1. Samu na yinki yakele mbote samu na beto kukutakanaka na Mbambukulu ya lufua ya Yesu konso mvula?

 KONDUA ntembe nge kendimaka ti nkudulu kele dikabu ya mfunu mingi! (2 Ko. 9:15) Lokola Yesu pesaka luzingu na yandi ya kimuntu, nge lenda vuanda na kinkundi ya penepene na Yehova Nzambi. Nge lenda vuanda diaka na kivuvu ya kuzinga mvula na mvula. Beto kele na bamfunu mingi ya kuvuanda na butondi na Yehova muntu yina pesaka beto nkudulu samu yandi kezolaka beto mingi mpenza! (Rom. 5:8) Samu na kusadisa beto beto tatamana kumonisa butondi mpe beto zimbakana ata fioti ve diambu yina Yehova mpe Yesu salaka samu na beto, Yesu bandisaka Mbambukulu ya lufua na yandi yina kesalamaka konso mvula.​—Luka 22:19, 20.

2. Yinki beto ketubila na disolo yayi?

² Na mvula yayi, beto kesala Mbambukulu na kilumbu ya samedi 12 avril 2025. Kondua ntembe beto nionso beto kena kukibongisa samu na kuvuanda na Mbambukulu. Beto kebaka mambote mingi kana na kilokola ya Mbambukulu beto kena kubaka ntangu ya kuyindula na mpinda a na zulu ya diambu yina Yehova mpe Muana na yandi salaka samu na beto. Na disolo yayi, beto ketubila mambu yina nkudulu kena kulonga beto samu na Yehova mpe Muana na yandi. Disolo kelanda kesadisa beto na kubakusa mutindu beto lenda baka mambote na nkudulu mpe mutindu beto lenda monisa butondi na beto samu na yau.

MAMBU YINA NKUDULU KENA KULONGA BETO SAMU NA YEHOVA

3. Yinki mutindu lufua ya muntu kaka mosi lendaka katula bamilion ya bantu na kinanga? (Tala diaka foto.)

³ Nkudulu kena kulonga beto ti Yehova kele Nzambi yina kezolaka lunungu. (Mib. 32:4) Na yinki mutindu? Na nzila ya  Adamu yina mangaka kuzitisa Yehova, beto bakaka disumu yina kenataka na lufua. (Rom. 5:12) Samu na kukatula beto na kinanga ya disumu mpe ya lufua, Yehova bakaka nkubukulu samu Yesu pesa nkudulu. Kasi yinki mutindu nkayilu ya muntu kaka mosi ya kukoka lenda katula bamilion ya bantu na kinanga? Ntumua Paulo mesasila: “Mutindu kaka kukondua luzitu ya muntu kaka mosi [Adamu] kumisaka bantu mingi bansumuki, mutindu mosi mpe luzitu ya muntu kaka mosi [Yesu] kekumisa bantu mingi bantu ya lunungu.” (Rom. 5:19; 1 Tim. 2:6) Na bampova yankaka, yalombaka kukondua luzitu ya muntu mosi kaka ya kukoka samu beto kuma bananga ya disumu mpe ya lufua. Na yau, yalombaka mpe luzitu ya muntu mosi kaka ya kukoka samu beto katuka na kinanga.

4. Samu na yinki Yehova pesaka kaka ve nzila na bana ya Adamu ya lunungu bazinga mvula na mvula?

⁴ Yalombaka mpenza Yesu kufua samu na kuvukisa beto? Yehova lendaka pesa kaka ve nzila na bana ya Adamu ya lunungu bazinga mvula na mvula? Samu na bantu ya kukondua kukoka, yazolaka monana lokola diambu ya mbote mpe yina mebonga. Kasi samu na Yehova, yazolaka vuanda ve diambu ya lunungu. Lokola Yehova kele Nzambi ya lunungu, yandi lendaka ata fioti ve kukanga meso na disumu ya nene yina Adamu salaka.

5. Samu na yinki beto lenda kukindimisa ti Yehova kesala ntangu nionso mambu ya lunungu?

⁵ Kasi yinki zolaka salama kana Yehova pesaka ve nkudulu, mpe yandi tulaka lunungu na yandi na pembeni na kubikaka bana ya Adamu ya kukondua kukoka bazinga mvula na mvula? Mbala yankaka, bantu zolaka kanisa ti Nzambi ketula diaka lunungu na yandi na pembeni na maluaku yankaka. Na kifuani, bantu lendaka kukiyuvusa kana Yehova kekokisa bansilulu na yandi nionso. Beto kele ve na mfunu ya kukitungisa ti diambu ya mutindu yina salama. Diambu ya kedika kele ti Yehova salaka diambu yina kele ya lunungu atako yalombaka yandi pesa Muana na yandi kaka mosi lokola nkayilu. Na yau beto lenda kukindimisa ti yandi kesala ntangu nionso mambu ya lunungu.

6. Yinki kele mosi ya mutindu yina nkudulu kemonisaka ti Yehova kezolaka beto? (1 Yoa. 4:9, 10)

⁶ Atako nkudulu kesadisaka beto na kubakusa ti Yehova kele Nzambi ya lunungu, yakesadisaka beto mingi kuluta na kubakusa ti yandi kezolaka beto mingi. (Yoa. 3:16; tanga 1 Yoa. 4:9, 10.) Nkudulu kemonisaka ti Yehova zola beto vuanda na luzingu yina mekondua nsuka mpe beto vuanda diaka na kati ya dibuta na yandi. Kanisa ntete: Ntangu Adamu salaka disumu, Yehova kukaka yandi na dibuta ya bisadi na Yandi. Yau salaka ti beto nionso beto butuka na nganda ya dibuta ya Nzambi. Kasi na nzila  ya nkudulu, Yehova kenlemvukilaka masumu na beto mpe nsukansuka yandi kekotisa beto na kati ya dibuta na yandi ya bantu nionso yina kemonisaka kiminu mpe luzitu. Ata bubu yayi, beto lenda vuanda na nguizani ya mbote na Yehova mpe na bampangi na beto Baklisto. Ya kedika, Yehova kezolaka beto mingi mpenza!​—Rom. 5:10, 11.

7. Yinki mutindu kuniokuama ya Yesu kesadisaka beto na kubakusa mutindu Yehova kezolaka beto?

⁷ Beto lenda bakusa mbote kuluta mutindu Yehova kezolaka beto kana beto metadila ntalu yina yandi futaka samu na nkudulu. Satana ketubaka ti kisadi mosi ve ya Nzambi kebikana ya kukuikama na Yandi kana yandi mekutana na mambu ya mpasi. Samu na kumonisa ti yakele luvunu, Yehova bikaka ti Yesu niokuama tekila yandi kufua. (Yobo 2:1-5; 1 Pe. 2:21) Yehova vuandaka tala ntangu bavuandaka vueza Yesu, ntangu basoda vuandaka bula yandi, mpe ntangu bakomaka yandi na yinti. Na manima yandi monaka ntangu Muana na yandi ya nzola kufuaka na mutindu ya mpasi mpenza. (Mat. 27:28-31, 39) Yehova vuandaka na kilendo ya kusala ti mambu yango nionso bika salama. Na kifuani, ntangu bambeni tubaka: “[Nzambi] vukisa yandi ntangu yayi kana Yandi mezola yandi,” Yehova vuandaka na dikoki ya kusala yau. (Mat. 27:42, 43) Kasi, kana Nzambi salaka mutindu yina nkudulu zolaka futama ve mpe beto zolaka vuanda ve na kivuvu. Na yau, Yehova bikaka ti Muana na yandi niokuama tii na lufua.

8. Yehova monaka mpasi ntangu yandi vuandaka tala Muana na yandi kena kuniokuama? Sasila. (Tala diaka foto.)

⁸ Beto fueti kanisa ve ti lokola Nzambi kele nkua-ngolo-nionso, yandi kevuandaka ve na banguilu! Beto mesalamaka na kifuani na yandi, na dikoki ya kuvuanda na banguilu, na yau yamebonga kundima ti Yehova kevuandaka na banguilu. Biblia metuba ti yandi kemonaka “ntima mpasi” mpe “kiadi.” (Nz. 78:40, 41) Beto tadila diaka kifuani ya Abrahami mpe Yisaka. Yehova tubilaka Abrahami yandi pesa muana na yandi kaka mosi lokola nkayilu. (Eba. 22:9-12; Ebr. 11:17-19) Beto lenda kanisa na banguilu nionso yina Abrahami vuandaka na yau ntangu yandi vuandaka kukibongisa samu na kufua muana na yandi Yisaka. Yehova monaka kiadi mingi kuluta ntangu yandi monaka bantu ya yimbi kena kuniokola Muana na yandi tii na lufua!​—Tala na jw.org video Landa kifuani ya kiminu na bau​—Abrahami, Kitini 2.

9. Yinki malongi beto lenda baka na Baroma 8:32, 38, 39 samu na nzola ya Yehova?

⁹ Nkudulu kelongaka beto ti muntu mosi ve kezolaka beto mingi mutindu mosi na Yehova​—yavuanda ata bampangi na beto ya dibuta yina beto kezolaka mingi kuluta to bankundi na beto ya ntima. (Tanga Baroma 8:32, 38, 39.) Kondua ntembe, Yehova kezolaka beto mingi kuluta mutindu beto kekukizolaka. Nge kevuandaka na nsatu ya kuzinga mvula na mvula? Yehova  zola mutindu yina samu na nge kuluta nge. Nge kevuandaka na nsatu banlemvukila masumu na nge? Yehova zola mutindu yina samu na nge kuluta nge. Yandi kena kulomba beto kaka beto ndima dikabu na yandi ya valere na kumonisaka kiminu mpe luzitu. Nkudulu kele mpenza dikabu ya valere yina kemonisaka ti Nzambi kezolaka beto mingi. Mpe na yinza ya yimpa beto kelonguka diaka mambu mingi samu na nzola ya Yehova.​—Mos. 3:11.

MAMBU YINA NKUDULU KENA KULONGA BETO SAMU NA YESU

10. (a) Samu na yinki Yesu vuandaka kukitungisa samu na lufua na yandi? (b) Na yinki mitindu Yesu nungisaka nkumbu ya Yehova? (Tala diaka ankadre “ Kukuikama ya Yesu nungisaka nkumbu ya Yehova.”)

¹⁰ Yesu kekukitungisaka mpenza samu na lokumu ya Tata na yandi. (Yoa. 14:31) Yesu vuandaka na kiadi ya ngolo mutindu yandi kufuaka lokola muntu yina fingaka Nzambi, samu bantu lendaka kanisa yimbi samu na Tata na yandi. Samu na yau nde yandi sambilaka: “Tata na munu, kana yalenda salama, dikopo yayi luta ntama na munu.” (Mat. 26:39) Na kubikanaka ya kukuikama na Yehova tii na lufua, Yesu nungisaka nkumbu ya Tata na yandi.

11. Yinki mutindu Yesu monisaka nzola ya mpinda samu na bantu? (Yoane 13:1)

¹¹ Nkudulu kelongaka beto diaka ti Yesu kekukitungisaka mpenza samu na bantu, mingimingi samu na banlonguki na yandi. (Mas. 8:31; tanga Yoane 13:1.) Na kifuani, Yesu zabaka ti mambu yankaka yina metadila kisalu na yandi awa na ntoto kevuanda mpenza mpasi, na kifuani lufua na yandi ya mpasi. Nzokande, ntangu yandi vuandaka kokisa kiyekua na yandi na ntoto, yandi vuandaka sala yau ve kaka samu na kusala. Kasi, Yesu vuandaka tula ntima na yandi nionso na kusamuna, kulonga, mpe kusadila bantu yankaka. Ata na kilumbu ya lufua na yandi, Yesu bakaka ntangu samu na kusukula makulu ya bantumua na yandi, kulonga bau,  kukindisa mpe kubomba bau. (Yoa. 13:12-15) Na manima ntangu yandi vuandaka na yinti ya mpasi, Yesu bakaka mua ntangu samu na kupesa kivuvu na muyibi mosi yina vuandaka pene ya kufua, mpe Yesu bakaka bankubukulu samu na lutanunu ya mama na yandi. (Luka 23:42, 43; Yoa. 19:26, 27) Yesu monisaka kaka ve nzola na yandi ya mpinda na ntangu ya lufua na yandi, kasi yandi monisaka yau diaka na luzingu na yandi ya mvimba awa na ntoto.

12. Na yinki mutindu Yesu kena kutatamana kusala mambu mingi samu na beto?

¹² Yakele kedika ti Yesu kufuaka “mbala mosi samu na mvimba,” kasi yandi kena kutatamana kusala mambu mingi samu na beto. (Rom. 6:10) Na yinki mutindu? Yandi kena kutatamana kupesa ntangu mpe bangolo na yandi samu beto bakila nkudulu mambote. Kanisa na bisalu mingi yina yandi kele na yau. Yandi kele Ntinu na beto, Nganga-nzambi ya nene, mpe mfumu ya kimvuka. (1 Ko. 15:25; Ef. 5:23; Ebr. 2:17) Yandi kena kutuadisa kisalu ya kusangisa Baklisto yina metulua mafuta na kimpeve mpe kimvuka ya nene, kisalu yina fueti manisa tekila mpasi ya nene manisa. b (Mat. 25:32; Mrk. 13:27) Yandi kena kusadila diaka nanga ya kukuikama samu na kutatamana kupesa beto madia ya kimpeve na bilumbu yayi ya nsuka. (Mat. 24:45) Mpe na ntangu ya Luyalu ya bamvula 1 000, yandi ketatamana kusala samu na mambote na beto. Yehova pesaka mpenza Muana na yandi samu na beto!

KULEMBA VE KULONGUKA

13. Yinki mutindu kuyindula na mpinda lenda sadisa nge nge tatamana kulonguka mambu metadila nzola yina Nzambi mpe Klisto kevuandaka na yau samu na beto?

¹³ Nge lenda tatamana kulonguka mambu metadila nzola ya Yehova Nzambi mpe ya Yesu Klisto samu na beto kana nge kena kutatamana kuyindula na mpinda na mambu yina basalaka samu na nge. Mbala yankaka na ntangu ya kilokola ya Mbambukulu ya mvula yayi, nge lenda tanga na mpinda mukanda mosi to kuluta ya Baevanjile. Kusosa ve kutanga bikapu mingi na mbala mosi. Kasi, tanga malembemalembe mpe sosa bamfunu yankaka yina fueti tinda beto na kuzola Yehova mpe Yesu. Mpe diambu meluta mfunu, tubila bantu yankaka mambu yina nge kena kulonguka.

14. Na kutadila Nzembo 119:97 mpe noti na yinsi ya paje, yinki mutindu kusosasosa lenda sadisa beto na kutatamana kulonguka mambu metadila nkudulu mpe malongi yankaka? (Tala diaka foto.)

¹⁴ Kana nge kele na kedika banda bamvula mingi, nge lenda kukiyuvusa kana nge lenda mona  diaka makanisi ya yimpa ya kulonguka na mambu metadila lunungu ya Nzambi, nzola na yandi, mpe nkudulu. Diambu ya kedika kele ti beto lenda manisa ve kulonguka mambu nionso na yina metadila masolo yango mpe masolo yankaka. Na yau, yinki nge lenda sala? Tanga mpe longuka mambu ya kitoko yina mekatuka na Biblia yina kele na mikanda na beto. Kana nge memona verse mosi yina nge bakusa mbote ve, sala basosasosa. Na manima, yindula na mpinda na mambu yina nge monaka mpe yina yakena kulonga nge samu na Yehova, Muana na yandi, mpe nzola na bau samu na nge.​—Tanga Nzembo 119:97 mpe noti na yinsi ya paje.

15. Samu na yinki beto fueti tatamana kusosa mambu ya yimpa na Biblia?

¹⁵ Kulemba nzutu ve kana nge kena kumona ve diambu ya yimpa to ya kusepedisa konso ntangu yina nge mevuanda samu na kutanga to kusosasosa. Kukifuanikisa na muntu yina kena kusosa wolo. Mbala mingi, yakelombaka bantu yina kena kusosa wolo lutisa bawola to bilumbu mingi tekila bamona yau. Kasi, baketatamanaka samu wolo kevuandaka na mfunu samu na bau. Konso diambu ya yimpa yina beto melonguka na Biblia kele na mfunu mingi kuluta wolo! (Nz. 119:127; Mas. 8:10) Na yau vuanda na ntima yinda, mpe tatamana programe na nge ya ntangulu ya Biblia.​—Nz. 1:2.

16. Yinki mutindu beto lenda landa kifuani ya Yehova mpe ya Yesu?

¹⁶ Ntangu nge kena kulonguka, sosa mitindu ya kusadila mambu yina nge kena kulonguka. Na kifuani, landa kifuani ya lunungu ya Yehova na kusadilaka bantu yankaka mambu kondua kupona bilungi. Landa kifuani ya nzola ya Yesu samu na Tata na yandi mpe bantu yankaka na kuvuandaka pene ya kuniokuama samu na nkumbu ya Yehova mpe na kukipesaka samu na mambote ya bampangi na nge Baklisto. Diaka, landa kifuani ya Yesu na kusamuninaka bantu yankaka samu bau diaka babaka diluaku ya kundima dikabu ya mfunu mingi ya Yehova.

17. Yinki beto ketubila na disolo melanda?

¹⁷ Kana beto kena kubakusa mpe kumonisa butondi mingi na nkudulu, beto kezola diaka mingi Yehova mpe Muana na yandi. Mpe bau diaka bakezola beto mingi. (Yoa. 14:21; Yak. 4:8) Na yau beto tatamana kusadila mbote bima nionso yina Yehova kepesaka beto samu na kutatamana kulonguka mambu metadila nkudulu. Disolo melanda ketubila ndambu ya mitindu yina beto lenda bakila nkudulu mambote mpe mutindu beto lenda monisa butondi na beto samu na nzola ya Yehova.