Na kilumbu ya 10 Avril 2022, mpangi John Hunguka, yina kele mpangi ya komite ya filiale na Zimbabwe, tubaka kubimisama ya Biblia Mbangudulu ya Yinza ya Yimpa ya Masonukua ya Greki ya Buklisto na ndinga ya Chitonga (Zimbabwe) yina lenda tangama na nzila ya apareyi. Bantu 500 landaka programe yina baanrejistreke. Kubimisama na yau ya papie kevuanda na ngonda ya Juillet 2022.

Chitonga kele ndinga yina ketubamaka mingi na bantu ya Tonga, yina kezingaka na sud mpe na ouest ya bizunga ya Zambie mpe na nord ya Zimbabwe. Biblia Mbangudulu ya Yinza ya Yimpa ya Masonukua ya Greki ya Buklisto bimisamaka na ndinga ya Chitonga (yina ketubamaka na Zambie) na 2014. Yakele mbala ya ntete yina Biblia banguluaka mpe bimisamaka na ndinga ya Chitonga (ya Zimbabwe).

Na ebandeli, yalombaka na bantu yina ketubaka ndinga ya Chitonga (ya Zimbabwe basadila kaka bambangudulu ya ndinga ya Chitonga yina ketubamaka na Zambie.

Lokola ndinga ya Chitonga ya Zambie mpe ndinga ya Chitonga (ya Zimbabwe) kele mutindu mosi, yakele na bampova mpe bafraze mingi yina bansasulu na yau kele ya kusuasana. Na kifuani, na Biblia Mbangudulu ya Yinza ya Yimpa ya Masonukua ya Greki ya Buklisto ya ndinga ya Chitonga ya Zambie, 1 Yoane 3:17 metuba ti Muklisto fueti monisa ntima kiadi na mpangi na yandi yina kele “na nsatu.” Kasi, na ndinga ya Chitonga (ya Zimbabwe), kaka fraze yango mebangulua lokola mpangi yina kele “kilawu.” Ekipi ya mbangudulu bongisaka ndinga yango samu bantu yina ketubaka ndinga ya Chitonga (ya Zimbabwe) babakusa mbotembote.

Mbangudi mosi tubaka: “Na ntama, munu vuandaka lutisa ntangu mingi na kisalu ya kusamuna samu na kusasila mbotembote bampova ya baverse na bantu yina beto vuandaka samunina. Bubu yayi munu lenda tanga kaka verse mpe kubika Mpova ya Nzambi yau mosi sasila bau.”

Beto kena kusepela kintuadi na bampangi yina ketubaka ndinga ya Chitonga (ya Zimbabwe) yina kena kusadila mbangudulu ya yimpa samu na kuzabisa bantu mingi yina kele na ntima yina mebonga “nzila ya luzingu.”—Nkunga 16:11.