Nge zabaka yau?
Samu na yinki banzenza vuandaka na kati ya basoda ya Ntinu Davidi?
NA KATI ya basoda ya Davidi yina vuandaka banzenza, yavuandaka na babakala lokola Zeleki muntu ya Amoni, Uria muntu ya Hiti, mpe Yitima muntu ya Moabi. a (1 Bs. 11:39, 41, 46) Na kati ya basoda ya Davidi, yavuandaka diaka na ‘bantu . . . ya Kereti, bantu ya Peleti mpe bantu ya Gati.’ (2 Sa. 15:18) Yamemonana ti Bakereti mpe Bapeleti vuandaka mpenza na nguizani na Bafilistia. (Eze. 25:16) Kondua ntembe Bagati vuandaka bantu ya mbanza ya Gati, mbanza mosi ya Filistia.—Yoz. 13:2, 3; 1 Sa. 6:17, 18.
Samu na yinki Davidi bikaka nzila na bantu yango samu bavuanda na kati ya basoda na yandi? Yandi kukindimisaka ti bavuandaka ya kukuikama na yandi, mpe mingi kuluta bavuandaka ya kukuikama na Yehova. Na kifuani, samu na Bakereti mpe Bapeleti diksionere mosi (The New Interpreter’s Dictionary of the Bible) metuba: “Babikanaka ya kukuikama na Davidi na bantangu yina yandi kutanaka na mambu ya mpasi kuluta na luyalu na yandi.” Yinki mutindu bamonisaka kukuikama na bau? Ntangu ‘bantu nionso ya Yisaele’ bikaka Ntinu Davidi samu na kulanda ‘muntu mosi ya mavuanga nkumbu na yandi Sheba,’ Bakereti mpe Bapeleti bikanaka ya kukuikama na Davidi mpe bapesaka maboko samu na kununga butomboki ya Sheba. (2 Sa. 20:1, 2, 7) Na diluaku yankaka, Adoniya, muana ya Ntinu Davidi sosaka kukikumisa ntinu na kisika ya Salomo. Kasi, Bakereti mpe Bapeleti bikanaka ya kukuikama na Davidi mpe bapesaka maboko samu na kutula Salomo ntinu yina vinganaka Davidi, samu yandi nde Yehova ponaka.—1 Bn. 1:24-27, 38, 39.
Nzenza yankaka yina vuandaka mpenza ya kukuikama na Davidi vuandaka Itai muntu ya Gati. Itai mpe basoda na yandi 600 pesaka Ntinu Davidi maboko ntangu Absalome muana ya Davidi tombokaka mpe yandi tindaka bantu ya Yisaele batula yandi ntinu na kisika ya Davidi. David tubilaka Itai ti, lokola yandi vuandaka nzenza yalombaka ve yandi nuana samu na Davidi. Kasi Itai tubaka: ‘Ya kedika lokola Yehova kele na luzingu mpe ya kedika lokola mfumu na munu ntinu kele na luzingu, konso kisika yina mfumu na munu ntinu kevuanda, yavuanda samu na lufua to samu na luzingu, kisadi na nge kevuanda vana!’—2 Sa. 15:6, 18-21.
Itai vuandaka ya kukuikama na Davidi, ntinu yina Yehova ponaka
Atako Bakereti, Bapeleti, mpe Bagati vuandaka banzenza, bavuandaka ndima Yehova lokola Nzambi ya kedika mpe bavuandaka ndima Davidi lokola muntu yina Yehova ponaka. Davidi vuandaka mpenza na butondi samu na babakala yango ya kukuikama yina vuandaka na ndambu na yandi!
a Nsiku ya Nzambi yina kele na Kulonga 23:3-6 pekisaka Baamoni mpe Bamoabi na kukota na kimvuka ya Yisaele. Kasi, yamemonana ti nsiku yango tadilaka kukikumisa mpenza bantu ya dikanda ya Yisaele, kasi yapekisaka ve banzenza yango basangana to bavuanda kintuadi na bisadi ya Nzambi. Tala mukanda Étude perspicace des Écritures, Volimi 1, p. 100.
