1. Yinki banguilu mbala yankaka bisadi ya Nzambi kena kunuana na yau?

 YAKELE diambu ya kukindisa kuzaba ti Yehova kendimaka bisadi na yandi nionso! Biblia metuba ti: ‘Yehova kezolaka bantu na yandi.’ (Nk. 149:4) Kasi, na bantangu yankaka bantu yankaka kelembaka nzutu mpe balenda kukiyuvusa, ‘Yehova kendimaka munu mpenza?’ Na bantangu yankaka bisadi mingi ya Yehova ya kukuikama yina Biblia metubila lembaka nzutu mpe bavuandaka mona mpasi kundima ti Yehova kendimaka bau.​—1 Sa. 1:6-10; Yobi 29:2, 4; Nk. 51:11.

2. Banani Yehova kendimaka?

² Biblia memonisa puelele ti bantu ya kukondua kukoka lenda ndimama na Yehova. Na yinki mutindu? Bafueti monisa kiminu na Yesu Klisto mpe kubaka mbotama. (Yoa. 3:16) Na mutindu yango beto kemonisaka na bantu yankaka ti beto mebalula ntima na masumu na beto, mpe beto mepesa Nzambi nsilulu ti beto kesala luzolo na yandi. (Bis. 2:38; 3:19) Yehova kesepelaka ntangu beto kesalaka mambu yina kekudisaka nguizani na beto na yandi. Kana beto kena kusala nionso yina beto lenda samu na kutanina nsilulu na beto ya kusadila yandi, Yehova kendima beto mpe yandi ketadila beto lokola bankundi na yandi ya ntima.​—Nk. 25:14.

3. Yinki beto ketubila na disolo yayi?

³ Kasi, samu na yinki mbala yankaka bantu yankaka kekukimonaka ti Nzambi kendimaka bau ve? Yinki mutindu Yehova ketubilaka beto ti yandi kena kundima beto? Mpe yinki mutindu Muklisto lenda kukindimisa ti Nzambi kena kundima yandi?

SAMU NA YINKI MBALA YANKAKA BANTU YANKAKA KEKUKIMONAKA TI YEHOVA KENDIMAKA BAU VE?

4-5. Ata kana beto kena kukimona ti beto kele na mfunu ve, beto lenda kukindimisa na yinki diambu?

⁴ Mingi kati na beto kekukimonaka ti beto kele na mfunu ve banda ntangu beto vuandaka bana fioti. (Nk. 88:15) Mpangi mosi ya bakala  na nkumbu ya Adrián metuba: “Munu vuandaka kukimona ntangu nionso ti munu vuandaka na mfunu ve. Munu kena kubambuka diaka ti ntangu munu vuandaka muana fioti, munu vuandaka sambila ti dibuta na munu zinga na Paradiso, atako munu vuandaka ndimisama ti munu bongaka ve kuvuanda kuna.” Tony, yina yundukaka ve na dibuta ya Baklisto metuba: “Bibuti na munu salaka tubila munu ve ti bakezolaka munu to bakesepelaka na munu. Yasalaka ti munu banda kukimona ti munu kele na diambu mosi ve yina munu lenda sala yina kesepedisa bau.”

⁵ Kana na bantangu yankaka beto kena kunuana na banguilu ya kukimona ti beto kele na mfunu ve, beto zimbakana ve ti, Yehova yandi mosi bendaka beto. (Yoa. 6:44) Yandi kemonaka mambu ya mbote na kati na beto yina beto mosi beto lenda mona ve, mpe yandi mezaba bantima na beto. (1 Sa. 16:7; 2 Bs. 6:30) Na yau beto fueti tudila yandi ntima ntangu yandi kena kutuba ti beto kele na valere.​—1 Yn. 3:19, 20.

6. Yinki mutindu ntumua Paulo vuandaka kukimona samu na masumu na yandi ya ntama?

⁶ Tekila beto longuka kedika, bayankaka kati na beto vuandaka sala mambu yina lenda sala ti batatamana kukimona lokola bau menata mambu. (1 Pi. 4:3) Ata Baklisto ya kukuikama ketatamanaka kunuana na babulembu. Bosi nge, nge kekukimonaka ti Yehova lenda nlemvukila nge ve? Kana yakele mutindu yina, yalenda vuanda lukindusu samu na nge na kuzaba ti bisadi ya kukuikama ya Yehova vuandaka nuana na banguilu ya mutindu yina. Na kifuani, ntumua Paulo vuandaka kukimona muntu ya kiadi ntangu yandi vuandaka kanisa na banzimbala na yandi. (Bar. 7:24) Ya kedika, Paulo balulaka ntima na masumu na yandi mpe yandi bakaka mbotama. Kasi yandi vuandaka tatamana kukitadila lokola ‘muntu yina meluta fioti kati na bantumua’ mpe nsumuki ‘ya ntete.’​—1 Bk. 15:9; 1 Tm. 1:15.

7. Yinki diambu beto fueti lunda na makanisi samu na masumu na beto ya ntama?

⁷ Tata na beto ya dizulu mepesa beto nsilulu ti yandi kenlemvukila beto kana beto mebalula ntima. (Nk. 86:5) Na yau kana beto memona mpenza kiadi samu na masumu yina beto salaka, beto lenda tula mpenza ntima ti mambu yina Yehova tubaka kele kedika​—ti yandi menlemvukilaka beto.​—Kol. 2:13.

8-9. Yinki mutindu beto lenda nunga banguilu ya kukanisa ti beto lenda sepedisa Yehova ata fioti ve?

⁸ Beto nionso beto kezolaka kusala nionso yina beto lenda samu na kusadila Yehova. Kasi bayankaka, kekukimonaka ti balenda sala ata diambu mosi ve ya mbote samu na kundimama na yandi. Mpangi mosi ya nketo na nkumbu ya Amanda metuba: “Munu kekanisaka ntangu nionso ti kupesa Yehova yina meluta mbote zola monisa kusala ntangu nionso mingi. Na yau, mbala mingi munu kesosaka kusala mingi kuluta yina munu lenda sala. Kana munu nunga ve, munu kemonaka ti yakesalaka Yehova mpasi mutindu yakesalaka munu mosi mpasi.”

⁹ Yinki mutindu beto lenda nunga banguilu ya kukimona ti beto lenda sala diambu mosi ve ya mbote samu na kusepedisa Yehova? Zaba ti Yehova kevuandaka ve mambu ngolo. Yandi kelombaka beto ve mambu kuluta yina beto kele na dikoki ya kusala. Yandi kesepelaka na mambu yina beto kena kusala samu na yandi kana beto kena kusala yau na makoki na beto nionso. Diaka, kanisa na bifuani ya Biblia ya bantu yina sadilaka Yehova na ntima na bau ya mvimba. Na kifuani kanisa Paulo. Yandi salaka kisalu ya ngolo bamvula mingi, yandi salaka bavuayaje ya badistanse ya yinda mpe yandi zibulaka bimvuka mingi. Kasi, ntangu mambu yina yandi kutanaka na yau salaka ti yandi bika diaka samuna mingi, Nzambi vuandaka ndima yandi diaka ve? Ve. Yandi tatamanaka kusala nionso yina yandi lendaka sala mpe Nzambi sakumunaka yandi. (Bis. 28:30, 31) Mutindu mosi, mambu yina beto lenda sala samu na Yehova lenda soba. Kasi diambu yina kevuandaka na mfunu samu na yandi kele nsatu yina beto kevuandaka na yau samu na kusadila yandi. Ntangu yayi beto tadila ndambu ya mitindu yina Yehova ketubilaka beto ti yandi kendimaka beto.

 YINKI MUTINDU YEHOVA KETUBILAKA BETO TI YANDI KENDIMAKA BETO?

10. Yinki mutindu beto lenda “kuwa” Yehova kena kutubila beto ti yandi kena kundima beto? (Yoane 16:27)

¹⁰ Na nzila ya Biblia. Yehova kesosaka mitindu ya kutubila bisadi na yandi ti yandi kendimaka bau mpe yandi kesepelaka na bau. Masonukua metubila maluaku zole ntangu Yandi tubilaka Yesu ti yandi kele Muana na Yandi ya nzola, mpe yina yandi mendima. (Mat. 3:17; 17:5) Nge kesepela kuwa Yehova kena kutubila nge ti yandi kesepelaka na nge? Yehova ketubaka na beto ve mbala mosi kukatuka na dizulu, kasi yandi ketubaka na beto na nzila ya Mpova na yandi. Beto lenda “kuwa” ndinga ya Yehova yina kena kutuba ti yandi kendimaka beto ntangu beto kena kutanga bampova ya Yesu yina kele na Baevanjile. (Tanga Yoane 16:27.) Yesu monisaka na mutindu ya kukoka kimuntu ya Tata na yandi. Na yau ntangu beto kena kutanga bampova ya Yesu yina kena kumonisa ti yandi ndimaka banlonguki na yandi ya kukondua kukoka kasi ya kukuikama, beto lenda mona kaka lokola Yehova kena kutubila beto bampova yango.​—Yoa. 15:9, 15.

11. Samu na yinki kukutana na mambu ya mpasi zola monisa ve ti Yehova kena kundima beto ve? (Yakobo 1:12)

¹¹ Na nzila ya bisalu na yandi. Yehova kevuandaka na nsatu ya ngolo ya kusadisa beto, na kifuani yandi kepesaka beto bima ya kinsuni yina beto kele na yau nsatu. Na bantangu yankaka, Yehova lenda bika nzila beto niokuama ngolo, mutindu yandi salaka yau na Yobi, muntu ya lunungu. (Yobi 1:8-11) Kukutana na banzomono zola monisa ve ti Nzambi kena kundima beto diaka ve. Kutu, yakepesaka beto maluaku ya kumonisa nzola ya mpinda yina beto kele na yau samu na Nzambi mpe yakemonisaka ti beto ketudilaka yandi ntima. (Tanga Yakobo 1:12.) Mpe na bantangu ya banzomono beto kemona ti yandi kezolaka beto mpe yandi kena kusadisa beto beto kanga ntima.

12. Yinki dilongi beto lenda baka na disolo ya Dmitrii?

¹² Beto tadila kifuani ya mpangi mosi na nkumbu ya Dmitrii yina kevuandaka na Asie. Yandi zimbisaka kisalu na yandi mpe bangonda mingi na manima yandi vuandaka ve na dikoki ya kubaka kisalu yankaka. Na yau yandi bakaka nzengolo ya kukipesa mingi na kisalu ya kusamuna, yamonisaka ti yandi vuandaka tudila Yehova ntima. Bangonda mingi lutaka, kasi yandi vuandaka baka kaka kisalu ve. Na manima yandi belaka maladi mosi yina vuandaka sala ti yandi bikana kaka ya kuleka na mfulu. Yandi bandaka kukanisa ti yandi vuandaka diaka ve tata to bakala ya mbote, mpe yandi vuandaka kukiyuvusa kana Yehova  vuandaka ndima yandi kaka. Mpe na nkokila mosi, muana na yandi ya nketo bimisaka na mashine papie yina vuandaka na bampova yina kele na Yezaya 30:15: ‘Beno kevuanda ngolo kana beno mebikana niee mpe beno metula ntima.’ Muana yango nataka yau pembeni ya mfulu ya tata na yandi mpe yandi tubaka, “Papa, kana nge kena kukitungisa, nge lenda kanisa verse yayi.” Dmitrii bakusaka ti na lusadusu ya Yehova, dibuta na yandi vuandaka ntangu nionso na bima ya kudia, bilele, mpe kisika ya kuvuanda. Yandi metuba: “Diambu yina lombamaka munu sala, vuandaka kuvuanda niee mpe kutatamana kutudila Nzambi na munu ntima.” Kana nge kena kukutana na banzomono ya mutindu yina nge lenda tula ntima ti Yehova ketudilaka nge dikebi mpe yandi kesadisa nge samu nge kanga ntima.

13. Banani Yehova lenda sadila samu na kutubila beto ti yandi kena kundima beto, mpe yinki mutindu?

¹³ Na nzila ya bampangi na beto Baklisto. Yehova kesadilaka bampangi na beto ya babakala mpe ya banketo samu na kutubila beto ti yandi kena kundima beto. Na kifuani, yandi lenda tinda bantu yankaka samu batubila beto bampova ya kukindisa na ntangu yina mebonga. Mpangi mosi ya nketo yina kevuandaka na Asie monaka kedika ya diambu yango ntangu yandi kutanaka na bampasi mingi. Yandi zimbisaka kisalu na yandi mpe yandi bandaka kubela ngolo. Na manima bakala na yandi salaka disumu mosi ya nene mpe bakatulaka yandi kiyekua ya nkulutu. Yandi tubaka: “Munu vuandaka bakusa ve samu na yinki mambu yango vuandaka salama, munu vuandaka kanisa ti mbala yankaka munu salaka diambu ya yimbi mpe Yehova vuandaka ndima munu diaka ve.” Mpangi na beto ya nketo lombaka na Yehova yandi ndimisa yandi ti yandi kena kundima yandi. Yinki mutindu Yehova pesaka yandi mvutu? Yandi metuba, “Bankulutu ya kimvuka sololaka na munu mpe bandimisaka munu ti Yehova kena kutatamana kuzola munu.” Na manima yandi lombaka diaka lusadusu na Yehova. Yandi metuba: “Kaka na kilumbu yango munu  yambaka letre mosi yina katukaka na grupe ya bampangi ya babakala mpe ya banketo ya kimvuka. Ntangu munu tangaka bampova na bau ya kubomba munu kukimonaka ti Yehova kuwaka munu.” Ya kedika, mbala mingi Yehova ketubilaka beto ti yandi kena kundima beto na nzila ya bampova ya kukindisa ya bantu yankaka.​—Nk. 10:17.

14. Yinki kele mutindu yankaka yina Yehova ketubilaka beto ti yandi kena kundima beto?

¹⁴ Yehova ketubilaka beto diaka ti yandi kena kundima beto na kusadilaka bampangi na beto Baklisto samu na kupesa beto malongi na ntangu yina beto kele na yau nsatu. Na kifuani, na siekle ya ntete, Yehova sadilaka ntumua Paulo samu yandi sonikina bampangi na yandi Baklisto baletre 14 yina mepemama. Baletre yango vuandaka na malongi ya ngolo kasi ya nzola. Samu na yinki Yehova tindaka Paulo yandi sonika malongi ya mutindu yina? Yehova kele Tata ya mbote, mpe yandi kepesaka disiplini na bana na yandi ‘yina yandi kezolaka.’ (Bin. 3:11, 12) Na yau kana beto mebaka malongi yina mekatuka na Biblia, beto lenda mona yau lokola kidimbu yina kena kumonisa ti Nzambi kena kundima beto, kasi yandi manga beto ve. (Ebr. 12:6) Yinki kele mambu yankaka yina kena kumonisa ti Nzambi kena kundima beto?

MITINDU YANKAKA YINA KENA KUMONISA TI YEHOVA KENA KUNDIMA BETO

15. Banani Yehova kepesaka mpeve na yandi ya nlongo, mpe samu na yinki yalenda pesa beto lukindusu?

¹⁵ Yehova kepesaka mpeve ya nlongo na yandi na bantu yina yandi kendimaka. (Mat. 12:18) Beto lenda kukiyuvusa, ‘Munu kemonisaka ndambu ya bikadulu ya mbuma ya mpeve ya nlongo ya Nzambi na luzingu na munu?’ Nge kemonaka ti nge mekumaka na ntima yinda mingi kuluta mutindu yavuandaka tekila nge zaba Yehova? Ya kedika kana nge kena kumonisa bikadulu ya mbuma ya mpeve ya nlongo ya Nzambi, yakemonana puelele ti Yehova kena kundima nge!​—Tala ankadre “ Mbuma ya mpeve kele . . .”

16. Banani Yehova kesadilaka samu na kusamuna nsangu ya mbote, mpe yakena kusala ti nge kukimona yinki mutindu? (1 Batesalonika 2:4)

¹⁶ Yehova kevuandaka na kiese ya kupesa bantu yina yandi kendimaka kisalu ya kutubila bantu yankaka nsangu ya mbote. (Tanga 1 Batesalonika 2:4.) Tala mutindu mpangi mosi ya nketo na nkumbu ya Jocelyn bakaka mambote na kusamuninaka bantu yankaka nsangu ya mbote. Kilumbu mosi, Jocelyn lamukaka na banguilu ya yimbi. Yandi metuba: “Munu vuandaka na ngolo ve mpe munu vuandaka kukimona ti munu vuandaka na mfunu ve, kasi munu vuandaka mpasudi nzila mpe yavuandaka kisalu na munu ya konso kilumbu.  Na yau munu salaka kisambu mpe munu kuendaka na kisalu ya kusamuna.” Na sunka yango Jocelyn kutanaka na Mary, nketo mosi ya kimpombo yina ndimaka kulonguka Biblia. Mua bangonda na manima, Mary tubaka ti yandi vuandaka sambila Nzambi ntangu Jocelyn bulaka na porte na yandi. Na kukanisaka na disolo yango, Jocelyn metuba, “Munu monaka lokola Yehova vuandaka tubila munu, ‘Munu kena kundima nge.’” Ya kedika, muntu nionso ve kendima kuwa nsangu yina beto kesamunaka. Kasi beto lenda kukindimisa ti Yehova kesepelaka ntangu beto kesalaka nionso yina beto lenda samu na kusamunina bantu yankaka nsangu ya mbote.

17. Yinki dilongi beto mebaka na bampova ya vicky na diambu metadila nkudulu? (Nkunga 5:12)

¹⁷ Yehova kesadilaka ntalu ya nkudulu na bantu yina yandi kendimaka. (1 Tm. 2:5, 6) Kasi yinki beto kesala kana ntima na beto kena kumanga kundima ti Nzambi kena kundima beto, ata kana beto kele na kiminu na nkudulu mpe beto mebakaka mbotama? Zaba ti, beto lenda ndimina ve ntangu nionso banguilu na beto, kasi beto lenda ndimina ntangu nionso Yehova. Yandi ketadilaka bantu yina kevuandaka na kiminu na nkudulu lokola bantu ya lunungu na meso na yandi mpe yandi mepesa bau nsilulu ti yandi kesakumuna bau. (Tanga Nkunga 5:12; Bar. 3:26) Kukanisa na mpinda na zulu ya nkudulu sadisaka Vicky. Kilumbu mosi, na manima ya kukanisa na mpinda na zulu ya nkudulu, yandi tubaka: “Yehova monisinaka munu ntima yinda samu na ntangu ya yinda. . . . Kasi, yavuandaka lokola munu vuandaka tubila yandi: ‘Nge lenda zola ve muntu lokola munu. Nkayilu ya Muana na nge lenda fuka ve masumu na munu.’” Na kukanisaka na mpinda na zulu ya dikabu yango ya nkudulu, yandi bandaka kukimona ti Yehova kezolaka yandi. Beto diaka beto kemona ti Yehova kezolaka beto mpe yandi kendimaka beto kana beto kena kukanisa na zulu ya nkudulu.

18. Na yinki diambu beto lenda kukindimisa kana beto kena kutatamana kuzola Tata na beto ya dizulu?

¹⁸ Atako beto lenda sala ngolo samu na kusadila mambu yayi beto melonguka na disolo yayi, na bantangu yankaka beto lenda lemba nzutu mpe beto lenda kukiyuvusa kana Yehova kena kundima beto. Kana diambu ya mutindu yina mekumina nge, kuzimbakana ve ti yandi kendimaka ‘bantu yina ketatamanaka kuzola Yandi.’ (Yak. 1:12) Na yau tatamana kupusana penepene ya Yehova mpe sosa kumona mitindu nionso yina kena kumonisa ti yandi kena kundima nge. Kuzimbakana ve ti Yehova ‘kele ntama ve na konso muntu na kati na beto.’​—Bis. 17:27.