1. Na kutadila 1 Piere 5:2, yinki kiyekua ya mfunu bankulutu kele na yau?

 BAMEPESAKA Baklisto yina kele bankulutu kiyekua ya kutanina mameme ya Yehova yina kele na valere. Babakala yango yina kekukipesaka kebakaka kiyekua na bau na mfunu samu na kusadila bampangi na bau ya babakala mpe ya banketo, mpe bakesalaka ngolo samu na kuvuanda ‘bamvungi yina . . . kedikila bau mpenza.’ (Yer. 23:4; tanga 1 Piere 5:2.) Beto kele na butondi mutindu beto kele na babakala yango na bimvuka na beto!

2. Yinki kumekama bankulutu yankaka lenda kutana na yau?

² Na kukokisaka biyekua na bau, bankulutu kekutanaka na mambu mingi ya mpasi. Na ndambu mosi, kutanina kimvuka kelombaka kisalu ya ngolo. Yalombaka na Tony, yina kele nkulutu mosi na États-Unis, yandi longuka kuzaba bandilu na yandi na diambu metadila biyekua yina yandi lenda ndima kuvuanda na yau. Yandi metuba: “Ntangu maladi ya COVID-19 bandaka, munu vuandaka meka kusala bisalu mingi samu na kubongisa balukutakanu mpe kisalu ya kusamuna. Kasi atako munu vuandaka sala mingi, bisalu yankaka vuandaka buelama kaka. Nsukansuka, yakumaka mpasi samu na munu kusala ntangulu na munu ya Biblia, ndongokolo ya munu mosi mpe bisambu.” Ilir, nkulutu mosi na Kosovo, kutanaka na diambu yankaka ya mpasi. Ntangu yandi vuandaka na kisika mosi yina vuandaka mvita, yavuandaka mpasi samu na yandi kulanda malako yina nkubukulu vuandaka pesa. Yandi metuba: “Kibakala na munu mekamaka ntangu filiale pesaka munu kiyekua ya kusadisa bampangi ya babakala mpe ya banketo yina vuandaka na kisika ya kivonza. Munu vuandaka banga, mpe malako yango vuandaka monana lokola yavuandaka mbote ve.” Tim, misionere mosi na Asie, vuandaka mona mpasi samu na kusala nionso yina yandi fueti sala konso kilumbu. Yandi metuba: “Bantangu yankaka, kutanina bampangi vuandaka lembisa munu.” Yinki lenda sadisa bankulutu yina kele na bampasi ya mutindu yina?

3. Yinki mambote beto nionso lenda baka na kutadilaka kifuani ya Zuzi Gideoni?

³ Bankulutu lenda baka dilongi na kifuani ya Zuzi Gideoni. (Ebr. 6: 12; 11:32) Yandi vuandaka na kiyekua ya kutanina mpe kutuadisa bisadi ya Nzambi. (Baz. 2:16; 1 Bs. 17:6) Lokola Gideoni, bankulutu meponamaka samu na kutanina bisadi ya Nzambi na ntangu ya mpasi kuluta. (Bis. 20:28; 2 Tm. 3:1) Beto lenda baka dilongi na kifuani ya Gideoni na diambu metadila kuzaba bandilu na beto, kumikitisa, mpe luzitu. Kukanga ntima na yandi mekamaka ntangu yandi vuandaka kokisa biyekua na yandi. Yavuanda beto kele bankulutu to ve, beto lenda longuka kuvuanda na butondi mingi samu na bankulutu na beto. Beto lenda pesa maboko na babakala yango ya kimpeve yina kesalaka kisalu ya ngolo.​—Ebr. 13:17.

4. Yinki mutindu Gideoni monisaka ti yandi zabaka bandilu na yandi mpe yandi kele muntu ya kumikitisa?

⁴ Gideoni vuandaka muntu yina vuandaka zaba bandilu na yandi mpe muntu ya kumikitisa. b Ntangu mbasi ya Yehova tubilaka Gideoni ti yandi meponama samu na kuvukisa Yisaele na maboko ya bantu ya kilendo ya Madiani, bakala yango ya kumikitisa tubaka: ‘Dibuta na munu kele dibuta yina meluta fioti na Manase, mpe munu kele muntu yina mekondua mfunu na yinzo ya tata na munu.’ (Baz. 6:15) Yandi kukimonaka lokola yandi bonga ve na kiyekua yango, kasi Yehova zabaka ti yandi lenda sala yau. Na lusadusu ya Yehova, Gideoni kokisaka kiyekua na yandi mbotembote.

5. Yinki ntangu yalenda vuanda mpasi samu na nkulutu na kumonisa kikadulu ya kuzaba bandilu na yandi mpe ya kumikitisa?

⁵ Bankulutu kesalaka nionso yina balenda sala samu na kumonisa kikadulu ya kuzaba bandilu na bau mpe ya kumikitisa na mambu nionso. (Mika 6:8; Bis. 20:18, 19) Bakekukikumisaka ve samu na mambu yina balenda sala to yina bamesala; mpe bakekanisaka ve ti bamekondua mfunu samu bamesala banzimbala. Kasi, na bantangu yankaka, yalenda vuanda mpasi samu na nkulutu na kuvuanda na kumikitisa mpe kikadulu ya kuzaba bandilu na yandi. Na kifuani, yandi lenda ndima biyekua mingi mpe na manima yamekuma mpasi samu yandi kokisa yau nionso. To balenda vueza yandi samu na mutindu yandi kena kukokisa kiyekua mosi, to balenda kumisa yandi samu na mutindu yandi kena kukokisa kiyekua yankaka. Yinki dilongi bankulutu lenda baka na kifuani ya Gideoni kana bamekutana na mambu ya mutindu yina?

6. Yinki dilongi bankulutu lenda baka na kifuani ya Gideoni na diambu metadila kuzaba bandilu? (Tala diaka foto.)

 ⁶ Lombaka lusadusu. Muntu yina kele na kikadulu ya kuzaba bandilu na yandi kezabaka ti yakele na mambu yina yandi kele ve na dikoki ya kusala. Gideoni monisaka ti yandi kele na kikadulu ya kuzaba bandilu na yandi na kulombaka bantu yankaka lusadusu. (Baz. 6:27, 35; 7:24) Bankulutu ya nduenga kesalaka kaka mutindu yina. Tony, yina beto tubilaka na ebandeli, metuba: “Mutindu balongaka munu na bumuana, munu kevuandaka na kifu ya kundima bisalu mingi ata yina mukekoka ve kusala. Na yau, mubakaka nzengolo ya kukotisa diambu metadila kuvuanda na kikadulu ya kuzaba bandilu na nsambudulu na beto ya dibuta mpe muyuvusaka nketo na munu mabanza na yandi samu na diambu yango. Mutalaka diaka na jw.org video Pesáká formasyo, tyeláká basusu motema mpe pesáká bango nguya, ndenge Yesu asalaka.” Tony bandaka kulomba bantu yankaka lusadusu samu na biyekua na yandi. Yinki mambote yabimisaka? Tony metuba: “Kisalu na kimvuka vuandaka salama, mpe munu vuandaka na ntangu ya kukumisa nguizani na munu na Yehova ngolo.”

7. Yinki mutindu bankulutu lenda landa kifuani ya Gideoni kana bamevueza bau? (Yakobo 3:13)

⁷ Kufuema ve kana bakena kuvueza nge. Diambu yankaka yina kesalaka bankulutu mpasi kele kana bakena kuvueza bau. Awa diaka, kifuani ya Gideoni lenda sadisa. Kondua ntembe lokola yandi zabaka ti yandi kele ve muntu ya kukoka, yandi pesaka mvutu na kiyenge nionso ntangu bantu ya Efrayimi vuandaka vueza yandi. (Baz. 8:1-3) Gideoni pesaka bau ve mvutu na nganzi. Yandi monisaka ti yandi kele muntu ya kumikitisa na mutindu yandi kuwaka mambu yina vuandaka tungisa bau mpe yandi pesaka bau mvutu na kimpombo. Yau salaka ti nganzi na bau kita. Bankulutu ya nduenga kelandaka kifuani ya Gideoni na kuwaka na dikebi mpe na kupesaka mvutu na kimpombo kana bamevueza bau. (Tanga Yakobo 3:13.) Na mutindu yina bakesalaka ti kiyenge vuanda na kimvuka.

8. Yinki bankulutu fueti sala kana bakena kukumisa bau? Pesa kifuani.

⁸ Pesaka Yehova lokumu nionso. Ntangu bantu vuandaka kumisa Gideoni samu na mutindu yandi nungaka Madiani, yandi lombaka bantu kumisa nde Yehova. (Baz. 8:22, 23) Yinki mutindu bampangi yina kele na biyekua lenda landa kifuani ya Gideoni? Balenda pesa lokumu na Yehova samu na mambu yina bakesalaka. (1 Bk. 4:6, 7) Na kifuani, kana bamepesa nkulutu mosi felisitasion samu na makoki yina yandi kele na yau ya kulonga, yandi lenda tuba ti malongi yango mekatuka na Mpova ya Nzambi mpe beto nionso beto kebakaka formasion na nkubukulu ya Yehova. Na bantangu yankaka, bankulutu lenda kukiyuvusa kana bakelongaka na mutindu yina kesala ti bantu pesa Yehova lokumu to bakezolaka kaka kubenda dikebi ya bantu na zulu na bau. Beto tadila kifuani ya nkulutu mosi na nkumbu ya Timothée. Ntangu Timothée kumaka nkulutu, yandi vuandaka zola kusala badiskur ya bantu nionso. Yandi metuba: “Munu vuandaka sadila bampova ya ebandeli mpe bifuani ya yinda mpe ya ngolongolo. Yavuandaka sala ti bantu pesa munu bafelisitasion. Diambu ya kiadi, bantu kumaka kutula dikebi na bau na munu na kisika ya kutula yau na Biblia to na Yehova.” Na manima, Timothée monaka ti yandi fueti soba mutindu na yandi ya kulonga samu bantu bika kutula dikebi mingi na yandi. (Bin. 27:21) Yinki mambote yabimisaka? Yandi metuba: “Bubu yayi, bampangi ketubilaka munu mutindu diskur na munu sadisaka bau samu na kununga mambu ya mpasi, kukanga ntima na bampasi, to kupusana penepene na Yehova. Munu kesepelaka mingi kana munu kena kuwa bampova ya mutindu yina kuluta mutindu munu vuandaka sala ntangu bavuandaka kumisa munu.”

9. Yinki mutindu luzitu mpe kibakala ya Gideoni mekamaka? (Tala foto ya kuvertire.)

⁹ Ntangu Gideoni ponamaka lokola zuzi, kikadulu na yandi ya kuzitisa mpe ya kibakala mekamaka.  Bapesaka yandi kiyekua mosi ya mpasi ya kubebisa meza ya nkayilu ya Baala ya tata na yandi. (Baz. 6:25, 26) Na manima ya kusangisa basoda, Yehova zabisaka Gideoni mbala zole ti yandi fueti kitisa ntalu ya basoda na yandi. (Baz. 7:2-7) Nsukansuka, balombaka yandi yandi kuenda nuanisa basoda yina vuandaka bambeni na bau na katikati ya mpipa.​—Baz. 7:9-11.

10. Yinki mutindu kikadulu ya kuzitisa ya nkulutu lenda mekama?

¹⁰ Bankulutu fueti vuanda ‘pene na kuzitisa.’ (Yak. 3:17) Nkulutu yina kele na kikadulu ya kuzitisa kevuandaka pene ya kuzitisa yina Masonukua metuba mpe kulanda malako ya nkubukulu ya Nzambi. Yandi kepesaka kifuani mosi ya mbote na bantu yankaka. Kasi, na bantangu yankaka, kikadulu na yandi ya kuzitisa lenda mekama. Na kifuani, yalenda vuanda mpasi samu na yandi na kuzitisa malako yina yandi kena kubaka. Na bantangu yankaka, yandi lenda kukiyuvusa kana malako yankaka kele mpenza na mfunu to ya nduenga. To balenda pesa yandi kiyekua mosi yina lenda sala ti bakanga yandi. Yinki mutindu bankulutu lenda landa kifuani ya luzitu ya Gideoni na mambu ya mutindu yina?

11. Yinki lenda sadisa bankulutu samu bamonisa luzitu?

¹¹ Kuwaka malako na dikebi mpe sadilaka yau. Nzambi tubilaka Gideoni mutindu ya kubebisa meza ya nkayilu ya tata na yandi, kisika ya kutunga meza ya nkayilu ya yimpa samu na Yehova, mpe kibulu yina bafueti pesa nkayilu. Gideoni vuezaka ve malako yango​—yandi salaka kaka mutindu Yehova tubilaka yandi yandi sala. Bubu yayi, bankulutu kebakaka malako yina nkubukulu ya Yehova kepesaka na nzila ya baletre, bansangu, mpe malako yankaka samu na kukitanina mpe kubikana penepene ya Yehova. Beto kezolaka bankulutu na beto samu bakelandaka na kukuikama nionso malako ya nkubukulu na beto. Kimvuka ya mvimba kebakilaka yau mambote.​—Nk. 119:112.

12. Yinki mutindu bankulutu lenda sadila Baebreo 13:17 kana nkubukulu mesala nsobolo mosi?

¹² Vuandaka pene ya kusala bansobolo. Kuzimbakana ve ti Yehova lombaka Gideoni yandi vutusa mingi ya basoda na yandi na bayinzo na bau. (Baz. 7:8) Mbala yankaka yandi kukiyuvusaka: ‘Nsobolo yayi kele mpenza na mfunu? Yakesimba?’ Atako plina, Gideoni zitisaka. Bankulutu bubu yayi kelandaka kifuani ya Gideoni na kuzitisaka kana nkubukulu mesala nsobolo mosi. (Tanga Baebreo 13:17.) Na kifuani, na 2014 Kimvuka ya Ntuadisi sobaka mutindu mbongo samu na ntungulu ya Bayinzo ya Kimfumu mpe ya balukutakanu ya nene kepesamina. (2 Bk. 8:12-14) Na ntama, nkubukulu vuandaka devisa bimvuka mbongo samu na ntungulu, mpe na manima bimvuka vuandaka vutula mbongo yango. Kasi bubu yayi, nkubukulu kesadilaka makabu ya bimvuka ya yinza ya vimba samu na kutunga Bayinzo ya Kimfumu mpe ya balukutakanu ya nene na bisika yina bakele na nsatu na yau, ata kana kimvuka mosi mepesa kaka makabu fioti. Ntangu José monaka nsobolo yango, yandi ndimaka ve ti yakesimba, yandi tubaka: ‘Ata Yinzo ya Kimfumu mosi ve ketungama diaka. Mambu kesalamaka mutindu yina ve na buala na beto.’ Yinki sadisaka José samu na kuzitisa malako yango? Yandi metuba: “Bampova ya Bingana 3:5, 6 bambulaka munu kutudila Yehova ntima. Mpe yabimisaka mambu ya  mbote! Beto kena kutunga kaka ve Bayinzo ya Kimfumu mingi, kasi beto melonguka diaka kupesa makabu na mitindu mesuasana, samu yau sala ti bima beto kele na yau mingi fuka bima yina mekondua na bantu yankaka.”

13. (a) Gideoni kukindimisaka na yinki diambu? (b) Yinki mutindu bankulutu lenda landa kifuani na Gideoni? (Tala diaka foto.)

¹³ Salaka luzolo ya Yehova na kibakala nionso. Gideoni zitisaka Yehova atako yandi vuandaka banga mpe atako kiyekua yango vuandaka na kivonza. (Baz. 9:17) Na manima ya kubaka lukindusu ya Yehova, Gideoni ndimisamaka mpenza ti Yehova kesadisa yandi mutindu kaka yandi vuandaka tanina bisadi ya Nzambi. Bankulutu yina kezingaka na bisika yina kisalu na beto kele na bipekiseli kelandaka kifuani ya Gideoni. Bakepesaka kifuani ya mbote na kukuendaka na balukutakanu mpe na kusamunaka na kibakala nionso atako bakena kukanga bampangi, kusambisa bau, kukatula bau na bisalu, to kusadila bau mambu na kinkesi. c Na ntangu ya mpasi ya nene, yakelomba na bankulutu bavuanda na kibakala samu na kuzitisa malako yina bakepesa bau​—atako kulanda yau lenda bimisa bivonza. Na kifuani, malako yango lenda tadila kusamuna nsangu ya kitumbu yina kele lokola mvula ya mabanga ya nene mpe yina beto kesala samu beto vuka ntangu Gogi ya Magogi kenuanisa beto.​—Eze. 38:18; Kus. 16:21.

14. Samu na yinki yavuandaka mpasi samu na Gideoni na kukanga ntima?

¹⁴ Kiyekua ya Gideoni lokola zuzi vuandaka lomba yandi sala kisalu ya ngolo. Ntangu bantu ya Madiani tinaka mvita na katikati ya mpipa, Gideoni landaka bau banda na n’dimba ya Yizreele tii na nzila ya nzadi ya Yordani, yina mefuluka na bayinti. (Baz. 7:22) Gideoni sukaka kaka na Yordani? Ve! Atako balembaka, yandi mpe basoda na yandi 300 sabukaka Yordani mpe batatamanaka kulanda bau. Nsukansuka, bakangaka bantu yango ya Madiani mpe banungaka bau.​—Baz. 8:4-12.

15. Samu na yinki, na bantangu yankaka, yalenda vuanda mpasi samu na nkulutu na kukanga ntima?

¹⁵ Na bantangu yankaka, nkulutu lenda lemba mpenza nzutu samu na kutuadisa kimvuka mpe dibuta  na yandi. Na bantangu yango, yinki mutindu bankulutu lenda landa kifuani ya Gideoni?

16-17. Yinki sadisaka Gideoni samu na kukanga ntima, mpe na yinki diambu bankulutu fueti kukindimisa? (Yezaya 40:28-31) (Tala diaka foto.)

¹⁶ Tulaka ntima ti Yehova kepesa nge ngolo. Gideoni tulaka ntima ti Yehova kepesa yandi ngolo, mpe Yehova salaka kaka mutindu yina. (Baz. 6:14, 34) Kilumbu mosi, Gideoni mpe basoda na yandi vuandaka landa na makulu bantinu zole ya Madiani yina vuandaka ntangu yankaka na zulu ya bashamo. (Baz. 8:12, 21) Kasi, Nzambi sadisaka Bayisaele samu na kukanga bau mpe kununga bau na mvita. Mutindu mosi bankulutu mpe fueti tudila Yehova ntima, muntu yina ‘kelembaka ve ata fioti mpe ngolo na yandi kemanisaka ve.’ Yandi kepesa bau ngolo ntangu bakele na yau nsatu.​—Tanga Yezaya 40:28-31.

¹⁷ Tadila diambu kuminaka Matthieu, yina kele na Komite samu na kusolola na minganga. Yinki kesadisaka yandi yandi kanga ntima? Matthieu metuba: “Munu kemonaka kedika ya bampova ya Bafilipi 4:13. Mbala mingi, ntangu munu kevuandaka ya kulemba mpenza mpe ngolo memanisa ya kusala diambu yankaka, munu kesambilaka mingi, na kulombaka Nzambi yandi pesa munu ngolo ya nzutu mpe ya mabanza yina munu kele na yau nsatu samu na kusadisa bampangi na munu. Na bantangu yango, munu kemonaka mutindu mpeve ya Yehova kepesaka munu ngolo samu munu kanga ntima.” Lokola Gideoni, bankulutu na beto kesalaka ngolo samu na kutanina bisadi ya Yehova atako mbala yankaka yakevuandaka pete ve kusala yau. Na yau, bafueti zaba bandilu na bau mpe kubakusa ti balenda ve kusala nionso yina bakele na nsatu ya kusala. Kasi, balenda kukindimisa ti Yehova kekuwa bisambu na bau samu na kulomba lusadusu mpe yandi kepesa bau ngolo samu na kukanga ntima.​—Nk. 116:1; Fil. 2:13.

18. Na nkufi, yinki mutindu bankulutu lenda landa kifuani ya Gideoni?

¹⁸ Bankulutu lenda longuka mambu mingi ya mfunu na kifuani ya Gideoni. Bankulutu fueti zaba bandilu na bau mpe kumonisa kumikitisa na kundimaka kaka kitezo ya kisalu yina balenda sala mpe diaka ntangu bakena kuvueza bau to bakena kupesa bau bafelisitasion. Bafueti monisa luzitu mpe kibakala, lokola nsuka ya mambu ya yinza yayi mekuma pene. Mpe bafueti kukindimisa ti atako bakena kukutana na bampasi na kisalu na bau, Yehova kepesa bau ngolo. Ya kedika, beto kesepelaka na bamvungi ya mutindu yayi, yina kena kusala ngolo mpe beto ‘tatamana kupesa bantu ya mutindu yina lokumu.’​—Fil. 2:29.