YAMEKUMINAKA nge deja nge mona ti nge fueti nunga mambu na nge ya mpasi nge mosi? Beto kena kuzinga na “ntangu mosi ya mpasi” yina lenda sala ti beto lemba nzutu mpe beto kukimona beto mosi. (2 Tim. 3:1) Kasi, ntangu beto kena kukutana na mambu ya mpasi, yakele na bantu yina lenda sadisa beto. Biblia memonisa mfunu ya kuvuanda na bankundi ya kedika na “bantangu ya mpasi.”​—Mas. 17:17.

Ntumua Paulo bakaka lusadusu na bankundi na yandi yina vuandaka sala na yandi bavuayaje. (Kol. 4:7-11) Ntangu Paulo vuandaka na buloko na Rome, bankundi na yandi vuandaka sadila yandi mambu mingi yina yandi mosi vuandaka ve na dikoki ya kusala. Na kifuani, Epafrodite natinaka Paulo bima yina bampangi ya Filipi tindaka. (Flp. 4:18) Tishike vuandaka kuenda bika baletre ya Paulo na bimvuka. (Kol. 4:7) Na lusadusu ya bankundi na yandi, Paulo kokisaka kisalu na yandi atako yandi vuandaka na yinzo yina basoda vuandaka sunga yandi to ntangu yandi vuandaka yandi mosi na buloko. Yinki mutindu nge lenda vuanda nkundi ya kedika bubu yayi?

Bifuani mingi ya bilumbu na beto memonisa mfunu ya kuvuanda nkundi ya kedika. Elisabet, mpasudi nzila mosi ya Espagne, mesasila mutindu mpangi mosi ya nketo sadisaka yandi ntangu yandi kutanaka na mambu ya mpasi. Ntangu bamonaka mama na yandi na maladi ya kansere yina zingilaka mpe kumaka pene ya kunata yandi na lufua, mpangi yango ya nketo tindilaka Elisabet bamesaje mingi ya lukindusu yina simbamaka na baverse ya Biblia. Elisabet metuba: “Konso kilumbu, bamesaje yango vuandaka pesa munu ngolo ya kununga banguilu ya kukimona munu mosi.”​—Mas. 18:24.

Beto lenda kumisa ngolo kinkundi na beto na bampangi na beto Baklisto na kusadisaka bau na mambu ya kimpeve. Na kifuani, nge lenda nata mpangi mosi yina mepusana na bamvula na balukutakanu to na kisalu ya kusamuna? Kana nge mesala mutindu yina, kondua ntembe nge kesepela na masolo ya kukindisa yina beno kesolola na yandi. (Rom. 1:12) Kasi, Baklisto yankaka kele ve na dikoki ya kubima na bayinzo. Yinki mutindu beto lenda vuanda bankundi ya kedika samu na bau?

Baklisto yankaka kele na mitungisi ya mavimpi to na mambu yankaka yina kepekisaka bau samu bakuenda na balukutakanu mbunzu na mbunzu. Beto tadila kifuani ya David, yina bamonaka na maladi ya lymphome. Samu na bangonda kuluta 6, yandi bakaka tretema samu na kansere na yandi. Na ntangu ya tretema yango, David mpe nketo na yandi Lidia, vuandaka landa balukutakanu na yinzo na nzila ya Internet.

Yinki lusadusu babakaka na bankundi na bau ya kimvuka? Na manima ya konso lukutakanu, bampangi yankaka yina vuandaka na Yinzo ya Kimfumu vuandaka  sala ngolo samu na kusolola na David mpe Lidia na nzila ya apele video. Katula yau, ntangu David mpe Lidia vuandaka pesa bakomantere, bampangi vuandaka tindila bau bamesaje ya kukindisa na manima ya lukutakanu. Yinki mambote yabimisaka? David mpe Lidia vuandaka kukimona pene ya bampangi.

Beto lenda samuna mpe kintuadi na bampangi yina kele ve na dikoki ya kubima na bayinzo. Kana beto mesala mua bansobolo na programe na beto, beto lenda monisa ti beto zimbakana ve bantu yina kena kukutana na mambu ya mutindu yina. (Mas. 3:27) Mbala yankaka nge lenda samuna na nzila ya letre to na nzila ya telefone kintuadi na bau. Bantu yina kele ve na dikoki ya kubima na yinzo lenda landa lukutakanu ya kisalu ya kusamuna na nzila ya apele video. David mpe Lidia vuandaka sepela na nkubukulu yango. David mesasila: “Kusangana na grupe na beto ya kisalu ya kusamuna samu na mua disolo ya nkufi mpe kusambila kintuadi vuandaka kindisa beto mpenza.” Mbala yankaka nge lenda lomba mbala na mbala mpangi yina kele ve na dikoki ya kubima na yinzo kana nge lenda nata nlonguki mosi ya Biblia na yinzo na yandi samu beno longuka kuna.

Kana beto kena kusala kintuadi na bampangi yina kele ve na dikoki ya kubima na bayinzo mpe beto kena kumona bikadulu na bau ya kitoko, beto kekuma bankundi na bau ya kedika. Na kifuani, ntangu nge kena kusamuna kintuadi na bansamuni ya mutindu yina mpe nge kena kumona mutindu bakena kusadila Mpova ya Nzambi na mutindu ya mbote samu na kusimba ntima ya muntu mosi, kondua ntembe nge kesepela na bau diaka mingi kuluta. Kana nge kena kupesa bampangi na nge Baklisto maboko na mambu ya kimpeve, nge lenda baka bankundi ya yimpa.​—2 Ko. 6:13.

Paulo bakaka lukindusu na kuvuandaka kintuadi na nkundi na yandi Tito. (2 Ko. 7:5-7) Disolo yango kena kubambula beto ti beto lenda pesa lukindusu kaka ve na kutubaka bampova ya kukindisa na bantu yina kele na nsatu na yau, kasi mpe na kuvuandaka kintuadi na bau mpe na kusalaka nionso yina beto lenda samu na kusadisa bau.​—1 Yoa. 3:18.

Bampangi na beto na Russie kele bifuani ya mbote na diambu metadila kusalasana. Beto tadila kifuani ya Sergey mpe nketo na yandi, Tatyana. Bapolisi kuizaka sosasosa na yinzo na bau mpe na manima banataka bau na biro ya polisi samu na kuyuvusa bau biuvu. Babikaka ntete Tatyana vutuka na yinzo. Sergey metuba: “Ntangu kaka [Tatyana] kumaka na yinzo, mpangi mosi ya nketo ya kibakala kuizaka tala yandi. Bankundi mingi kuizaka mpe basadisaka beto samu na kukatula mvualangani yina bapolisi bikaka.”

Sergey mebuela: “Munu kesepelaka ntangu nionso na Masese 17:17, yina metuba: ‘Nkundi ya kedika kezolaka ntangu nionso mpe yandi kele mpangi yina mebutuka samu na bantangu ya mpasi.’ Bampova yango kumaka na mfunu mingi samu na munu na ntangu yango ya minioko, ntangu munu vuandaka na nsatu mingi ya lusadusu ya bankundi na munu. Yehova pesaka munu bankundi ya kibakala samu bavuanda na ndambu na munu.” a

Ntangu beto kekutanaka na mambu ya mpasi kuluta, beto kevuandaka na nsatu ya bankundi yina lenda sadisa beto. Beto kevuanda diaka na nsatu na bau mingi kuluta na ntangu ya mpasi ya nene. Na yau, bika beto sala nionso yina beto lenda samu beto vuanda bankundi ya kedika banda bubu yayi!​—1 Pe. 4:7, 8.