Na lusadusu ya Yehova, mpangi Liudmyla Mozul mpe mpangi Kateryna Rozdorska kena kukanga ntima na mambu ya mpasi yina bamvita kena kubimisa. Babakala na bau, mpangi Petro Mozul mpe mpangi Dmytro Rozdorskyi, vuandaka bampangi ya ntete yina kufuaka ntangu mvita bandaka na Ukraine. Diambu ya kiadi, tii bubu yayi, bampangi 34 ya babakala mpe ya banketo mekufua na mvita yango.

Petro mpe Liudmyla bakaka mbotama na 1994. Dikuela na bau salaka bamvula 43.

Liudmyla metuba: “Bampangi na munu Baklisto kekindisaka munu konso kilumbu na bampova ya lukindusu. Bakena kutatamana kaka kubokila munu. Letre yina katukaka na filiale ya Ukraine bimisaka munu maza meso samu na bampova ya kukindisa yina munu tangaka.”

Mvita bandaka na kilumbu ya 24 février 2022. Petro, yina vuandaka nsadisi na kisalu na kimvuka ya ndinga ya mababa, kufuaka ntangu yandi mpe dibuta na yandi vuandaka sosa kutina samu na babombi yina vuandaka kubua na mbanza ya Kharkiv na kilumbu ya 1 mars 2022.

Na kilumbu yango, na manima ya kubua ya babombi bilumbu mingi, baavion ya mvita vuandaka luta na zulu mpe yabandaka kukitisa babombi na mbanza yango. Dibuta yango bongisaka bima ya mfunu mpe bakuendaka na manima ya baminiti 30. Petro mpe Liudmyla vuandaka na ntomabilu mosi. Muana na bau ya bakala, Oleksii, mpe nketo na yandi, Maryna, vuandaka na ntomabilu yankaka. Liudmyla metuba: “Beto vuandaka nata ntomabilu na balabala mosi ntangu baavion ya mvita bandaka kubula babombi mpe yabakaka beto. Babombi yango bebisaka fioti ntomabilu na beto.”

Petro, yina vuandaka na bamvula 67, lualaka ngolo, atako yandi salaka nionso samu na kutina kututana na ntomabilu ya Oleksii. Yandi mpe Liudmyla, banataka bau na opitale, kisika Petro fuilaka na manima. Liudmyla lualaka na dikulu mpe na kivumu na bisengo ya fiotifioti yina babombi vuandaka bimisa. Oleksii mpe Maryna lualaka ve. Na manima ya bilumbu tatu ya kubima na opitale, Liudmyla zabaka ti Petro kufuaka.

Liudmyla metuba: “Ntangu munu kekanisaka mingi na kimpombo ya Yehova mpe na lukanu na yandi ya kitoko, munu kebakaka kiyenge mingi na ntima. Munu mendimisama ti na yinza ya yimpa munu kemona diaka bakala na munu, mpe munu kena kuvingila na nsatu ya ngolo kilumbu yango ya kitoko.”

Dikuela ya Dmytro mpe Kateryna salaka bamvula 8. Yandi tubilaka nketo na yandi bampova ya nsuka ntangu yandi vuandaka na kisalu ti “munu kevuanda na yinzo ntama mingi ve.”

Na manima ya bawola, na kilumbu ya 8 mars 2022, nkundi na yandi mosi ya kisalu bokilaka Kateryna mpe yandi tubilaka yandi ti Dmytro diataka mine mpe banataka yandi na opitale. Yandi kufuaka na manima ya bawola 5 ntangu basalaka yandi operasion.

Ntangu Kateryna zabaka ti Dmytro mekufua, yandi metuba: “Na mpipa yango, Yehova simbaka kaka diboko na munu ve, kasi yandi nataka munu na maboko na yandi. Munu kukimonaka ti Yehova vuandaka mpenza penepene na munu.”

Mpangi Dmytro vuandaka na bamvula 28, mpe yandi bakaka mbotama na 2006 mpe yandi vuandaka nkulutu na kizunga ya Donetsk na Ukraine.

Na manima ya diskur ya lufua ya Dmytro, Kateryna salaka vuayaje ya bawola 12 samu na kukuenda na kizunga yina mekondua kivonza na Ukraine. Yandi metuba: “Bampangi ya babakala mpe ya banketo ya Ukraine mpe ya babuala yankaka pesaka munu balukindusu. Bamonisinaka munu nzola mingi, mpe yasalaka ti munu kukimona mbote.”

Yandi tubaka diaka: “Munu kebakaka diaka lukindusu na kisalu ya kusamuna. . . . Kana munu mebanda kukitungisa samu na mambu yango ya mpasi, munu ketangaka na makanisi baverse ya Biblia, lokola Bafilipi 4:6, 7.”

Beto mendimisama ti Yehova ketatamana kukindisa mpe kubomba bampangi na beto ya babakala mpe ya banketo ya nzola yina kena kufuila bampangi yina bakezolaka samu na mvita yina kele na Ukraine.—Nkunga 61:1-3.