DISOLO YA NDONGOKOLO 35
MUYIMBU 123 Tótosaka ebongiseli ya Teokrasi
Lusadusu samu na bantu yina bakatulaka na kimvuka
“Kiese kevuanda mingi na dizulu samu na nsumuki mosi yina mebalula ntima kuluta samu na bantu ya lunungu 99 yina yalomba ve babalula ntima.”—LUKA 15:7.
MAMBU YINA BETO KELONGUKA
Mfunu yina yakelombaka bakatula bantu yankaka na kimvuka mpe mutindu bankulutu lenda sadisa bantu ya mutindu yina samu bapusana diaka penepene ya Yehova.
1-2. (a) Yinki mutindu Yehova ketadilaka bantu yina kesalaka masumu na nko? (b) Yinki kivuvu Yehova kele na yau samu na bansumuki?
YEHOVA kele ve Nzambi yina kendimaka mambu nionso; yandi keyinaka disumu. (Nz. 5:4-6) Yandi kelombaka beto beto zitisa bansikudukusu na yandi ya lunungu yina kele na Biblia. Ya kedika, Yehova kelombaka ve mambu ya kukoka na bantu yina kele ya kukondua kukoka. (Nz. 130:3, 4) Kaka na ntangu yango, yandi kendimaka ve ‘bantu yina kevuezaka Nzambi, yina kekumisaka ntima kiadi ya nene na yandi kima yina kena kupesa nzila ya kuvuanda na ndiatulu ya nsoni na nko.’ (Yuda 4) Kutu, Biblia metubila “kubebisama ya bantu yina kevuezaka” Nzambi na Armagedoni, mvita ya Nzambi.—2 Pe. 3:7; Em. 16:16.
2 Kasi, Yehova zola ve ata muntu mosi kufua. Mutindu beto tubilaka yau na masolo yayi meluta, Biblia metuba puelele ti yandi “zola ti bantu nionso babalula ntima.” (2 Pe. 3:9) Bankulutu kelandaka kifuani ya Yehova ntangu bakesadisaka nsumuki na ntima yinda nionso samu yandi soba banzila na yandi mpe yandi ndimama diaka na Yehova. Kasi, bansumuki nionso ve nde kebalulaka ntima. (Yis. 6:9) Bantu yankaka ketatamanaka na banzila na bau ya yimbi ata kana bankulutu mesala bangolo mbala na mbala samu na kunata bau na kubalula ntima. Yinki bafueti sala na diambu ya mutindu yina?
“BENO KATULA MUNTU YA YIMBI”
3. (a) Na kutadila Biblia, yinki fueti salama kana nsumuki mosi memanga kubalula ntima? (b) Samu na yinki beto lenda tuba ti, na mutindu yankaka, nsumuki yandi mosi nde keponaka kukatuka na kimvuka?
3 Kana nsumuki memanga kubalula ntima, bankulutu fueti zitisa ntumu yina kele na 1 Bakorinti 5:13: “Beno katula muntu ya yimbi na kati na beno.” Na mutindu yango, nsumuki yango yandi mosi keponaka kukikatula na kimvuka; yandi mebuka yina yandi a kunaka. (Gal. 6:7) Samu na yinki beto lenda tuba mutindu yina? Samu yandi memanga kubalula ntima atako bankulutu mekaka kusadisa yandi mbala na mbala. (2 Bak. 17:12-15) Bisalu na yandi memonisa ti yandi memanga kuzitisa bansikudukusu ya Yehova.—Mib. 30:19, 20.
4. Samu na yinki luzayusu kepesamaka kana bamekatula na kimvuka nsumuki mosi yina memanga kubalula ntima?
4 Kana bamekatula nsumuki yina memanga kubalula ntima na kimvuka, luzayusu kepesama samu na kutubila kimvuka ti yandi kele diaka ve Mbangi ya Yehova. b Lukanu ya luzayusu yango kele ve samu na kufuisa nsumuki yango nsoni. Kutu, yakesalamaka samu kimvuka zitisa nsikudukusu yayi ya Biblia ya “kuzenga kinkundi” na muntu yango, ‘kudia kutu ata kisika mosi ve’ na yandi. (1 Ko. 5:9-11) Lutuadusu yango mepesama samu na bamfunu ya mbote. Ntumua Paulo sonikaka: “Mua levire ya fioti kevimbisaka potopoto ya mvimba ya farini.” (1 Ko. 5:6) Kana bakatula ve nsumuki yina memanga kubalula ntima na kimvuka, bantu yankaka lenda kanisa ti yakele ve na mfunu kuzitisa bantumu ya Yehova.—Mas. 13:20; 1 Ko. 15:33.
5. Yinki mutindu beto fueti tadila muntu yina bamekatula na kimvuka, mpe samu na yinki?
5 Na manima, yinki mutindu beto fueti tadila Muklisto yina bamekatula na kimvuka? Atako beto kezenga kinkundi na yandi, beto fueti tadila yandi lokola dimeme yina mezimbana, kasi ve lokola yandi lendaka vutukila diaka ve Yehova. Kana dimeme mosi mezimbana, yandi lendaka vutuka. Kuzimbakana ve ti, dimeme yina mezimbana kukipesaka na Yehova. Diambu ya kiadi, yandi kele diaka ve na dikoki ya kuzitisa ndefi na yandi bubu yayi, yamesala ti yandi kuma na kivonza. (Ezk. 18:31) Kasi, lokola ntangu kele ntete mpe Yehova kele pene ya kumonisina yandi ntima kiadi, beto kele na kivuvu ti muntu yango kesoba. Yinki mutindu bankulutu kemonisaka kivuvu yango, ata na nsumuki yina bamekatula na kimvuka?
MUTINDU BANKULUTU KESADISAKA BANTU YINA BAMEKATULA NA KIMVUKA
6. Yinki mambu bankulutu kesalaka samu na kusadisa muntu yina bamekatula na kimvuka?
6 Kana bamekatula muntu mosi na kimvuka, bankulutu kelembaka kusosa kusadisa yandi samu yandi vutukila Yehova? Yakele mutindu yina ve! Ntangu bakena kutubila nsumuki yina memanga kubalula ntima ti yandi kekatuka na kimvuka, komite ya bankulutu kesasilaka yandi mambu yina yandi lenda sala samu yandi vutuka na kimvuka. Kasi bankulutu kesuka kaka ve na kusala mutindu yina. Mbala mingi, baketubilaka nsumuki yango ti bakesepela kusolola diaka na yandi na manima ya mua bangonda samu na kuzaba kana yandi mesoba makanisi na yandi. Kana nsumuki yango mendima kusolola diaka na bau, bankulutu kekindisa yandi na kubalula ntima. Ata kana na ntangu yango diaka yandi memanga kubalula ntima, bankulutu kesosa kukutana diaka na yandi na bilumbu kena kuiza mpe bakekindisa yandi na kubalula ntima.
7. Yinki mutindu bankulutu kemonisaka ntima kiadi ya Yehova ntangu bakena kutadila muntu mosi yina bakatulaka na kimvuka? (Yirimia 3:12)
7 Bankulutu kesalaka ngolo samu na kumonisa ntima kiadi na bantu yina bamekatula na kimvuka. Na kifuani, Yehova vuandaka vingila ve ti Bayisaele yina tombokaka balula ntima tekila yandi sadisa bau. Kutu, yandi vuandaka baka bankubukulu samu na kusadisa bau tekila bamonisa bidimbu ya kubalula ntima. Mutindu beto monaka yau na disolo ya zole ya masolo yayi, Yehova monisaka ntima kiadi na yandi na kutubilaka mbikudi Hosea yandi vutukila nketo na yandi, atako nketo yango vuandaka tatamana kusala disumu ya nene. (Hos. 3:1; Mal. 3:7) Na kulandaka kifuani ya Yehova, bankulutu kevuandaka mpenza na nsatu ti nsumuki balula ntima mpe yandi vutuka na kimvuka, mpe bakesalaka ti yavuanda pete samu na yandi kusala yau.—Tanga Yirimia 3:12.
8. Yinki mutindu kifuani ya Yesu ya muana yina zimbanaka memonisa beto puelele ntima kiadi mpe nlemvo ya Yehova? (Luka 15:7)
8 Kanisa na kifuani ya Yesu ya muana yina zimbanaka, yina beto tubilaka na disolo ya zole ya masolo yayi. Ntangu tata na yandi monaka na ntama ti muana na yandi ya bakala vuandaka vutuka na yinzo, tata yango “zawulaka, yandi yambaka yandi ngolo mpe yandi pesaka yandi bizu na kimpombo.” (Luka 15:20) Simba ti tata yango vingilaka ve ti muana na yandi lomba nlemvo samu yandi nlemvukila yandi. Kutu, tata yango zawulaka na muana na yandi samu yandi vuandaka zola yandi. Bankulutu kesalaka ngolo samu na kumonisa kikadulu ya mutindu yina na bantu yina zimbanaka nzila. Bakezolaka ti mameme yango yina zimbanaka “vutuka na yinzo.” (Luka 15:22-24, 32) Kiese kevuandaka na dizulu ntangu nsumuki mosi mevutuka, mpe yakevuandaka mutindu yina na ntoto!—Tanga Luka 15:7.
9. Yinki mutindu Yehova kena kubokila bansumuki na nzola nionso?
9 Na kutadila mambu yina beto mekatuka tubila, yakele puelele ti Yehova kendimaka ve ti bantu yina memanga kubalula ntima na masumu na bau bikana na kimvuka. Kasi, yandi kesundolaka bau ve. Yandi kezolaka ti bavutukila yandi. Banguilu ya Yehova na bansumuki yina mebalula ntima memonana na Hosea 14:4: “Munu kevukisa kukondua lunungu na bau. Munu kezola bau mutindu munu mosi mesepela, samu nganzi na munu mekatuka.” Yakena kukindisa bankulutu na kutula dikebi na konso kidimbu ya kubalula ntima. Mpe yakena kukindisa bantu yina mebikaka Yehova bavutuka kondua kuvingila.
10-11. Yinki mutindu bankulutu kesadisaka bantu yina mekatukaka na kimvuka yameluta bamvula mingi?
10 Bosi samu na bantu yina bakatulaka na kimvuka na ntama, mbala yankaka bamvula mingi meluta? Mbala yankaka bantu yango melembaka kusala masumu yina bakatudilaka bau na kimvuka. Mbala yankaka bakezabaka diaka ve samu na yinki bamekatudilaka bau na kimvuka. Yavuanda plina to ve, bankulutu kesala ngolo samu na kusosa mpe kukuenda tala bantu yango. Na baviziti yango, bankulutu lenda ata kusambila na bau mpe kubokila bau na nzola bavutuka na kimvuka. Ya kedika, kana muntu mekatukaka na kimvuka samu na bamvula mingi, kondua ntembe yandi kelembaka ngolo na kimpeve. Kasi, kana yandi memonisa nsatu ya kuvutuka na kimvuka, bankulutu lenda pona mpangi mosi samu yandi longuka Biblia na yandi, ata kana yandi vutuka ntete ve na kimvuka. Na mambu yango nionso, bankulutu nde fueti baka bankubukulu samu muntu yango longuka Biblia.
11 Na kulandaka ntima kiadi ya Yehova, bankulutu kesosaka mpe kesadisaka bantu nionso yina mekatukaka na kimvuka bazaba ti balenda vutukila Yehova. Kana nsumuki mosi memonisa kubalula ntima mpe yandi mebika banzila na yandi ya yimbi, yandi lenda vutuka na kimvuka kondua kuvingila.—2 Ko. 2:6-8.
12. (a) Na yinki maluaku bankulutu fueti kenga mpenza? (b) Samu na yinki beto fueti kanisa ve ti yalenda salama ve bansumuki yankaka baka nlemvo ya Yehova? (Tala diaka noti na yinsi ya paje.)
12 Na maluaku yankaka, yakelombaka bankulutu kenga mpenza tekila bavutula muntu na kimvuka. Na kifuani, kana muntu yango bebisaka muana, to yandi kumaka mopengui, to yandi kufuaka dikuela na mayele ya yimbi, bankulutu fueti kukindimisa ti yandi mebalula mpenza ntima. (Mal. 2:14; 2 Tim. 3:6) Bafueti tanina mameme. Kaka na ntangu yango, beto fueti zaba ti Yehova kendima kuvutula konso nsumuki yina memonisa kubalula ntima mpe mebika bikadulu ya yimbi. Na yau atako bankulutu fueti kenga na bantu yina sadilaka bantu yankaka mambu ya kukondua kukuikama, bafueti tuba ve ti bansumuki yankaka lenda baka ve nlemvo ya Yehova. c—1 Pe. 2:10.
MAMBU YINA KIMVUKA LENDA SALA
13. Yinki kele lusuasanu kati na mutindu beto ketadilaka muntu yina bankulutu mesemba mpe muntu yina bamekatula na kimvuka?
13 Mutindu beto tubilaka yau na disolo meluta, na bantangu yankaka luzayisu kepesamaka ti bamesemba muntu mosi. Kana yamesalama mutindu yina, beto lenda tatamana kusala kinkundi na yandi, na kuzabaka ti yandi balulaka ntima mpe yandi bikaka mambu na yandi ya yimbi. (1 Tim. 5:20) Yandi kele kaka na kati ya kimvuka mpe yandi kele na nsatu ya lukindusu ya bampangi na yandi Baklisto. (Ebr. 10:24, 25) Kasi, yakele mutindu yina ve samu na muntu yina bamekatula na kimvuka. Beto ‘kezengaka kinkundi’ na muntu yango, beto ‘kekudiaka kutu kisika mosi ve na muntu ya mutindu yina.’—1 Ko. 5:11.
14. Yinki mutindu Baklisto lenda sadila kikansasa na bau yina melongua na Biblia na bantu yina bamekatulaka na kimvuka? (Tala diaka foto.)
14 Mambu yina beto melonguka zola monisa ti beto fueti zimbakana muntu yina bamekatula na kimvuka? Yakele mutindu yina ve. Kondua ntembe, beto kesangana diaka ve na yandi. Kasi Baklisto lenda sadila kikansasa na bau yina melongua na Biblia samu na kubaka nzengolo kana bakebokidisa na balukutakanu ya kimvuka muntu yina bakatulaka na kimvuka—mbala yankaka muntu yango kele mpangi na beto ya dibuta to yandi vuandaka nkundi na beto ya penepene. Bosi kana yandi mekuiza na lukutakanu? Na ntama, beto vuandaka pesa ve muntu yango mbote. Kasi, konso Muklisto fueti sadila kikansasa na yandi yina melongua na Biblia samu na diambu yango. Bampangi yankaka lenda mona mbote kupesa mbote to kuyamba muntu yango na lukutakanu. Kasi, beto kesolola ve masolo ya yinda to kusala kinkundi na muntu yango.
Baklisto lenda sadila kinkasasa na bau yina melongua na Biblia ntangu bakena kubaka nzengolo kana bakebokidisa to ve na balukutakanu muntu yina bakatulaka na kimvuka, to kana bakepesa yandi mbote ya nkufi to ve (Tala paragrafe 14)
15. Bansumuki ya yinki mutindu bametubila na 2 Yoane 9-11? (Tala diaka ankadre “ Yoane mpe Paulo vuandaka tubila disumu ya mutindu mosi?”)
15 Bantu yankaka lenda kukiyuvusa, ‘Biblia tuba ve ti Muklisto yina mepesa muntu ya mutindu yina mbote mesangana na bisalu na yandi ya yimbi?’ (Tanga 2 Yoane 9-11.) Baverse yina kele na ntuala mpe na manima ya baverse yango memonisa ti diambu yango metadila bapengui mpe bantu yina kekindisaka bantu yankaka balanda bikadulu na bau ya yimbi. (Em. 2:20) Kasi, kana muntu mosi kena kumuangisa malongi ya bapengui to mambu yankaka ya yimbi, bankulutu kekuenda tala yandi ve. Ya kedika, bakele na kivuvu ti yandi kevutukila makanisi ya mbote. Kasi, tekila yandi vutukila makanisi ya mbote, beto kepesa ve muntu yango mbote mpe beto kebokidisa yandi ve na balukutakanu.
LANDA KIFUANI YA NTIMA KIADI MPE NLEMVO YA YEHOVA
16-17. (a) Yinki Yehova zola bansumuki sala? (Ezekiele 18:32) (b) Yinki mutindu bankulutu lenda monisa ti bakesalaka kintuadi na Yehova ntangu bakesosaka kusadisa bansumuki?
16 Yinki beto melonguka na masolo 5 yayi melandana? Yehova zola ve ata muntu mosi kufua! (Tanga Ezekiele 18:32.) Yandi zola ti bansumuki vutukila yandi. (2 Ko. 5:20) Yakele samu na mfunu yango nde Yehova vuandaka kindisa ntangu nionso bisadi na yandi yina bikaka yandi babalula ntima mpe bavutukila yandi. Kimvuka ya bankulutu kevuandaka na lokumu ya kusala kintuadi na Yehova ntangu bakesalaka ngolo samu na kunata bansumuki na kubalula ntima.—Rom. 2:4; 1 Ko. 3:9.
17 Kanisa kiese yina kevuandaka na dizulu kana bansumuki mebalula ntima! Tata na beto ya dizulu, Yehova kevuandaka na kiese ntangu nionso yina dimeme yina zimbanaka kevutukaka na kimvuka. Nzola na beto samu na Yehova ketatamanaka kukuma ngolo ntangu beto kekanisaka na kiadi, na nlemvo, mpe na ntima kiadi ya Yehova.—Luka 1:78.
MUYIMBU 111 Ntina ya esengo na biso
a Na disolo yayi, beto mesadila mpova nsumuki samu na kutubila mpangi ya bakala to ya nketo yina mesala disumu ya nene.
b Beto kebokidila diaka ve bantu ya mutindu yina bantu yina mebimisamaka na kimvuka. Na nguizani na bampova ya Paulo yina kele na 1 Bakorinti 5:13, beto kebanda kubokidila bau bantu yina bamekatula na kimvuka.
c Biblia metuba ti bantu yankaka lenda baka ve nlemvo. Yakele bantu yina mebakaka nzengolo ya kutelemina Nzambi ntangu nionso. Kaka Yehova mpe Yesu nde lenda tuba kana muntu mosi mebonga kubaka nlemvo to ve.—Mrk 3:29; Ebr. 10:26, 27.
