1. Yinki kele paradiso ya kimpeve, mpe beto fueti vuanda na nzengolo ya kusala yinki?

 BUBU yayi yakele na paradiso mosi ya kifuani yina mefuluka na bantu yina mekukipesaka na kusala mambu ya mbote. Yamefuluka na bamilion ya bantu yina kevuandaka na kiyenge ya kedika. Bantu yina kele deja na paradiso yango kevuandaka na nzengolo ya kubika yau ata fioti ve. Bakevuandaka diaka na nsatu bantu mingi yankaka kuiza sangana na bau na kisika yango ya spesiale. Yinki kele kisika yango? Paradiso ya kimpeve! a

2. Yinki kena kukamuisa na diambu metadila paradiso ya kimpeve?

² Na mutindu mosi ya kukamua, Yehova salaka kisika mosi ya kifuani yina bisadi na yandi kele na kiyenge mpe bumosi atako bakena kuzinga na yinza ya yimbi mpe ya kivonza ya Satana, kisika bantu keyinanaka. (1 Yn. 5:19; Kus. 12:12) Nzambi na beto ya nzola kena kumona mutindu mambu ya yinza yayi kena kubebisa bantu mpe yandi kena kusala ti bisadi na yandi kukimona ti bakele na lutanunu samu batatamana kusadila yandi na kiese. Mpova na Yandi kena kutubila paradiso ya kimpeve lokola kisika mosi ya ‘kutinina’ mpe ‘bilanga yina bakedukudilaka maza na mutindu ya mbote.’ (Yez. 4:6; 58:11) Na lusakumunu ya Yehova, bantu yina kevuandaka na paradiso yango kevuandaka na kiese mpe na lutanunu na bilumbu yayi ya nsuka ya mpasi.​—Yez. 54:14; 2 Tm. 3:1.

3. Yinki mutindu mbikudulu yina kele na Yezaya kikapu 65 kokisamaka samu na mbala ya ntete?

³ Na nzila ya mbikudi Yezaya, Yehova monisaka mutindu luzingu kevuanda samu na bantu yina kezinga na paradiso yango ya kimpeve. Nge lenda mona nsasulu yango na Yezaya 65, yina kokisamaka samu na mbala ya ntete na 537 T.N.B. Na ntangu yango, Bayuda  yina balulaka ntima katukaka na kinanga na Babiloni mpe bavutukaka na buala na bau. Yehova sakumunaka bisadi na yandi mpe yandi sadisaka bau samu bakumisa diaka Yerusaleme kitoko, mbanza yina bebaka mpe bavutula tempelo na yau samu yavuanda kisika ya nsambudulu ya kedika na Yisaele.​—Yez. 51:11; Zek. 8:3.

4. Yinki mutindu mbikudulu yina kele na Yezaya kikapu 65 kena kukokisama na bilumbu na beto?

⁴ Kukokisama ya zole ya mbikudulu ya Yezaya bandaka na 1919 N.B. ntangu bisadi ya Yehova ya bilumbu na beto katukaka na kinanga na Babiloni ya nene. Na manima na yau paradiso ya kimpeve bandaka kupanzana na ntoto ya mvimba. Bansamuni ya vema ya Kimfumu bimisaka bimvuka mingi mpe bamonisaka bikadulu ya Buklisto. Babakala mpe banketo yina vuandaka ntete bantu ya kinkesi, mpe vuandaka sala mambu ya yimbi ‘vuataka kimuntu ya yimpa yina salamaka na nguizani na luzolo ya Nzambi.’ (Efe. 4:24) Ya kedika, balusakumunu mingi yina Yezaya tubilaka kekokisama mingi na yinza ya yimpa yina kena kuiza. Kasi ata bubu yayi beto kena kusepela na mambote mingi. Beto ketubila mutindu paradiso ya kimpeve kele na bupusi samu na beto mpe samu na yinki beto fueti bika yau ata fioti ve.

MUTINDU BANTU YINA KELE NA PARADISO YA KIMPEVE KEKUKIMONAKA

5. Mutindu Yezaya 65:13 lakaka yau, yinki beto kele na yau na kati ya paradiso ya kimpeve?

⁵ Bakena kudia mpe bakena kunua mbote. Mbikudulu ya Yezaya kena kumonisa lusuasanu ya nene yina kele kati na bantu yina kele na kati ya paradiso ya kimpeve mpe bantu yina kele na nganda ya paradiso ya kimpeve. (Tanga Yezaya 65:13.) Yehova kepesaka bisadi na yandi bima mingi ya kimpeve yina bakevuandaka na yau nsatu. Beto kele na mpeve ya nlongo na yandi, Mpova na yandi, mikanda na beto yina kesasilaka Biblia, na yau beto lenda ‘kudia, . . . kunua, . . . [mpe] kusepela.’ (Fuanikisa na Kusonga 22:17.) Kasi mambu kele mpenza ya kusuasana samu na bantu yina kele ve na paradiso ya kimpeve, ‘bakele na nsatu . . . , na nsatu ya maza . . . , [mpe] na nsoni.’ Bansatu na bau ya kimpeve kekokisamaka ve.​—Amo. 8:11.

6. Yinki mutindu Yoele 2:21-24 kena kumonisa ndambu ya makabu yina Nzambi kena kupesa beto, mpe yinki mutindu beto lenda bakila yau mambote?

⁶ Na mbikudulu na yandi, Yoele sadilaka bima ya mfunu ya kudia lokola bambuma, vinu, mafuta ya olive samu na kumonisa ti Yehova kepesaka bisadi na Yandi bima yina bakele na yau nsatu na nzola nionso, buela diaka madia ya kimpeve. (Yoe. 2:21-24) Yandi kesalaka yau na nzila ya Biblia mpe mikanda na beto yina kesasilaka Biblia, site Internet na beto, buela diaka balukutakanu na beto, mpe balukutakanu ya nene. Beto lenda bakila yau mambote konso kilumbu, mpe yakesalaka ti beto mona ti beto kena kudia mpe beto kena kunua mbote kuluta.

7. Yinki kesalaka ti beto kukimona ‘mbote na ntima’? (Yezaya 65:14)

⁷ Bakele na kiese mpe bakena kusepela. Bisadi ya Nzambi lenda ‘tula milolo ya kiese’ samu bakevuandaka na butondi na Yehova. (Tanga Yezaya 65:14.) Bakedika ya kukindisa mpe bampova ya kubomba yina kevuandaka na Mpova ya Nzambi mpe kivuvu na beto ya ngolo yina mesimbama na nkayilu ya nkudulu ya Klisto kesalaka ti ‘ntima na [beto] vuanda mbote.’ Kutubila mambu yango na bampangi na beto ya kimpeve kepesaka beto mpenza kiese!​—Nk. 34:8; 133:1-3.

8. Yinki kele mambu zole ya mfunu ya paradiso ya kimpeve?

⁸ Nzola mpe bumosi yina kevuandaka na kati ya bisadi ya Yehova kele mambu zole ya mfunu ya paradiso ya kimpeve. ‘Kikangulu ya bumosi’ yango kesadisaka beto samu beto mona mutindu ya luzingu yina beto kevuanda na yau na yinza ya yimpa, kisika bisadi ya Yehova kevuanda na bumosi mpe na nzola mingi kuluta yina bakele na yau bubu yayi. (Kol. 3:14) Mpangi mosi ya nketo yina kele Muklisto, metubila mambu yina yandi monaka na bisadi ya Yehova ntangu yandi kutanaka na bau samu na mbala ya ntete. Yandi  metuba: “Munu vuandaka zaba ve mutindu ya kuvuanda na kiese, ata mpe na dibuta na munu. Mbala ya ntete yina munu monaka bantu kena kumonasana nzola ya kedika vuandaka ntangu munu kutanaka na Bambangi ya Yehova.” Konso muntu yina kele mpenza na nsatu ya kuvuanda na kiese mpe kusepela fueti vuanda na kati ya paradiso na beto ya kimpeve. Yavuanda yinki diambu yinza kekanisaka samu na bisadi ya Yehova, bakele na lokumu na meso ya Yehova, mpe na meso ya bantu nionso yina kesadilaka yandi.​—Yez. 65:15.

9. Yinki Yezaya 65:16, 17 melaka samu na mambu yina kesalaka beto mpasi mpe keniokolaka beto bubu yayi?

⁹ Bakele na luvuvamu mpe na kiyenge. Yezaya 65:14 metuba ti bantu yina keponaka kuvuanda na nganda ya paradiso ya kimpeve ‘kena kudila samu na mpasi ya ntima [mpe] kena kudila samu na mabanza yina kena kuniokuama.’ Kasi yinki beto ketuba samu na mambu nionso yina kebimisinaka bisadi ya Nzambi bampasi mpe minioko? Nsukansuka, ‘[ba]kezimbakana [mambu yango mpe] meso ya [Nzambi] kemona yau diaka ve.’ (Tanga Yezaya 65:16, 17.) Yehova kekatula bampasi na beto, mpe beto kekanisa diaka ve mutindu bampasi yango vuandaka sala beto.

10. Samu na yinki nge kemonaka ti yakele lusakumunu kuvuanda kintuadi na bampangi na beto Baklisto? (Tala diaka foto.)

¹⁰ Bubu yayi deja, beto kekukimonaka mbote ntangu beto kevuandaka na balukutakanu ya Buklisto, kuna beto lenda mona ti beto kele na luvuvamu mpe beto ketulaka diaka ve makanisi na mambu yina kena kuniokola beto na yinza yayi ya yimbi. Beto kesadisaka diaka bampangi na beto samu bakukimona ti bakele na kiyenge ntangu beto kemonisaka nzola, kiese, kiyenge, ntima mbote, mpe kimpombo yina kele na kati ya mbuma ya mpeve ya Nzambi. (Bag. 5:22, 23) Yakele mpenza lusakumunu samu na beto kuvuanda na kati ya nkubukulu ya Nzambi! Bantu yina kebikana na kati ya paradiso ya kimpeve, kemona mpenza kukokisama ya nsilulu ya Nzambi ya ‘dizulu ya yimpa mpe ntoto ya yimpa.’

11. Na kutadila Yezaya 65:18, 19, yinki mutindu paradiso ya kimpeve fueti vuanda na bupusi na zulu na beto?

¹¹ Bakele na butondi mpe na kiese. Na manima Yezaya monisaka mfunu yina beto fueti ‘sepela mpe kuvuanda na kiese’ na paradiso ya kimpeve. Yehova nde salaka paradiso yango ya kimpeve. (Tanga Yezaya 65:18, 19.) Yakele diambu ya kukamua ve mutindu yandi kena kusadila beto samu na kusadisa bantu bakatuka na bankubukulu ya yinza yayi yina kelongaka bau ve kedika samu na Nzambi, mpe beto kesadisaka bau samu bakota na paradiso na beto ya kitoko ya kimpeve! Beto kele na kiese samu na balusakumunu yayi beto kele na yau ya kuvuanda na kedika, mpe beto kevuandaka na nsatu ya ngolo ya kutubila bantu yankaka bakedika yango.​—Yer. 31:12.

12. Yinki mutindu nge kekukimonaka samu na bansilulu yina kele na Yezaya 65:20-24, mpe samu na yinki?

 ¹² Beto kevuandaka diaka na butondi mpe na kiese samu na kivuvu yina beto kele na yau ya kuvuanda bantu yina kevuandaka na kati ya paradiso ya kimpeve. Kanisa ntete na mambu nionso yina beto kemona mpe beto kesala na kati ya yinza ya yimpa ya Nzambi! Biblia mepesa nsilulu ti: ‘Muana fioti yina kezinga kaka bilumbu fioti kevuanda diaka ve, to kiboba yina kokisa ve bilumbu na yandi kevuanda diaka ve.’ Beto ‘ketunga bayinzo mpe [beto] kezinga kuna [mpe beto] kekuna bilanga ya vinu mpe [beto] kekudia mbuma na yau.’ Beto ‘kesala ve kisalu ya ngolo samu na mpamba’ samu beto kevuanda bantu yina ‘Yehova mesakumunaka.’ Yandi melaka beto luzingu ya lutanunu mpe ya kiese, yina kele na lukanu ya kedika. ‘Kutu tekila babokila,’ yandi kezaba nsatu ya konso muntu mpe yandi ‘kekokisa nsatu ya kisemua nionso yina kele na luzingu.’​—Yez. 65:20-24; Nk. 145:16.

13. Yinki mutindu Yezaya 65:25 kena kutubila bansobolo yina bantu kesalaka na luzingu na bau ntangu bamebanda kusadila Yehova?

¹³ Bakele na kiyenge mpe lutanunu. Na lusadusu ya mpeve ya Nzambi, bantu mingi yina vuandaka na ntama na kimuntu ya bibulu salaka bansobolo ya kukamua na luzingu na bau. (Tanga Yezaya 65:25.) Basalaka ngolo samu na kukatula bikadulu na bau ya yimbi. (Bar. 12:2; Efe. 4:22-24) Kondua ntembe, bisadi ya Nzambi kele kaka bantu ya kukondua kukoka, na yau baketatamana kusala banzimbala. Kasi, Yehova mesangisa ‘bantu ya mitindu nionso’ na kikangulu ya nzola mpe ya kiyenge yina kezenganaka ve. (Tito 2:11) Yakele kimangu yina kaka Nzambi Nkua-ngolo nionso kele na dikoki ya kusala!

14. Yinki mutindu kedika ya Yezaya 65:25 memonana na disolo ya mpangi mosi ya bakala?

¹⁴ Bantu lenda soba mpenza kimuntu na bau? Beto tadila disolo yayi. Ntuenia mosi ya bakala yina vuandaka kota mbala na mbala na buloko ntangu yandi vuandaka na bamvula 20, yandi kukipesaka na luzingu ya pite mpe ya kinkesi. Yandi kotaka na buloko samu yandi yibaka ntomabilu, yandi botolaka bima, mpe samu na mambu yankaka ya yimbi. Yandi vuandaka pene ya kunuana na muntu nionso. Ntangu yandi kuwaka kedika ya Biblia samu na mbala ya ntete mpe yandi bandaka kukutakana na balukutakanu ya Bambangi ya Yehova, yandi monaka kima mosi yina kepesaka luzingu mfunu​—kusambila Yehova na paradiso ya kimpeve. Na manima ya kubaka mbotama, mbala mingi yandi vuandaka kanisa na mutindu Yezaya 65:25 tadilaka yandi. Yandi sobaka luzingu na yandi na kubikaka kimuntu yina vuandaka lokola ya nkosi, yazola monisa muntu ya kinkesi samu na kukuma lokola dimeme, yazola monisa muntu ya kiyenge.

15. Samu na yinki beto fueti bokidisaka bantu yankaka bakuiza na paradiso na beto ya kimpeve, mpe yinki mutindu beto lenda sala yau?

¹⁵ Yezaya 65:13 mebanda na bampova yayi: ‘Tala yina Yehova Mfumu yina meluta nene metuba.’ Verse 25 mesukisa na bampova: ‘Yehova muntu metuba.’ Bampova na yandi kekokisamaka ntangu nionso. (Yez. 55:10, 11) Bubu yayi beto kele deja na paradiso ya kimpeve. Yehova salaka dibuta ya bansambidi na yandi yina kokana ve na yankaka. Lokola beto kele na kati ya dibuta yango, beto kele na kiyenge mingi mpe beto kekukimonaka beto kele na lutanunu na kati ya yinza yayi ya kinkesi. (Nk. 72:7) Samu na bamfunu yango, beto kevuandaka na nsatu ya kusadisa bantu mingi bakuiza sangana na beto na kati ya dibuta yango ya bampangi. Beto lenda sala yau na kutulaka makanisi na beto na kisalu ya kukumisa bantu banlonguki.​—Mat. 28:19, 20.

MUTINDU YA KUBENDA BANTU YANKAKA NA PARADISO YA KIMPEVE

16. Yinki lenda sadisa bantu bavuanda na nsatu ya kukota na paradiso ya kimpeve?

¹⁶ Konso muntu na kati na beto lenda sala diambu mosi samu na kubenda bantu yankaka na  paradiso ya kimpeve. Samu na kusala yau beto fueti landa kifuani ya Yehova. Yandi ketindikaka bantu na kingolo ve samu bakota na nkubukulu na yandi. Kutu, yandi ‘kebendaka’ bantu na kimpombo samu bakuiza na yandi. (Yoa. 6:44; Yer. 31:3) Bantu yina kele na bantima yina mebonga yina kelongukaka bikadulu ya nzola ya Yehova mpe kimuntu na yandi ya kitoko, bakebendamaka bau mosi na yandi. Yinki mutindu beto lenda benda bantu na nzila ya bikadulu mpe nzingulu na beto ya mbote?

17. Yinki mutindu beto lenda benda bantu yankaka na paradiso ya kimpeve?

¹⁷ Mutindu mosi yina beto lenda benda bantu na paradiso na beto ya kimpeve kele na kusadilaka bampangi na beto Baklisto mambu na kimpombo mpe na nzola. Ntangu bantu ya yimpa kekuizaka kutakana na balukutakanu na beto ya kimvuka, beto kevuandaka na nsatu bakukimona lokola bantu yina vuandaka ve Baklisto, yina vuandaka kutakana na kimvuka ya Korinto ya ntama. Batubaka: ‘Nzambi kele na kati na beno.’ (1 Bk. 14:24, 25; Zek. 8:23) Kasi, beto fueti tatamana kusadila dilongi ya ‘kuvuanda na kiyenge kati [na beto].’​—1 Te. 5:13.

18. Yinki lenda benda bantu na nkubukulu na beto?

¹⁸ Beto fueti sosa ntangu nionso kutadila bampangi na beto Baklisto mutindu Yehova ketadilaka bau. Beto kesala yau na kutulaka makanisi na bikadulu na bau ya mbote kasi ve na banzimbala na bau yina nsukansuka kemanisa. Beto lenda bongisa matata nionso yina lenda bima kati na beto na nzola na kuvuandaka ntangu nionso ‘ntima mbote . . . , na kumoninaka bantu yankaka kiadi, . . . na kunlemvukilaka na ntima ya mvimba.’ (Efe. 4:32) Na manima, paradiso ya kimpeve kebenda bantu nionso yina kele na nsatu basadila bau mambu na mutindu yina. b

 BETO BIKANA NA KATI YA PARADISO YA KIMPEVE

19. (a) Mutindu ankadre “ Babikaka paradiso ya kimpeve mpe bavutukilaka yau” memonisa yau, yinki bantu yankaka tubaka na manima ya kuvutuka na paradiso ya kimpeve? (b) Yinki nzengolo beto fueti vuanda na yau? (Tala diaka foto.)

¹⁹ Beto kesepelaka mpenza na paradiso na beto ya kimpeve! Yakele kitoko kuluta mutindu yavuandaka na ntama, mpe bisadi ya Yehova kele mingi na kati na yau kuluta mutindu yavuandaka. Bika beto vuanda na butondi samu na mvimbamvimba samu na paradiso yina Yehova salaka samu na beto. Muntu nionso yina kele na nsatu ya maza, kiese, kiyenge, mpe kuvuanda na lutanunu, fueti kuiza na paradiso ya kimpeve mpe kubika yau ata fioti ve! Kasi beto fueti kenga, samu Satana kesalaka nionso yina yandi lenda samu na kutinda beto beto katuka na paradiso yango. (1 Pi. 5:8; Kus. 12:9) Beto fueti bika yandi ve yandi nunga. Bika beto sala ngolo samu beto tanina kitoko, bunkete, mpe kiyenge ya paradiso ya kimpeve.