Nge tangaka mbotembote banimero ya Yinzo’a zulu ya Nkengi ya mvula yayi? Na yau, tala kana nge lenda pesa bamvutu na biuvu yayi melanda:

Yinki kena kulombama samu na ‘kukumisa mabanza na [nge] ya yimpa’? (Bar. 12:2)

Yakena kulomba ve nge suka kaka na kusala mambu ya mbote. Yakena kulomba diaka beto tadila mutindu ya bantu yina beto kele mpe kusala bansobolo yina mebonga samu luzingu na beto vuanda na nguizani na bansikudukusu ya Nzambi.​—w23.01, p. 8-9.

Yinki mutindu beto kemonisa ti beto kele na bukatikati ntangu beto kena kumona mambu yina kena kuluta na yinza?

Beto kesepelaka mutindu mambu yina kena kuluta na yinza kena kukokisa bambikudulu ya Biblia. Na kisika ya kupanza bansangu yina lenda bimisa bukabuani, yakevuanda mbote masolo na beto simbama na mambu yina mikanda ya nkubukulu ya Yehova kebimisaka. (1 Bk. 1:10)​—w23.02, p. 16.

Na yinki mutindu mbotama ya Yesu mesuasana na mbotama ya banlonguki na yandi?

Lokola Yesu butukaka na dikanda yina kukipesaka deja na Nzambi, yalombaka ve yandi kukipesa na Yehova mutindu yandi salaka yau. Yesu vuandaka muntu ya kukoka, muntu yina mekondua masumu. Yalombaka ve yandi balula ntima na masumu na yandi.​—w23.03, p. 5.

Yinki mutindu beto lenda sadisa bantu yankaka samu bapesa bakomantere na balukutakanu?

Beto lenda sala ti bakomantere na beto vuanda ya nkufi, samu bantu yankaka diaka pesa bakomantere. Beto lenda manga diaka kutubila mambu mingi. Na yau, yakevuanda na mambu yankaka yina bantu yankaka kepesila bakomantere.​—w23.04, p. 23.

Yinki zola monisa ‘Nzila ya Nlongo’ yina Yezaya 35:8 metubila?

Nzila yango ya nene ya kifuani vuandaka monisa ntete nzila yina Bayuda tambulaka na yau kukatuka na Babiloni samu na kuvutuka na buala na bau. Bosi na bilumbu na beto? Bamvula yina vuandaka tekila mvula 1919, kisalu ya kubongisa nzila yango vuandaka salama​—na kati na yau kubangula mpe kubimisa Babiblia na mashini. Bisadi ya Nzambi salaka vuayaje na ‘Nzila ya Nlongo’ samu na kukota na paradiso ya kimpeve, yina kena kunata na balusakumunu ya Kimfumu ya Nzambi.​—w23.05, p. 15-19.

Yinki banketo zole ya kifuani yina Bingana kikapu 9 kena kupesila malongi?

Bingana kena kutubila “nketo ya zoba” yina kena kubokila bantu samu na kunata bau na ‘Diziami’ mpe yakena kutubila ‘nduenga ya kedika,’ yina bamekokanisa na nketo mosi yina kena kubokila bantu samu na kunata bau na ‘nzila ya mayele ya kubakusa mambu’ mpe na luzingu. (Bin. 9:1, 6, 13, 18)​—w23.06, p. 22-24.

Yinki mutindu kumikitisa ya Nzambi mpe kikadulu na yandi ya kuvuanda ve mambu ngolo monanaka na mutindu yandi sadilaka Loti mambu?

Yehova tubilaka Loti yandi katuka na Sodomi mpe yandi tina na kizunga ya bamongo. Ntangu Loti lombaka ti Yehova pesa yandi nzila ya kukuenda tina na Zoare, Nzambi pesaka Loti nzila ya kukuenda kuna.​—w23.07, p. 21.

Yinki nketo lenda sala kana bakala na yandi ketalaka pornografi?

Yandi fueti zaba ti, yandi fueti kukipesa foti ve. Yandi fueti tula makanisi na yandi na nguizani yina yandi kele na yau na Nzambi mpe kukanisa na mpinda na masolo ya Biblia ya banketo yina vuandaka tungisama kasi babakaka lukindusu na Nzambi. Yandi lenda sadisa bakala na yandi na kumanga mambu yina ketulaka muntu na ntotolo.​—w23.08, p. 14-17.

Yinki mutindu mayele ya kubakusa mambu lenda sadisa beto samu beto vuanda na kimpombo ntangu bantu kena kutula ntembe na bindimeli na beto?

Beto lenda tadila kiuvu yango to diambu yango ya mpasi lokola diluaku samu na kulonguka diambu yina muntu yango kena kukanisa to diambu yina kele mfunu samu na yandi. Na mutindu yango beto kevuanda ya kubongama samu na kupesa mvutu na mutindu ya kimpombo.​—w23.09, p. 17.

Yinki dilongi beto lenda baka na kifuani ya Maria na diambu metadila kubaka ngolo?

Ntangu yandi zabaka ti yandi kevuanda mama ya Masiya, Maria bakaka ngolo na nzila ya bantu yankaka. Mbasi Gabriele mpe Elizabeti pesaka Maria lukindusu yina katukaka na Masonukua. Beto diaka beto lenda baka ngolo na nzila ya bampangi na beto Baklisto.​—w23.10, p. 15.

Yinki mutindu Yehova lenda pesa mvutu na bisambu na beto?

Yandi mepesa nsilulu ti yandi kekuwa bisambu na beto mpe yandi ketalaka kana bisambu na beto kele na nguizani na lukanu na yandi. (Yer. 29:12) Yandi lenda pesa mvutu na mitindu ya kusuasana na bisambu yina mekokana, kasi yandi kesadisa beto ntangu nionso.​—w23.11, p. 21-22.

Kana Baroma 5:2 metubila “kivuvu,” samu na yinki bametubila yau diaka na verse 4?

Kana muntu mekuwa nsangu ya mbote, yandi lenda kuma na kivuvu ya kuvuanda na luzingu na paradiso na ntoto. Kasi ntangu yandi kena kukutana na bampasi, yandi kena kukangila yau ntima, mpe yandi kena kumona mutindu Nzambi kena kundima yandi, kivuvu na yandi kekumaka diaka ngolo mpe yandi kekukimona ti yametadila mpenza yandi.​—w23.12, p. 12-13.