DISOLO YA NDONGOKOLO 7
MUYIMBU 15 Tókumisa Mwana ya liboso ya Yehova!
Yinki mutindu beto kebakaka mambote na nlemvo ya Yehova?
“Nge kenlemvukilaka na kedika nionso.”—NZ. 130:4.
MAMBU YINA BETO KELONGUKA
Beto ketadila ndambu ya bifuani ya Biblia yina kena kumonisa mutindu mosi kaka yina Yehova kenlemvukilaka beto. Disolo yayi kesadisa beto beto kudisa butondi na beto samu na nlemvo na yandi.
1. Samu na yinki yakevuandaka mpasi na kubakusa yinki muntu zola tuba kana yandi metuba ti yandi menlemvukila?
“MUNU MENLEMVUKILA NGE.” Bampova yango lenda kitisa mpenza ntima, mingimingi kana nge mezaba ti nge tubaka to nge salaka diambu mosi yina salaka muntu mpasi na ntima! Kasi yinki zola monisa mpenza bampova “Munu menlemvukila nge”? Muntu yina nge luadisaka zola tuba ti kinkundi na beno mevutuka mutindu yavuandaka? To yandi zola tuba kaka ti yandi kele diaka ve na nsatu ya kutubila diambu yango? Bantu kezolaka kutuba mambu ya kusuasana ntangu baketubaka ti, “munu menlemvukila nge.”
2. Yinki mutindu bamesasila nlemvo ya Yehova na Masonukua? (Tala diaka noti na yinsi ya paje.)
2 Mutindu Yehova kenlemvukilaka beto bantu ya kukondua kukoka kele mpenza ya kusuasana na mutindu beto kenlemvukilanaka. Muntu mosi ve lenda nlemvukila mutindu Yehova kenlemvukilaka. Nsoniki mosi ya nkunga tubaka samu na Yehova ti: “Nge kenlemvukilaka na kedika nionso, samu bantu vuanda na wonga na nge.” a (Nz. 130:4) Ya kedika, Yehova “kenlemvukilaka na kedika nionso.” Yandi kele muntu yina kemonisaka beto yinki zola monisa mpenza kunlemvukila. Na bisika yankaka, samu na kutubila mutindu Yehova kenlemvukilaka, bansoniki ya Biblia sadilaka mpova mosi ya Ebre yina basalaka sadila ve samu na kutubila mutindu bantu kenlemvukilaka.
3. Yinki mutindu nlemvo ya Yehova mesuasana na nlemvo na beto? (Yisaya 55:6, 7)
3 Kana Yehova menlemvukila muntu, yandi kekatulaka disumu ya muntu yango. Kinkundi yina bebaka kevutukaka mpenza. Beto kele mpenza na butondi mutindu nlemvo ya Yehova kevuandaka ya mvimba mpe mutindu yandi kenlemvukilaka beto mbala na mbala.—Tanga Yisaya 55:6, 7.
4. Yinki mutindu Yehova mesadisa beto beto bakusa nsasulu ya kedika ya nlemvo?
4 Kana nlemvo ya Yehova kele ya kusuasana na nlemvo na beto, yinki mutindu beto bantu ya kukondua kukoka beto lenda bakusa mpenza nsasulu na yau? Yehova mesadila bifuani ya kitoko mpenza samu na kusasila nlemvo na yandi. Na disolo yayi, beto ketubila ndambu ya bifuani yango. Yakemonisa beto mutindu Yehova kekatulaka disumu mpe kaka na ntangu yango, yandi kevutulaka nguizani yina disumu bebisaka. Kutadila bifuani yango kekudisa butondi na beto samu na Tata na beto ya nzola, yina kemonisaka nlemvo na yandi na mitindu mingi ya kusuasana.
YEHOVA KEKATULAKA DISUMU
5. Yinki kesalamaka kana Yehova menlemvukila masumu na beto?
5 Na Biblia, mbala mingi bakefuanikisaka masumu na bizitu ya kilo. Ntinu Davidi tubilaka masumu na yandi mutindu yayi: “Banzimbala na munu melutila munu yintu; lokola kizitu mosi ya kilo, yakele mpenza kizitu yina munu kekoka ve kunata.” (Nz. 38:4) Kasi Yehova kenlemvukilaka masumu ya bantu yina mebalula ntima. (Nz. 25:18; 32:5) Mpova ya Ebre yina mebangulua na “kunlemvukila” zola monisa “kunanguna” to “kunata.” Beto lenda kokanisa Yehova na muntu mosi ya ngolo yina na mutindu ya kifuani, kenangunaka kilo ya masumu na beto na mapeka na yandi mpe kenataka yau ntama na beto.
“Nge nlemvukilaka” (Nz. 32:5)
6. Tii yinki kisika Yehova kenataka masumu na beto?
6 Biblia kesadilaka kifuani yankaka samu na kumonisa ti Yehova kenataka masumu na beto ntama na beto. Nzembo 103:12 metubila beto: “Kaka mutindu kisika muini kebimaka kele ntama mpenza na kisika yakelekaka, mutindu mosi mpe yandi metula ntama na beto bisalu na beto mingi ya kubuka bansiku.” Est kevuandaka ntama mpenza na ouest. Bandambu yango nionso zole lenda kutana ata fioti ve. Na bampova yankaka, Yehova ketulaka masumu na beto ntama na beto kuluta mutindu yina beto lenda kanisa. Yakena kundimisa beto ti Yehova kenlemvukilaka beto na ntima ya mvimba!
“Kaka mutindu kisika muini kebimaka kele ntama mpenza na kisika yakelekaka” (Nz. 103:12)
7. Yinki mutindu Biblia mesasila diambu yina Yehova kesalaka na masumu na beto? (Mika 7:18, 19)
7 Atako na mutindu ya kifuani Yehova ketulaka masumu na beto ntama na beto, yandi ketatamanaka kukanisa yau mbala na mbala? Ve. Ntinu Ezekiasi sonikaka samu na Yehova: “Nge meloza masumu na munu nionso na manima ya mukongoni na nge.” To mutindu noti ya yinsi ya paje memonisa yau, “nge mekatula masumu na munu nionso na meso na nge.” (Yis. 38:9, 17; nyp.) Bampova yango ya kifuani memonisa ti Yehova kebakaka masumu ya bantu yina mebalula ntima mpe yandi kelozaka yau ntama ya meso na yandi. Bampova yango lendaka bangulua diaka mutindu yayi: “Nge mekumisa [masumu na munu] lokola yasalamaka ve.” Biblia mebula nsoso na diambu yango na bampova yankaka ya kifuani, yina kele na Mika 7:18, 19. (Tanga.) Baverse yango kena kutuba ti Yehova kelozaka masumu na beto na bisika ya mudindu ya nzadi mungua. Na ntama, muntu vuandaka na dikoki ve ya kubaka kima yina bameloza na bisika ya mudindu ya nzadi mungua.
“Nge meloza masumu na munu nionso na manima ya mukongoni na nge” (Yis. 38:17)
“Nge keloza masumu na bau nionso na bisika ya mudindu ya nzadi mungua” (Mika 7:19)
8. Yinki mambu beto melonguka deja na baparagrafe meluta?
8 Na nzila ya bampova yango ya kifuani, beto melonguka ti kana Yehova menlemvukila beto, yandi kekatulaka beto kizitu ya masumu na beto. Ya kedika, mutindu Davidi tubaka, “kiese na bantu yina bamenlemvukila bisalu na bau ya kubuka bansiku mpe bantu yina bamefuka masumu na bau; kiese na muntu yina Yehova ketanga ve disumu na yandi.” (Rom. 4:7, 8) Yau nde nlemvo ya kedika!
YEHOVA KESUKULAKA MASUMU
9. Yinki bampova ya kifuani Yehova mesadila samu na kusasila bunene ya nlemvo na yandi?
9 Yehova kesadilaka bampova yankaka ya kifuani samu na kusadisa beto beto bakusa mutindu yandi kesukulaka masumu ya bantu yina mebalula ntima, na nzila ya nkudulu yina katulaka beto na kinanga. Na mutindu ya kifuani, Yehova metuba lokola yandi kena kusukula mpe yandi kena kupase masumu yango. (Nz. 51:7; Yis. 4:4; Yir. 33:8) Yehova yandi mosi metubila mambu yina nkubukulu yango kebimisaka: “Ata kana masumu na beno kele mbuaki ya ngolo, yakekuma mpembe lokola neje; ata kana yakele mbuaki lokola kinkuti ya mbuaki ya ngolo, yakekuma lokola lene.” (Yis. 1:18) Yakevuandaka mpasi mpenza kukatula tashe ya mbuaki na kinkuti. Nzokande, na nzila ya bampova yango ya kifuani, Yehova kena kundimisa beto ti masumu na beto lenda sukuka mbote mpenza na mutindu yina kesala ti yamonana diaka ata fioti ve.
“Ata kana masumu na beto kele mbuaki ya ngolo, yakekuma mpembe lokola neje” (Yis. 1:18)
10. Yinki bampova ya kifuani Yehova mesadila samu na kumonisa bunene ya mutindu yandi kenlemvukilaka mpenza?
10 Mutindu beto monaka yau na disolo meluta, masumu kele lokola ‘bamfuka.’ (Mat. 18:32-35) Na yau, mfuka na beto kebuelamaka konso ntangu yina beto kesalaka masumu. Beto kele na mfuka na yandi ya nene! Kasi kana Yehova menlemvukila beto, yakele lokola yandi mekatula mfuka yina yalombaka beto futa. Yandi kelombaka ve beto futa mfuka ya masumu yina yandi menlemvukilaka. Mutindu kaka muntu kemonaka kiese kana bamekatula mfuka na yandi, beto kemonaka kiese ntangu Yehova kenlemvukilaka beto!
“Nlemvukila beto masumu na beto” (Mat. 6:12)
11. Yinki Biblia kezolaka tuba ntangu yaketubaka ti Yehova ‘kekufuaka masumu na beto’? (Misala 3:19)
11 Yehova kesukaka kaka ve na kukatula bamfuka, to masumu na beto; yandi kekufuaka yau. (Tanga Misala 3:19.) Kana bamekatula mfuka mosi, mbala mingi baketulaka kidimbu ya X (fois) na zulu ya ntalu yina muntu fueti futa. Nzokande, bantu lenda vuanda kaka na dikoki ya kutanga ntalu yango, atako kidimbu ya X kele na zulu. Kasi yakele ya kusuasana na kufua kima mosi. Samu na kubakusa bampova yango ya kifuani, beto fueti zaba ti na ntama yavuandaka pete samu na kukatula masonukua yina bamesonika na ankre na kusadilaka maza. Muntu lendaka katula masonukua yango na kusadilaka eponje. Na yau, ntangu bavuandaka “kufua” mfuka mosi, yavuandaka zimbana samu na mvimbamvimba. Bantu vuandaka diaka ve na dikoki ya kumona mambu yina vuandaka ya kusonama. Yavuandaka kaka lokola mfuka yango salaka vuanda ve. Yakena kusimba bantima na beto kuzaba ti Yehova kesukaka kaka ve na kukatula masumu na beto, kasi yandi kekufuaka yau samu na mvimbamvimba!—Nz. 51:9.
“Samu bakufua masumu na beno” (Mis. 3:19)
12. Yinki dilongi beto mebaka na kifuani ya dituti ya nene?
12 Yehova mesadila mpova ya kifuani ya mutindu yina samu na kumonisa mutindu yandi kekufuaka masumu. Yandi metuba: “Munu kefuka bisalu na nge ya kubuka bansiku lokola nde yamefukama na dituti mpe masumu na nge lokola nde na dituti mosi ya nene.” (Yis. 44:22) Kana Yehova menlemvukila, yakele lokola yandi mesadila dituti mosi ya nene samu na kufuka banzimbala na beto samu yabika diaka kumonana.
“Munu kefuka bisalu na nge ya kubuka bansiku lokola nde yamefukama na dituti” (Yis. 44:22)
13. Kana Yehova menlemvukila masumu na beto, yinki mutindu beto kekukimonaka?
13 Yinki yazola monisa samu na beto? Kana Yehova menlemvukila masumu na beto, beto fueti lemba kukitungisa samu na masumu yango na luzingu na beto ya mvimba. Na nzila ya menga ya Yesu Klisto, Yehova kekatulaka masumu na beto samu na mvimbamvimba. Kana Yehova menlemvukila masumu, yakele lokola beto salaka yau ata fioti ve. Yau nde mambote ya nlemvo ya kedika yina kekatukaka na Yehova.
YEHOVA KEVUTULAKA NGUIZANI YA MBOTE
Nlemvo yina Tata na beto ya dizulu kepesaka beto kesalaka ti beto vuanda na nguizani ya mbote na yandi (Tala paragrafe 14)
14. Samu na yinki beto lenda tula ntima na nlemvo ya Yehova? (Tala diaka bafoto.)
14 Nlemvo ya kedika yina kekatukaka na Yehova kesalaka ti beto vuanda na nguizani ya mbote na yandi. Yakesadisaka beto beto lemba kukitungisa kuluta ndilu. Beto kele na mfunu ve ya kubanga ti Yehova kele kaka na nganzi samu na beto mpe yandi kena kusosa mutindu ya kupesa beto kitumbu. Yandi kesala mutindu yina ata fioti ve. Samu na yinki beto lenda tudila Yehova ntima ntangu yandi ketubaka ti yandi kenlemvukilaka beto? Yehova tubilaka mbikudi Yeremia: “Munu kenlemvukila nzimbala na bau, mpe munu kekanisa diaka ve disumu na bau.” (Yir. 31:34) Paulo vuandaka tubila bampova yango ntangu yandi tubaka: “Munu kekanisa diaka ve masumu na bau.” (Ebr. 8:12) Kasi yinki yazola monisa mpenza?
“Munu kekanisa diaka ve disumu na bau” (Yir. 31:34)
15. Na yinki mutindu Yehova kekanisaka diaka ata fioti ve masumu na beto?
15 Na Biblia, mbala mingi mpova “kukanisa” kemonisaka kaka ve kukanisa diambu mosi yina salamaka na ntama. Yalenda monisa diaka kusala diambu. Muntu ya yimbi yina bakomaka na yinti pembeni ya Yesu tubaka: “Yesu, kanisa munu ntangu nge kekuma na Kimfumu na nge.” (Luka 23:42, 43) Yandi vuandaka lomba kaka ve ti Yesu kanisa yandi na ntangu yango. Mvutu ya Yesu monisaka ti yandi kesala diambu samu na kufutumuna muntu yango ya yimbi. Na yau, ntangu Yehova metuba ti yandi kebambukaka diaka ve na masumu na beto, yazola tuba ti yandi nlemvukilaka beto mpe yandi kepesa beto diaka ve kitumbu na bilumbu kena kuiza samu na masumu yango.
16. Yinki mutindu Biblia mesasila kimpuanza yina kekatukaka na nlemvo ya kedika?
16 Biblia mesadila mpova yankaka ya kifuani samu na kusadisa beto beto bakusa kimpuanza yina beto kebakaka na nlemvo ya kedika. Lokola beto kele bantu ya kukondua kukoka, beto kele lokola “bananga ya disumu.” Kasi, kana Yehova menlemvukila beto, beto kekumaka lokola bananga yina mekatuka na ‘kinanga ya disumu.’ (Rom. 6:17, 18; Em. 1:5) Ya kedika, kana beto mezaba ti Yehova nlemvukilaka beto, beto kevuanda na kiese lokola bananga yina mebaka kimpuanza.
“Beno katukaka na kinanga ya disumu” (Rom. 6:18)
17. Yinki mutindu nlemvo kenataka kubeluka? (Yisaya 53:5)
17 Tanga Yisaya 53:5. Mpova ya nsuka ya kifuani yina beto ketubila mekokanisa beto na bantu yina kele na maladi mosi yina kenataka na lufua. Na nzila ya nkayilu ya nkudulu yina Yehova pesaka na nzila ya Muana na yandi, Yehova belusaka beto. (1 Pe. 2:24) Kana beto mesala disumu, beto kebebisaka nguizani na beto na Yehova. Kasi na nzila ya nkudulu, yandi lenda nlemvukila beto mpe beto lenda vutukila diaka nguizani ya penepene na yandi. Mutindu kaka muntu yina mebeluka na maladi ya ngolo kevuandaka na kiese mingi, beto diaka beto kevuandaka na kiese ntangu beto mebeluka na kimpeve mpe beto mevutukila nguizani ya mbote na Yehova samu yandi menlemvukila beto.
“Beto mebeluka samu na bamputa na yandi” (Yis. 53:5)
YINA NLEMVO YA YEHOVA ZOLA MONISA SAMU NA BETO
18. Yinki malongi beto mebaka na kutadilaka bampova ya kifuani ya kusuasana yina kele na Biblia na diambu metadila nlemvo ya Yehova? (Tala diaka ankadre “Mutindu Yehova kenlemvukilaka beto.”)
18 Yinki beto melonguka na kutadilaka bampova ya kifuani yina kele na Biblia na diambu metadila nlemvo ya Yehova? Kana Yehova menlemvukila masumu na beto, yakevuandaka kaka lokola beto salaka ve masumu mpe beto lenda ndimisama ti yandi kepesa beto ve kitumbu samu na masumu yango na bilumbu kena kuiza. Na yau beto lenda vuanda na nguizani ya mbote na Tata na beto ya dizulu. Nzokande, beto mezaba ti nlemvo ya Yehova kele dikabu yina yandi mepesa beto samu yandi kezolaka beto mpe yandi kele na kikadulu ya kukaba, kasi ve samu beto kele na yinsua ya kubaka yau.—Rom. 3:24.
19. (a) Samu na yinki diambu beto fueti monisa butondi? (Baroma 4:8) (b) Yinki beto ketubila na disolo melanda?
19 Tanga Baroma 4:8. Mosimosi kati na beto fueti vuanda na butondi mutindu Yehova kele Nzambi yina ‘kenlemvukilaka na kedika’! (Nz. 130:4) Kasi, kana beto zola Yehova nlemvukila beto, beto fueti sala diambu mosi ya mfunu. Yesu tubaka: “Kana beno kena kunlemvukila ve bantu banzimbala na bau, Tata na beno diaka kenlemvukila ve banzimbala na beno.” (Mat. 6:14, 15) Na yau, yakele na mfunu mingi beto landa kifuani ya nlemvo ya Yehova. Kasi yinki mutindu beto lenda sala yau? Disolo melanda kemonisa beto mutindu beto lenda sala yau.
MUYIMBU 46 Totɔndi yo, Yehova
a Masonukua ya ebandeli ya Ebre mesadila mpova “nlemvo,” yina kena kumonisa ti yakele nlemvo kaka mosi ya kedika, atako yakele na bampova yankaka yina bamesadila samu na kutubila nlemvo. Bambangudulu mingi ya Biblia kesalaka ve lusuasanu yango ya mfunu, kasi yakele ve mutindu yina samu na Biblia—Libongoli ya Mokili ya Sika, yamebangula Nzembo 130:4 na mutindu yina mesuasana na bambangudulu yankaka ya Biblia.
