1-2. Yinki mambu ya mpasi bisadi ya Yehova lenda kutana na yau?

 KANA diambu mosi ya mpasi mekumina beto, yalenda soba luzingu na beto na kintulumukina. Na kifuani, mpangi mosi ya bakala ya kukuikama na nkumbu ya Luis, a bamonaka yandi na maladi ya kansere. Munganga tubilaka yandi ti yandi mebikana kaka na mua bangonda samu na kuzinga. Monika mpe bakala na yandi vuandaka kukipesa mingi samu na kusadila Yehova kintuadi. Kasi kilumbu mosi, Monika kuizaka zaba ti, bakala na yandi yina vuandaka nkulutu, vuandaka sala masumu na kinsueki bamvula mingi. Yavuandaka lomba na mpangi mosi ya nketo ya mpupa na nkumbu ya Olivia, yandi katuka na yinzo na yandi samu mupepe mosi ya ngolo vuandaka kuiza. Ntangu yandi vutukaka, yandi kutaka mupepe yango mebebisa yinzo na yandi. Na kintulumukina, luzingu ya bampangi yayi sobaka mpenza. Nge lenda bakusa mutindu bakukimonaka? Nge mekutanaka na diambu yina sobaka luzingu na nge na kintulumukina?

² Ata kana beto kele bisadi ya Yehova ya kukuikama, beto kekutanaka na mambu ya mpasi mpe na bamaladi yina bantu nionso kekutanaka na yau. Diaka, beto lenda kanga ntima na kutelemina to na banzomono yina kena kukatuka na bantu yina keyinaka bisadi ya Nzambi. Kasi Yehova kepekisaka ve ti mambu yango kumina beto, yandi melaka ti yandi kesadisa beto. (Yez. 41:10) Na lusadusu na yandi, beto lenda tanina kiese na beto, beto lenda baka banzengolo ya mbote, mpe beto lenda bikana ya kukuikama na yandi ata kana beto kena kukutana na mambu yina meluta mpasi. Na disolo yayi, beto ketadila mitindu yiya yina Yehova kesadisilaka beto na bantangu ya mpasi ya luzingu na beto. Beto ketadila diaka mambu yina beto fueti sala samu na kubakila lusadusu yina yandi kepesaka mambote.

 YEHOVA KETANINA NGE

3. Ntangu beto kena kukutana na mambu ya mpasi, yinki beto lenda mona mpasi na kusala?

³ Diambu ya mpasi. Ntangu beto kena kukutana na diambu mosi ya mpasi, yalenda vuanda mpasi samu na beto na kukanisa na mutindu ya puelele mpe kubaka banzengolo. Samu na yinki? Ntima na beto lenda vuanda na mpasi ya ngolo. Makanisi na beto lenda tungisama ngolo. Beto lenda kukimona lokola kaka beto kele ya kuzimbana, kondua kuzaba diambu yina beto fueti sala. Tala mutindu bampangi zole ya banketo yina beto tubilaka na ebandeli kukimonaka ntangu bakutanaka na mambu ya mpasi. Olivia metuba, “Ntangu mupepe ya ngolo bebisaka yinzo na munu, munu kukimonaka lokola munu mezimbana, mpe diambu yango lutilaka munu mpenza.” Monika metuba samu na bakala na yandi yina vunaka yandi ti: “Munu monaka mpasi ya ngolo. Munu kukimonaka lokola ntima na munu meluala. Yakumaka mpasi samu munu sala bisalu yina munu kesalaka konso kilumbu. Munu salaka kanisa ata fioti ve ti diambu ya mutindu yina lendaka kumina munu.” Yinki mutindu Yehova melaka kusadisa beto ntangu beto kena kukimona ti mambu ya mpasi melutila beto?

4. Na kutadila Bafilipi 4:6, 7, yinki mambu Yehova melaka kusala samu na beto?

⁴ Mambu yina Yehova melaka kusala samu na beto. Yandi melaka kupesa beto yina Biblia mebokidila ‘kiyenge ya Nzambi.’ (Tanga Bafilipi 4:6, 7.) Kiyenge yango memonisa luvuvamu yina beto kevuandaka na yau samu beto kele na nguizani ya ngolo na yandi. Kiyenge yango meluta ‘mayele nionso ya kubakusa mambu’; yakele mbote kuluta mambu nionso yina beto lendaka kanisa. Nge mesambilaka deja Yehova ngolo mpe na manima nge kamuaka mutindu nge monaka mpenza kiyenge? Nge kukimonaka mutindu yina samu Yehova pesaka nge ‘kiyenge ya Nzambi.’

5. Yinki mutindu kiyenge ya Nzambi ketaninaka makanisi mpe bantima na beto?

⁵ Bafilipi 4:7 metuba diaka ti kiyenge yango ya Nzambi ‘ketanina bantima na beno mpe makanisi na beno.’ Mpova ya ebandeli ‘kutanina’ vuandaka mpova yina basoda vuandaka sadila, mpe bavuandaka sadila yau samu na basoda yina vuandaka tanina mbanza mpe vuandaka sunga yau samu bambeni bika kota. Bantu yina vuandaka na mbanza yina bavuandaka tanina mbote, vuandaka leka na kiyenge samu bazabaka ti batulaka basoda na baporte ya nene ya mbanza. Mutindu mosi, kana kiyenge ya Nzambi kena kutanina bantima na beto mpe makanisi na beto, beto kekukimonaka mbote na kuzabaka ti beto kele na lutanunu. (Nk. 4:8) Mutindu mosi na Ana, ata kana mambu na beto ya mpasi soba ve na mbala mosi, beto lenda tatamana kuvuanda na kiyenge. (1 Sa. 1:16-18) Mpe kana beto kele na kiyenge, mbala mingi yakevuandaka pete na kukanisa na mutindu mosi ya puelele mpe kubaka banzengolo ya nduenga.

6. Yinki beto lenda sala samu beto bakila kiyenge ya Nzambi mambote? (Tala diaka foto.)

⁶ Diambu yina beto fueti sala. Mutindu kaka bantu yina kele na mbanza mosi lenda lomba soda  tanina bau, mutindu mosi beto diaka beto lenda lomba lusadusu ya Yehova. Yinki mutindu? Sambilaka tii nge kemona kiyenge ya Nzambi. (Luka 11:9; 1 Te. 5:17) Luis, yina beto tubilaka na ebandeli mesasila mutindu yandi mpe nketo na yandi Ana vuandaka na dikoki ya kununga ntangu bazabaka ti, yandi bikanaka kaka na bangonda fioti samu na kuzinga. Yandi metuba: “Na bantangu ya mutindu yina, yakevuandaka mpenza mpasi samu na kubaka banzengolo na diambu metadila tretema yina muntu kebaka mpe mambu yankaka. Kasi beto vuandaka na dikoki ya kuvuanda na kiyenge na bantangu yango ya mpasi mpenza kaka samu beto vuandaka sambila.” Luis mpe nketo na yandi tubaka ti bavuandaka sambila kondua kubika mpe mbala na mbala, na kulombaka Yehova yandi pesa bau kiyenge ya makanisi, kiyenge ya ntima mpe nduenga samu na kubaka banzengolo ya mbote. Mpe bamonaka lusadusu na yandi. Ntangu nge kena kukutana na diambu mosi ya mpasi, tingama na kisambu mpe nge kemona kiyenge ya Yehova lokola kaka yakena kutanina ntima mpe makanisi na nge.​—Bar. 12:12.

YEHOVA KESIAMISA NGE

7. Yinki mutindu beto lenda kukimona ntangu beto kena kukutana na nzomono mosi ya ngolo?

⁷ Diambu ya mpasi. Ntangu beto kena kukutana na nzomono mosi ya ngolo, banguilu na beto, makanisi na beto mpe mambu yina beto kesalaka lenda vuanda diaka ve mutindu yakevuandaka. Beto lenda kukimona lokola kaka beto vuandaka natumuka na banguilu mosi ya ngolo. Ana, yina beto tubilaka na ebandeli metuba ti banguilu ya mutindu na mutindu vuandaka kuizila yandi na manima ya lufua ya Luis. Yandi tubaka: “Na bantangu yankaka munu vuandaka tungisama na makanisi mpe munu vuandaka kukimonina kiadi. Munu vuandaka diaka na nganzi mutindu yandi kufuaka.” Na bantangu yankaka Ana vuandaka kukimona lokola kaka yandi kele yandi mosi mpe yandi vuandaka na nganzi na mutindu yalombaka yandi baka banzengolo na mambu yina Luis nde vuandaka bakila banzengolo. Na bantangu yankaka yandi vuandaka kukimona lokola muntu yina kena kukutana na mupepe ya ngolo na kati ya nzadi. Yinki mutindu Yehova kesadisaka beto kana banguilu ya mutindu yina mebanda kulutila beto?

8. Mutindu Yezaya 33:6 metuba, yinki diambu Yehova melaka beto?

⁸ Mambu yina Yehova melaka kusala samu na beto. Yehova melaka beto ti yandi kesiamisa beto. (Tanga Yezaya 33:6.) Kana bato mekutana na mupepe mosi ya ngolo, yalenda kuma na kivonza ya kunatumuka na konso ndambu. Samu na kusiamisa yau, bato kevuandaka na bima mosi yina mebongisamaka na konso ndambu na kati ya maza. Bima yango lenda sala ti bato bika diaka kuningana mingi, na mutindu yango bantu yina kele na kati ya bato lenda vuanda na lutanunu mpe balenda tatamana vuayaje na bau na mutindu ya mbote. Mingi ya bisadulu yango yina kesiamisaka bato, kesalaka mbote kana bato kena kutambula. Mutindu mosi, Yehova kesiamisa beto kana beto kena kutatamana kusadila yandi na kukuikama na bantangu ya mpasi.

9. Yinki mutindu bisadulu na beto samu na kusosasosa lenda sadisa beto samu beto bikana ya kusiama? (Tala diaka foto.)

 ⁹ Diambu yina beto fueti sala. Kana banguilu ya mpasi kena kulutila nge na makanisi, sala nionso yina nge lenda samu na kutatamana kusambila, kukuenda na balukutakanu, mpe kusamuna. Ya kedika, nge lenda vuanda na dikoki ve ya kusala mambu yina nge vuandaka sala ntete, kasi kuzimbakana ve ti Yehova kelombaka beto ve beto sala mambu yina beto kele na dikoki ve ya kusala. (Fuanikisa na Luka 21:1-4.) Diaka, bakaka ntangu ya kusala ndongokolo na nge mosi mpe kuyindula na mpinda. Samu na yinki? Na nzila ya nkubukulu na yandi, Yehova kepesaka beto masolo ya kitoko mpe bavideo yina lenda sadisa beto samu beto vuanda ya kusiama. Samu na kumona mambu yina nge kele na yau nsatu, nge lenda sadila bisadulu ya kusosasosa yina kele na ndinga na beno, na kifuani aplikasion JW Library^®, Index des publications des Témoins de Jéhovah, mpe Buku ya bolukiluki ya Batatoli ya Yehova. Monika, yina beto tubilaka na ebandeli tubaka ti yandi vuandaka sadila bisadulu ya kusosasosa samu na kubaka malongi ntangu yandi vuandaka mona banguilu ya mpasi kena kukuma ngolo. Na kifuani, yandi sosaka mpova, “colère.” Na bambala yankaka yandi sosaka mpova “trahison” to “fidélité.” Na manima yandi vuandaka tanga tii yandi kekukimona mbote. Yandi metuba: “Ntangu munu vuandaka banda kusosasosa, munu vuandaka tungisama. Kasi lokola munu tatamanaka kutanga, munu monaka ti Yehova vuandaka pesa munu lusadusu ya ngolo. Na kutangaka, munu kuizaka bakusa ti Yehova vuandaka bakusa banguilu na munu nionso mpe yandi vuandaka sadisa munu.” Lusadusu yango ya Yehova lenda sadisa nge samu nge yala banguilu na nge tii nge kebaka kiyenge ya ngolo.​—Nk. 119:143, 144.

YEHOVA KESADISA NGE

10. Yinki mutindu beto lenda kukimona na manima ya diambu mosi ya mpasi?

¹⁰ Diambu ya mpasi. Kana diambu mosi ya mpasi ya ngolo mekumina beto, bilumbu yankaka beto lenda kukimona ti beto kele ya kulemba na nzutu mpe na makanisi. Beto lenda kukimona lokola muntu yina kesalaka bansaka ya kuzawula, yina memesanaka kuzawula nzunzu, kasi lokola yandi meluala yandi kena kutambula tengu. Yalenda kuma mpasi kusala mambu yina mbala mingi kevuandaka pete samu na beto na kusala, to beto lenda kondua nsatu ya kusala mambu yina vuandaka pesa beto kiese. Mutindu mosi na Eliya, beto lenda kukimona ti yakele mpasi samu na beto na kutelema. Nsatu na beto kele ya kulekaka kaka. (1 Bn. 19:5-7) Yinki Yehova melaka kusala ntangu beto kena kukimona ti beto kele ya kulemba?

11. Yinki kele mutindu yankaka yina Yehova kepesilaka beto lusadusu? (Nkunga 94:18)

¹¹ Mambu yina Yehova melaka kusala samu na beto. Yandi melaka ti yandi kesadisa beto. (Tanga  Nkunga 94:18.) Mutindu mosi kaka na muntu ya bansaka ya kuzawula yina meluala kevuandaka na nsatu ya lusadusu samu na kutambula, beto diaka beto lenda vuanda na nsatu ya lusadusu samu na kutatamana kusadila Yehova. Na bantangu yango, Yehova melaka beto: “Munu, Yehova Nzambi na nge, munu kena kusimba diboko na nge ya kibakala, Munu Muntu yina kena kutubila nge ti, ‘Kubanga ve. Munu kesadisa nge.’” (Yez. 41:13) Ntinu Davidi monaka lusadusu yango. Ntangu yandi kutanaka na mambu ya mpasi mpe na bambeni, yandi tubilaka Yehova: ‘Diboko na nge ya kibakala kesadisaka munu.’ (Nk. 18:35) Kasi yinki mutindu Yehova kepesaka lusadusu?

12. Banani Yehova kesadilaka samu na kusadisa beto ntangu beto kele ya kulemba?

¹² Mbala mingi Yehova kesadisaka beto na kutindaka bantu yankaka sadisa beto. Na kifuani, na diluaku mosi ntangu Davidi kukimonaka ti yandi kele ya kulemba nzutu, nkundi na yandi Yonatane kuendaka tala yandi samu na kupesa yandi lusadusu na makanisi mpe kutubila yandi bampova ya kukindisa. (1 Sa. 23:16, 17) Mutindu mosi, Yehova ponaka Elisha samu na kupesa Eliya lusadusu ya mfunu. (1 Bn. 19:16, 21; 2 Bn. 2:2) Bubu yayi, Yehova lenda sadila dibuta, bankundi, to bankulutu samu na kusadisa beto. Kasi, kana beto kena kutungisama na makanisi beto lenda vuanda na nsatu ya kuvuanda ntama na bantu yankaka. Beto lenda vuanda na nsatu ya kuvuanda kaka beto mosi. Kukimona mutindu yina kele yimbi ve. Yinki beto lenda sala samu na kubaka lusadusu ya Yehova?

13. Yinki beto kele na yau nsatu samu na kubaka mambote na lusadusu ya Yehova? (Tala diaka foto.)

¹³ Diambu yina beto fueti sala. Sala ngolo samu na kubika kuvuanda kaka kisika na nge mosi. Kana beto mekukivambula na bantu yankaka, beto lenda banda kukanisa kaka samu na beto mosi, mpe samu na mambu yina beto kena kukutana na yau. Mutindu yina ya kukanisa lenda vuanda na bupusi na banzengolo yina beto kebakaka. (Bin. 18:1) Ya kedika, na bantangu yankaka beto nionso beto kevuandaka na nsatu ya kuvuanda kaka beto mosi, mingimingi ntangu beto kena kukutana na mambu ya mpasi. Kasi, kana beto mekukivambula na bantu yankaka samu na ntangu mosi ya yinda, yalenda vuanda lokola kaka beto kena kumanga lusadusu ya bantu yina Yehova kena kusadila samu na kusadisa beto. Yavuanda bantangu ya mpasi kele mpasi yinki mutindu, ndima lusadusu ya dibuta na nge, ya bankundi na nge, mpe ya bankulutu. Mona bau lokola bantu yina Yehova kena kusadila samu na kusadisa nge.​—Bin. 17:17; Yez. 32:1, 2.

YEHOVA KEBOMBA NGE

14. Yinki mambu ya kubangisa yina beto lenda kutana na yau?

¹⁴ Diambu ya mpasi. Na bantangu yankaka beto lenda banga. Na Biblia bisadi ya kukuikama ya Nzambi metubila bantangu yina bavuandaka na mpasi  mpe na wonga ya bambeni na bau to bambamba yankaka. (Nk. 18:4; 55:1, 5) Mutindu mosi, beto lenda kutana na kutelemina na ekole, na kisalu, na dibuta to na bamfumu ya Leta. Beto lenda kuma ata na wonga ya lufua samu beto kele na maladi mosi. Na bantangu ya mutindu yina beto lenda kukimona lokola beto mekondua lusadusu lokola mua muana mosi ya fioti. Yinki mutindu Yehova kesadisaka beto na bantangu ya mutindu yina?

15. Na kutadila Nkunga 94:19, yinki mambu Yehova kesala samu na beto?

¹⁵ Mambu yina Yehova melaka kusala samu na beto. Yandi kebombaka beto mpe yandi kekitisaka beto ntima. (Tanga Nkunga 94:19.) Bampova ya nkunga yayi lenda tinda beto na kukanisa muana mosi ya fioti ya nketo yina kena kubanga mpe yandi kena kukoka ve kuleka samu na mupepe mosi ya ngolo. Beto lenda mona na makanisi mutindu tata na yandi mekuenda kisika yandi kele, yandi menanguna yandi, mpe yandi mesimba yandi na maboko na yandi tii ntangu yandi meleka. Atako mupepe ya ngolo kena kutatamana, kasi yandi kena kumona ti yandi kele na lutanunu mpe na mbombolo na maboko ya tata na yandi. Ntangu beto kena kukutana na banzomono yina kena kubangisa beto, beto lenda vuanda na nsatu ya Tata na beto ya dizulu, samu yandi nanguna beto na maboko na yandi na mutindu ya kifuani tii beto kebaka kiyenge. Yinki mutindu Yehova lenda bomba beto mutindu yina?

16. Yinki beto lenda sala samu beto baka mambote na mbombolo ya Yehova? (Tala diaka foto.)

¹⁶ Diambu yina beto fueti sala. Lutisaka ntangu kintuadi na Yehova mbala na mbala​—na kusambilaka yandi mpe na kutangaka Mpova na yandi. (Nk. 77:1, 12-14) Na manima, ntangu nge ketungisama na makanisi, kondua ntembe makanisi na nge kekuenda ntete na Tata na nge ya dizulu. Tubila Yehova kubanga mpe mitungisi na nge. Bika yandi solola na nge mpe yandi bomba nge na nzila ya Masonukua. (Nk. 119:28) Nge lenda mona ti ntangu nge kena kutanga bitini yankaka ya Biblia, yalenda bomba nge mingimingi ntangu nge kena kubanga. Na kifuani, nge lenda baka lukindusu na mukanda ya Yobi, Nkunga, Bingana, buela diaka bampova ya Yesu yina kele na Matayo kikapu 6. Ntangu nge kena kusambila Yehova mpe nge kena kutanga Mpova na yandi, nge kemona ti yandi kena kubomba nge.

17. Na yinki diambu beto lenda kukindimisa?

¹⁷ Nge lenda tula ntima ti Yehova kevuanda ntangu nionso vana samu na nge na bantangu ya mpasi ya luzingu na nge. Nge kevuanda ata fioti ve nge mosi. (Nk. 23:4; 94:14) Yehova melaka ti yandi ketanina, yandi kesiamisa, yandi kesadisa, mpe yandi kebomba beto. Yezaya 26:3 metuba samu na Yehova ti: ‘Nge ketanina bantu yina ketadilaka nge mpenza; nge kepesa bau kiyenge ya ntangu nionso, samu baketudilaka nge ntima.’ Na yau, tudila Yehova ntima mpe sala nionso yina nge lenda samu na kubakila lusadusu na yandi mambote. Kana nge mesala mutindu yina, nge kebaka ngolo ata na bantangu ya mpasi.