DISOLO YA NDONGOKOLO 34
MUYIMBU 107 Ndakisa ya bolingo ya Nzambe
Mutindu bankulutu kemonisaka nzola mpe ntima kiadi na bansumuki
“Nzambi, na kimpombo na yandi yandi zola nata nge na kubalula ntima.”—ROM. 2:4.
MAMBU YINA BETO KELONGUKA
Mutindu bankulutu kesosaka kusadisa bampangi yina mesala masumu ya nene.
1. Yinki Nzambi lenda sala samu na bantu yina mesala masumu ya nene?
NA DISOLO meluta, beto longukaka mambu yina Paulo tubilaka kimvuka ya Korinti sala ntangu bakala mosi salaka disumu ya nene. Nsumuki yango mangaka kubalula ntima mpe yalombaka bakatula yandi na kimvuka. Kasi, mutindu verse yina mesimba disolo na beto memonisa yau, Nzambi lenda nata bansumuki na kubalula ntima. (Rom. 2:4) Yinki mutindu bankulutu lenda sadisa bau na kubalula ntima?
2-3. Yinki beto fueti sala kana beto mezaba Muklisto mosi mesala disumu ya nene, mpe samu na yinki?
2 Tekila bankulutu pesa lusadusu, yakelomba bazaba diambu yango. Na yau, yinki beto fueti sala kana beto mezaba ti Muklisto mosi mesala disumu ya nene—diambu yina lenda sala ti bakatula yandi na kimvuka? Beto fueti kindisa nsumuki yango na kukuenda na bankulutu samu basadisa yandi.—Yis. 1:18; Mis. 20:28; 1 Pe. 5:2.
3 Bosi kana nsumuki yango memanga kutubila bankulutu? Beto kekuenda tubila bankulutu beto mosi samu na kukindimisa ti muntu yango kebaka lusadusu yina mebonga. Yau nde diambu ya nzola ya kusala samu beto kezola ve kuzimbisa mpangi na beto. Kana muntu yango soba ve, yandi kebebisa nguizani na yandi na Yehova. Yandi lenda bebisa diaka lokumu ya kimvuka. Na yau, na kibakala nionso beto kekuendaka tubila bankulutu samu beto kezolaka Yehova mpe nsumuki yango.—Nz. 27:14.
MUTINDU BANKULUTU KESADISAKA BANTU YINA MESALA MASUMU YA NENE
4. Yinki kevuandaka lukanu ya bankulutu ntangu bakena kusolola na muntu mosi yina mesala disumu ya nene?
4 Kana mpangi mosi na kimvuka mesala disumu ya nene, kimvuka ya bankulutu keponaka bankulutu tatu ya makoki samu na kusala komite. a Yakelombaka babakala yango vuanda na kumikitisa. Ntangu bakesosaka kusadisa muntu yina zimbanaka samu yandi balula ntima, bakezabaka ti balenda tinda ve muntu na kingolo samu yandi soba. (Mib. 30:19) Bankulutu kezabaka ti bansumuki nionso ve kebalulaka ntima lokola Ntinu Davidi. (2 Sa. 12:13) Bansumuki yankaka lenda manga banduengoso ya Yehova. (Eba. 4:6-8) Kasi, lukanu ya bankulutu kele ya kusadisa muntu samu yandi balula ntima. Yinki bansikudukusu kesadisaka bau ntangu bakena kusolola na nsumuki?
5. Yinki bikadulu bankulutu fueti monisa ntangu bakena kusolola na nsumuki? (2 Timote 2:24-26) (Tala diaka foto.)
5 Bankulutu ketadilaka nsumuki lokola dimeme ya mfunu, yina mezimbana. (Luka 15:4, 6) Na yau, ntangu bakena kusolola na muntu yango, bakemonisaka ve kinkesi na bampova mpe na mutindu na bau ya kusadila yandi mambu. Bankulutu kekanisaka ve ti diambu yina bakele na yau nsatu kele kaka kuyuvusa biuvu mpe kuzaba kedika ya mambu. Kasi, bakemonisaka bikadulu yina kele na 2 Timote 2:24-26. (Tanga.) Bankulutu kemonisaka kimpombo mpe ntima kiadi ntangu bakena kusosa kusimba ntima ya nsumuki.
Mutindu mosi na bamvungi ya ntama, bankulutu kesalaka ngolo samu na kuvutula mameme yina zimbanaka (Tala paragrafe 5)
6. Yinki mutindu bankulutu kebongisaka bantima na bau tekila basolola na nsumuki? (Baroma 2:4)
6 Bankulutu kebongisaka bantima na bau. Bakebambukaka na bampova ya Paulo: “Nzambi, na kimpombo na yandi yandi zola nata nge na kubalula ntima.” Na yau, bakesosaka kulanda kifuani ya kimpombo yina Yehova kemonisinaka bansumuki. (Tanga Baroma 2:4.) Bankulutu fueti zimbakana ve ti bakele ntetentete bamvungi na yinsi ya lutuadusu ya Klisto. (Yis. 11:3, 4; Mat. 18:18-20) Tekila bankulutu solola na nsumuki, bakesambilaka Yehova samu bakoka kunata nsumuki na kubalula ntima. Bakesosasosaka na Biblia mpe na mikanda na beto mpe bakesambilaka samu na kulomba lusuasukusu. Baketadilaka mambu yina bafueti zaba yina mbala yankaka salaka ti nsumuki yango kanisa to yandi sala mambu ya yimbi.—Mas. 20:5.
7-8. Yinki mutindu bankulutu lenda landa kifuani ya ntima yinda ya Yehova ntangu bakena kusolola na nsumuki?
7 Bankulutu kelandaka kifuani ya ntima yinda ya Yehova. Bakelundaka na makanisi mutindu Yehova sadilaka bansumuki mambu na ntama. Na kifuani, Yehova monisinaka Kaina ntima yinda. Yandi tubilaka yandi mambu yina kesalama kana yandi soba ve mpe balusakumunu yina yandi kebaka kana yandi mesoba. (Eba. 4:6, 7) Yehova luengisaka Davidi na nzila ya mbikudi Natane yina sadilaka kifuani yina simbaka ntima ya Davidi. (2 Sa. 12:1-7) Mpe Yehova ‘vuandaka tinda kaka . . . mbala na mbala’ bambikudi na yandi na Bayisaele yina tombokaka. (Yir. 7:24, 25) Yandi vuandaka vingila ve ti bisadi na yandi balula ntima kondua kusadisa bau. Kutu, yandi vuandaka baka bankubukulu samu na kukindisa bau babalula ntima.
8 Bankulutu kelandaka kifuani ya Yehova ntangu bakesosaka kusadisa bantu yina mesala masumu ya nene. Bakesadilaka bau mambu “na ntima yinda” mutindu 2 Timote 4:2 metuba yau. Na yau bankulutu fueti vuanda ntangu nionso na kiyenge mpe na ntima yinda samu na kusadisa nsumuki kuma na nsatu ya kusala mambu ya mbote. Kana nkulutu mefuema, muntu lenda manga kuwa malongi mpe kumanga kubalula ntima.
9-10. Yinki mutindu bankulutu lenda sadisa nsumuki yandi kanisa na mambu yina yandi salaka?
9 Bankulutu kesosaka kuzaba mambu yina menata muntu na disumu. Yinki lembisaka nguizani na yandi na Yehova? Yandi lembaka kulonguka Biblia mbala na mbala mpe kusamuna? Yandi lembaka kusambila Yehova mbala na mbala? Yandi vuandaka bika bansatu ya yimbi tuadisa yandi? Yandi bakaka banzengolo ya yimbi na diambu metadila bankundi to bandutusulu ya ntangu? Yinki mutindu banzengolo yango vuandaka na bupusi na ntima na yandi? Yandi kena kuzaba mutindu banzengolo na yandi mpe mambu yina yandi salaka pesaka Tata na yandi, Yehova mpasi na ntima?
10 Na kuyuvusaka biuvu ya mfunu kondua kukota na mambu ya luzingu na yandi, bankulutu kesadisaka nsumuki na kukanisa na mambu yina bebisaka nguizani na yandi na Yehova mpe nataka yandi na kusala disumu. (Mas. 20:5) Diaka, balenda sadila bifuani samu na kusadisa muntu yango yandi kanisa mpe yandi mona yimbi ya mambu yina yandi salaka, mutindu Natane salaka yau na Davidi. Mbala yankaka na masolo na beno ya ntete, muntu yango kebanda kumona kiadi ya kedika samu na nzila yina yandi landaka. Yandi lenda balula ata ntima.
11. Yinki mutindu Yesu sadisaka bansumuki?
11 Bankulutu kesalaka ngolo samu na kulanda kifuani ya Yesu. Ntangu yandi sololaka na Saulo, muntu ya Tarse, Yesu yina futumukaka yuvusaka yandi kiuvu mosi ya nduenga: “Saulo, Saulo, samu na yinki nge kena kuniokola munu?” Na mutindu yango, Yesu sadisaka yandi na kukanisa na mambu ya yimbi yina yandi salaka. (Mis. 9:3-6) Mpe na diambu metadila “nketo yayi Yezabele,” Yesu tubaka: “Munu mebikila yandi ntangu samu yandi balula ntima.”—Em. 2:20, 21.
12-13. Yinki mutindu bankulutu lenda pesa nsumuki ntangu ya kubalula ntima? (Tala diaka foto.)
12 Na kulandaka kifuani ya Yesu, bankulutu ketubaka ve na nsualu ti nsumuki mosi kebalula ve ntima. Atako bansumuki yankaka lenda balula ntima kaka ntangu bamesolola samu na mbala ya ntete na bankulutu, yalenda lomba ntangu mingi samu na bansumuki yankaka. Na yau bankulutu lenda baka bankubukulu samu na kusolola na nsumuki mbala mingi. Mbala yankaka na manima ya kusolola samu na mbala ya ntete, Muklisto yina zimbanaka kebanda kukanisa na mpinda na mambu yina batubilaka yandi. Yandi lenda sambila Yehova na kumikitisa. (Nz. 32:5; 38:18) Na yau, na masolo yina kelanda, nsumuki yango lenda monisa makanisi ya kusuasana na yina yandi monisaka na disolo na beno ya ntete.
13 Samu na kunata nsumuki na kubalula ntima, bankulutu kekukitulaka na kisika na yandi mpe bakemonisinaka yandi kimpombo. Bakesambilaka Yehova sakumuna bangolo na bau mpe bakevuandaka na kivuvu ti Muklisto yina zimbanaka lenda vutukila makanisi ya mbote mpe yandi lenda balula ntima.—2 Tim. 2:25, 26.
Bankulutu lenda kutana samu na kusolola na nsumuki mbala mingi samu na kupesa yandi ntangu ya kubalula ntima (Tala paragrafe 12)
14. Kana nsumuki mosi mebalula ntima, nani mebonga kubaka lokumu, mpe samu na yinki?
14 Kana nsumuki mebalula ntima, yakepesaka kiese mingi! (Luka 15:7, 10) Nani mebonga kubaka lokumu? Bankulutu? Beto kanisa na mambu yina Paulo sonikaka samu na bansumuki: “Mbala yankaka Nzambi kepesa bau nzila babalula ntima.” (2 Tim. 2:25) Na yau, yakele Yehova, kasi bantu ve nde kesadisaka Muklisto samu yandi soba makanisi mpe bikadulu na yandi. Paulo sasilaka mambu ya mbote yina kesalamaka kana muntu mebalula ntima. Muntu yango lenda kuma na mbakusulu ya mbote kuluta ya kedika, kuvutukila makanisi na yandi ya mbote, mpe kutina bantambu ya Satana.—2 Tim. 2:26.
15. Yinki mutindu bankulutu lenda tatamana kusadisa nsumuki yina mebalula ntima?
15 Kana nsumuki mebalula ntima, Bankulutu ketatamanaka kukuenda tala muntu yango samu na kusadisa yandi yandi kumisa kiminu na yandi ngolo, yandi telemina bantotolo ya Satana mpe yandi sala mambu yina kele mbote. (Ebr. 12:12, 13) Ya kedika, bankulutu ketubaka ata na muntu mosi ve diambu yina nsumuki salaka. Na yau, yinki balenda tubila kimvuka?
“SEMBA NA MESO YA BANTU NIONSO”
16. Na kutadila 1 Timote 5:20, bampova “na meso ya bantu nionso” yina Paulo sadilaka kena kutubila banani?
16 Tanga 1 Timote 5:20. Paulo tubilaka Timote, yina vuandaka mpe nkulutu, na kusemba bansumuki “na meso ya bantu nionso.” Yinki yazolaka monisa? Yazolaka monisa kaka ve ti yalombaka yandi semba bau na ntuala ya kimvuka nionso. Kutu, yandi vuandaka tubila nde bantu fioti yina mbala yankaka zabaka deja masumu yango. Yalendaka vuanda bantu yina monaka masumu yango, to bantu yina yandi tubilaka yau. Bankulutu ketubila bau na kinsueki ti batadilaka mambu yango mpe basembaka nsumuki yango.
17. Kana disumu mosi ya nene mezabana na kimvuka to yakekuiza zabana, yinki luzayusu kepesama, mpe samu na yinki?
17 Na bantangu yankaka, disumu lenda zabana na kimvuka ya mvimba to mbala yankaka yakekuiza zabana. Na mambu ya mutindu yina, “na meso ya bantu nionso” kesangisa kimvuka ya mvimba. Na yau, nkulutu mosi kepesa luzayusu na kimvuka ti bamesemba mpangi kingandi. Samu na yinki? Paulo tubaka: “Samu yakebisa bantu yankaka” mpe bakubua ve na disumu.
18. Yinki bankulutu kesala kana muana mosi ya minere yina mebakaka mbotama mesala disumu ya nene? (Tala diaka foto.)
18 Bosi kana muana mosi yina mebakaka mbotama—yina kele na yinsi ya bamvula 18—mesala disumu ya nene? Kimvuka ya bankulutu ketinda bankulutu zole samu na kusolola na muana yango kintuadi na bibuti na yandi Baklisto. b Bankulutu keyuvusa bibuti yango mambu yina basalaka deja samu na kusadisa muana na bau yandi soba mpe yandi balula ntima. Kana muana yango mekuwa malongi ya bibuti na yandi mpe yandi mesoba makanisi mpe bikadulu na yandi, bankulutu yango zole lenda baka nzengolo ya kubika mambu na maboko ya bibuti na yandi. Kutu, Nzambi mepesa kiyekua ya kusemba bana na nzola na bibuti na bau. (Mib. 6:6, 7; Mas. 6:20; 22:6; Ef. 6:2-4) Na manima, bankulutu kebanda kusolola na bibuti yango na bantangu yankaka samu na kuzaba kana muana yango kena kubaka lusadusu yina mebonga. Bosi kana muana yango ya minere memanga kubalula ntima mpe yandi kena kutatamana kusala mambu yango yimbi? Kana yakele plina, komite ya bankulutu kesolola na muana yango kintuadi na bibuti na yandi yina kele Baklisto.
Kana minere mesala disumu ya nene, bankulutu zole kesolola na yandi kintuadi na bibuti na yandi yina kele Baklisto (Tala paragrafe 18)
“YEHOVA KELE NA NZOLA MINGI YA NTIMA MPE YANDI KEMONISAKA NTIMA KIADI”
19. Yinki mutindu bankulutu kesosaka kulanda kifuani ya Yehova ntangu bakena kusolola na nsumuki?
19 Bankulutu yina kesalaka na bakomite kele na kiyekua na ntuala ya Yehova ya kutanina bunkete ya kimvuka. (1 Ko. 5:7) Bakezolaka diaka bansumuki balula ntima kana dikoki kele. Samu na yau, bankulutu fueti tanina makanisi ya mbote mpe kivuvu samu na muntu yango. Samu na yinki? Samu bakezolaka kulanda kifuani ya Yehova, yina kele “na nzola mingi ya ntima mpe yandi kemonisaka ntima kiadi.” (Yak. 5:11) Beto tala mutindu ntumua Yoane yina pusanaka na bamvula monisaka mpeve ya mutindu yina. Yandi sonikaka: “Bana na munu, munu kena kusonikina beno mambu yayi samu beno sala ve disumu. Nzokande, kana muntu mesala disumu, beto kele na nsadisi mosi na Tata, Yesu Klisto, muntu ya kukuikama.”—1 Yoa. 2:1.
20. Yinki beto ketubila na disolo ya nsuka ya masolo yayi?
20 Diambu ya kiadi, na bantangu yankaka Muklisto mosi lenda manga kubalula ntima. Kana yamesalama plina, bafueti katula yandi na kimvuka. Yinki bankulutu kesala kana diambu ya mutindu yina mesalama? Beto ketubila yau na disolo ya nsuka ya masolo yayi.
MUYIMBU 103 Babateli ya mpate—Makabo oyo ezali bato
a Na ntama, beto vuandaka bokidila grupe yango ya bankulutu komite samu na kusambisa. Kasi, lokola bakesukaka kaka ve na kusambisa, beto kebokidila yau diaka ve mutindu yina. Kasi, beto kebokidila grupe yango komite ya bankulutu.
b Mambu yina beto metuba samu na bibuti, metadila diaka bantu yina kele na yinsua ya kulunda muana yango ya minere to bantu yankaka yina kele na kiyekua ya kutanina yandi.
