DISOLO YA NDONGOKOLO 33
MUYIMBU 130 Tólimbisaka
Mutindu Yehova kezolaka kimvuka tadila bantu yina mesala masumu ya nene
“Kana muntu mesala disumu, beto kele na nsadisi mosi.”—1 YOA. 2:1.
MAMBU YINA BETO KELONGUKA
Malongi yina beto lenda baka na mambu yina kimvuka ya Korinti salaka ntangu mpangi mosi salaka disumu ya nene.
1. Yinki Yehova zola samu na bantu nionso?
YEHOVA salaka bantu na kimpuanza ya kupona. Nge kesadilaka dikabu yango mbala na mbala ntangu nge kebakaka banzengolo. Nzengolo yina meluta mfunu yina muntu lenda baka kele kukipesa na Yehova mpe kukota na dibuta na Yandi. Yehova kezolaka muntu nionso sala plina. Samu na yinki? Samu yandi kezolaka bantu mpe yandi kesosaka bavuanda na luzingu yina meluta mbote. Yandi kezolaka bavuanda na kinkundi ya mbote na yandi mpe bazinga mvula na mvula.—Mib. 30:19, 20; Gal. 6:7, 8.
2. Yinki Yehova zola samu na bantu yina balula ntete ve ntima? (1 Yoane 2:1)
2 Kasi, Yehova ketindaka ve bantu sadila yandi na kingolo. Yandi kebikaka konso muntu baka nzengolo na mambu yina yandi kesala. Bosi kana Muklisto yina mebakaka mbotama mesala disumu ya nene? Kana yandi memanga kubalula ntima, yandi fueti katulua na kimvuka. (1 Ko. 5:13) Kasi ata mutindu yina, Yehova ketatamanaka kutula ntima ti yandi kevutukila Yandi. Yakele samu na mfunu yango nde yandi pesaka nkudulu—samu na kunlemvukila bansumuki yina mebalula ntima. (Tanga 1 Yoane 2:1.) Yehova kele Nzambi ya nzola yina kelombaka bantu yina mesala masumu ya nene, babalula ntima.—Zek. 1:3; Rom. 2:4; Yak. 4:8.
3. Yinki beto ketubila na disolo yayi?
3 Yehova kezolaka ti beto landa mutindu na yandi ya kutadila masumu mpe bansumuki. Disolo yayi ketubila mutindu beto lenda sala yau. Ntangu nge kena kutanga disolo yayi, sosa kuzaba (1) mambu yina kimvuka salaka ntangu mpangi mosi salaka disumu ya nene, (2) yinki malako ntumua Paulo pesaka ntangu nsumuki yango balulaka ntima, mpe (3) yinki disolo yango kena kumonisa samu na mutindu yina Yehova ketadilaka Baklisto yina mesala masumu ya nene.
MAMBU YINA KIMVUKA SALAKA NTANGU MPANGI MOSI SALAKA DISUMU YA NENE
4. Yinki diambu salamaka na kimvuka ya Korinti? (1 Bakorinti 5:1, 2)
4 Tanga 1 Bakorinti 5:1, 2. Na vuayaje na yandi ya 3 ya misionere, Paulo kuwaka nsangu mosi ya yimbi yina metadila kimvuka ya yimpa ya Korinti. Mpangi mosi ya bakala na kimvuka yango vuandaka sala pite na nketo ya tata na yandi. Diambu ya mutindu yina vuandaka yimbi mpenza mpe yavuandaka ‘salama kutu ve na bantu ya makanda’! Kasi kimvuka vuandaka kanisa ti yabongaka mpangi yango ya bakala yina vuandaka sala mambu yango ya yimbi bikana na kimvuka. Mbala yankaka bantu yankaka na kimvuka vuandaka kanisa ti bavuandaka monisa ntima kiadi mutindu Yehova kemonisaka yau na bantu ya kukondua kukoka. Kasi Yehova kesepelaka ve bisadi na yandi sala masumu. Samu na ndiatulu na yandi ya yimbi, bakala yango vuandaka bebisa mpenza lokumu ya mbote ya kimvuka. Yandi lendaka vuanda diaka na bupusi ya yimbi na Baklisto yankaka yina vuandaka sangana na yandi. Na yau, yinki Paulo tubilaka kimvuka sala?
5. Yinki Paulo tubilaka kimvuka sala, mpe yinki yazola monisa? (1 Bakorinti 5:13) (Tala diaka foto.)
5 Tanga 1 Bakorinti 5:13. Yehova tindaka Paulo na kusonikina kimvuka letre yina sasilaka ti bafueti katula na kimvuka nsumuki yina memanga kubalula ntima. Yinki mutindu yalombaka na Baklisto ya kukuikama tadila yandi? Paulo tubilaka bau “bazenga kinkundi” na yandi. Yinki yazola monisa? Paulo sasilaka ti ntumu yango zola monisa “kudia kutu ve kisika mosi na muntu ya mutindu yina.” (1 Ko. 5:11) Kuvuanda samu na kudia kisika mosi na muntu lenda sala ti beno banda kulutisa ntangu mingi kintuadi. Na manima, Paulo monisaka puelele ti kimvuka fueti sangana ve na bakala yango. Yaketanina kimvuka na bupusi na yandi ya yimbi. (1 Ko. 5:5-7) Diaka, kumanga kusangana na bakala yango lenda sala yandi bakusa ti yandi salaka diambu ya yimbi mpenza, yandi mona nsoni mpe yandi balula ntima.
Yehova tindaka Paulo na kusonikina kimvuka letre yina sasilaka ti bafueti katula nsumuki yina memanga kubalula ntima na kimvuka (Tala paragrafe 5)
6. Yinki kimvuka mpe nsumuki yango salaka na manima ya kubaka letre ya Paulo?
6 Na manima ya kutinda letre na Baklisto ya Korinti, Paulo bandaka kukiyuvusa yinki kimvuka kesala. Tito tubilaka Paulo diambu yina sepedisaka yandi mpenza. Kimvuka zitisaka letre ya Paulo. (2 Ko. 7:6, 7) Balandaka malako na yandi. Diaka, ntangu fioti na manima ya letre ya ntete ya Paulo, bakala yango balulaka ntima! Yandi sobaka ndiatulu, bikadulu na yandi, mpe yandi bandaka kulanda bansikudukusu ya lunungu ya Yehova. (2 Ko. 7:8-11) Ntangu yayi yinki Paulo tubilaka kimvuka sala?
MUTINDU YALOMBAKA KIMVUKA TADILA NSUMUKI YINA BALULAKA NTIMA
7. Yinki mambote kukatula nsumuki na kimvuka bimisaka? (2 Bakorinti 2:5-8)
7 Tanga 2 Bakorinti 2:5-8. Paulo tubaka ti ‘disiplini yina bantu mingi pesaka kokaka samu na muntu yango.’ Yazola tuba, disiplini yango kokisaka lukanu na yau na muntu yango. Yinki lukanu? Kunata yandi na kubalula ntima.—Ebr. 12:11.
8. Yinki Paulo tubilaka kimvuka sala na manima?
8 Paulo tubilaka kimvuka yango: ‘Banlemvukila na kimpombo mpe babomba’ mpangi yango yina zimbanaka, mpe ‘bamonisa yandi ti bakezolaka yandi.’ Simba ti Paulo lombaka kaka ve kimvuka vutula bakala yango. Paulo lombaka bau bandimisa bakala yango yina balulaka ntima na bampova mpe bisalu na bau ti banlemvukilaka mpe bavuandaka zola yandi. Yalendaka sala mpangi yango kukindimisa ti bamesepela mutindu yandi mevutuka na kimvuka.
9. Samu na yinki mbala yankaka yavuandaka mpasi samu bantu yankaka nlemvukila nsumuki yina balulaka ntima?
9 Yavuandaka mpasi samu na bampangi yankaka na kimvuka na kuyamba nsumuki yango yina balulaka ntima? Disolo yango tubila yau ve, kasi yalenda vuanda mutindu yina. Bantu yankaka lendaka vuanda na nganzi samu yandi kotisaka mvualangani na kimvuka. Mpe bantu yankaka lendaka kukitungisa samu yandi luadisaka bau. Bantu yankaka lendaka kanisa ti yabongaka ve bayamba bakala yango na nzola lokola mpangi samu bau nde salaka ngolo samu na kubikana ya kuvedila na makanisi. (Fuanikisa na Luka 15:28-30.) Kasi, samu na yinki yavuandaka na mfunu kimvuka monisa nzola ya kedika na mpangi na bau yina vutukaka na kimvuka?
10-11. Yinki zolaka salama kana bankulutu mangaka kunlemvukila nsumuki yina balulaka ntima?
10 Kanisa diambu yina zolaka salama kana bankulutu mangaka kuvutula na kimvuka bakala yango yina balulaka mpenza ntima, to kana na manima ya kuvutuka na yandi, kimvuka mangaka kumonisina yandi nzola. Yandi lendaka kuma na kiadi ya ngolo mpe kulemba nzutu. Yandi lendaka kanisa ti yandi lenda sadila diaka ve Yehova. Yandi lendaka ata kulemba kusala bangolo samu na kubongisa nguizani na yandi na Nzambi.
11 Diambu meluta yimbi, kana bampangi yankaka na kimvuka mangaka kunlemvukila nsumuki yango yina balulaka ntima, bazolaka bebisa nguizani na bau na Yehova. Samu na yinki? Samu bazolaka monisa ve kikadulu ya Yehova ya kunlemvukila bansumuki yina mebalula ntima, kasi bazolaka monisa nde kinkesi mpe kukondua ntima kiadi ya Satana. Kutu, bazolaka kuma bisadulu yina Diabulu kena kusadila samu na kubebisa kimpeve ya bakala yango.—2 Ko. 2:10, 11; Ef. 4:27.
12. Yinki mutindu kimvuka lenda landa kifuani ya Yehova?
12 Na yau, yinki mutindu kimvuka ya Korinti lendaka landa kifuani ya Yehova, kasi ya Satana ve? Na kunlemvukilaka bantu yina mebalula ntima mutindu Yehova kesalaka yau. Tala mua mambu yina bansoniki ya Biblia metuba samu na Yehova. Davidi tubaka: Yandi kele ‘mbote mpe yandi kesepelaka kunlemvukila.’ (Nz. 86:5) Mika sonikaka: “Nani kele lokola nge, yina kenlemvukilaka nzimbala mpe ketulaka ve dikebi na kubuka minsiku?” (Mika 7:18) Mpe Yisaya tubaka: “Muntu ya yimbi bika yimbi na yandi, mpe muntu yina kesalaka yimbi bika makanisi na yandi; yandi vutukila Yehova mpe yandi kemonina yandi kiadi, yandi vutukila Nzambi na beto, samu yandi kenlemvukila mpenza.”—Yis. 55:7.
13. Samu na yinki yavuandaka mbote kuvutula na kimvuka nsumuki yina balulaka ntima? (Tala ankadre “ Yinki ntangu bavutulaka bakala yina ya Korinti na kimvuka?”)
13 Samu na kulanda kifuani ya Yehova, kimvuka ya Korinti yambaka bakala yina balulaka ntima mpe bandimisaka yandi ti bakezolaka yandi. Na kulandaka dilongi ya Paulo ya kuyamba nsumuki yina mebalula ntima, kimvuka monisaka ti ‘bakezitisaka na mambu nionso.’ (2 Ko. 2:9) Ya kedika, mua bangonda lutaka banda bakatulaka muntu yango na kimvuka, kasi disiplini nungaka kunata yandi na kubalula ntima. Na yau, bankulutu vuandaka ve na mfunu ya kuvingila yazingila tekila ya kuvutula yandi.
MONISA LUNUNGU MPE NTIMA KIADI YA YEHOVA
14-15. Yinki malongi beto mebaka na mambu yina salamaka na Korinti? (2 Petro 3:9) (Tala diaka foto.)
14 Disolo ya mambu yina salamaka na Korinti sonamaka na Biblia “samu na kulonga beto.” (Rom. 15:4) Na nzila ya disolo yango, beto melonguka ti Yehova kebikaka ve ti bantu yina mesala masumu ya nene kondua kubalula ntima babikana na kimvuka. Yandi kekanisaka ve ti beto fueti monisa “ntima kiadi” na kubikaka bansumuki yina memanga kubalula ntima na kimvuka. Yehova kele na ntima kiadi, kasi yandi kendimaka ve mambu nionso; yandi kelembisaka mpe ve bansikudukusu na yandi. (Yuda 4) Kutu, kusala mutindu yina kemonisa ve ntima kiadi kasi yaketula kimvuka ya mvimba na kivonza.—Mas. 13:20; 1 Ko. 15:33.
15 Kasi, beto melonguka ti Yehova zola ata muntu mosi ve kufua. Yandi kevuandaka na nsatu ya kuvukisa bantu nionso yina lenda vuka. Yandi kemonisaka ntima kiadi na bantu yina kebalulaka ntima mpe yina kevuandaka na nsatu ya kubongisa nguizani na bau na yandi. (Ezk. 33:11; tanga 2 Petro 3:9.) Na yau, ntangu bakala yango ya Korinti balulaka ntima mpe bikaka ndiatulu na yandi ya yimbi, Yehova sadilaka Paulo samu yandi sasila kimvuka ti bafueti nlemvukila mpe kuyamba bakala yango.
Na kulandaka nzola mpe ntima kiadi ya Yehova, kimvuka keyambaka na nzola nionso bantu yina mevutuka na kimvuka (Tala paragrafe 14-15)
16. Kifuani ya kimvuka ya Korinti memonisa beto yinki samu na Yehova?
16 Kifuani ya kimvuka ya Korinti memonisa beto ti Yehova kele mpenza nzola, yandi kele ya kukuikama, mpe na lunungu. (Nz. 33:5) Beto kekumisaka Yehova samu na bikadulu na yandi ya kukamua. Beto kele mpenza na butondi mutindu yandi kele na ntima kiadi samu beto nionso beto kele bansumuki. Konso muntu kati na beto kele na mfunu ya kuvuanda na butondi na Yehova samu na nkudulu, yina kesalaka ti yandi nlemvukila beto. Yakena kubomba mpenza kuzaba ti Yehova kezolaka mpenza bisadi na yandi mpe yandi kesosaka bavuanda na luzingu yina meluta mbote!
17. Yinki beto ketubila na masolo melanda?
17 Yinki beto kesalaka kana muntu mesala disumu ya nene bubu yayi? Yinki mutindu bankulutu ya kimvuka lenda monisa nsatu ya Yehova ya kunata nsumuki na kubalula ntima? Yinki kimvuka fueti sala kana bankulutu mebaka nzengolo ya kukatula to kuvutula muntu na kimvuka? Beto ketubila yau na masolo melanda.
MUYIMBU 109 Tólingaka makasi, na motema moko
