1. Yinki beto lenda sala samu na kusepedisa Yehova?

 KANISA ti nge mepesa muntu mosi yina nge kezolaka kado mosi ya spesiale, yina kele kitoko mpe yina mebonga. Kondua ntembe, nge kelemba nzutu kana muntu yango metula kado yango na karton mpe yandi sala bimisa yau diaka ve! Na ndambu yankaka, nge kesepela kana muntu yango kena kusadila kado yango mbote mpe yandi memonisa butondi samu na yau. Yinki kele dilongi? Yehova pesaka Muana na yandi samu na mambote na beto. Yehova kesepela mpenza kana beto kena kumonisa butondi samu na kado yango ya mfunu mpe samu na nzola na yandi, yina tindaka yandi na kupesa nkudulu!​—Yoa. 3:16; Rom. 5:7, 8.

2. Yinki beto ketubila na disolo yayi?

² Kasi ntangu bamvula kena kuluta, beto lenda banda kuzimbisa butondi na beto samu na nkudulu. Yakevuanda lokola beto metula kado ya Nzambi na karton. Beto kele na kiese ya kuvuanda na yau, kasi beto metula yau kisika ya ntama. Samu diambu yango bika kumina beto, beto fueti kanisa mbala na mbala na mambu nionso yina Nzambi mpe Klisto salaka samu na beto. Disolo yayi lenda sadisa beto na kusala yau. Beto ketubila mutindu beto kebakaka mambote na nkudulu bubu yayi mpe mutindu beto lenda kebakila yau mambote na bilumbu kena kuiza. Beto ketubila diaka mutindu beto lenda monisa butondi na nzola ya Yehova, mingimingi na kilokola yayi ya Mbambukulu.

MUTINDU BETO KEBAKILAKA YAU MAMBOTE BUBU YAYI

3. Yinki kele mosi ya mutindu yina beto kebakilaka nkudulu mambote bubu yayi?

³ Beto kebakaka deja mambote na nkayilu ya nkudulu ya Klisto. Na kifuani, na nzila ya nkudulu, Yehova kenlemvukilaka masumu  na beto. Yakelombaka ve yandi nlemvukila beto kaka. Kasi yandi kezolaka kusala yau. Nsoniki mosi ya nkunga yina vuandaka na butondi yimbilaka: “Samu nge, Ee Yehova, nge kele mbote mpe nge kesepelaka kunlemvukila.”​—Nz. 86:5; 103:3, 10-13.

4. Samu na banani Yehova pesaka nkudulu? (Luka 5:32; 1 Timote 1:15)

⁴ Bantu yankaka lenda mona ti babonga ve kubaka nlemvo ya Yehova. Ya kedika, beto nionso beto bonga ve. Ntumua Paulo bakusaka ti ‘yabongaka kutu ve babokidila yandi ntumua.’ Kutu yandi buelaka: “Samu na nlemvo ya nene ya Nzambi, munu kele mutindu munu kele.” (1 Ko. 15:9, 10) Kana beto mebalula ntima na masumu na beto, Yehova kenlemvukila beto. Samu na yinki? Yakele ve samu beto mebonga na yau, kasi samu yandi kezolaka beto. Kana nge kena kukitungisa samu na banguilu ya kukimona ti nge kele ve na valere, zaba ti Yehova pesaka ve nkudulu samu na bantu yina mekondua masumu, kasi samu na bansumuki yina mebalula ntima.​—Tanga Luka 5:32; 1 Timote 1:15.

5. Muntu mosi kati na beto lenda kukimona ti yandi mebonga kubaka nlemvo ya Yehova? Sasila.

⁵ Mosi ve kati na beto fueti kukimona lokola yandi mebonga kubaka nlemvo ya Yehova ata kana yandi mesadila Yehova bamvula mingi. Ya kedika, Yehova kesepelaka na kukuikama na beto. (Ebr. 6:10) Yandi pesaka beto Muana na yandi lokola dikabu ya ofele, kasi ve lokola mfutu ya bisalu yina beto mesadila yandi. Kana beto kena kutuba ti beto mebonga kubaka nlemvo to beto kele bantu ya spesiale, yakevuanda lokola beto kena kutuba ti Klisto kufuaka mpamba.​—Fuanikisa na Bagalatia 2:21.

6. Samu na yinki Paulo salaka kisalu ya ngolo samu na Yehova?

⁶ Paulo zabaka ti yandi bonga ve kundimama na Nzambi. Kasi, samu na yinki yandi salaka kisalu ya ngolo samu na Yehova? Yakele ve samu na kumonisa ti yandi mebonga, kasi samu na kumonisa butondi na nlemvo ya nene ya Yehova. (Ef. 3:7) Mutindu mosi na Paulo, beto ketatamanaka kusala na vema samu na kumonisa ve ti beto mebonga kubaka nlemvo ya Yehova, kasi samu na kumonisa butondi na nlemvo yango.

7. Yinki kele mutindu yankaka yina beto kebakilaka nkudulu mambote bubu yayi? (Baroma 5:1; Yakobo 2:23)

⁷ Mutindu yankaka yina beto kebakilaka nkudulu mambote bubu yayi kele ti beto lenda vuanda na nguizani ya penepene na Yehova. a Mutindu beto tubilaka yau na disolo meluta, ntangu beto kebutukaka beto kevuandaka ve na nguizani ya penepene na Nzambi. Kasi na nzila ya nkudulu, beto lenda vuanda na “kiyenge kintuadi na Nzambi” mpe kupusana penepene na yandi.​—Tanga Baroma 5:1; Yakobo 2:23.

8. Samu na yinki beto fueti vuanda na butondi na Yehova samu na diluaku ya kusambila?

⁸ Beto tadila diambu mosi yina metadila nguizani na beto na Yehova​—diluaku ya kusambila. Yehova kekuwaka kaka ve bisambu yina bisadi na yandi mesala ntangu bamekutakana, kasi yandi kekuwaka diaka bisambu yina mosimosi kati na beto kesalaka na kisika na yandi mosi. Kisambu lenda pesa beto kiyenge ya ntima mpe ya makanisi, kasi yau kaka ve mambote ya kisambu. Yalenda kudisa kinkundi na beto na Nzambi. (Nz. 65:2; Yak. 4:8; 1 Yoa. 5:14) Ntangu yandi vuandaka na ntoto, Yesu vuandaka sambila mbala na mbala samu yandi zabaka ti Yehova vuandaka kuwa yandi mpe bisambu yango kesala ti nguizani na yandi na Tata na yandi vuanda ngolo. (Luka 5:16) Beto kele mpenza  na butondi samu na nzila ya nkayilu ya Yesu beto lenda kuma bankundi ya Yehova ata mpe kusolola na Yandi na kisambu!

MUTINDU BETO LENDA BAKILA YAU MAMBOTE NA BILUMBU KENA KUIZA

9. Yinki mutindu bisadi ya kukuikama kebaka mambote na nkudulu na bilumbu kena kuiza?

⁹ Yinki mutindu bisadi ya kukuikama ya Yehova kebakila nkudulu mambote na bilumbu kena kuiza? Bakebaka luzingu ya mvula na mvula. Bantu mingi kekanisaka ti yalenda salama ve samu bantu kekufuaka banda mafunda ya bamvula. Kasi lukanu ya Yehova ya ebandeli samu na bantu vuandaka bazinga mvula na mvula. Kana Adamu salaka ve disumu, bantu nionso zolaka zinga mvula na mvula. Atako luzingu ya mvula na mvula lenda monana lokola diambu ya kukamua bubu yayi, beto lenda ndima ti beto kebaka yau samu beto mezaba ti Yehova futaka ntalu mosi ya nene, luzingu ya Muana na yandi kaka mosi, samu diambu yango salama.​—Rom. 8:32.

10. Yinki mambu Baklisto yina metulua mafuta mpe mameme yankaka kena kuvingila na nsatu ya ngolo?

¹⁰ Atako beto kebaka luzingu ya mvula na mvula na bilumbu kena kuiza, Yehova zola ti beto kanisaka yau deja bubu yayi. Baklisto yina metulua mafuta kevingilaka na nsatu ya ngolo kuzinga na dizulu kuna bakeyadila ntoto kintuadi na Klisto. (Em. 20:6) Mameme yankaka kele na kivuvu ya kuzinga na paradiso awa na ntoto kondua bampasi mpe kiadi. (Em. 21:3, 4) Nge kele mosi ya mameme yankaka yina kele na kivuvu ya kuzinga mvula na mvula na ntoto? Yakele ve n’sendo mosi ya fioti! Yehova salaka beto samu beto zinga na ntoto, na yau luzingu na ntoto kepesa beto kiese ya kukoka.

11-12. Yinki kele ndambu ya balusakumunu ya Paradiso yina beto lenda kanisa na yau bubu yayi? (Tala diaka bafoto.)

¹¹ Kanisa mutindu luzingu kevuanda samu na nge na Paradiso awa na ntoto. Nge kevuanda ve na wonga samu na maladi to lufua. (Yis. 25:8; 33:24) Yehova kekokisa mpenza bansatu na nge nionso. Nge kesepela kulonguka mambu  mingi na yina metadila bibulu, bisadulu ya miziki, to kusala badesen? Na paradiso beto kevuanda na nsatu ya bantu yina mezaba kusala baplan mpe kutunga. Ya kedika, beto kevuanda diaka na nsatu ya bantu yina kesala kisalu ya kupesa maboko mpe ya kutanina, na kifuani kubongisa bima ya kudia, kusala bisadulu, kukuna mpe kutanina bajarden ya kitoko. (Yis. 35:1; 65:21) Lokola nge kezinga mvula na mvula, nge kevuanda na ntangu ya kulonguka konso kisalu yina nge lenda sepela na yau.

¹² Yakevuanda kiese kuyamba bantu yina kefutumuka! (Mis. 24:15) Kanisa diaka, ntangu yina nge kelonguka mambu mingi yina metadila Yehova na kutalaka bima mingi yina yandi mesalaka. (Nz. 104:24; Yis. 11:9) Yina meluta nionso, nge kevuanda na kiese ya kusambila Yehova kondua kusala disumu! Nge kebika ti “kiese ya ntangu ya nkufi yina mekatuka na disumu” pekisa nge kubaka balusakumunu yango? (Ebr. 11:25) Kondua ntembe nge kesala plina ve! Balusakumunu yango kele na valere kuluta konso mambu yina beto lenda kukiyimina bubu yayi. Kuzimbakana ve ti, Paradiso ya ntoto kebikana kaka ve kivuvu ya mpamba. Kasi yakevuanda mpenza kisika yina beto kezinga. Mambu yango nionso zolaka salama ve kana Yehova vuandaka zola beto ve mpe kana yandi pesaka ve dikabu ya Muana na yandi!

MONISA BUTONDI SAMU NA NZOLA YA YEHOVA

13. Yinki mutindu beto lenda monisa butondi na nzola ya Yehova? (2 Bakorinti 6:1)

¹³ Yinki mutindu beto lenda monisa butondi na Yehova mutindu yandi pesaka nkudulu? Na kutulaka kisalu na yandi na kisika ya ntete na luzingu na beto. (Mat. 6:33) Kutu, Yesu kufuaka “samu bantu yina kele na luzingu bavuanda na luzingu samu na bau mosi diaka ve, kasi samu na muntu yina kufuaka samu na bau mpe bafutumunaka.” (2 Ko. 5:15) Kondua ntembe, beto kezola ve kukondua mambote ya nlemvo ya nene ya Yehova.​—Tanga 2 Bakorinti 6:1.

14. Yinki mutindu beto lenda tudila Yehova ntima mpe kulanda lutuadusu na yandi?

¹⁴ Beto lenda monisa diaka butondi na nzola ya Yehova na kutudilaka yandi ntima mpe na kulandaka lutuadusu na yandi. Na yinki mutindu? Kana beto zola baka banzengolo, na kifuani bamvula yikua beto fueti lutisa na kalasi to yinki kisalu beto fueti ndima, beto fueti tadila mambu yina Yehova zola beto sala. (1 Ko. 10:31; 2 Ko. 5:7) Kana beto kena kumonisa kiminu na beto na bisalu, diambu mosi ya kitoko kesalama​—kiminu na beto mpe kinkundi na beto na Yehova kekuma ngolo kuluta. Kivuvu na beto diaka kekuma ngolo.​—Rom. 5:3-5; Yak. 2:21, 22.

15. Yinki mutindu beto lenda monisa butondi na beto na kilokola ya Mbambukulu?

¹⁵ Yakele na mutindu yankaka ya kumonisa butondi na beto na nzola ya Yehova. Yakele na kusadilaka kilokola ya Mbambukulu samu na kumonisa Yehova ti beto kele mpenza na butondi  na nkudulu. Katula kukibongisa samu na kukutakana na Mbambukulu, beto lenda bokidisa bantu yankaka. (1 Tim. 2:4) Sasila bantu yina nge mebokidisa mutindu mambu kesalama na Mbambukulu. Samu na kusadisa bau nge lenda monisa bau video Samu na yinki Yesu kufuaka? mpe video Kanisa lufua ya Yesu na jw.org. Bankulutu fueti bokidisa bantu yina melembaka na kimpeve. Kanisa na kiese yina kevuanda na dizulu mpe na ntoto kana dimeme mosi ya Yehova yina mezimbanaka mevutukila yandi! (Luka 15:4-7) Na Mbambukulu, beto kepesa kaka ve mbote na bampangi na beto, kasi mingimingi na bantu ya yimpa mpe na bantu yina mekutakanaka yameluta bantangu mingi. Beto kevuandaka na nsatu bamona ti beto meyamba bau mbote!​—Rom. 12:13.

16. Samu na yinki beto fueti sala mingi kuluta na kisalu ya kusamuna na kilokola ya Mbambukulu?

¹⁶ Nge lenda sala mingi kuluta na kisalu ya Yehova na kilokola ya Mbambukulu? Kusala mutindu yina kele mutindu ya mbote ya kumonisa butondi na beto samu na mambu nionso yina Nzambi mpe Klisto mesadilaka beto. Kana beto kena kusala mingi na kisalu ya Yehova, yandi kesadisa beto mpe mingi, yakesala ti kiminu na beto na yandi kuma ngolo kuluta. (1 Ko. 3:9) Diaka, tatamana kusala ntangulu ya Biblia ya Mbambukulu yina kele na mua mukanda Beto tadilaka Masonukua konso kilumbu to ankadre yina kele na mukanda ya lukutakanu ya katikati ya sabala. Nge lenda ata kupona kusadila baverse yango ya Biblia na programe na nge ya ndongokolo.

17. Yinki kesepedisaka Yehova? (Tala diaka ankadre “ Mitindu ya kumonisa butondi na nzola ya Yehova.”)

¹⁷ Ya kedika, mbala yankaka mambu ya luzingu na nge lenda pekisa nge kusala mambu nionso yina disolo yayi metubila. Kasi kuzimbakana ve ti Yehova kefuanikisaka ve mambu yina nge kesalaka na mambu yina bantu yankaka kesalaka; yandi ketalaka mambu yina kele na ntima na nge. Yandi kesepelaka kana yandi memona ti nge kele na butondi na dikabu na yandi ya mfunu ya nkudulu.​—1 Sa. 16:7; Mrk. 12:41-44.

18. Samu na yinki beto kele na butondi na Yehova Nzambi mpe na Yesu Klisto?

¹⁸ Yakele kaka samu na nkudulu nde beto kebakaka nlemvo ya masumu na beto, beto kele na kinkundi na Yehova, mpe beto kele na kivuvu ya kuzinga mvula na mvula. Bika beto monisaka ntangu nionso butondi na nzola ya Yehova, yina tindaka yandi yandi pesa beto balusakumunu yango nionso. (1 Yoa. 4:19) Bika beto monisa diaka butondi na beto na Yesu, yina zolaka beto mingi na kupesaka luzingu na yandi ya kimuntu samu na beto!​—Yoa. 15:13.