NA KILUMBU ya mercredi 18 janvier 2023, luzayisu mosi ya spesiale bimaka na jw.org, yina tubaka ti mpangi Gage Fleegle mpe mpangi Jeffrey Winder ponamaka samu na kusala lokola bampangi na Kimvuka ya Ntuadisi ya Bambangi ya Yehova. Bampangi yango nionso zole sadilaka Yehova na kukuikama nionso bamvula mingi.

Mpangi Fleegle yundukilaka na ouest ya Pennsylvanie, na États-Unis, mpe yandi longukaka kedika na nzila ya bibuti na yandi. Ntangu yandi vuandaka ntuenia, dibuta na yandi kuendaka na mua mbanza mosi ya fioti kisika nsatu ya ngolo ya bansamuni vuandaka. Ntangu fioti na manima, yandi bakaka mbotama na kilumbu ya 20 novembre 1988.

Bibuti ya mpangi Fleegle vuandaka kindisa yandi ntangu nionso yandi kota na kisalu ya ntangu nionso. Mbala mingi bavuandaka yamba bankengi ya kizungidila mpe bampangi ya Betele na yinzo na bau, mpe mpangi Fleegle vuandaka mona mutindu bampangi yango vuandaka na kiese. Ntangu fioti na manima ya mbotama na yandi, yandi bandaka kisalu ya mpasudi nzila ya ngonda na ngonda​—na kilumbu ya 1 septembre 1989. Bamvula zole na manima, yandi kokisaka lukanu na yandi yina yandi kukitudilaka ntangu yandi vuandaka na bamvula 12​—lukanu ya kusala na Betele. Yandi bandaka kisalu na yandi na Betele ya Brooklyn na ngonda ya octobre 1991.

Na Betele, mpangi Fleegle salaka bamvula 8 na Departema ya kubimisa mikanda na mashine mpe na manima batindaka yandi na Departema ya kisalu. Kaka na ntangu yango, yandi vuandaka pesa maboko na kimvuka mosi ya ndinga Russe samu na mua bamvula. Na 2006 yandi kuelaka nketo na yandi Nadia, yina kumaka kusala kintuadi na yandi na Betele. Kintuadi, bapesaka maboko na kisalu ya kusamuna na ndinga ya Portugais mpe basalaka bamvula kuluta 10 na kupesa maboko na kisalu ya kusamuna na ndinga ya Espagnol. Na manima ya kusala bamvula mingi na Departema ya kisalu, batindaka mpangi Fleegle na kusala na biro ya Komite ya malongi mpe na manima na biro ya Komite ya kisalu.  Na mars 2022 yandi ponamaka samu na kusala lokola nsadisi na Komite ya kisalu ya Kimvuka ya Ntuadisi.

Mpangi Winder yundukilaka na Murrieta, na Californie na États-Unis. Yandi zabaka kedika na nzila ya bibuti na yandi, mpe yandi bakaka mbotama na kilumbu ya 29 mars 1986. Kaka ngonda landaka, yandi bakaka nzengolo ya kukuma mpasudi nzila ya ntangu ya nkufi. Yandi sepelaka na yau mingi yau yina yandi vuandaka na nsatu ya kutatamana kusala yau. Na manima ya kusala bangonda mingi lokola mpasudi nzila ya ntangu ya nkufi, yandi kumaka mpasudi nzila ya ngonda na ngonda na kilumbu ya 1 octobre 1986.

Ntangu yandi vuandaka ntuenia, mpangi Winder vuandaka kuenda tala bayaya na yandi zole ya babakala yina vuandaka sala na Betele na ntangu yango. Yasalaka ti yandi kuma na nsatu ya kufulusa formilere ntangu yandi kekuma mbuta. Mpe na ngonda ya mai 1990, babokilaka yandi samu yandi banda kusala na Betele na Wallkill.

Na Betele, mpangi Winder salaka na badepartema mutindu na mutindu, na Departema ya kutula bunkete, na Departema ya ferme, mpe na biro ya Betele. Yandi kuelaka nketo na yandi Angela na 1997, mpe banda vana babandaka kusala kintuadi na Betele. Na 2014 batindaka bau na Warwick, kuna mpangi Winder vuandaka pesa maboko na biro ya nene ya kisalu ya kutunga. Na 2016 batindaka bau na Kisika ya nene ya malongi ya Watchtower na Patterson, kuna mpangi Winder vuandaka sala na kisalu ya Audio/Video. Bamvula 4 na manima, bavutukaka na Warwick, mpe batindaka mpangi Winder yandi banda kusala na biro ya Departema yina ketadilaka bisadi. Na ngonda ya mars 2022 yandi ponamaka lokola nsadisi na Komite ya Kimvuka ya Ntuadisi yina ketadilaka bisadi.

Beto kena kusambila ti Yehova sakumuna mingi bampangi yango yina kele ‘makabu yina kele bantu’ ntangu bakena kutatamana kusala ngolo samu na mambote ya Kimfumu.​—Efe. 4:8.