukitungisa samu na mbazi, kusepela na bima ya mfunu yina beto kele na yau, mpe kutudila Yehova ntima na bantangu ya mpasi mingi.”

Beto mezaba ti Nzambi na beto, Yehova, mezaba mbotembote bampasi ya ngolo yina bampangi na beto na Ukraine kena kukutana na yau. Beto kebika ata fioti ve kusadisa bau.—2 Piere 2:9.

Tii na kilumbu ya 10 mars 2022, beto bakaka bantalu yayi melanda na Ukraine:

• Bansamuni 2 kufuaka

• Bansamuni 8 lualaka

• Bansamuni 25 407 tinaka bayinzo na bau samu na kukuenda na bisika yina kele ve na bivonza

• Bayinzo 25 kubuaka

• Bayinzo 59 bebisamaka ngolo

• Bayinzo 222 bebisamaka ngolo ve

• Bayinzo ya Kimfumu 7 bebisamaka

• Bakomite samu na kupesa lusadusu 27 kena kusala na Ukraine

• Bakomite samu na kupesa lusadusu sadisaka bansamuni 10 566 samu babaka bisika ya kuvuanda yina kele ve na bivonza

• Bansamuni 9 635 tinaka na babuala yankaka mpe bampangi na bau Baklisto kena kusadisa bau