DISOLO YA NDONGOKOLO 31
MUYIMBU 12 Yehova, Nzambe monene
Diambu yina Yehova salaka samu na kuvukisa bantu ya masumu
“Nzambi zolaka yinza mingi mpenza yau yina yandi pesaka Muana na yandi mosi yina butukaka.”—YOA. 3:16.
MAMBU YINA BETO KELONGUKA
Mutindu Yehova bakaka nkubukulu samu na kusadisa beto beto nunga disumu mpe mutindu yandi salaka ti beto vuanda na dikoki ya kubaka luzingu ya mvula na mvula, kondua disumu.
1-2. (a) Yinki kele disumu, mpe yinki mutindu beto lenda nunga mvita na beto na yau? (Tala diaka “Mpova yina bamesasila.”) (b) Yinki beto ketubila na disolo yayi mpe na masolo yankaka yina kele na Yinzo’a zulu ya Nkengi yayi? (Tala diaka “Letre samu na bantangi” na Yinzo’a zulu ya Nkengi yayi.)
NGE kesepela kuzaba mutindu Yehova Nzambi kezolaka nge? Mutindu ya mbote ya kuzaba yau kele: Kulonguka diambu yina yandi salaka samu na kuvukisa nge na disumu mpe na lufua. Disumu a kele mbeni mosi ya yimbi mpenza yina beto lenda nunga ve na ngolo na beto mosi. Konso kilumbu beto kesalaka masumu, mpe beto kekufuaka samu na disumu. (Rom. 5:12) Kasi, yakele na nsangu mosi ya mbote. Na lusadusu ya Yehova, beto lenda nunga disumu. Ya kedika, beto kenunga yau mpenza!
2 Banda bamvula kana 6 000, Yehova Nzambi kesadisaka bantu samu banunga disumu. Samu na yinki? Samu yandi kezolaka beto. Yandi kezolaka bantu banda na ebandeli, na yau yandi kesalaka mambu mingi samu na kusadisa bau na mvita yango. Nzambi mezaba ti disumu kenataka na lufua, mpe yandi zola ve ti beto kufua. Yandi kele na nsatu beto zinga mvula na mvula. (Rom. 6:23) Yau nde diambu yandi mezola samu na nge. Na disolo yayi, beto ketubila biuvu tatu: (1) Yinki mutindu Yehova pesaka kivuvu na bantu ya masumu? (2) Yinki mutindu bantu ya masumu yina Biblia metubila ndimamaka na Yehova? (3) Yinki mutindu Yesu kuizaka vukisa bantu ya masumu?
YINKI MUTINDU YEHOVA PESAKA KIVUVU NA BANTU YA MASUMU?
3. Yinki mutindu bibuti na beto ya ntete kumaka bansumuki?
3 Ntangu Yehova salaka bakala mpe nketo ya ntete, yandi vuandaka na nsatu ti bazinga na kiese. Yandi pesaka bau kisika mosi ya kitoko, dikabu ya dikuela, mpe kiyekua mosi mfunu. Yalombaka bafulusa ntoto na bana na bau, bakumisa ntoto ya mvimba paradiso lokola bilanga ya Edeni. Yandi pesaka bau kaka ntumu mosi ya pete. Mpe yandi luengisaka bau ti kana bamemanga kuzitisa ntumu yango mpe bametombokila yandi na nko, bakekufua. Beto mezaba diambu yina salamaka. Mbasi mosi ya yimbi, yina vuandaka zola ve Nzambi mpe bantu, vunaka Adamu mpe Eva samu bamanga kuzitisa Nzambi. Adamu mpe Eva ndimaka luvunu yango. Lokola batudilaka ve Tata na bau ya nzola ntima, basalaka disumu. Mutindu beto mezaba yau, bampova ya Yehova kokisamaka. Samu na kukondua luzitu na bau, Adamu mpe Eva niokuamaka samu na luzingu na bau ya mvimba. Banunaka, mpe nsukansuka bakufuaka.—Eba. 1:28, 29; 2:8, 9, 16-18; 3:1-6, 17-19, 24; 5:5.
4. Samu na yinki Yehova keyinaka disumu mpe kesadisaka beto samu beto nunga yau? (Baroma 8:20, 21)
4 Yehova sonikisaka disolo yango samu na mambote na beto. Yakesadisaka beto beto bakusa samu na yinki yandi keyinaka mpenza disumu. Disumu kekabulaka beto na Tata na beto, mpe yakenataka beto na lufua. (Yis. 59:2) Yakele samu na mfunu yango Satana, kisemua ya kimpeve yina kotisaka mvualangani yango, kezolaka disumu mpe ketindaka bantu na kusala yau. Mbala yankaka yandi kanisaka ti yandi nungaka mvita mosi ya nene na Edeni. Kasi yandi bakusaka ve nzola ya Yehova. Nzambi sobaka ata fioti ve lukanu na yandi samu na bana ya Adamu mpe Eva. Yandi kezolaka bantu, yau yina yandi pesaka mbala mosi kivuvu samu na bantu nionso. (Tanga Baroma 8:20, 21.) Yehova zabaka ti ndambu ya bana yango kepona kuzola yandi mpe kusosa lusadusu na yandi samu na kununga disumu. Mpe lokola yandi kele Tata mpe Mvangi, yandi sadisaka bau bakatuka na kinanga ya disumu mpe bapusana penepene na yandi. Yinki Yehova salaka samu na kukokisa diambu yango?
5. Yinki ntangu Yehova salaka diambu ya ntete yina pesaka kivuvu na bantu ya masumu? Sasila. (Ebandeli 3:15)
5 Tanga Ebandeli 3:15. Diambu ya ntete yina Yehova salaka samu na kupesa kivuvu kele mutindu yandi tubaka kitumbu yina yandi kepesa Satana. Nzambi tubaka ti yakevuanda na “muana” mosi yina kevukisa bantu. Nsukansuka muana yango kekufua Satana mpe kemanisa mambu nionso ya mpasi yina yandi bimisaka na Edeni. (1 Yoa. 3:8) Kasi, muana yango keniokuama samu kukokisa diambu yango. Satana keluadisa yandi na kitambi to kekufua yandi. Yakesala Yehova mpasi mingi na ntima. Kasi mpasi yango kevuanda na mfunu mpenza, samu na nzila na yau bantu mingi kevuka na disumu mpe na lufua.
YINKI MAMBU BANTU YA MASUMU YINA BIBLIA METUBILA SALAKA SAMU YEHOVA NDIMA BAU?
6. Yinki mambu babakala ya kukuikama, na kifuani Abele mpe Noa salaka samu na kupusana penepene na Yehova?
6 Malembemalembe, Yehova monisaka puelele mutindu bantu ya masumu lendaka pusana penepene na yandi. Abele, muana ya zole ya Adamu mpe Eva, vuandaka muntu ya ntete yina monisaka kiminu na Yehova na manima ya diambu ya mpasi yina salamaka na Edeni. Lokola Abele vuandaka zola Yehova mpe yandi vuandaka na nsatu ya kusepedisa mpe ya kupusana penepene na Yandi, yandi pesaka Yehova nkayilu. Abele vuandaka mvungi ya bibulu, na yau yandi bakaka ndambu ya bana ya mameme na yandi mpe yandi pesaka yau nkayilu na Yehova. Yinki mutindu Yehova tadilaka nkayilu yango? Yandi “ndimaka Abele mpe nkayilu na yandi.” (Eba. 4:4) Yehova ndimaka diaka bankayilu ya bantu yankaka yina vuandaka zola yandi mpe kutudila yandi ntima—na kifuani Noa. (Eba. 8:20, 21) Na kundimaka bankayilu yango, Yehova monisaka ti yandi lendaka ndima diaka bantu ya masumu mpe balendaka pusana penepene na yandi. b
7. Yinki dilongi beto mebaka mutindu Abrahami ndimaka kupesa muana na yandi kaka mosi lokola nkayilu?
7 Yehova lombaka Abrahami, bakala mosi ya kiminu ya kukamua, yandi sala diambu mosi ya mpasi mpenza—yandi pesa Yisaka, muana na yandi kaka mosi lokola nkayilu. Kondua ntembe, diambu yango tungisaka mpenza Abrahami. Kasi, yandi kukibongisaka samu na kuzitisa Yehova. Ntangu Abrahami kumaka pene ya kufua muana na yandi, Nzambi pekisaka yandi. Kasi, kifuani yango kena kulonga kedika mosi ya mfunu na bantu nionso ya kiminu. Yehova vuandaka pene ya kupesa Muana na yandi kaka mosi ya nzola lokola nkayilu. Yehova kezolaka mingi bantu.—Eba. 22:1-18.
8. Bankayilu vuandaka monisa yinki na kutadila Nsiku? (Balevi 4:27-29; 17:11)
8 Ntangu Yehova pesaka Nsiku na Bayisaele, yandi tubilaka bau bapesaka bankayilu ya bibulu samu na nlemvo ya masumu na bau. (Tanga Balevi 4:27-29; 17:11.) Bankayilu yango vuandaka monisa nkayilu mosi yina kevukisa bantu na disumu samu na mvimbamvimba. Nzambi tubilaka bambikudi na yandi basonika samu na muana yango yina lakamaka. Basasilaka ti Muana yango ya spesiale ya Nzambi, keniokuama mpe bakekufua yandi. Bakekufua yandi lokola dimeme ya nkayilu. (Yis. 53:1-12) Kanisa ntete: Yehova bakaka nkubukulu samu Muana na yandi kaka mosi ya nzola, pesama nkayilu samu na kuvukisa bantu, yavuanda mpe nge, na disumu mpe na lufua!
YINKI YESU SALAKA SAMU NA KUVUKISA BANTU NA DISUMU?
9. Yinki Yoane Mbotiki tubaka samu na Yesu? (Baebre 9:22; 10:1-4, 12)
9 Na mvula 29, Yoane Mbotiki monaka Yesu muntu ya Nazareti mpe yandi tubaka: “Tala, Muana Dimeme ya Nzambi yina kena kukatula disumu ya yinza!” (Yoa. 1:29) Bampova yango memonisa ti Yesu vuandaka muana yina lakamaka banda ntama. Yesu pesaka luzingu na yandi lokola nkayilu. Kubanda ntangu yango, bantu ya masumu kumaka na kivuvu mosi ya ngolo—kununga disumu samu na mvimbamvimba.—Tanga Baebre 9:22; 10:1-4, 12.
10. Yinki mutindu Yesu monisaka ti yandi “kuizaka bokila” bansumuki?
10 Yesu tulaka dikebi mingimingi na bantu yina vuandaka kukimona yimbi samu bavuandaka bantu ya masumu mpe yandi bokilaka bau samu bakuma banlonguki na yandi. Yandi zabaka ti disumu nde kesalaka ti bantu niokuama. Na yau, yandi vuandaka sadisa bantu yina zabanaka lokola bantu ya masumu. Na kusadilaka kifuani mosi, yandi tubaka: “Bantu yina kele na nzutu ya mbote kevuandaka ve na nsatu ya munganga, kasi nde bantu yina kena kubela.” Yandi buelaka: “Munu kuizaka bokila bantu ya kukuikama ve, kasi bansumuki.” (Mat. 9:12, 13) Mpe yau nde diambu Yesu salaka. Na nzola nionso, Yesu nlemvukilaka masumu ya nketo yina pangusaka makulu na yandi na maza meso na yandi. (Luka 7:37-50) Yandi longaka bakedika ya mfunu na nketo Musamaria na dibulu ya maza, atako yandi zabaka ti yandi vuandaka zinga na bakala ya ngana. (Yoa. 4:7, 17-19, 25, 26) Nzambi pesaka Yesu kilendo ya kumanisa lufua, diambu yina disumu kebimisaka. Na yinki mutindu? Yesu futumunaka babakala, banketo, mpe bana.—Mat. 11:5.
11. Samu na yinki bantu ya masumu vuandaka pusana penepene ya Yesu?
11 Yakele diambu ya kukamua ve kumona ti ata bantu yina vuandaka sala mambu ya yimbi vuandaka pusana penepene ya Yesu. Yandi vuandaka monisina bau ntima kiadi mpe yandi vuandaka kukitula na kisika na bau. Bavuandaka kukimona mbote kupusana penepene na yandi. (Luka 15:1, 2) Mpe Yesu vuandaka pesa bafelisitasion mpe kusadisa bantu ya mutindu yina samu bamonisaka kiminu na yandi. (Luka 19:1-10) Yandi monisaka na mutindu ya kukoka ntima kiadi ya Tata na yandi. (Yoa. 14:9) Bampova mpe bisalu ya Yesu melonga beto ti Yehova kele na ntima kiadi mpe yandi kezolaka bantu ya masumu. Yesu sadisaka bantu ya masumu yina vuandaka na nsatu ya kusala bansobolo mpe kulanda yandi.—Luka 5:27, 28.
12. Yinki Yesu tubaka na diambu metadila lufua na yandi mosi?
12 Yesu zabaka mambu yina kekumina yandi. Mbala mingi, yandi vuandaka tubila banlonguki na yandi ti baketeka yandi mpe bakekoma yandi na yinti. (Mat. 17:22; 20:18, 19) Yandi zabaka ti nkayilu na yandi kekatula disumu ya yinza, mutindu Yoane mpe bambikudi samunaka yau. Yesu tubaka diaka ti na manima ya kupesa luzingu na yandi, yandi “kebenda bantu ya mitindu nionso” na yandi. (Yoa. 12:32) Bantu ya masumu lendaka sepedisa Yehova na kundimaka Yesu lokola Mfumu na bau mpe na kulandaka kifuani na yandi. Kana bamesala mutindu yina, nsukansuka ‘bakekatuka na kinanga ya disumu.’ (Rom. 6:14, 18, 22; Yoa. 8:32) Na yau, na kibakala nionso, Yesu ndimaka lufua ya mpasi samu na kuvukisa beto.—Yoa. 10:17, 18.
13. Yinki mutindu Yesu kufuaka, mpe yinki lufua na yandi kena kulonga beto samu na Yehova Nzambi? (Tala diaka foto.)
13 Batekaka Yesu, bakangaka yandi, bafingaka yandi, bavuninaka yandi mambu, mpe baniokolaka yandi. Nsukansuka basoda komaka Yesu na yinti mpe bakufuaka yandi. Yesu niokuamaka mpe yandi kangaka ntima na kukuikama na bampasi yango nionso. Kasi, Yehova monaka mpasi mingi kuluta Yesu ntangu yandi vuandaka tala Muana na yandi kena kuniokuama. Yehova vuandaka na kilendo mpe na dikoki ya kusala ti Muana na yandi bika niokuama, kasi yandi salaka yau ve. Yehova vuandaka zola muana na yandi mingi mpenza, na yau samu na yinki yandi bikaka nzila ti yandi mona mpasi mpe yandi kufua? Samu Yehova kezolaka beto. Yesu tubaka: “Nzambi zolaka yinza mingi mpenza yau yina yandi pesaka Muana na yandi mosi yina butukaka, samu muntu nionso yina kemonisa kiminu na yandi yandi kufua ve kasi yandi baka luzingu ya mvula na mvula.”—Yoa. 3:16.
Na kubikaka ti bakufua Muana na yandi, Yehova monaka mpasi ya ngolo samu na kukatula beto na kinanga ya disumu mpe ya lufua (Tala paragrafe 13)
14. Yinki mambu nkayilu ya Yesu melonga nge?
14 Nkayilu ya Yesu kele kidimbu yina meluta nene yina kemonisaka ti Yehova kezolaka bana ya Adamu mpe Eva. Yakena kumonisa ti Yehova kezolaka nge mingi. Yandi pesaka Muana na yandi kaka mosi ya nzola mpe yandi kangaka ntima na mpasi ya ngolo samu na kuvukisa nge na disumu mpe na lufua. (1 Yoa. 4:9, 10) Ya kedika, yandi kele na nsatu ya kusadisa mosimosi kati na beto samu beto nuanisa—mpe beto nunga disumu!
15. Yinki beto fueti sala samu beto baka mambote ya nkayilu ya nkudulu ya Yesu, yina kele dikabu ya Nzambi?
15 Dikabu ya Nzambi, nkayilu ya nkudulu ya Muana na yandi mosi yina butukaka, mesala ti beto vuanda na dikoki ya kubaka nlemvo ya masumu na beto. Kasi samu beto baka nlemvo ya Nzambi, beto fueti sala diambu mosi. Yinki diambu? Yoane Mbotiki mpe Yesu Klisto yandi mosi pesaka mvutu: “Beno balula bantima, samu Kimfumu ya Nzambi mekuma pene.” (Mat. 3:1, 2; 4:17) Na yau kubalula ntima kele diambu mosi ya mfunu kana beto zola mpenza kunuanisa disumu mpe kupusana penepene ya Tata na beto ya Nzola. Kasi yinki zola monisa kubalula ntima, mpe yinki mutindu yakesadisaka beto samu beto nuanisa kimuntu na beto ya kukondua kukoka? Disolo melanda kepesa mvutu.
MUYIMBU 18 Tózala na botɔndi mpo na lisiko
a MPOVA YINA BAMESASILA: Na Biblia, mpova “disumu” lenda monisa mambu ya yimbi, kuzinga to kusala diambu yina kele ve na nguizani na bansikudukusu ya Yehova. Kasi mpova “disumu” lenda monisa diaka kimuntu ya kukondua kukoka yina Adamu bikilaka beto. Beto nionso beto kekufuaka samu na disumu yina Adamu bikilaka beto.
