Ntumua Paulo sonikinaka Timote, yina vuandaka nkulutu lokola yandi: ‘Na ntuala ya Nzambi, ya Klisto Yesu mpe ya bambasi yina meponama, munu kena kupesa nge bantumu ti nge landa malako yayi kondua kukanisina bantu yimbi, mpe kondua kupona bilungu.’​—1 Tim. 5:21.

Beto tubila ntete banani kele na kati ya grupe yango ya bambasi. Yakele puelele, bambasi yango kele ve na kati ya Baklisto 144 000. Ntangu Paulo sonikinaka Timote, mfutumukunu ya Baklisto yina metulua mafuta na kimpeve samu na kukuenda na dizulu bandaka ntete ve. Bantumua mpe Baklisto yankaka yina tuluaka mafuta kumaka ntete ve bisemua ya kimpeve, na yau balendaka vuanda ve “bambasi yina meponama.”​—1 Ko. 15:50-54; 1 Tes. 4:13-17; 1 Yoa. 3:2.

Diaka, “bambasi yina meponama” lendaka vuanda ve bambasi yina zitisaka ve Nzambi na ntangu ya Nkuka ya maza. Bambasi yango landaka Satana mpe bakumaka bademo, mpe bambeni ya Yesu. (Eba. 6:2; Luka 8:30, 31; 2 Pe. 2:4) Na bilumbu kena kuiza, bakekanga bau na dibulu ya mudindu samu na bamvula 1 000 mpe na manima bakekufua bau kintuadi na Diabulu.​—Yuda 6; Em. 20:1-3, 10.

Na yau, “bambasi yina meponama” fueti vuanda bambasi ya dizulu yina kesalaka na kukuikama kintuadi na “Nzambi mpe Klisto Yesu.”

Yakele na mafunda ya mafunda ya bambasi ya kukuikama. (Ebr. 12:22, 23) Beto fueti kanisa ve ti bambasi yango nionso kesalaka kisalu mosi. (Em. 14:17, 18) Na kifuani, Yehova lombaka na mbasi mosi yandi kufua basoda 185 000 ya Asiri. (2 Bak. 19:35) Kasi bambasi mingi lenda ponama samu na ‘kukatula na Kimfumu ya Yesu nionso yina kebudisaka dibaku mpe bantu yina kebukaka bansiku.’ (Mat. 13:39-41) Bambasi yankaka lenda baka kiyekua ya kusangisa Baklisto yina meponama na dizulu. (Mat. 24:31) Mpe bambasi yankaka ‘ketaninaka beto na banzila na beto nionso.’​—Nz. 91:11; Mat. 18:10; fuanikisa na Matai 4:11; Luka 22:43.

Kondua ntembe, “bambasi yina meponama” yina 1 Timote 5:21 metubila vuandaka bambasi yina bapesaka biyekua ya spesiale na nguizani na bisadi ya Nzambi. Na kikapu yayi, Paulo pesaka malongi ya nduenga samu na bankulutu, yina bampangi ya kimvuka fueti zitisa. Na ndambu na bau, bankulutu fueti kokisa biyekua na bau “kondua kukanisina bantu yimbi, mpe kondua kupona bilungi” mpe bafueti baka ve banzengolo to kuzenga mambu kondua kukanisa. Mfunu ya mbote yina Paulo pesilaka bau dilongi yango kele samu bakena kusala “na ntuala ya Nzambi, ya Klisto Yesu mpe ya bambasi yina meponama.” Na yau, bambasi yankaka kele na kiyekua ya kusadisa kimvuka. Na kifuani, baketaninaka bisadi ya Nzambi, bakesadisaka bau na kisalu ya kusamuna, mpe baketubilaka Yehova mambu yina bamemona.​—Mat. 18:10; Em. 14:6.