1. Yinki kekuizilaka nge na makanisi ntangu nge kekanisaka Yehova?

 NGE memekaka deja kukanisa mutindu Yehova kele? Ntangu nge kesololaka na yandi na nzila ya kisambu, yinki kekuizilaka nge na makanisi? Atako Yehova kemonanaka ve, Biblia metubila yandi na mitindu ya kusuasana. Bamebokidila Yehova ‘muini mpe kitanunu’ mpe ‘tiya yina keyokaka.’ (Nk. 84:11; Ebr. 12:29) Na vizion mosi, Ezekiele monisaka Yehova lokola dibanga ya safire, kisengo yina kena kulezima, mpe arkansiele yina kena kulezima. (Eze. 1:26-28) Ndambu yango ya mitindu ya kusuasana yina bametubila Yehova lenda pesa beto wonga to lenda ata kubangisa beto.

2. Yinki kesalaka ti yavuanda mpasi samu na beto na kupusana penepene na Yehova?

² Lokola beto kemonaka Yehova ve, yalenda vuanda mpasi samu beto ndima ti yandi kezolaka beto. Bayankaka kekanisaka ti Yehova lenda zola bau ve samu na mambu ya mpasi yina bamekutanaka na yau na luzingu. Mbala yankaka bavuandaka ve na tata yina vuandaka zola bau. Yehova kebakusaka banguilu ya mutindu yina mpe yandi mezaba samu na yinki yakele mpasi samu na beto kupusana penepene na yandi. Samu na kusadisa beto, yandi memonisa kimuntu na yandi ya kitoko na Mpova na yandi.

3. Samu na yinki beto fueti tadila mbotembote nzola ya Yehova?

³ Mpova yina kemonisaka Yehova na mutindu meluta mbote kele nzola. Biblia metuba ti Nzambi kele nzola. (1 Yn. 4:8) Mambu nionso yina yandi kesalaka, yandi kesalaka yau samu na nzola. Nzola ya Nzambi kele mpenza nene mpe ngolo na mutindu ti yandi kesukaka kaka ve na kumonisa yau na bantu yina kezolaka yandi, kasi yandi kemonisaka yau ata mpe na bantu yina kezolaka yandi ve. (Mat. 5:44, 45) Na disolo yayi, beto ketadila mbotembote Yehova mpe nzola na yandi. Kana beto kena kulonguka mingi kuzaba Nzambi na beto, beto kezola yandi mpe mingi.

 YEHOVA KEZOLAKA BETO MINGI MPENZA

4. Nzola ya ngolo ya Yehova kesalaka ti nge kukimona yinki mutindu? (Tala diaka foto.)

⁴ ‘Yehova kele mpenza na nzola ya ngolo.’ (Yak. 5:11) Na Biblia, yandi mekukifuanikisa na mama ya nzola. (Yez. 66:12, 13) Kanisa na mama yina ketaninaka muana na yandi ya fioti na nzola nionso. Yandi kenangunaka yandi mpe yandi kekitisaka yandi na nzola nionso na bajenu na yandi, mpe yandi ketubilaka yandi na ndinga ya kukita mpe ya kubomba. Kana yandi kena kudila to yandi kele na mpasi, mama na yandi kesalaka nionso samu na kukindimisa ti muana na yandi kele na nionso yina yandi kele na yau nsatu. Ntangu beto kele na mpasi, beto lenda tula ntima na nzola ya Nzambi. Nsoniki mosi ya nkunga sonikaka: ‘Ntangu mitungisi kumaka mingi na kati na munu, nge bombaka munu mpe nge kitisaka munu ntima.’​—Nk. 94:19.

5. Nzola ya kukuikama ya Yehova zola monisa yinki samu na nge?

⁵ Yehova kele ya kukuikama. (Nk. 103:8) Yandi kelemba ve kuzola beto kana beto mesala diambu ya yimbi. Dikanda ya Yisaele monisaka Yehova mpasi mbala na mbala; kasi, yandi vuandaka monisa nzola na yandi ya kukuikama na bisadi na yandi yina vuandaka balula ntima na bampova yayi: ‘Nge kumaka na mfunu mingi na meso na munu, munu pesaka nge lokumu mpe munu zolaka nge.’ (Yez. 43:4, 5) Yehova kele kaka na nzola ya mutindu yina samu na beto bubu yayi. Beto lenda tula ntima ntangu nionso na nzola yango. Ata kana beto salaka disumu ya nene, Yehova kesundolaka beto ve. Kana beto mebalula ntima mpe beto mevutukila Yehova, beto kemona ti yandi kena kutatamana kuzola beto. Yandi melaka ti ‘yandi kenlemvukila na luzolo nionso.’ (Yez. 55:7) Biblia metuba ti beto kevuanda na ‘bansungi ya kupema . . . yina kekatuka na Yehova yandi mosi.’​—Bis. 3:19.

6. Yinki Zekaria 2:8 kena kulonga beto samu na Yehova?

⁶ Tanga Zekaria 2:8. Lokola Yehova kezolaka beto, yandi kebakusaka banguilu na beto mpe yandi kevuandaka na nsatu ya ngolo ya kutanina beto. Yandi kemonaka kiadi ntangu beto kevuandaka na mpasi. Na yau, beto lenda tula ntima ti yandi kepesa beto mvutu kana beto mesambila: ‘Tanina munu lokola mbuma ya disu na nge.’ (Nk. 17:8) Disu kele kitini ya nzutu yina kemonaka mpasi na pete mpe yakele kitini mosi ya mfunu. Na yau ntangu Yehova mefuanikisa beto na mbuma ya disu na yandi, yakele lokola yandi vuandaka tuba, ‘Muntu nionso yina mesala beno mpasi, beno bantu na munu, yandi mesala mpasi na kima yina kele na mfunu samu na munu.’

7. Samu na yinki beto fueti kumisa ngolo kikadulu na beto ya kutudila nzola ya Yehova ntima?

⁷ Yehova kezolaka beto kukindimisa ti yandi  kezolaka beto. Kasi yandi mezaba samu na mambu ya mpasi yina mekuminaka beto na ntama, beto lenda kukiyuvusa kana yandi lenda zola beto. To beto lenda kutana na mambu yina ketula na kumekama kikadulu na beto ya kutudila nzola ya Yehova ntima. Yinki kekumisa ngolo kikadulu na beto ya kutudila yandi ntima? Longuka mutindu Yehova monisaka nzola na yandi samu na Yesu, samu na Baklisto yina metulua mafuta na kimpeve, mpe samu na beto nionso.

MUTINDU YEHOVA KEMONISAKA NZOLA NA YANDI

8. Samu na yinki Yesu kukindimisaka ti Tata na yandi kezolaka yandi?

⁸ Samu na basiekle mingi, Yehova mpe Muana na yandi ya nzola salaka kinkundi ya ngolo yina mesimbama na nzola ya mpinda. Nguizani na bau kele nguizani yina meluta kuzingila na luyalanganu ya mvimba. Yehova monisaka puelele nzola na yandi samu na Yesu, mutindu beto ketangaka yau na Matayo 17:5. Yehova tubaka, ‘Yandi kele muntu yina munu mendima.’ Kasi, yandi zolaka beto zaba mutindu yandi kezolaka Yesu, na yau yandi bokidilaka yandi ‘Muana na munu, yina munu kezolaka mingi.’ Yehova vuandaka sepela na Yesu mingimingi samu yandi vuandaka pene ya kupesa luzingu na yandi. (Efe. 1:7) Mpe Yesu vuandaka na ntembe ve ti Tata na yandi kezolaka yandi. Yandi vuandaka kukindimisa mpenza ti Tata na yandi kezolaka yandi. Yandi tubaka mbala na mbala na kiminu nionso ti Tata na yandi kezolaka yandi.​—Yoa. 3:35; 10:17; 17:24.

9. Yinki mpova kena kutubila nzola ya Yehova samu na Baklisto yina metulua mafuta na kimpeve? Sasila. (Baroma 5:5)

⁹ Yehova monisaka diaka nzola na yandi samu na Baklisto yina metulua mafuta na kimpeve. (Tanga Baroma 5:5.) Simba mpova ‘mefuluka.’ Diksionere mosi yina kesasilaka mambu ya Biblia metubila yau lokola “maza yina kena kukita.” Yakele kifuani mosi ya kilendo samu na kumonisa nzola ya mingi yina Yehova kevuandaka na yau samu na Baklisto yina metulua mafuta na kimpeve! Baklisto yina metulua mafuta na kimpeve mezaba ti ‘Nzambi . . . kezolaka’ bau. (Yude 1) Ntumua Yoane monisaka banguilu na bau ntangu yandi sonikaka: ‘Beno tala mutindu Tata mezolaka beto, samu babokidila beto bana ya Nzambi!’(1 Yn. 3:1) Nzola ya Yehova mesuka kaka na Baklisto yina metulua mafuta na kimpeve? Ve, Yehova monisaka nzola na yandi na beto nionso.

10. Yinki diambu yina meluta nene kena kumonisa nzola ya Yehova samu na nge?

¹⁰ Yinki kele diambu meluta nene yina mendimisa nzola ya Yehova? Nkudulu​—na nzila na yau Yehova monisaka nzola yina ata muntu yankaka lenda monisa ve! (Yoa. 3:16; Bar. 5:8) Yehova pesaka Muana na yandi ya nzola, na kubikaka nzila yandi kufua samu na bantu nionso, samu yandi nlemvukila masumu na beto mpe beto vuanda na dikoki ya kuvuanda bankundi na Yandi. (1 Yn. 4:10) Kana beto kena kuyindula na mpinda na zulu ya ntalu yina Yehova mpe Yesu futaka, beto kevuanda na dikoki ya kubakusa nzola yina bakevuandaka na yau samu na mosimosi kati na beto. (Bag. 2:20) Nkudulu futamaka kaka ve samu lunungu ya Yehova vuandaka lomba yau. Yakele dikabu ya nzola. Yehova monisaka nzola na yandi samu na beto na kupesaka yina meluta mfunu samu na yandi lokola nkayilu samu na beto​—Yesu. Yehova bikaka nzila Muana na yandi niokuama mpe kufua samu na mambote na beto.

11. Yinki dilongi beto mebaka na Yeremia 31:3?

¹¹ Mutindu beto monaka yau, Yehova kesukaka kaka ve na kumona nzola na ntima samu na beto, kasi yandi kemonisaka yau mpe na bampova. (Tanga Yeremia 31:3.) Yehova bendaka beto penepene na yandi samu yandi kezolaka beto. (Fuanikisa na Kulonga 7:7, 8.) Kima mosi ve mpe muntu mosi ve lenda kabula beto na nzola yango. (Bar. 8:38, 39) Nzola yango kesalaka ti nge kukimona yinki mutindu? Tanga Nkunga 23, mpe mona yinki mutindu Davidi kukimonaka samu na nzola ya Yehova mpe yinki mutindu nge lenda kukimona.

NZOLA YA YEHOVA KESALAKA TI NGE KUKIMONA YINKI MUTINDU?

12. Yinki mutindu nge lenda tubila Nkunga 23 na nkufi?

¹² Tanga Nkunga 23:1-6. Nkunga 23 kele nkunga yina kena kumonisa ti beto fueti tudila nzola ya  Yehova mpe dikebi na yandi ntima. Davidi, nsoniki ya nkunga yango, kena kumonisa nguizani ya ngolo yina vuandaka kati na yandi mpe Yehova, Mvungi na yandi. Davidi vuandaka kukimona na lutanunu na kubikaka Yehova tuadisa yandi mpe yandi vuandaka tula ntima ya mvimba na Yandi. Davidi zabaka ti Yehova kemonisina yandi nzola na yandi konso kilumbu ya luzingu na yandi. Yinki vuandaka sala ti yandi tudila yandi ntima ya plina?

13. Samu na yinki Davidi vuandaka kukindimisa ti Yehova ketudilaka yandi dikebi?

¹³ ‘Munu kekondua kima ve.’ Davidi vuandaka mona ti Yehova kena kukipe yandi samu yandi vuandaka pesa yandi bima nionso yina yandi vuandaka na yau nsatu. Davidi zabaka diaka ti Yehova vuandaka nkundi na yandi mpe Yehova vuandaka ndima yandi. Yau yina yandi vuandaka ndimisama ti yavuanda yinki diambu kekumina yandi na bilumbu kena kuiza, Yehova ketatamana kukokisa bansatu na yandi nionso. Lokola Davidi vuandaka ndimisama ti Yehova kezolaka yandi mpe yandi kekipeke yandi, yasadisaka yandi yandi bika kukitungisa kasi yandi vuanda nde na kiese.​—Nk. 16:11.

14. Yinki mutindu Yehova lenda tudila beto dikebi na nzola nionso?

¹⁴ Yehova ketudilaka beto dikebi na nzola nionso, mingimingi ntangu beto kena kukutana na mambu ya mpasi na luzingu na beto. Claire, a yina salaka na Betele kuluta bamvula 20 zabaka ve mutindu ya kusadisa dibuta na yandi ntangu bakutanaka na mambu ya mpasi yina landanaka. Tata na yandi belaka maladi ya AVC, mosi ya bampangi na yandi ya nketo bimisamaka na kimvuka, mpe bazimbisaka mua kompani na bau ya dibuta mpe yinzo na bau. Yinki mutindu Yehova monisaka nzola na yandi samu na bau? Claire metuba: “Yehova vuandaka sala nionso samu dibuta na munu vuanda na yina bavuandaka na yau nsatu samu na konso kilumbu. Na yau, mbala mingi Yehova vuandaka pesa beto mingi  kuluta yina beto vuandaka na yau nsatu! Mbala mingi munu kekanisaka na mutindu Yehova sadisaka beto mpe munu kezimbakanaka ata fioti ve nzola na yandi. Kukanisa na mambu yango sadisaka munu munu tatamana kusadila Yehova na kiese ntangu munu kutanaka na mambu yankaka ya mpasi na luzingu na munu.”

15. Samu na yinki Davidi kukimonaka ti yandi mebaka ngolo? (Tala diaka foto.)

¹⁵ ‘Yandi kepesaka munu ngolo.’ Na bantangu yankaka, Davidi vuandaka kukitungisa na makanisi samu na mambu nionso ya mpasi mpe banzomono yina yandi vuandaka kutana na yau. (Nk. 18:4-6) Kasi, nzola mpe dikebi ya Yehova vuandaka pesa yandi ngolo. Yehova vuandaka nata nkundi na yandi yina vuandaka ya kulemba na ‘bisika yina mefuluka na matiti’ mpe na ‘bisika ya kupema yina kele na maza mingi.’ Yau salaka ti, Davidi baka diaka ngolo mpe yandi vuanda na dikoki ya kutatamana kusadila Yehova na kiese.​—Nk. 18:28-32.

16. Yinki mutindu nzola ya Yehova pesaka nge ngolo?

¹⁶ Mutindu mosi bubu yayi, ‘kana beto manisa ve, [ntangu beto kena kukutana na bampasi mpe banzomono] yakele samu na nzola ya kukuikama ya Yehova.’ (Bid. 3:22; Kol. 1:11) Beto tadila kifuani ya Rachel. Yandi kukitungisaka mingi ntangu bakala na yandi bikaka yandi mpe Yehova na ntangu ya maladi ya COVID-19. Yinki Yehova salaka samu na yandi? Yandi metuba: “Yehova salaka nionso samu munu kukimona ti yandi kezolaka munu. Yandi pesaka munu bankundi yina vuandaka lutisa ntangu kintuadi na munu, yina vuandaka natina munu madia, yina vuandaka tindila munu bamesaje ya nzola mpe baverse ya kukindisa, yina vuandaka sekisa munu, mpe yina vuandaka tatamana kubambula munu ti Yehova kekipeke munu. Ntangu nionso munu vuandaka pesa Yehova matondo samu yandi pesaka munu dibuta ya nene ya nzola.”

17. Samu na yinki Davidi vuandaka ‘banga [ata fioti] ve kima ya yimbi’?

¹⁷ ‘Munu kebangaka ata fioti ve kima ya yimbi, samu nge kele kintuadi na munu.’ Mbala mingi luzingu ya Davidi vuandaka na kivonza, mpe yandi vuandaka na bambeni mingi ya kilendo. Kasi, nzola ya Yehova vuandaka sala yandi kukimona ti yandi kele na lutanunu. Davidi lendaka kukimona ti Yehova vuandaka kintuadi na yandi na konso diambu mpe yavuandaka kitisa yandi ntima. Na yau, yandi vuandaka na dikoki ya kuyimbila: ‘[Yehova] vukisaka munu na mambu nionso yina vuandaka pesa munu wonga.’ (Nk. 34:4) Davidi vuandaka banga mpenza; kasi nzola ya Yehova vuandaka ngolo kuluta kubanga na yandi.

18. Yinki mutindu kukindimisa na nzola ya Yehova lenda pesa nge ngolo ntangu nge kena kubanga?

¹⁸ Yinki mutindu kuzaba ti Yehova kezolaka beto kepesaka beto ngolo ntangu beto kena kukutana na  mambu ya mpasi? Mpasudi nzila mosi na nkumbu ya Susi metubila mutindu yandi mpe bakala na yandi kukimonaka ntangu muana na bau kukivondaka: “Ntangu diambu mosi ya kiadi mingi mekumina muntu na luzingu, yakesalaka mpenza mpasi mpe muntu kekukimonaka ti yandi kele mpenza na lusadusu ve. Kasi nzola ya ngolo ya Yehova salaka beto kukimona ti beto kele na lutanunu.” Rachel, yina beto tubilaka na ebandeli, kena kubambuka diaka: “Na mpipa mosi ntangu munu vuandaka mpenza na kiadi, munu vuandaka kukitungisa mpe kubanga, munu sambilaka Yehova na ndinga ya ngolo. Kaka na ntangu yango munu monaka lokola yandi mekitisa munu ntima mpe yandi pesaka munu kiyenge, kaka mutindu mama kesalaka yau samu na bebe na yandi, mpe munu lekaka. Munu kesala zimbakana ve ntangu yango.” Nkulutu mosi na nkumbu ya Tasos lutisaka bamvula yiya na buloko samu yandi mangaka kukota na kisalu ya soda. Yinki mutindu yandi monaka nzola mpe dikebi ya Yehova? Yandi metuba: “Yehova pesaka munu bima mingi kuluta yina munu vuandaka na yau nsatu. Yasalaka munu ndimisama diaka ti munu lenda tudila yandi ntima. Diaka, na nzila ya mpeve ya nlongo na yandi, Yehova pesaka munu kiese atako buloko vuandaka kisika mosi ya mpasi. Yasadisaka munu munu mona ti kana munu kena kutudila Yehova ntima, munu kemona nzola na yandi samu na munu. Na yau munu bandaka kusadila yandi lokola mpasudi nzila ya ngonda na ngonda.”

PUSANA PENEPENE YA NZAMBI NA NGE YA NZOLA

19. (a) Yinki mutindu kuzaba ti Nzambi kezolaka beto lenda vuanda na bupusi na zulu ya mambu yina beto ketubaka na bisambu na beto? (b) Yinki diambu yina nge kutanaka na yau na luzingu na nge yina monisaka ti Yehova kezolaka nge? (Tala ankadre “ Bampova yina kesadisaka beto samu beto mona nzola ya Yehova.”)

¹⁹ Masolo nionso yayi beto metubila kena kumonisa ti Yehova, ‘Nzambi ya nzola,’ kele kintuadi na beto! (2 Bk. 13:11) Yandi ketudilaka mosimosi kati na beto dikebi. Beto mendimisama ti, ‘nzola na Yandi ya kukuikama kezungaka’ beto. (Nk. 32:10) Kana beto kena kuyindula na mpinda na mutindu yandi monisinaka beto nzola na yandi, yandi kekuma muntu ya kedika samu na beto mpe beto kekuma penepene na yandi. Beto lenda sambila yandi kondua kubanga mpe kutubila yandi ti beto kele na nsatu ya nzola na yandi. Beto lenda tubila yandi mitungisi na beto nionso na kundimisamaka ti yandi kebakusa beto, mpe yandi kele pene ya kusadisa beto.​—Nk. 145:18, 19.

20. Yinki mutindu nzola ya Yehova kebendaka beto penepene na yandi?

²⁰ Kaka mutindu tiya kebendaka beto na kilumbu ya madidi, nzola ya Yehova mpe kebendaka beto. Atako nzola ya Yehova kele na kilendo, yakele diaka na kimpombo. Na yau, vuanda na kiese samu Yehova kezolaka nge. Mpe bika beto nionso beto monisina yandi nzola na kutubaka: ‘Munu kezolaka Yehova’!​—Nk. 116:1.