Na kilumbu ya 24 février 2022, munu lamukaka samu munu kuwaka makelele ya ngolo. Na ebandeli, munu kanisaka yavuandaka bakake samu makelele yango vuandaka katuka na nganda, kasi munu bakusaka ti yavuandaka nde babombi vuandaka kubua.

Yalombaka munu tina yinzo na munu yina vuandaka na katikati ya mbanza ya Marioupol. Kilumbu yina landaka, munu kuendaka na yinzo ya nkaka na munu Irina, yina kevuandaka penepene ya mbanza. Na manima, mama na munu, Kateryna, kuizaka kisika yina munu, nkaka mpe mpangi na munu vuandaka. Yinzo ya nkaka na munu sadisaka beto beto suama samu na mua ntangu, kasi beto vuandaka leka na yinzo ya yinsi ya ntoto samu na bilumbu mingi.

Kilumbu mosi diaka, bombi mosi kubuaka na bilanga na beto ntangu beto vuandaka sosa kusuama na yinzo ya yinsi ya ntoto. Makelele ya bombi yango vuandaka ngolo. Munu sambilaka ngolo Yehova. Na manima ya sabala mosi, beto bakusaka ti yavuandaka diaka mbote ve kutatamana kuvuanda na yinzo ya nkaka, na yau beto bakaka nzengolo ya kuvutuka na mbanza samu na kusosa mutindu ya kutina. Munu sambilaka Yehova samu yandi tanina beto mpe yandi sadisa beto beto bima na kisika yango.

Na sunka ya kilumbu ya 4 mars, ata train mosi ve vuandaka katuka na mbanza ya Marioupol, samu mbanza yango vuandaka na basoda mingi yina vuandaka sunga. Na yau, beto kuendaka suama na sale mosi, kisika bakesalaka bateyatre kintuadi na bankama ya bantu, mpe beto salaka kuna bilumbu 10. Yalombaka beto leka na ntoto, samu bantu mingi vuandaka kuna. Kisika yango vuandaka doti, mpe yavuandaka mpasi kubaka madia mpe maza tiya. Yalombaka beto telema na mulongo bawola mingi.

Kilumbu mosi, bombi kubuaka pembeni ya sale yina beto suamaka. Bombi yango bimisaka bivonza mingi, yina salaka ti bafenetre mingi panzana, mupepe ya madidi ya ngolo vuandaka kota na kati ya sale yango.

Yinki sadisaka munu na ntangu yango ya mpasi? Disolo ya Yobi. Ntangu munu monaka bantu vuandaka banga samu na makelele ya babombi yango, munu vuandaka tanga disolo ya Yobi na Biblia. Yasalaka ti munu kukimona mpenza mbote. Yavuandaka lokola munu vuandaka kintuadi na Yobi na sale yango, mpe munu vuandaka tubila yandi: “Ntangu yayi munu mebakusa mbote mutindu nge vuandaka kukimona!” Yobi zimbisaka bima mingi: Dibuta na yandi, mavimpi na yandi, mpe bima na yandi ya kinsuni. Munu zimbisaka kaka bima ya kinsuni. Munu vuandaka na dibuta na munu, beto nionso vuandaka ya moyo mpe na mavimpi ya mbote. Na ntangu yango, munu bakusaka ti mambu ya luzingu na munu vuandaka ve mpasi kuluta yina ya Yobi. Yau salaka ti munu kukimona mbote.

Na kilumbu ya 14 mars, beto kuwaka ti grupe mosi ya bantu nungaka kutina mbanza yango. Na yau, beto diaka beto bakaka nzengolo ya kutina. Beto kumaka na dikoki ya kubaka ntomabilu yina sadisaka beto kintuadi na bantu yankaka yina vuandaka na beto na sale yango samu beto tina.

Grupe mosi ya bantomabilu 20 bikaka mbanza yango. Beto bantu 14 vuandaka na manima ya wagon ya ntomabilu. Bambombi vuandaka kubua na nzila penepene na beto ntangu beto vuandaka sala vuayaje. Munu vuandaka sambila mbala na mbala. Ntangu beto nungaka kubika mbanza ya Marioupol na luvuvamu nionso, nati ya ntomabilu telemaka, yandi bimaka na nganda, mpe yandi bandaka kudila ngolo. Yandi nungaka kutina ba mine ya yinsi ya ntoto yina vuandaka na nzila. Na manima ya bilumbu zole ntangu beto tinaka, beto bakaka nsangu ti, sale yina beto vuandaka bakaka babombi, mpe yakufuaka bantu kana 300.

Na manima ya bawola 13, beto kumaka na mbanza ya Zaporizhia. Na sunka yina landaka, beto bakaka train yina vuandaka nata na mbanza ya Lviv. Yavuandaka na bantu 16 na wagon mosi yina kenataka kaka bantu 4. Yavuandaka dikaka mpe tiya na kati. Munu vuandaka kaka ya kutelema na kuluare ya train yango. Yavuandaka kisika kaka mosi yina muntu lendaka baka mupepe ya mbote. Na kilumbu ya 16 mars, beto kumaka na mbanza ya Lviv, kisika bampangi na beto ya babakala mpe ya banketo yambaka beto mbote. Beto kuendaka vuanda na Yinzo ya Kimfumu na bilumbu yiya (4) yina landaka. Dikebi yina bampangi tudilaka beto, salaka ti munu dila. Yavuandaka nde dikabu ya Yehova.

Na kilumbu ya 19 mars, beto bakaka nzengolo ya kubika buala ya Ukraine mpe beto kuendaka vuanda penepene ya buala ya Pologne, kisika nkaka na munu ya nketo, mama, mpangi na munu, mpe munu, bayambaka beto na bampangi na beto Baklisto. Bapesaka beto konso kima yina beto vuandaka na yau nsatu. Bamonisinaka beto nzola mingi.

Munu kele kaka na bamvula 19, kasi na manima ya kukutana na mambu nionso yayi ya mpasi, munu bakusaka ti yakele mbote kukumisa kiminu ngolo ntangu mambu nionso kena kutambula ntete mbote. Kiminu kesadisa nge samu na kuvuka. Kana munu vuandaka sala ve ndongokolo ya Biblia munu mosi tekila mvita, yazolaka vuanda mpasi mingi samu na munu.

Yehova kele Tata ya nzola. Na ntangu yango nionso ya mpasi, munu kukimonaka ti yandi vuandaka nata munu na diboko na yandi ya kibakala mpe yandi vuandaka tuadisa munu na nzila ya mvimba. Munu kelemba ve kupesa Yehova matondo samu na konso diambu yina yandi mesala samu na munu.—Yesaya 41:10.