Na lusadusu ya bakomite 27 samu na kupesa lusadusu, filiale ya Ukraine kena kutatamana kusadisa bampangi yina kena kubika bayinzo samu na mvita. Banda mvita bandaka, batone kuluta 250 ya bima samu na kupesa lusadusu yina katukaka na Pologne mepesama deja, bima yango kele madia, bilele, mpe bima samu na kutula bunkete. Babuelaka diaka batone kuluta 80 yina katukaka na bampangi ya Ukraine yina kena kuvuanda na bisika yina bivonza kele mingi ve.

Na yina metadila lusadusu yina mpangi Valentyna ya mbanza ya Kiev bakaka na bampangi yina kepesaka maboko na komite samu na kupesa lusadusu, yandi sonikaka: “Ntangu mvita bandaka, yakumaka kivonza kubikana na mbanza. Na yau, munu tinaka na mbanza mosi ya fioti na kizunga ya Cherkasy. Yameluta bangonda zole na ndambu banda munu kumaka awa. Bampangi ya babakala mpe ya banketo ya kimvuka ya mbanza yango vuandaka tudila munu mpenza dikebi. Bavuandaka natina munu bakarton mingi yina vuandaka na madia mpe bima ya kutudila bunkete. Ntima na munu fulukaka na kiese mpe na butondi, na manima ya kubaka balusadusu nionso yayi. Na mosi ya bakarton yango, vuandaka na desen mosi yina Blanca ya bamvula 4 salaka samu na munu mpe yandi tulaka buati mosi ya bakulere na kati . . . munu kelunda mbote kado yango. Munu kele mpenza na butondi na bampangi na munu ya babakala mpe ya banketo mpe mingimingi na Yehova.”

Mpangi mosi diaka ya nketo ya bamvula 83 na nkumbu ya Valentyna, yina kele na kieta, ya mbanza ya Sieverodonetsk sonikaka: “Ntangu mvita bandaka, munu vuandaka kaka munu mosi. Muana na munu kaka mosi yina munu vuandaka na yandi kufuaka tekila mvita banda. Yavuandaka bangisa munu ngolo ntangu babombi bandaka kubua na mbanza kilumbu ya mvimba. Maza, kuran, gaze, vuandaka diaka ve, mpe Internet vuandaka ya mbote ve. Munu kele mpenza na butondi na bampangi yina tulaka luzingu na bau na kivonza samu na kusadisa munu.”

Yandi mebuela: “Na manima, bampangi nataka munu mpe bampangi yankaka zole ya kieta na Dnipro, mbanza yina vuandaka na kivonza ve. Na mbanza yango, bampangi sadisaka munu munu baka kisika ya kuvuanda. Bubu yayi mukena kuvuanda kintuadi na dibuta yina kele Baklisto, yina kena kutanina munu. Bakena kusadila munu mambu lokola mpangi na bau ya kinsuni. Basumbilaka munu Androide samu munu vuanda na dikoki ya kulanda mpe kupesa bakomantere na balukutakanu. Munu kesala zimbakana ata fioti ve kimpombo yina bampangi monisinaka munu.”

Bantima na beto mefuluka na kiese mpe na butondi samu na Tata na beto ya nzola, Yehova, yina kena kutatamana kutanina bampangi na beto ya nzola ya Ukraine samu ‘bakondua ve kima ya mbote.’—Nkunga 34:10.

Tii na kilumbu ya 7 juin 2022, beto bakaka bantalu yayi melanda na Ukraine. Bantalu yango mekatuka na balopolo yina beto bakaka na bampangi ya Ukraine. Kasi bantalu ya kedika lenda vuanda mingi kuluta, samu beto kele na mukakatano ya kusolola na bampangi yina kele na bizunga nionso ya buala yango.

• Bansamuni 42 kufuaka

• Bansamuni 82 lualaka

• Bansamuni 46 145 metina bayinzo na bau

• Bayinzo 469 kubuaka

• Bayinzo 540 bebisamaka ngolo

• Bayinzo 1 405 bebisamaka ngolo ve

• Bayinzo ya Kimfumu 5 kubuaka

• Bayinzo ya Kimfumu 8 bebisamaka ngolo

• Bayinzo ya Kimfumu 33 bebisamaka ngolo ve

• Bakomite samu na kupesa lusadusu 27 kena kusala na Ukraine

• Bakomite samu na kupesa lusadusu sadisaka bansamuni 50 663 samu babaka bisika ya kuvuanda yina kele ve na bivonza

• Bansamuni 22 995 tinaka na babuala yankaka mpe bampangi na bau Baklisto kena kupesa bau lusadusu