Nge tangaka mbotembote banimero ya Yinzo’a zulu ya Nkengi ya mvula yayi? Na yau, tala kana nge lenda pesa bamvutu na biuvu yayi melanda:

Yinki kifuani Yehova kepesaka samu na mutindu ya kusadila banketo mambu?

Yandi kesadilaka bau mambu kondua kupona bilungi, yandi kemonaka ve ti babakala meluta banketo. Nzambi kekuwaka banketo, yandi ketulaka dikebi na banguilu mpe mitungisi na bau. Mpe yandi ketudilaka bau ntima na kupesaka bau kiyekua ya kukokisa kisalu na yandi.​—w24.01, p. 15-16.

Yinki mutindu beto lenda sadila Baefese 5:7, yina metuba: ‘Beno sangana ve na bau’?

Ntumua Paulo vuandaka luengisa beto na kubika kusangana na bantu yina kesalaka ti yavuanda mpasi samu na beto kuzitisa bansikudukusu ya Nzambi. Bankundi ya yimbi kele kaka ve bantu yina beto kelutisaka na bau ntangu mbunzu na mbunzu. Yamesangisa mpe bantu yina beto kesololaka na bau na nzila ya basite ya kusolola na bantu.​—w24.03, p. 22-23.

Beto fueti keba na masolo ya luvunu ya yinki mutindu?

Beto fueti keba na masolo yina beto zaba ve kana ya kele ya kedika, yina kekatukaka na bankundi na beto yina kele na makanisi ya yimbi ve, na bamesaje yina mekatuka na bantu yina beto zaba ve, mpe bapengui yina kekukibimisaka lokola bakena kusepela na kedika.​—w24.04, p. 12.

Yinki mambu beto mezaba mpe yinki mambu beto zaba ve samu na mutindu Yehova kisambisa Ntinu Salomo, bantu yina kufuaka na Sodome mpe Gomore mpe na Nkuka ya maza?

Beto zaba mpenza ve kana Yehova zengilaka bau lufua ya mvimbamvimba. Kasi, diambu yina beto mezaba kele ti yandi mezaba mambu nionso mpe yandi mefuluka na ntima kiadi.​—w24.05, p. 3-4.

Kuzaba ti Nzambi kele “Dibanga” kena kundimisa beto na yinki diambu? (Mib. 32:4)

Beto lenda sosa kisika ya kutinina na Yehova. Yandi kele ya kukuikama mpe yandi kebika beto ata fioti ve, yandi kekokisaka ntangu nionso bansilulu na yandi. Mpe yandi kesobaka ve, kimuntu mpe lukanu na yandi kesobaka ata fioti ve.​—w24.06, p. 26-28.

Yinki lenda sadisa nge samu nge mesana na kimvuka ya yimpa?

Tudila Yehova ntima, yandi kesadisa nge mutindu yandi sadisaka bisadi na yandi ya ntama. Kufuanikisa ve kimvuka na nge ya ntama na ya yimpa. Kukipesa na kimvuka na nge ya yimpa, mpe sala kinkundi ya yimpa.​—w24.07, p. 26-28.

Yinki malongi kele na bifuani tatu yina kele na Matai kikapu 25?

Kifuani ya mameme mpe bankombo kena kutubila diambu metadila kuvuanda muntu ya kukuikama mpe ya lunungu. Kifuani ya banketo ya mayele mpe bazoba yina zabaka ntete ve babakala kena kumonisa mfunu ya kuvuanda ya kubongama mpe ya kukenga. Mpe kifuani ya batalanta kena kutubila mfunu ya kuvuanda muntu yina kesalaka kisalu ya ngolo.​—w24.09, p. 20-24.

Yinki vuandaka yinda ya kisika ya kukotila ya tempelo ya Salomo?

Na 2 Ntango 3:4, bamaniskri yankaka ya ntama metuba ti kisika yango ya kukotila vuandaka na “ba coudée 120,” yina zola monisa ti yavuandaka na yinda ya bametre 53. Kasi bamaniskri yankaka yina mezabana mingi metuba ti kisika yango ya kukotila vuandaka na “ba coudée 20,” yina zola monisa ti ntela na yau vuandaka ya bametre 9. Ntalu yayi ya nsuka mebonga mpenza na kutadila epesere ya bibaka ya tempelo.​—w24.10, p. 31.

Kuvuanda ‘bakala ya nketo kaka mosi’ zola monisa yinki samu na nsadisi na kisalu? (1 Tim. 3:12)

Yazola monisa ti yandi kele bakala ya nketo kaka mosi mpe yandi fueti sala ve pite. Katula yau, yandi fueti tula ata fioti ve dikebi na mutindu ya yimbi na banketo yankaka.​—w24.11, p. 19.

Samu na yinki beto lenda tuba ti Yoane 6:53 vuandaka ve kifuani samu na Madia ya nkokila ya Mfumu?

Yoane 6:53 ketubilaka mfunu ya kudia nsuni ya Yesu mpe kunua menga na yandi. Yesu tubaka bampova yango na Galile na mvula 32 N.B., na Bayuda yina yalombaka bamonisa kiminu na bau na yandi. Kasi, Yesu bandisaka Madia ya nkokila ya Mfumu na Yerusaleme mvula mosi na manima. Kuna Yesu vuandaka tubila bantu yina keyala kintuadi na yandi na dizulu.​—w24.12, p. 10-11.