1. Na yinki diambu bantu mingi ketulaka dikebi bubu yayi?

 NGE kena kumona mutindu bubu yayi bantu mingi kena kukitudila dikebi mingi na kisika ya kutudila bantu yankaka dikebi? Na kifuani, bantu yankaka kesadilaka basite ya kusolola na bantu samu na kukipesa lokumu mpe kupesa lokumu na mambu yina bakena kusala. Kasi bubu yayi, ndambu ya bantu kepesaka Yehova Nzambi nkembo. Na disolo yayi, beto ketubila yinki zola monisa kupesa Yehova nkembo mpe samu na yinki beto fueti sala yau. Beto kelonguka diaka mutindu beto lenda pesa Nzambi nkembo yina mebonga na yandi mpe mutindu yandi kepesa nkumbu na yandi nkembo ntama mingi ve.

YINKI ZOLA MONISA KUPESA YEHOVA NKEMBO?

2. Yinki mutindu Yehova monisaka nkembo na yandi na mongo ya Sinai? (Tala diaka foto ya kuvertire.)

² Biblia kemonisaka ti Yehova kele Nzambi ya kukamua. Yehova monisaka nkembo na yandi ya kukamua ntangu fioti na manima ya kubimisa dikanda ya Yisaele na kinanga na Ezipito. Kanisa diambu yayi: Bamilion ya Bayisaele sanganaka pembeni ya mongo ya Sinai samu na kukutana na Nzambi na bau. Dituti mosi ya ndombe fukaka mongo yango. Na mbala mosi, ntoto bandaka kuningana​—mpe yabandaka kubimisa tiya​—yabandaka kuningisa makulu na bau, mpe bantiemo, bakake, mpe makelele ya bampoka bandaka kubula. (Kob. 19:16-18; 24:17; Nz. 68:8) Kanisa mutindu Bayisaele yango kamuaka ntangu Yehova monisinaka bau kilendo ya nkembo na yandi.

3. Yinki zola monisa kupesa Yehova nkembo?

³ Kasi yinki beto ketuba samu na beto bantu? Beto lenda pesa mpenza Yehova nkembo? Ee. Mosi ya mitindu yina beto lenda pesa Yehova nkembo kele na kutubilaka bantu yankaka mambu  metadila kilendo na yandi ya kukamua mpe bikadulu na yandi ya kitoko. Beto kepesaka diaka Nzambi nkembo ntangu beto kepesaka yandi lokumu samu na mambu nionso yina beto mesala na ngolo na yandi. (Yis. 26:12) Ntinu Davidi vuandaka kifuani mosi ya mbote na diambu metadila kupesa Yehova nkembo. Na kisambu mosi yina Davidi salaka na ntuala ya kimvuka ya Yisaele, yandi tubilaka Nzambi: “Ee, Yehova, bunene, kilendo, kitoko, nkembo mpe lokumu kele ya nge, samu kima nionso na dizulu mpe na ntoto kele ya nge.” Na manima Davidi manisaka kisambu na yandi na kutubaka: “Kimvuka ya mvimba beno pesa Yehova lokumu.”​—1 Nt. 29:11, 20.

4. Yinki mutindu Yesu pesaka Yehova nkembo?

⁴ Ntangu Yesu vuandaka na ntoto, yandi pesaka Tata na yandi lokumu na kutubilaka bantu ti Yehova nde muntu pesaka yandi kilendo ya kusala bimangu. (Mrk. 5:18-20) Yesu pesaka diaka Yehova nkembo na mutindu yandi vuandaka tubila mambu metadila Tata na yandi mpe mutindu yandi vuandaka sadila bantu yankaka mambu. Na diluaku mosi, Yesu vuandaka longa na sinagoga. Na kati ya bantu yina vuandaka kuwa yandi, yavuandaka na nketo mosi yina vuandaka na demon bamvula 18. Demon yango salaka ti yandi kuma ya kukomvama mpe yandi vuandaka koka diaka ve kutelema ya kusungama. Yesu bakusaka ti nketo yango vuandaka mpenza na mpasi mpe yandi vuandaka na nsatu ya kusadisa yandi. Na yau Yesu pusanaka pembeni na yandi, mpe yandi tubilaka yandi na kimpombo nionso: “Nketo, nge mebeluka na bulembu na nge.” Na manima yandi simbaka yandi, mpe na mbala mosi nketo yango telemaka ya kusungama mpe yandi “bandaka kupesa Nzambi nkembo.” Yandi vuandaka mpenza na butondi samu Yehova belusaka yandi! (Luka 13:10-13) Nketo yango vuandaka na bamfunu ya mbote ya kupesa Yehova nkembo, mpe yakele mutindu mosi samu na beto.

SAMU NA YINKI BETO KEPESAKA YEHOVA NKEMBO?

5. Yinki bamfunu beto kele na yau ya kuzitisa Yehova?

⁵ Beto kepesaka Yehova nkembo samu beto kezitisaka yandi mpenza. Beto kele na bamfunu mingi ya kuzitisa yandi. Yehova kele nkua-ngolo-nionso; kilendo na yandi kele na nsuka ve. (Nz. 96:4-7) Nduenga na yandi ya mpinda kemonanaka puelele na bima yina yandi mesalaka. Yandi mepesaka beto luzingu mpe konso kima yina beto kele na yau nsatu samu na kuzinga. (Em. 4:11) Yandi kele ya kukuikama. (Em. 15:4) Konso diambu yina yandi kesalaka kenungaka, mpe yandi kekokisaka ntangu nionso bansilulu na yandi. (Yos. 23:14) Yakele samu na yau mbikudi Yeremia tubaka samu na Yehova: “Na bantu nionso ya nduenga na makanda mpe na bimfumu na bau nionso, muntu mosi ve mekokana na nge”! (Yir. 10:6, 7) Ya kedika, beto kele na bamfunu ya kuzitisa Tata na beto ya dizulu. Kasi beto kesukaka kaka ve na kuzitisa Yehova, beto kezolaka yandi diaka.

6. Samu na yinki beto kezolaka Yehova?

⁶ Beto kepesaka Yehova nkembo samu beto kezolaka yandi mingi. Beto tadila bikadulu mingi ya Yehova yina ketindaka beto na kuzola yandi. Yandi kele na nlemvo mpe na ntima ya kiadi. (Nz. 103:13; Yis. 49:15) Yandi kekukitulaka na kisika na beto. (Zek. 2:8) Yandi kesadisaka beto samu beto zaba yandi mpe beto kuma bankundi na yandi. (Nz. 25:14; Mis. 17:27) Mpe yandi kele na kumikitisa; ‘yandi kekitaka samu na kutala dizulu mpe ntoto, yandi kezangulaka muntu yina mekondua mfunu kukatuka na mfundumfundu.’ (Nz. 113:6, 7) Samu na bamfunu yango nionso, beto kevuandaka na nsatu ya kupesa Nzambi na beto ya nene nkembo.​—Nz. 86:12.

7. Yinki diluaku ya spesiale beto kele na yau?

 ⁷ Beto kepesaka Yehova nkembo samu beto kezolaka ti bantu yankaka zaba yandi. Bantu mingi zaba ve kedika na mambu metadila Yehova. Samu na yinki? Samu Satana mefuka makanisi na bau na kumuangisaka baluvunu ya ngolo samu na Yehova. (2 Ko. 4:4) Satana kendimisaka bantu ti Yehova kele Nzambi ya nganzi, yandi ketudilaka beto ve dikebi, mpe yandi nde kebimisaka bampasi ya yinza yayi. Kasi beto mezaba kedika samu na Nzambi na beto! Beto kele na diluaku ya kusadisa bantu yankaka samu babakusa ti yandi kele Nzambi ya mbote. (Yis. 43:10) Nzembo 96 metubila mingimingi diambu metadila kupesa Yehova nkembo. Ntangu beto kena kutadila ndambu ya bampova ya kikapu yango, beto kelonguka mitindu beto lenda pesa Yehova nkembo yina yandi mebonga na yau.

YINKI MUTINDU BETO LENDA PESA YEHOVA NKEMBO YINA YANDI MEBONGA NA YAU?

8. Yinki kele mosi ya mutindu yina beto lenda pesa Yehova nkembo? (Nzembo 96:1-3)

⁸ Tanga Nzembo 96:1-3. Beto lenda pesa Yehova nkembo na mambu yina beto ketubaka samu na yandi. Baverse yango metubila beto beto “yimbidila Yehova,” beto “kumisa nkumbu na yandi,” beto “samuna nsangu ya mbote ya luvuluzu,” mpe beto “samuna nkembo na yandi na makanda.” Mambu yango nionso kele mitindu ya kupesa Tata na beto ya dizulu nkembo. Bayuda ya kukuikama mpe Baklisto ya siekle ya ntete kakatanaka ve samu na kutubila bantu yankaka mambu ya mbote yina Yehova sadilaka bau mpe kukotila nkumbu na yandi. (Dan. 3:16-18; Mis. 4:29) Yinki mutindu beto lenda landa kifuani na bau?

9-10. Yinki dilongi nge mebaka na disolo ya Angelena? (Tala diaka foto.)

⁹ Beto tadila kifuani ya Angelena, a mpangi mosi ya nketo yina kezingaka na États-Unis. Na kibakala nionso, yandi kotilaka nkumbu ya Yehova na kisika yandi kesalaka. Lokola Angelena vuandaka muntu ya yimpa na kisalu, babokilaka yandi na lukutakanu mosi yina pesaka diluaku na bantu nionso ya yimpa ya kompani yango batubila mambu metadila luzingu na bau. Angelena bongisaka mua bafoto ya kumonisa samu na kusasila luzingu ya kiese yina yandi kele na yau lokola yandi kele Mbangi ya Yehova. Kasi, tekila yandi banda kutuba, nkundi na yandi mosi ya kisalu tubaka ti yandi yundukaka na dibuta ya Bambangi ya Yehova. Yandi bandaka kuvueza bindimeli  na beto. Angelena metuba: “Ntima na munu vuandaka bula ngolo. Kasi, munu kukitubilaka: ‘Munu kebika ti muntu mosi tuba luvunu samu na Yehova? To mukekotila Yandi?’”

¹⁰ Ntangu nkundi na yandi ya kisalu manisaka kutuba, Angelena salaka kisambu mosi ya nkufi na ntima. Na manima yandi tubilaka yandi na kimpombo nionso: “Dibuta na munu mpe kele mutindu mosi na ya nge. Munu yundukaka na dibuta ya Bambangi ya Yehova, mpe munu kele Mbangi ya Yehova tii bubu yayi.” Atako ntima na yandi vuandaka bula ngolo; Angelena taninaka kiyenge na yandi. Yandi monisaka bankundi na yandi ya kisalu bafoto na yandi mpe ya bankundi na yandi yina kena kusadila Yehova na kiese, mpe na luzitu nionso yandi sasilaka bindimeli na yandi. (1 Pe. 3:15) Yinki mambote yabimisaka? Ntangu Angelena manisaka kutuba, bakala yango vuandaka niee. Yandi tubaka kutu ti yakele na mambu ya mbote yina yandi kekanisaka ntangu yandi vuandaka ntuenia mpe ntangu yandi vuandaka sangana na Bambangi ya Yehova. Angelena metuba: “Yamebonga kukotila Yehova. Yakele lokumu kukotila nkumbu na yandi.” Beto diaka beto kele na lokumu ya kukumisa Yehova ata ntangu bantu yankaka kena kuvueza yandi.

11. Yinki mutindu bisadi ya Yehova ya ntama sadilaka nsikudukusu yina kele na Nzembo 96:8?

¹¹ Tanga Nzembo 96:8. Beto lenda pesa Yehova nkembo na nzila ya bima na beto ya valere. Banda ntama, bisadi ya Yehova kekumisaka Yehova na mutindu yina. (Mas. 3:9) Na kifuani, Bayisaele pesaka makabu samu na kutunga mpe kutanina tempelo. (2 Bak. 12:4, 5; 1 Nt. 29:3-9) Banlonguki yankaka ya Yesu sadisaka yandi mpe bantumua na yandi na nzila ya “bima na bau.” (Luka 8:1-3) Baklisto ya siekle ya ntete diaka tindaka bima samu na kusadisa bampangi na bau ya kimpeve. (Mis. 11:27-29) Bubu yayi, beto diaka beto lenda kumisa Yehova na kupesaka makabu na luzolo na beto mosi.

12. Yinki mutindu makabu na beto lenda kumisa Yehova? (Tala diaka foto.)

¹² Beto tadila kifuani mosi yina kena kumonisa mutindu makabu na beto kekumisaka Yehova. Lapolo mosi ya 2020, tubilaka mutindu bamvula lembaka kunoka samu na ntangu ya yinda na Zimbabwe. Luzingu ya bamilion ya bantu vuandaka na kivonza samu na kukondua bima ya kudia, na kifuani luzingu ya mpangi mosi ya nketo na nkumbu ya Prisca. Atako nsatu yango ya ngolo, Prisca tatamanaka na mumeseno na yandi ya kusamuna  konso mercredi mpe vendredi, ata na nsungi ya kukuna. Bafinangani na yandi vuandaka vueza yandi ntangu yandi vuandaka kuenda na kisalu ya kusamuna na kisika ya kukuenda na bilanga na yandi. Bavuandaka tuba: “Nge kekufua na nsatu.” Prisca vuandaka pesa bau mvutu na kivuvu nionso: “Yehova kesundolaka ata fioti ve bisadi na yandi.” Yazingilaka ve, yandi bakaka lusadusu yina katukaka na nkubukulu na beto. Lusadusu yango katukaka na makabu na beto. Bafinangani ya Prisca kamuaka mpe batubilaka yandi: “Nzambi sundolaka nge ata fioti ve, na yau beto zola zaba mambu mingi yina metadila yandi.” Bantu 7 kati na bau bandaka kukuiza na balukutakanu.

13. Yinki mutindu bikadulu na beto lenda pesa Yehova nkembo? (Nzembo 96:9)

¹³ Tanga Nzembo 96:9. Beto lenda pesa Yehova nkembo na nzila ya bikadulu na beto. Yalombaka na banganga-nzambi yina vuandaka sala na tempelo ya Yehova bavuanda na bunkete na nzutu. (Kob. 40:30-32) Kasi, bikadulu ya mbote kele na mfunu mingi kuluta bunkete ya nzutu. (Nz. 24:3, 4; 1 Pe. 1:15, 16) Beto fueti sala ngolo samu na kukatula “kimuntu ya ntama”​—bikadulu mpe bisalu ya yimbi​—mpe kuvuata “kimuntu ya yimpa”​—mutindu ya kukanisa mpe bisalu yina kemonisaka bikadulu ya kitoko ya Yehova. (Kol. 3:9, 10) Na lusadusu ya Yehova, ata bantu yina mesalaka mambu ya yimbi mpenza lenda soba mpe kuvuata kimuntu ya yimpa.

14. Yinki dilongi nge mebaka na disolo ya Jack? (Tala diaka foto.)

¹⁴ Beto tadila kifuani ya Jack, bakala mosi ya kinkesi mpe ya yimbi yina bavuandaka bokidilaka Demon. Samu na mambu na yandi ya yimbi, bazengilaka Jack kitumbu ya lufua. Kasi, ntangu yandi vuandaka vingila kilumbu bakekufua yandi, Jack ndimaka kulonguka Biblia na mpangi mosi yina vuandaka sala baviziti na buloko yina bakangaka Jack. Atako Jack vuandaka na luzingu ya yimbi na ntama, yandi katulaka kimuntu na yandi ya ntama mpe yandi bakaka mbotama. Jack sobaka mpenza, yau salaka ti kilumbu yina yalombaka bakufua yandi, bankengi yankaka ya buloko dilaka ntangu bavuandaka pesa yandi bayo. Mfumu mosi yina vuandaka sala na buloko yango tubaka: “Jack vuandaka mosi ya bantu yina meluta yimbi na kisika yayi. Bubu yayi yandi kele mosi ya bantu yina meluta mbote.” Sabala mosi na manima ya lufua ya Jack, bampangi yina kuizaka tuadisa lukutakanu ya katikati  ya sabala na buloko kutanaka na muntu mosi yina bamekangaka na buloko yina kutakanaka samu na mbala ya ntete. Yinki tindaka yandi kuiza kutakana? Yandi kamuaka mutindu Jack sobaka bikadulu na yandi mpe yandi vuandaka na nsatu ya kuzaba mambu yina yandi fueti sala samu yandi sadila Yehova. Yakele puelele, bikadulu na beto lenda kumisa Tata na beto ya dizulu!​—1 Pe. 2:12.

YINKI MUTINDU YEHOVA KEPESA NKUMBU NA YANDI NKEMBO NTAMA MINGI VE?

15. Yinki mutindu Yehova kepesa nkumbu na yandi nkembo na mutindu ya kukoka ntama mingi ve? (Nzembo 96:10-13)

¹⁵ Tanga Nzembo 96:10-13. Baverse yayi ya nsuka ya Nzembo 96 memonisa Yehova lokola Zuzi mpe Ntinu ya lunungu. Yinki mutindu Yehova kepesa nkumbu na yandi nkembo ntama mingi ve? Na nzila ya bansambusulu na yandi. Ntama mingi ve yandi kebebisa Babiloni ya nene samu yakefingisaka nkumbu na yandi ya nlongo. (Em. 17:5, 16; 19:1, 2) Bantu yankaka yina kemona kubebisama ya Babiloni ya nene lenda sangana na beto na nsambudulu ya kedika. Na nsuka, na Armagedoni, Yehova kebebisa nkubukulu nionso ya Satana, na kufuaka bantu nionso yina keteleminaka yandi mpe kefingaka nkumbu na yandi, na kuvukisaka bantu nionso yina kezolaka yandi, kezitisaka yandi mpe kezolaka kupesa yandi nkembo. (Mrk. 8:38; 2 Tes. 1:6-10) Na manima ya kumekama ya nsuka yina kesalama na manima ya Luyalu ya bamvula 1 000 ya Klisto, Yehova kekumisa nkumbu na yandi nlongo na mutindu ya kukoka. (Em. 20:7-10) Na ntangu yango, “ntoto kefuluka na nzayilu ya nkembo ya Yehova kaka mutindu maza kefulukaka na nzadi.”​—Hab. 2:14.

16. Yinki nzengolo nge kele na yau? (Tala diaka foto.)

¹⁶ Yakevuanda mpenza ntangu mosi ya kitoko ntangu bantu nionso kepesa Yehova nkembo yina yandi mebonga na yau! Kasi tekila kilumbu yango koka, beto lenda sala nionso yina beto lenda samu na kupesa Nzambi na beto nkembo na konso diluaku. Samu na kubula nsoso na diambu yango ya mfunu, Kimvuka ya Ntuadisi ponaka Nzembo 96:8 lokola kikapu ya mvula 2025: “Beno pesa Yehova nkembo yina mebonga na nkumbu na yandi.”